Пумиськонэз усьтӥз «Кенеш» журналлэн валтӥсь редакторез Анастасия Шумилова. Со шумпотэмзэ вераз, удмурт кылын произведениос кылдо но тросэз ӵапак «Кенеш» журналын дуннеез адӟо. Тунсыко луысал тодыны, мар меда малпало лыдӟисьёс выль удмурт чеберлыко литература сярысь. Соин журналлэн редакциез Йӧскалык лыдӟетъюртэн валче М. Г. Атамановлэн – «Санӥ. Пилемъёс доразы берто...» романэзлы сӥзем ужрад ортчытыны кариськиз.
Пумиськонын выль чеберлыко произведение пумысен вераськизы Удмурт кун университетлэн Удмурт кылосбуръя, финно-угроведениея, журналистикая институтысьтыз дышетӥсьёс, тодосчиос Любовь Федорова, Галина Шушакова, Александр Шкляев, Татьяна Зайцева; Историяя, кылъя но литературая удмурт институтысь тодосчи Виктор Шибанов. Авторлы таукарон кылъёс веразы Ижысь, Можгалась но ёросъёсысь вуэм куноос: М. Г. Атамановлэн улосчиосыз – Грак ёрослэн дано кунмуртэз Михаил Крестьянинов но дышетӥсь Виктор Крестьянинов, радиожурналист Раиса Куликова, кылосбур тодосъя кандидат Татьяна Кибардина, Пичи Пурга ёрос библиотекаысь ӧнерчи Людмила Шумилова, Александро-Невской соборысь протоиерей Павел Григорьев.
Михаил Гаврилович Атаманов вераськонзэ кутскиз толсур пумын улонысь кошкем кылосбур тодосъя докторез, профессорез Валентин Кельмакович Кельмаковез буре вайыса. «Удмурт кун пединститутысь кылосбур факультетлэн удмурт ёзэтаз дышетскыкум, 53 ар талэсь азьло мон Валентин Кельмаковичлы экзамен сётӥ вал. Со быръем удысам дышетӥсе», – дано удмурт тодосчиез шунытэн тодаз вайиз М. Г. Атаманов.
Вераськонзэ азьланьтыса, писатель шара лыдӟиз романзэ йылпумъясь «Даур ортчиз, кадыр быриз…» люкетэз. Татын верамын валтӥсь героинялэн Санӥлэн каньылэн кулэмез, гурт калыклэн но ӵыжы-выжыосызлэн сое берпуметӥ сюресаз келямзы сярысь.
Анастасия Шумилова ужрадэ лыктэмъёслы возьматӥз выль романлэсь ньыль тетраде гожтэм рукописьсэ. Собере кыл сётэмын вал литературатодосчилы Любовь Петровна Федоровалы. Тодосчи шуиз, романэз дунъян понна, сое трос пол лыдӟоно; дунъяно, мар выльзэ вае та уж, мар выльзэ вера автор. Л. П. Федорова вераз произведение пумысен кылдэм малпанъёссэ.
Романысь действие мынэ 120 ар ӵоже, гуртэз пӧртэм исторической вакытэ возьматэ, нош сюжет азинске Санӥлэсь улон-вылонзэ суредаса. Трос шуг-секыт пыр ортчоно луиз Санӥлы, озьы солэн Инмарлы осконэз юнмаз. Совето удмурт литератураысь геройёс палэнскизы религилэсь, нош Михаил Атамановлэн романэз огшоры нылкышнолэсь Инмар доре сюрессэ возьматӥсь нырысетӥез чеберлыко произведение луэ.
Л. П. Федорова тодаз вайиз писательлэсь «Кылё тодэм калыкъёс» очеркъёсын бичетсэ. Та бичетысь котькудӥз герой сярысь роман гожтыны луоз, шуиз тодосчи. Санӥлы ассэ ачиз валаны юрттӥз Мария матушкалэн визь-кенешез но Коми шаерын ссылкаын улэмез. Кулаклэн нылыз шуыса, калыклэсь висъяськемзэ Санӥ котьку тодаз возиз.
