Евгений Федорович Шумилов – история тодосъя доктор, искусствоведение наукаосъя кандидат, Россиысь Суредасьёслэн союззылэн но Архитекторъёслэн союззылэн ёзчиез, Ижкарлэн дано гражданинэз, дун-чылкыт Сергий Радонежский орденлэн кавалерез, «Михаил Калашников» медален данъямын, Удмуртилэн историезлы сӥзем тодослыко ужъёс но монографиос гожтӥз.
Творчествоезлы сӥзем ӝытын Евгений Федорович тодматоз выленыз – 28-тӥеныз – «Родная Удмуртия: города и люди. Живая история из шумиловской шкатулки» книгаен. Книгаысь радлык кылдытэмын темаез но дырез сузьйыса, бичетэ пыремын историлы но культурологилы сӥзем берло аръёсы эссе жанрын гожтэм ужъёс, соос йӧскалык но кунлык ужпумъёсты усьто, Удмуртиысь городъёслэсь но гуртъёслэсь история но архитектура ласянь аспӧртэмлыксэ возьмато.
- Авторлэн кылыз: «Та эссеос юрттозы тӥледлы шӧдыны Удмуртилэн улэп историезлэсь зэмос драматургизэ но солэн лулчеберетэзлэсь бордаз кыскемзэ. Куинь арлэсь кема соос печатласькизы «Удмурт правдаын» “Из шумиловской шкатулки” рубрикаын. Дасо аръёс ӵоже мон архив документъёсысь сюрсэн выпискаос лэсьтылӥ. Собере соосты радъяй. Эсселэн шорсюлмыз со. Азьвыл книгаосысь ивортодэт уг полэстӥськы. Татын ваньмыз выль: архивысь шедьтосъёс, синйылтэтъёс но огъянъёс.
Е. Ф. Шумилов вералоз выль книгаез бордын ужамез но азьвылъёсыз поттэм 28 ужъёсыз, «вуж» но «выль» Ижкар сярысь но творчествозэ азинтон пумысен миллион планъёсыз сярысь.
Юбилярлэсь вераськемзэ чебертоз «Е. Ф. Шумиловлэн 80 аресэзлы: учыръёсын пачыл пичи шыкыс» адӟытон. Отчы пыртэмын луозы историклэн, шаерчилэн улэмез но тодосын ужамез сярысь публикациос но аслаз книгаосыз.
Пумиськонэз йылпумъялоз «эрико микрофон» – юанъёс сётъян, кенешон но ӟечкылан понна. Авторлэн автографеныз книга басьтыны луоз.
Вань мылкыд карисьёсты ӧтиськом.
Пыронэз дунтэк.
