Со – бесерман кылын кыкетӥ книга. Нош нырысетӥез – «Вортча мадьёс» («Ворцинские сказы») (презентациез ортчиз вал 2021-тӥ арын коньывуонэ Йӧскалык лыдӟиськонниын.) – возьматӥз « бесерман гожъяськетлэсь вордскемзэ».
Презентацие лыктэмъёсты ӟечкылаз Удмурт Элькунысь йӧскалык политикая министрлэн воштӥсез Людмила Юрьевна Соковикова: «Выль книга – яратоно выжыкыл, лул-сюлэмлы матын луись книга гинэ ӧвӧл, со – кылэз азинтонын бадӟым вамыш, книгаослы луыса бесерман кыл утемын но луоз, азинскоз но».
Антуан де Сент-Экзюперилэн бесерман кылын тулыспалэ потэм книгаез дунневыл празднике пыриськиз: оштолэзе француз гожъясьчилэн но летчиклэн выжыкыл-мадёсэзлы, кудзэ пичиез но, бадӟымез но яратэ, 80 ар тырмиз.
Книгаен тодматӥз берыктӥсез – бесерман мерлыко но лулчеберет улонэз азинтӥсь, азьветлӥсь Рафаил Минмуллаевич Дюкин. Со вераз, кызьы бесерман кылэ берыктыны малпан кылдӥз, берыктон уж мынӥз, озьы ик пусйиз, «Пичи принцез» поттон сярысь сюлмаськиз Вена университетысь Европейской но компаратив лингвистикая но литературая институтлэн финн-угор ёзэтысьтыз тодос ужась Кристиан Пишлёгер (солы луыса книга печатламын Edition Tintenfaß книгапотонниын).
«Бесерман кыл азинскоз, со кылын пиналъёс вераськизы ке. Нылпиос мед валалозы, вордскем кылынызы верасько но, книгаос но пото шуыса, – пусйиз Р. М. Дюкин. – Соин, Кристиан Пишлёгерлэсь гожтэтсэ басьтыса, мон соку ик берыктон уж борды басьтӥськи. Нырысетӥ главазэ ӝог пӧрмытӥ, нош берлоосыз шуген сётӥськизы. Литературной бесерман кыл ӧвӧл бере, пуштросэзъя тупась кыл шедьтыны шуг луиз. Шугомыса, куштӥсько но вал ужме, нош вис карем бере, шӧдтэк шорысь кулэ валатон сюрыса, мон выльысь берытскисько вал уретэм уже борды».
Кристиан Пишлёгерлэсь ужрадэ лыктэмъёсты ӟечкылан кылзэ лыдӟиз история тодосъя кандидат, Россиысь тодосъёсъя академилэн Урал ёзэтэзлэн Тодос эскеронъя Удмурт федерал центрысьтыз История, кылъя но литературая удмурт институтысь тодосчи, Удмурт Элькунысь бесерман калыклэн обществоезлэн ёзчиез, азьветлӥсь Елена Васильевна Попова: «Мон Рафаиллэн берыктыны быгатэмезлы но кыл шӧдонэзлы котьку оски. Зэмзэ верано ке, стилистика ласянь устолыкез али котькуд адями ас сяменыз дунъялоз. Валтӥсез ужпум – бесерман кылын гожъяськыны но вераськыны. Бесерманъёс вордскем кылынызы лыдӟыны мед быгатозы шуыса, нырысь ик бесерман кылын гожтэм текстъёс кулэ, озьыен – авторъёс но. Соос пӧлын Рафаил Дюкин – кылэз ӟеч шӧдӥсь мурт.
Пусйыны кулэ, бесерман кылэз утьыны но азинтыны книга поттон сяна мукет ужрадъёс но юртто.
- 2022-тӥ арын инвожо толэзе Кун Кенешлэн 41-тӥ сессиысьтыз депутатъёс выль праздник юнматӥзы: табере Удмурт Элькунын 21-тӥ коньывуонэ Бесерман кыллэн но гожъяськетлэн нуналэз пусйиське (кичӧлтӥсез – Кун Кенешлэн тӧроезлэн воштӥсез Т. В. Ишматова).
- «Атай» фондлэн юрттэмез улсын Удмурт Элькунысь Бесерман калыклэн огазеяськонысьтыз азьветлӥсьёс поттӥзы йӧскалык календарь. Та дырозь кык издание потӥз – «Нуналлөд. 2022» но «Нуналлөд. 2023». Таяз арлы календаре пыртэмын, кылсярысь, Балезино каргуртысь чеберлыкъя нылпи школаысь дышетскисьёслэн ужъёссы. Суредъёсынызы адӟытон – «Беҫерман дунне» («Бесермянский мир») – али Йӧскалык библиотекаын ужа. Книгалэн презентациез дыръя покчи суредасьёс мадизы проектэ пыриськемзы сярысь.
- Туэ толшоре «Блог-тур “Малые народы России”» мультимедиа проект улсын потӥз бесерманъёс сярысь нырысетӥ фильм. Проект улонэ пыӵа Лулчеберет кичӧлтонъёсъя президентлэн фондэз юрттэмен. Пыр-почгес проектэн тодматыса, презентациын вераськиз солэн кивалтӥсез Надежда Шоркина.
Бесерман лулчеберет понна пусйымон ужрад ӧз ортчысал Михаил Федотов удмурт кылбурчи сярысь тодэ вайытэк (туэ солэн вордскемез дырысен 65 ар тырме). Со ассэ нырысетӥ бесерман поэт шуиз, аслэсьтыз выжызэ но калыкезлэн улоназ ас интызэ утчан мотив творчествояз валтӥсез луэ. «Малпаны ӧвӧл кулэ, бесерман литература алигес кутскиз шуыса, – оскытӥз презентациын вераськыкуз кылосбур тодосъя кандидат, литературатодосчи Виктор Леонидович Шибанов. – Сое кутскиз Михаил Федотов. Со бесерман кылын кӧня ке кылбур гожтӥз, бесерман этнической группалэн кылдонэзлы сӥзем тодослыко статьяослэн авторзы луэ.
Кылбурчи сярысь тодэ ваиз солэн кышноез, трос ар ӵоже удмурт радио но телевидениын ужам мурт, Анна Васильевна Федотова.
Михаил Федотовлэн кылбуръёсызъя гожтэм кырӟанъёс ӝытын трос пол чузъяськизы. Презентациез кырӟанэн кутскиз Надежда Сидорова (Юн Нади). Кырӟанэзлы крезьгур гожтэм Рафаил Дюкин.
«Пичи принц» книга потӥз пичигес тиражен – 300 экземпляр гинэ (куинез Йӧскалык библоиотекае сетэмын ини). Презентациын вераськыкуз, Йӧскалык библиотекалэн директорезлэн воштӥсез Ирина Владимировна Крашенинникова пусйиз, бесерман кылын книгаен тросэз тунсыкъяськозы, нош авторъёслы ӵектӥз книгалэсь электрон вариантсэ Йӧскалык электрон библиотекае интыяны, озьы лыдӟисьёс сое капчиен шедьтыны быгатозы.
