Конкурслэн номинациосызлы тупатскыса, адӟытон люкемын тямыс люкетлы («Устоез оформление», «Дышетон но тодос, тодосэз вӧлмытон удысъёсысь устоез издание», «Чеберлыко литература удысысь устоез печатлос», «Нылпиослы но быдэ вуымтэослы чаклам устоез издание», «Шаертодонъя устоез печатлос», «Россиысь калыкъёслэн кылъёсазы печатлам устоез издание», «Библиотекаен дасям устоез печатлос», «Вордӥськем палъёслы сӥзем тужгес но усто книга»), конкурсэ пыриськем книгаос сярысь дасямын валтӥсез ивортодэт: вылкыметэн (обложкаен) туспуктэм, библиографической описание, аннотация.
Туэ та конкурсэ пырем изданиос пӧлын: тодмо гожъясьчиослэн но литературатодосчиослэн (И. С. Тургеневлэн, В. И. Дальлэн, В. Г. Короленколэн, С. А. Есенинлэн, Н. М. Рубцовлэн, В. И. Беловлэн, Д. И. Хармслэн, Е. Д. Айпинлэн, В. Я. Курбатовлэн) улонзылы но творчестволы сӥзем ужъёс; калык сям-йылолъёс но праздникъёс сярысь, Россиысь но Удмуртиысь городъёслэн но гуртъёслэн (Орел, Оренбург, Ярославль, Вологда, Нижний Новгород, Чебоксары но мукет) историзы сярысь мадись книгаос; В. Верещагинлы но С. Юхтарлы, почтовой открыткалы но архитектурной синпелетъёслы сӥзем яркыт буёло альбомъёс но суредъёсын чеберъям печатлосъёс, Петр I сярысь фольклор текстъёсын бичет, нылпиослы выжыкылъёс но мукет ужъёс.
