Книга потӥз кылем арын А. М. Горький нимо Литературной институтлэн издательствояз («Библиотека Дома национальных литератур» сериын). Та сярысь милям вотэсбамамы ивор сётыку, ми чидатэк витимы куное книгаез люкасьсэ но солэсь авторзэ – Литинститутысь кылысь кылэ берыктонъя семинарлэсь кивалтӥсьсэ Вера Григорьевна Пантелееваез. Соин библиотека кема дыр ӵоже эшъяське ни.
Презентацие лыктэмъёслы шуд усёз – соос пумиськозы на Литинститутлэн ректореныз, писателен Алексей Николаевич Варламовен, Выль антологилэн огъя редакциез но – А. Н. Варламовлэн.
Книгаез кылдытӥсьлэн азькылысьтыз оглюкетэз:
- «“Современный удмуртский рассказ” антологие пыртэмын 20 гожъясьчилэн 40 чеберлыко ужез <...>Книгаез люкыны луоз куинь люкетлы – куинь вакытысь веросъёслы: совето вакытысь, совето вакыт бере но туала дырысь. Нырысетӥ люкетысь авторъёс – война дыръя вордскемъёс (Г. Красильников, С. Самсонов, Р. Валишин, Е. Загребин) – йӧскалык литературалэн историысьтыз классикъёс луизы. <...>
Кык вакытъёс вискысь гожъясьчиос – XX даурлэсь пумзэ – XXI даурлэсь кутсконзэ возьматӥсь авторъёс, кудъёссы творчествоязы мерлыкын но лулчеберетын воштӥськонъёслэсь тужгес но адӟымон палъёссэ пусъё (Никвлад Самсонов, О. Четкарев, У. Бадретдинов, В. Ар-Серги, Л. Нянькина, Э. Батуев). <...>
«Егитъёс» (В. Шибан, С. Матвеев, Л. Малых, Е. Миннигараева, Л. Марданова, Г. Савина, М. Векшина, Дарали Лели, Е. Сараматова) – туала литературной процессысь пӧртэм арлыдо писательёс. <...>
Та книга – удмурт прозаен нырысетӥ антология, кудӥз совето вакыт ортчем бере, федерал книгапотонниын печатламын. Со дасямын А. М. Горький нимо Литературной институтысь «Йӧскалык литератураослэн юртсы» тодосъя но дышетонъя, лулчеберетъя но югдытонъя центрлэн киӵолтэмезлы но юрттэмезлы луыса. Пусйытэк уг луы, авторъёс пӧлын – Литературной институтэз яке Вылӥ литературной курсъёсты быдтэм муртъёс (Г. Красильников, С. Самсонов, Никвлад Самсонов, В. Ар-Серги, Л. Нянькина, В. Пантелеева, Л. Марданова), нош ӝыныезлэсь троссэ веросъёсты берыктӥзы Литературной институтысь удмурт кылысь берыктонъя семинарын дышетскись студентъёс».
Пумиськон ортчоз библиотекалэн конференц-залаз.
Ӧтиськом вань мылкыд карисьёсты.
Пыронэз дунтэк.