Кызьы вера Л. П. Федорова, азьвыл вылӥе ӝутӥзы колхоз кылдытӥсь куанеръёсты. Нош али кулакъёс сярысь вераны лэзизы. Кулаке поттэм адямиослы сӥзем документальной очеркъёс но тодэ ваёнъёс печатласькизы «Удмурт дунне» газетын но. М. Г. Атамановлэн романаз колхоз кылдытӥсьёс шеко адямиос шуыса возьматэмын. Но колхоз уж кызьы ке азинскиз ук... 2023-тӥ арын Михаил Атамановлэн романэныз ӵош «Кенеш» журналын печатласькиз Лия Малыхлэн «Усьты синъёстэ» романэз. Лия Малых ӟечен возьматӥз удмурт гуртысь калыкез – узыръёсты но, куанеръёсты но. Озьыен, пӧлазы пӧртэм сямо но быгатонлыкъёсын адямиос вал.
Малы меда романысь героиня Санӥ шуыса нимамын? – юаз тодосчи. Кызьы тодмо, Игнатий Гаврилов гожтӥз «Санӥ» поэмаез (печатламын нырысьсэ «Молот» журналын 1939-тӥ арын). Та кык героиняос характерзыя антиподъёс луо. Романысь Санӥ калыклы пыриськыса, соин тупаса улонзэ ортчытэ, нош поэмаысь героиня бугыръяськыны дась.
Кылосбур тодосъя кандидатлэн, фольклористлэн Галина Николаевна Шушаковалэн верамезъя, Михаил Атамановлэн выль романаз азьвыл ужам бервылэз шӧдӥське – авторлэсь кылчи, историк, этнограф луэмзэ валано, озьы ик со христиан осконэз калык пӧлы вӧлмытӥсь, тодэ ваёнъёс гожъясь но. Галина Николаевна пусйиз, Мария матушка – туж зол образ. Укмыс аресъем Санӥлы пумиськиз оскись адями. Мария матушкалэн визь-кенешъёсыз юртто нылкышнолы улонтӥ йыг-йыг вамышъяны.
Повествованиын туж бадӟым инты басьтэ калык кырӟан. Романэ пыртэмын черкын чирдонтэм кырӟанъёс но. Кырӟан-молитва юрттэ шуг-секытэз потыны, кырӟан огазея удмуртъёсты. Авторен кылдытэмын яркытэсь этнографической суредъёс – сюан, сялтыман нергеос но мукет. Та романэз ӟуч кылэ берыктыны умой луысал, ӟуч кылын лыдӟисьёс удмурт калыклэн сям-йылолъёсыныз но гуртлэн улэменыз мургес тодматскыны быгатозы.
Литературатодосчи но критик В. Л. Шибанов вераськиз выль произведениелэн жанрез пумысь. Со романэз лыдӟыны кутскем вылэм эпопея шуыса. Но лыдӟемезъя малпанэ вуиз: произведение сюжетэзъя матын житие жанрлы. Романысь геройёс люкисько урод но умой персонажъёслы. Анай-атайёс котьку чылкытэсь – ӟуч литератураын со жанрлэн куронэз луэ. Героинялэн Коми шаере вуылэмез тупа житиеысь пустыняе мынонлы. Мария матушкалэн образэз кулэ, мадён ӧре чудо валатон пыртон понна. Паймымон ӧвӧл шат романысь Мария матушкалэн пытсэтэ сюрем Кузебай Гердэн пумиськемез. Но, кызьы вера В. Л. Шибанов, автор ачиз быръе, кызьы аслэсьтыз ужзэ жанр ласянь пусйыны. Пример интые тодаз ваиз удмурт литератураысь Сергей Матвеевлэсь «Чорыглэсь лушкам кылбуранъёс» произведениезэ: со авторен пусъемын роман-уйбыртон шуыса.
