Та ӧвӧл ни авторъёслэн нырысьсэ валче ужам ужзы. 2021-тӥ арын Йӧскалык лыдӟиськонниын Анай кыллэсь калыккуспо нуналзэ пусъён улсын ортчиз соослэн «Удм точка ру» нимо кылбур бичетэнызы тодматскон. 2022-тӥ арын потӥз вал Алексей Коробейниковлэн но Светлана Поторочиналэн «Классики» книгазы. Выляз – «Музон улон = Потусторонний мир» – бичетаз, азьвыл кадь ик, пыртэмын Алексей Коробейниковлэн ӟуч кылын гожтэм кылбуръёсыз но Светлана Поторочиналэн удмурт чуръёсыз.
Светлана Юрьевна Поторочина быдтӥз Удмурт кун университетысь удмурт кылосбуръя факультетэз, элькун ивортодэт ёзэтъёсын журналист но редактор, Эгра ёросысь Чутыр культурая юртысь чеберлыкъя кивалтӥсь луыса ужаз. Студент вакытысеныз литературной творчествоен выре. Солэн ужъёсыз ёрос но элькун газет-журналъёсын печатласькизы. Али «Иднакар» волонтёр издательствоын ужа.
«Иднакар» издательстволэн кивалтӥсез Алексей Владимирович Коробейников элькунын тодмо луиз шаертодонъя но историяя ужъёсыныз, вордскем шаерез гажан мылкыд пыӵатӥсь книгаосыныз. Таин валче шӧдтэк шорысь луиз солэн кылбурет удысэ, лирикае кыстӥськемез. Солэн но Светлана Поторочиналэн «Музон улон = Потусторонний мир» бичетэз пӧрмиз бугыр пӧзись мылкыдэз но матысь муртэн кусыпъёсыз возьматӥсен. Презентация дыръя Алексей Владимирович шараяз, бичетлэн авторъёсыз ог-огзылы синмаськемын.
«Книга гожтэмын эпистолярной жанрен – яратӥсь муртъёслэн ог-огенызы Интернет пыр кусып воземзы сярысь та история, – пусйиз “Музон улон = Потусторонний мир” книгалы беркыл гожтӥсь кылосбур тодосъя кандидат Виктор Леонидович Шибанов. – Эпистола, яке кылбурен вазиськон, – со классика луись кылбур каб. Но таӵе жанрен кык кылын гожтэм издание нырысьсэ печатлаське».
Кылбур бичетлэн йӧспӧртэм нимыз пумысен Алексей Владимирович тазьы шуиз: «Светлана гуртын улэ, со дышемын гурт улонлы, нош мон – городысь. Соин, куке мон со доры гуртэ вуисько яке со мон доры, каре лыктэ, котькудмы сюриськомы йӧспӧртэм – «музон» дуннее. Котькудмылэн кылдэмын ини аслыз гинэ тупась дышем сямъёсыз, ас сямен дуннеез валан но сое дунъян амалэз, соин ми ог-огмылы усьтӥськомы дуннеосмес.
Классической эпистолаосын кадь ик, кудъёсыз узыр пуштросо но пӧртэм стилен гожтэмын луо (философской малпанъёс но сатира, вылӥ стилен но юлтош карыса кадь гожтэм чуръёс), та книгаысь кылбуръёс яратон сярысь гинэ ӧвӧл: текстъёс Родина, политика, кун улонысь югдуръёс сярысь но адямилэн дунлыкез пумысен малпаськонъёсты возьмато.
«Искусствоен вырись мурт – котькыӵе куазен боевой дежурствое потӥсь яке оже мынӥсь солдат выллем, – гожтӥз Светлана Поторочина бичетлэн азькылаз. – Озьы ик милям но – милемлы котьку но лякыт луон сярысь сюлмаськыны кулэ. Кырӟаны, куке лулсэр сӥослэсь но зол кыстӥське. Эктыны, куке лыос висё. Куректонэд вань ке но мыняны. Ми со понна кулэ, ми шоры учкыса, ӝутӥськем мылкыдо кылбурмес лыдӟыса, адямиос утчасалзы но шедьтысалзы шумопотон яратонын но эшъяськонын, сое весяк утьыны тыршысалзы!»
Пумиськон дыръя Светлана Поторочина вераз, кылбуръёс аслыз гинэ гожъяз вал. Нош али, кылысь кылэ меӵак берыктэмъёсыз ӧвӧл ке но, кылбуръёсызлэсь ӟуч кылэ берыктэм вариантъёссэ со ужаз кутэ – али кылбурчи нуэ удмурт кылъя курсъёс. «Милям бичетъёс кык кылын гожтэмын бере, туж каньыл ӵошатыны кылъёсты».
Бичетлэн авторъёсыз, презентациез витьытэк, книгаез калыке вӧлмытӥллям – кылбур марафон радъяллям: вань мылкыд карисьёсты ӧтиллям бичетысь кельшем кылбуръёсты видое гожтыны. Со видеороликъёс ужрад дыръя возьматэмын вал, нош куд-огез марафонэ пыриськемъёс ӝытын но кылбур шара лыдӟизы. Светланалэн «студентъёсыз» но ӝытэ пыриськизы, бичетысь удмурт кылын кылбуръёсты лыдӟыса.
Книга лыдӟисьёс пӧлын Ангелина Ефремовна Решетникова но вал. Со шуиз: «Светлана мыным кузьмаз бичетсэ, мон лобыса кадь сое чалякгес лыдӟыны дорам бертӥ. Вань адямиос, кин уг улы кыӵе ке куронъёсъя гинэ тупатскыса. Светлана сыӵеос пӧлысь – со кылбурчи гинэ ӧвӧл, со трос ужез быдэстэ».
Ӝытлэн крезьгур люкетаз Эгра ёросысь Лия но Дмитрий Лекомцевъёс кырӟазы.
Ужрадлы йылпумъян лэсьтӥз Йӧскалык библиотекалэн директорезлэн воштӥсез Ирина Владимировна Крашенинникова. Со авторъёслы тау кариз таӵе шуныт пумиськон понна, Нимысьтыз тау карыса пусйиз Алексей Владимировичлэсь Йӧскалык библиотекалэн ужаз пыриськемзэ но шуиз, выль кылбур бичет «Книга года на родине П. И. Чайковского» IV улосвылкуспо фестиваль-конкурсэ пыртэмын.
