Презентациез усьтӥз валтӥсь библиотекарь Галина Александровна Сергеева. Со ивортӥз: Йӧскалык лыдӟетъюртысь «Край удмуртский» клублэн ужаны кутскемез дырыcен 40 ар тырмиз. Клуб ужзэ мытӥз 1984-тӥ арын 26-тӥ толшоре. Нырысетӥ пумиськон сӥземын вал удмурт кылбурчилэн но азьветлӥсьлэн Максим Прокопьевич Прокопьевлэн (1884–1919) вордскемез дырысен 100 ар тырмонлы. Со дырысен клубен ортчытэмын 250-лэсь ятыр ужрад, пумиськонъёсы пыриськиз 15 сюрслэсь трос калык. Таиз но пумиськон Максим Прокопьевез буре ваён луиз: 29 январе кылбурчилэн вордскемез дырысен 140 ар тырмиз.
Ӝытэз нуиз литературатодосчи Виктор Леонидович Шибанов. Со шуиз, Михаил Атамановлэсь «Санӥ. Пилемъёс доразы берто» но Ульфат Бадретдиновлэсь «Туннэ – ӵуказелэн кутсконэз» романъёссэс огазея мистика. Одӥгаз паймытӥсь кужым герӟаськемын христианской осконэн, нош мукетаз – язычествоен. «Туннэ – ӵуказелэн кутсконэз» роман гожтэмын магической реализм жанрен. Та ӧрын удмурт литератураын кылдӥзы, В. Шибановлэн пусъемезъя, Вячеслав Ар-Сергилэн «Уй вадьсын – бубылиос» но Олег Четкаревлэн «Пиртэш толэзь» чеберлыко ужъёссы.
Ульфат Бадретдинов романэзлэсь пушсузьетсэ (композицизэ) быгатыса радъя, одӥг гозые пунэ сюжетъёсты. Дыръёсты капчиен вошъяса, мадёсчи возьматэ 1910-тӥ аръёсты, я выже туала вакытэ. Романысь герой Максим Прокопьев быремез бере берытске уртлы но Куара-Лангалы. Та персонажъёс ваньзэ адӟо-валало, адямиослэсь улонзэс эскеро но дунъет сёто. Аспӧртэмлыко амал, кудӥз бадӟым прозалы пайдаё луысал, шуиз В. Шибанов. Та амалэз ачиз ик Ульфат Бадретдинов кутӥз «Вужер пи» пьесаяз. Пусъёно: Прокопьев-уртлэн но Лангалэн вераськон-кенешонъёссы романлэсь философской пуштроссэ усьто. Романлэн нимыз усто, со возьматэ авторлэсь публицистической малпанзэ но удмурт лулчеберетлэн азьлапалэз сярысь сюлэмшугъяськемзэ.
Светлана Арекеева но Любовь Фёдорова литературатодосчиос огкылысь луизы: соос возьмало вал исторической роман. Максим Прокопьевлэн семьяез сярысь бадӟым произведение гожтыны луэ, шуиз Светлана Тимофеевна Арекеева. Кылбурчилэн Евгения кышноез, агай-вынъёсыз, Гавриил но Антон Прокопьевъёс, ужазы дышетӥсь луыса, югдытӥзы калыкез. Любовь Петровна Фёдоровалэн верамезъя, У. Бадретдиновлэн романэз ӝутэ калыклэсь асваланзэ. Та выллем чеберлыко ужъёс мед кылдысалзы Ашальчи Оки но Трофим Борисов сярысь но.
Ульфат Бадретдинов валэктӥз произведение гожтон борды басьтӥськемезлэсь мугзэ. Вордӥськем Алтау гуртаз дышетскыкуз, М. Прокопьев сярысь номыр ӧз поттылэ. Берло ини, дышетсконзэ йылпумъяса, со школаезлэн историезлы сӥзем альбомысь адӟем гожтосэз: «Нырысьсэ школаез 1912-тӥ арын усьтӥз Максим Прокопьевич». Фамилиез но пусъемын ӧй вал, шуиз У. Бадретдинов. Собере ини писатель гуртоосызлэсь удмурт азьветлӥсь сярысь юалляськыны кутскем, пумиськем Нырья палась адямиосын но, соослэсь тодэ ваёнъёссэс гожъям. У. Бадретдинов тау кариз Татарстанысь Кукмор ёросысь Михаил Степановлы М. Прокопьев сярысь гожъям-верамъёсты люкамез понна.
Ӝытэ вуэмын вал Максим Прокопьевлэн аспалысьтыз адями но та дыре Удмуртиысь Красногорск ёросын улӥсь Василий Николаевич Спиридонов. Со шуиз, М. Прокопьев сярысь матысь муртъёс гожъяны ӧз басьтӥське. Нырьялан пӧртэм вераськизы: куд-огез понна со – адямилэсь ю-няньзэ талась мурт вал, мукетыз ушъяз М. Прокопьевлэсь совето власть понна нюръяськемзэ.
Романэ пыртэмын зэмос историос, возьматэмын тодмо адямиослэн улон сюрессы. Куд-ог нимъёсты автор воштытэк сётэ, кылсярысь, автор маде Владимир Котков кылбурчиен луэм маскара учыр сярысь. Валтӥсь геройёсызлэн но прототипъёссы вань. Мон чеберлыко произведение кылдытӥ, шуиз писатель, персонажъёсты но учыръёсты ас сямен валэктыса. Адями ачиз лыдӟиз ке, ачиз тодмалоз, кин луиз прототип соизлы яке таизлы геройлы.
Выль книга потэмын авторской редакциын. Туэ роман печатласькоз «Кенеш» литературной журналын.
