Ужрадэз нуиз Кедра Митрей нимо Эгра ёросысь шор библиотекаысь ӧнерчи Ольга Александровна Степанова. Творчествоенызы тодматӥзы Алексей Лекомцев, Алексей Данилов, Елизавета Лекомцева, озьы ик ӝытэ пыриськиз тодмо кылбурчи, журналист, Удмурт Элькунысь лулчеберет удысысь дано ужась Татьяна Чернова.
Туэ Ижкарын Алексей Лекомцевлэн «Ку чильпырам гужем саюл?» нырысетӥ кылбур бичетэз потӥз. А. Лекомцев «Удмурт кенеш» но Йӧскалык прессалэн юртэзлэн конкурсазы пыриськыса, кылбурет номинациын вормиз но книгазэ печатланы луонлык басьтӥз.
Ужрадын А. Лекомцев саклык висъяз берыктон удысын тыршемезлы. Сеп гуртысь лулчеберетъя шор юртын ужаса, со пӧртэм творческой проектъёсы пыриське. А. Лекомцевлэн верамезъя, огпол ужрадысен сое синйылтӥз фольклорист, профессор Татьяна Владыкина. Тодосчи солы удмурт кылысь ӟуче калык кырӟанъёсты берыктыны ӵектӥз. Озьы кылбурчи ӟуч кылын ог 50 удмурт кырӟанлэсь текстсэ дасяз. А. Лекомцев пуйиз, Алнаш черкогуртысь «Пичи кизилиос» нылпи ансамбль понна «Розовый компот» но Шаманлэсь (Ярослав Дроновлэсь) «Встанем» кырӟанъёсты удмурт кылын чузъяськытӥз. Алексей Лекомцев яратэ но берыктэ Сергей Есенинэз но.
Алексей Данилов ужа сюрес тупатонъя мастер луыса. Аслэсьтыз творчествозэ но азинтэ: гитара сиосын улӟытэ кылбуръёссэ, куараез арысен аре юнма. А. Данилов 2016-тӥ арын егитъёслэн «Шунды» огазеяськонэнызы радъям «Куарагур» крезьгуро ӵошатсконэ пырыса, «Тон – удмурт шаерлэн сяськаез» кырӟан гожтӥз. Сое быдэстӥз егит кырӟась Валерий Мадазимов. 2016-тӥ арын ик Эгра ёрос библиотека печатлаз А. Даниловлэсь «Своей строкой своей дорогой…Та улонын – мон сюресчи!» кылбур бичетсэ.
Алексей Данилов пыриське «Элькуновидение», «Арлэн кырӟанэз» конкурсъёсы. Кырӟанъёссэ быдэсто Альбина Беспалова, Светлана Тронина, Елизавета Лекомцева но мукет кырӟасьёс. Даслэсь трос кырӟанъёсыз чузъясько «Мынам Удмуртие» радиолэн тулкымъёсаз. 2021-тӥ арын Алексей Дмитриевич пусъемын Кедра Митрей нимо ёрос лулчеберет премиен. Со сюлмысь тау кариз котырысьтыз ӟеч визь-кенеш дэмлась, бурдъясь адямиослы. Ӝытын Алексей Даниловлэсь «Я, лык дорам» кырӟанзэ быдэстӥз егит кырӟась Светлана Тронина.
Елизавета Лекомцева вордскемын Эгра ёросысь Илляпи гуртын. Али улэ Ижкарын. Сцена вылэ пота 5 арескысен. Е. Лекомцевалэн бадӟым вормонэз – «Чеберина» элькун ӵошатсконын 3-тӥ инты но «Дыдыкай» ним басьтон. Нылмурт пыриське удмурт лулчеберетэз азинтонъя «Эктоника» крезьгур проектлэн концертъёсаз но. 2018-тӥ арын кырӟанъя «Элькуновидение» ӵошатсконын быдэстӥз Алексей Даниловен гожтэм «Сяськаяське гербер» кырӟанэз. 2021-тӥ арын Эгра ёрос библиотека Е. Лекомцевалэсь «Кылбур – сюлэм кырӟан» кылбур бичетсэ поттӥз.
Тодмо удмурт кылбурчилэн Татьяна Николаевна Черновалэн «мумы йӧлын пичи вакытэз» ортчемын Эгра ёросысь Зура гуртын. Кык аресозь со татын улӥз, собере семьяез Можга ёросысь Пазял гуртэ кошкиз. Ӝытын Татьяна Николаевна тодаз вайиз, тужгес ческыт перепечен сое куноято вал Зура палан. Т. Н. Чернова сюлмысь тау каре Диана Черновалы, Эгра ёросысь Гондыркуш гуртын (али та гурт – Зура черкогуртлэн одӥгез урамез луэмын) анаезлы Лидия Дмитриевна Черновалы музей усьтэмез понна. Эгра ёрос библиотекалы Т. Н. Чернова кузьмаз «Туривесь» бичетсэ. Татьяна Николаевна шумпотэ: Эгра палан но кылбурет удысын, устолыкын удмуртлыкез азинтӥсь егитъёс вань.
Ужрадэз йылпумъяз Сеп гуртысь лулчеберетъя шор юртысь ансамбль шулдыр кырӟанъёсын но эктонэн.
