«Дунневыл меӵкытонъёс» группаез кылдытӥз Виктор Занчаров журналист, удмурт кылэ афоризмъёсты, вакчи кылбуръёсты но мукет визьмо веранъёсты берыктон вылысь. Собере огинлэн ужез паськытаз: ёзчиос кылбуръёс гожъян борды басьтӥськизы. «Дунневыл меӵкытонъёс» группае пыриськисьёс асьсэды кылбурчиосын ниманы уг дырто, соин мукетсэ тупась термин шедьтӥзы: «кылбурась».
Туэ валче ужам ужзылэн емышез – выль книга потӥз. Кылбуръёсты бичетэ люказ огинлэн валтӥсез Виктор Занчаров. Сборниклы азькыл гожтӥз калык писатель Вячеслав Ар-Серги, литературной редакторез луиз кылбурчи но прозаик, «Кенеш» журналысь редактор-стилист Лидия Нянькина. Литературной консультантлэсь ужзэ быдэстӥзы кылбурчиос Татьяна Чернова но Любовь Тихонова.
В. Ар-Сергилэн верамезъя, котькуд адямилэсь удмурт литература удысын ужамзэ ӵошатоно шальы-кирпичен, кудӥзлы луыса кылдэ юрт, мынэ лэсьтӥськон уж. Нош авторъёсыз будэтонын пример карыса со тодаз вайиз Владимир Романов кылбурчиез, кудӥз мыло-кыдо литература устолыклы дышетӥз.
Сборник поттонэз веме каронэн ӵошатӥз Александр Шкляев тодмо критик но литературовед. Сборникез кылдытон ужын валтӥсь мугез – удмурт кылэз утён. «Удмурт кылбурчи удмурт кылын вераськыны кулэ, тужгес но туала вакытэ, куке удмурт кылын вераськисьёслэн лыдзы синэ», – шуиз А. Г. Шкляев.
Удмуртиысь Кун Кенешлэн тӧроезлэн воштӥсез Татьяна Ишматова авторъёсты ӟечкылакуз, пусйиз: «Тӥ нюръяськиськоды чебер удмурт кыл понна, улӥськоды "басьты но лэсьты" девизэн».
Ужрадэ вуэм кылбур бичетлэн авторъёс валче ужамзы сярысь ӝутӥськем мылкыдын веразы. Огин мед возёз литературной кылын гожъяськонэз. Со удмурт кыллэсь чеберзэ валаны юрттэ. Гожъяськон сием потон кадь луиз, шуо «Дунневыл меӵкытонъёс» огинысь ёзчиос. «Удмурт кылтэк пытсаське лулпушкы», – пусйиз одӥгез автор, Леонид Громов. Ужрад йылпумъяськиз Виктор Занчаровлэн кылъёсызъя гожтэм кырӟанэн.
