Е. Ф. Шумилов – история тодосъя доктор, искусствоведение наукаосъя кандидат, Россиысь Суредасьёслэн союззылэн но Архитекторъёслэн союззылэн ёзчиез, Ижкарлэн дано гражданинэз, дун-чылкыт Сергий Радонежский орденлэн кавалерез, «Михаил Калашников» медален данъямын, Удмуртилэн историезлы сӥзем тодослыко статьяос, книгаос но монографиос гожтӥз.
Ужрадэз кутскиз но юбилярез котырес лыдпусэныз ӟечкылаз Йӧскалык лыдӟетъюртлэн директорез Татьяна Владимировна Тенсина. Со Евгений Федоровичлы – Йӧскалык библиотекалэн дано лыдӟисезлы – тау каремзэ вераз, лыдӟетъюртлэн ужрадъёсаз мыло-кыдо пыриськемез понна. Т. В. Тенсина пусйиз, ваньмыз солэн книгаосыз лыдӟисьёс понна тунсыко луо, нош Ижевсклэсь но Удмуртилэсь историзэ дышетонын но эскеронын валтӥсь источник интыын, ваньмыз книгаосыз библиотекалэн фондаз вань, оглюкетэз нош поттэмын библиотекалэн НЭБ ресурсаз но.
Дышем сяме пыриз ини библиотекалэсь кузьым – «Удмуртская правда» газетлэн нырысетӥ полосаеныз скан-коллаж: со пусъемын 19-тӥ инвожое 1943-тӥ арлэсь шуыса (Евгений Федоровичлэн вордскем нуналэз), юбилярлэн фотографиеныз но ««передовицаен», кудӥз сӥземын солэн улонсюресэзлы но тодослыко ужезлы. Евгений Федорович солы туж шумпотӥз но библиотекалы кузьмаз выльзэ – 28-тӥзэ книгазэ. Книгазэ кузьмакуз, солэн вылкыметаз Е. Ф. Шумилов тазьы пусъем : «“Ижевской звезде в галактике Гутенберга” (с. 594) от одного древнего читателя, согретого ее теплом». («Родная Удмуртия: города и люди. Живая история из шумиловской шкатулки» книгаяз 594-тӥ бамын таӵе ик нимын Йӧскалык лыдӟетъюртлы сӥзем статья кутске).
Ӝыт дыръя Евгений Федорович люкаськемъёсты статьяосыныз выль бичетэныз тодматӥз, отчы пыризы история но культурология ӧрын гожтэм эссеосыз. Соос куинь арлэсь кема печатласькизы «Удмуртской правдаын», «Из шумиловской шкатулки» рубрикаын. Соос дасо аръёс ӵоже архивын ужам ужезлэн емышъёсыз. «Мон архивист. Ваньмызлы уг тупа архивын ужан, но ӧраз пырид ке, дугдыны уг луы», – шуиз Евгений Федорович но пусйиз, азьпаллы дасямез трос на, озьыен вань выль творческой планъёс. Ватсаса верано, историк газетаысь колонкалы 112-тӥ статья гожтэ ини, азьпалан эшшо одӥг книга поттыны дасяське.
Евгений Федоровичлы рубрикаез понна тау каремзэ вераз «Удмуртская правда» газетлэн валтӥсь редакторезлэн воштӥсез Владимир Александрович Байметов: «Таӵе проектъёслы луыса, лыдӟись азьын газетлэн кулэлыкез будэ».
Юбилярез ӟечкылаз тодмо краевед но туспуктӥсь Сергей Николаевич Селивановский. Со пусйиз, Евгений Федорович дышетӥсь луиз тросэзлы шаертодонэн вырись тодосчиослы, адӟем карымон солэн ужаны яратэмез, сюлмо луэмез но алдаськонлы пумит султэмез.
1998-тӥ арысен Е. Ф. Шумилов Россиысь историк-архивистъёслэн Удмурт ёзэтэзлэн президиумезлэн ёзчиез луэ, нош 2014-тӥ арысен солэн Ижысь ёзэтэныз кивалтэ. Та огазеяськонлэн ёзчиосыз но, бадӟым коллективен люкаськыса, юбилярез ӟечкыланы лыктӥзы.
Ужрадын вераськисьёс пӧлын вал гожъясьчи но шаерчи Сергей Алексеевич Жилин, Марина Анатольевна Милюкова, «МарШак» книгапоттоннилэн кивалтӥсез – татын печатламын «Родная Удмуртия: города и люди» книга (со кык пӧртэм вылкыметэн потӥз – лыдӟись ачиз бырйыны быгатоз, кудӥз солы кулэ), Удмурт Элькунысь Суредасьёслэн союззылэн ёзчиез Константин Феликсович Резницкий но мукет.
Ӟечкыланъёс бере пумиськон эрико микрофон амалэн мынӥз, но вань мылкыд карисьёс юбилярлы соослы тунсыко луись юанъёс сётъязы. Кылсярысь, юалляськизы Евгений Фёдоровичлэн улоназ бадӟым инты басьтэм адямиос, семьяез но репрессиос улэ сюрем песятаез сярысь, куд-ог исторической учыръёс сярысь малпанъёсты вераны куризы. Ӝыт пумын выль книга басьтыны но авторлэсь кинюртэмзэ курыны луиз.
Ужрад дыръя куноос тодматскизы Йӧскалык литературая но библиографияя центрлэн фондысьтыз книгаосыныз адӟытонэн – «Шкатулка, полная историй: к юбилею Е. Ф. Шумилова». Отын возьматэмын вал аслаз историклэн ужъёсыз («История Ижевска: краткий очерк»; «Трудфронт: героические дела и повседневная жизнь кузницы оружия на Иже»; «Город на Иже»; «Город оружейников. 1807–1917. Два века “Ижмаша”» но мукет), солэн улонэз но тодос ужез сярысь публикациос (И. Васильевлэн «Простой почетный гражданин»; А. Иртеньевлэн «Хомо Ижевикус: от Дерябина до Сивкова», «Летописец»; С. Княжинлэн «Ижевские краеведы и профессор Е. Ф. Шумилов как классик краеведения для нашего города»; Н. Прокопьевлэн «Певец “села Ижева”» но мукет).
