Евгений Васильевич Самсонов (1925–1989) вордӥськиз Татарской АССР-ысь Бавлы ёросысь Урсыгуртын. 1942-тӥ арын шоръёзо школаез йылпумъяса, Быдӟым Атыкай оже кошкиз. Демобилизация бере школаын дышетӥсьын ужаз, Удмурт госпединститутэз йылпумъяса, Ижевскысь педучилищеын но городысь школаосын дышетӥз, «Нефтяник Удмуртии» газетын корреспондент вал.
1980-тӥ арысен СССР-ысь писательёслэн союззылэн ёзчиез. Дасо книгаос – кылбур, верос но повестьёсын бичетъёс печатлаз. Е. Самсоновлэн тужгес но бадӟымез произведениез – удмурт калыклэн улонэз сярысь роман-трилогия. Нырысетӥ люкетэз – «Льӧльшур палъёс» (1986) куинь повестьлэсь роман, кыкетӥ люкетэз – «Уй пал симфония» (1989) роман. Куинетӥзэ люкетсэ – «Тулыс ӵукна» книгазэ авторлы поттыны ӧз кылды. Писатель 1995-тӥ арын кулэм бере, сое печате дасяз эшез – филология тодосъя доктор, профессор И. В. Тараканов.
Выль книгалэн – «Ӝуа ӝыт пал инльӧль вирен» кык авторъёсыз – писатель но нылыз Светлана Евгеньевна Косарева (Самсонова). С. Е. Косарева та бичетэз люкась луэ. Книгалэн нырысетӥ люкетаз пыризы атаез сярысь тодэ ваёнъёсыз.
Книгалэн кыкетӥ люкетэзлэн но авторъёсыз кык – Евгений Самсонов но солэн фронтын бырем эшез Григорий Чернов. Оже кошкемзылэсь азьвыл кык эшъёс вераськиллям: кин улэпен берытскоз, со ик люкалоз но эшезлэсь кылбуръёссэ поттоз. Е. В. Самсонов сётэм кылзэ быдэстӥз: 1979-тӥ арын Григорий Чернов сярысь тодэ ваёнъёссэ но солэсь кылбуръёссэ «Молот» журналын печатлаз. Та публикация но эшъёслэн ог-огзылы ыстэм гожтэтъёссы, озьы ик Евгений Самсоновлэн аслаз кылбуръёсыз кылдытӥзы «Ӝуа ӝыт пал инльӧль вирен» книгалэсь кыкетӥ люкетсэ.
Презентацие ваньзэсты мылкыд карисьёсты ӧтиськом!
