Валентин Белых (1952) – элькунысьтымы искусство удысысь дано ужась, реализм амалэн суредась, график. Презентация дыръя со пусйиз: авторлы одно ик шедьтоно аслэсьтыз темазэ, ужъёссэ ӟеч мед тодмалозы шуыса.
«Данъяськон понна ӧвӧл та, – шуэ Валентин Белых, – со возьматэ пыр-поч тунсыкъяськемез… Аполлинарий Васнецовлэн шор даурысь Мусколы сӥзем суредъёсыз монэ бурдъязы но малпаськи: малы бон уд суреда Удмуртиысь вашкала юртъёсты но.
Автор вера, 2010-тӥ арысен со кутскиз эскизъёс кылдытыны. Пейзажъёс учкисьлэн сюлмаз пыӵазы. «Суредъёсын улӟытэм вашкала история калыклы туж тунсыко потэ», – шуэ Валентин Белых.
«Панорама Воткинского завода» (2015) картинаын суредамын XX даурлэн кутсконысьтыз верфь. Картина милемлы Вотка карын корабльёс лэсьтонлэн дауръем историез сярысь маде. Татысь завод Граждан ож вакытозь лэсьтӥз ог 400 судно, поттэмын вал пассажиръёсты нуллон корабльёс, шхунаос, баркасъёс но мукет пыжъёс.
Пичи гинэ Сарапул тодмо луиз монастыръёсыныз но трос черкъёсыныз. «Сарапулысь даслэсь трос зарни куполъёсын черкъёссы но кык монастырь кыдёкысен адӟиськылӥзы Кам шур кузя мынӥсь-ветлӥсьёслы», – гожтэ Сергей Жилин «Красота уходящая» книгаын. Та малпан юнматэмын Валентин Белыхлэн суредъёсыныз: пӧлазы – «Город Сарапул и река Кама», «Центральная часть города Сарапула. Вид с Камы», «Вид со Старцевой горы. Город Сарапул» но мукет ужъёс.
Сарапулын Валентин Белых куинь ар ӵоже улӥз, городысь театрын валтӥсь суредасьын ужаз. Та вакытэ карлэсь вашкала архитектуразэ синйылтӥз но синмаськиз солы. Пусйиз нылкышно гимназилэсь юртсэ (проектсэ кылдытӥз тодмо архитектор Иван Чарушин) но революция бере ворсам нылкышно монастырьлэсь музъемъёссэ. «Художник понна Сарапулын но Воткинскын тунсыко интыос но юртъёс трос», – вера Валентин Белых.
Сарапулын улыкуз, художник суреда вылэм ульчаосты, наличникъёсты, кылчинъёсын но вензельёсын чеберъям ву кошкон трубаосты, муръёослэсь колпакъёссэс. Ваньмыз со сюлэме пыӵа, пушкы люкаське но творческой мылкыдэз ӧръя, эрике куриське чеберлыко произведение кылдытон пыр.
Выль книгалэн концепциез малпамын ар талэсь азьло. Архивысь сьӧдо-тӧдьыё туспуктэмъёсын артэ альбоме автор интыяз трос буёло картинаос. Архивысь фото – со документ гинэ, нош картинаез адӟыса, пушкысь мылкыд бугырске, шуэ художник.
Люкаськемъёслы Валентин Белых мадиз исторической живопись борды басьтӥськемез сярысь но. Со нырысетӥез луэ суредасьёс пӧлысь, кин басьтӥськиз удмурт калыклэсь вашкалазэ улӟытыны. Нырысь вамышъёс лэсьтӥз сценография удысын ужакуз. Декорациос кылдытӥз вашкала удмуртъёс сярысь постановкаослы (Евгения Копысовалэн «Сказка о богатыре Эйдаре, красавице Айно и злом волшебнике Уйпери» (1986) операезлы, Петр Захаровлэн пьесаезъя пуктэм «Эбга» (1992) спектакльлы но мукет). Собере Валентин Белых ужаз «Тень Алангасара» (1994) кинофильм бордын, кылдытӥз «Эхо древних удмуртов» (1993–1994) картинаослэсь серия но «Удмурт батыръёс = Удмуртские батыры» (2008) графикая альбом, кудӥз печатламын «Удмуртия» книгапотонниын.
«Красота уходящая» (2024) выль альбом азьланьтэ Валентин Белыхлэн творчествояз историлы сӥзем ӧрез. Таяз ужын со усьтӥське шаерчи сямен, элькунысьтымы вашкала архитектураез возьматэ. Книга озьы ик поттэмын «Удмуртия» издательствоын, спонсор юрттэтэн. Йӧскалык лыдӟетъюртын авторез выль книгазэ поттэменыз ӟечкылазы библиотекамылэн директорез Т. В. Тенсина, «Удмуртия» издательстволэн кивалтӥсез Ю. В. Кузнецов но валтӥсь редакторез Г. Г. Грязев, искусствовед, Удмурт кун университетысь преподаватель Е. И. Ковычева но ужрадэ вуэм мукет куноос.
