Андрей Александрович Клементьев – кылосбур тодосъя кандидат, кылысь кылэ берыктӥсь но дышетӥсь, журналист, «Вордскем кыл» журналлэн валтӥсь редакторез. Трос аръёс ӵоже Тодон-валан сётон удысын ужасьёслэсь быгатонлыксэс будэтонъя но выльдонъя институтын ужаз.
А. А. Клементьев вордскемын 1980-тӥ арын Эгра ёросысь Сундур гуртын. Эгра каргуртысь 1-тӥ шоръёзо школаез йылпумъяса, дышетскиз удмурт кылосбуръя факультетын. Со тодаз вае пичи дырысеныз литературае кыстӥськемзэ. Ми, – шуэ со ас ёзъёсыз сярысь, – трос лыдӟиськыса будӥмы. Школаын нырысетӥ классысен ӟеч дышетӥмы удмурт кылэз но литератураез. Та предметъёсъя часъёс трос вал, туала вакытысь югдурен ӵошатыса. Вордскем кыл – одно ик дышетоно предмет чотын вал – солы пумитъяськон сярысь ӧм малпаське.
Школаын но университетын дышетскем вакытэз сярысь Андрей Клементьев тунсыко вера. – Бадӟым классъёсын ми эшеным Татьяна Ившинаен роман гожтыны малпамы. Ӵошатскыса гожъямы – кин чальгес сое быдэстоз. Школаез йылпумъяса, вераським дась ужез сётыны Эгра ёросысь «Светлый путь» газетэ. Озьы ик каримы – кыкнамы ик «романъёсмес» ыстӥмы редакцие но… соосты печатлазы. Гожтэм ужме – солэн нимыз «Усьтӥськымтэ сяська» – роман шуыны уг луы, берло «Ӟечбур!» газетын сое зол тупатъяса печатлазы, жанрзэ пусйизы верос шуыса. Нош Татьяна Ившина – табере ёрос газетлэн валтӥсь редакторез луыса ужа ни.
Озьыен, та литературной ужзы Татьянаез но, Андреез но – вуоно профессиенызы герӟаз, журналистика но лулчеберет удысэ кыскиз. Возьматӥз трос лыдӟиськемзэс. – Ми ӧм гожъяськысалмы, – шуэ Андрей Александрович, – трос лыдӟиськеммы ке ӧй луысал. Бадӟымесь произведениосты быдэссэ лыдӟимы. Анай-атае но книгаен эшъяськизы. Тодам ваисько, анай Игнатий Гавриловлэсь «Вордӥськем палъёсын» романзэ ӝажыяз возе вал.
Удмурт кылосбуръя факультетын дышетскыкуз, Андрей Клементьев литературной кружокъёсы пыриськиз. Кылбуръёсыз печатласькизы удмурт кылосбуръя факультетысь студентъёслэн ужъёсынызы «Вуюись» (Ижкар, 2003) альманахын.
Дышетскыкуз удмурт фольклорен тунсыкъяськиз. Университетысь дышетӥсьёс – удмурт фольклоръя – Галина Николаевна Шушакова но ӟуч фольклоръя – Элеонора Алексеевна Тамаркина – калык кылослы яратон пыӵатӥзы.
Зӧк тетрадьёсы быдэс ар ӵоже со материал люказ. Сундур гуртысь гинэ ведӥнъёс сярысь ог 50 мифологической быличка гожтӥз. – Удмурт традиционной культураын улӥсь мифологической дунневаланэз возись песянайёс, кудъёсызлэсь мон фольклор гожъяй, улонысь кошкемын ни, – жаляса вера А. Клементьев. – Нош нылпиоссы чылкак мукетэсь, калык кылосэз уг тодо.
Гурт калыклэн ишанъёслы оскемез луиз А. Клементьев понна кылбур гожтыны муг. Андрей Александровичлэн верамезъя, солэсь песянайзэ гуртын ведӥн шуиллям. Туспуктэмзэ шайвылэ но согемзы, пе, вань. Гуртоосызлы Поля песянаезлэн зол йыркуръяськемез сярысь гожтэмын «Тӥ сямен уз луы» кылбурын. Та ужзэ лыдӟыны луоз «Туала удмурт поэзия» (2020) антологиысь.
Андрей Клементьевлэсь «Толсуре ӝужам роза» вероссэ финн кылэ берыктыса, Joulukuussa puhjennut ruusu нимын поттӥз финн кылчи, гожъясьчи Эса-Юсси Салминен, финн кылэ берыктэм удмурт веросъёсын Murskautuneet tähdet (2020) антологияяз.
Али Андрей Александрович Клементьев трос кужымзэ сётэ удмурт кылэз но литератураез дышетонын методической юрттэтъёс дасянлы. Со удмурт литературая но сое дышетонъя сюлэсь трос статьяослэн авторзы луэ. Озьы ик дышетӥсь луыса ужа – колледжын удмурт литературая занятиос нуэ. Ассэ кылбурчиен нимамез уг поты ке но, чеберлыко литература удысын кылдытэм ужъёсыз но тунсыкоесь.