Кылосбур тодосъя кандидат, Удмуртиысь калык писатель Александр Григорьевич Шкляев азьланьтӥз жанр пумысен вераськонэз. Произведение пуштросэзъя но, кабезъя но удмурт: отын возьматэмын калык сямъёс, кутэмын удмурт вераськетъёсысь кылъёс, инты нимъёс. А. Г. Шкляев но В. Л. Шибановен соглаш, таиз роман азинтэ удмурт литератураысь житийной традициез. Произведениеысь куд-ог интыосыз верослы но тупало. Умой луысал возьматыны, шуиз тодосчи, эшшо одӥг сӥзэ: кылсярысь, кызьы коллективизиция вакытэ идеология васькиз калык доры. Мадён ӧре пыртыны кулэ вал эшшо одӥгзэ ваньзэ тодӥсь повествователез, кудӥз ӵемысь эпопеяын луэ. Но соку пазьгиськысал романлэн житиелы тупась структураез, пусйиз А. Г. Шкляев.
Михаил Гаврилович Атаманов куд-ог вератэк кельтэм сюжетъёс сярысь кылпум ӝутӥз. Кылсярысь, романын возьматэмын йылол: калык Арчакарысь ваем куншетэз данъя но Кузон усён гурез быдэстэ. Со сяна, М. Г. Атаманов пусйиз романысь вставной эпизодъёсты: бигер ныллэн Бибигульлэн шудтэм яратонэз сэрен быремез, озьы ик Сибыре уллям Малань сярысь история.
Критик, литературатодосчи Татьяна Ивановна Зайцева пусйиз, удмурт куншетэз данъян сярысь мадёс мукетъёсыз сюжетъёс пӧлы ыше. Улонысь зэмос учыръёс вылын кылдытэм романысь эпизодъёс туж тунсыко пӧрмиллям. Картсэ предатель каременызы йырин Сибыре ыстэм Маланьлэн монологез но зол. Т. И. Зайцевалэн верамезъя, романысь геройлэсь характерзэ мургес усьтыны луэ на вал.
Кема аръёс ӵоже радиоын ужам журналист Раиса Семеновна Куликова шуиз: «Роман гожтэмын чебер узыр кылын. Одӥг но нокытчы могӟонэз ӧвӧл, кыл уг люкеты лыдӟыны. Котькуд бамаз сноска – вужмыны кутскем кылъёс пусъемын. Соослэн пуштроссы вужмемын ӧвӧл, но общественной улонын ӧжыт кутӥсько». Раиса Семеновна оскыса вераз, вуозы визьмо егитъёс – литератураез азинтӥсьёс, со чебер кылэз асьсэлы басьтозы, пушказы пыӵатозы.
М. Г. Атамановлэн аспалъёсыз – Виктор Селиверстович Крестьянинов но Михаил Арсентьевич Крестьянинов тодмаса лыдӟиллям гурт но адями нимъёсты, улонысь учыръёсты, кылсярысь, бигер ныллэн Менделеевскысь тулыс ву кошкыку коласькыса бертыса кулэмез. «Ми Грах ёрос, элькунлэн анклавез сямен улӥськом. Калыкын удмурт кылэз возё на ай. Тодӥсько, ми палан Кузон усён гурез кырӟало вал. Писательмы Леонид Кривошеев тунсыко книгаос поттэ», – шуиз Виктор Селиверстович. Грак ёрослэн дано муртэз Михаил Арсентьевич Крестьянинов М. Г. Атамановлэн кутэм пиез луэ. Со данъяськыса вераз киросатайзэ гажамез но солэсь вань ужъёссэ лыдӟыса потэмез сярысь.
Михаил Гаврилович Атамановлэн «Санӥ. Пилемъёс доразы берто...» роман-эпопеяез сярысь вераськон тунсыко пӧрмиз. Со сярысь пыр-почгес лыдӟыны луоз «Кенеш» журналысь.
