Дышетскемезъя врач, Акилина Григорьевна Векшина удмурт литературалэн историяз нырысетӥ удмурт нылкышно-кылбурчи луыса пыриз. «Со – нырысетӥ удмурт кылбурчи. Удмурт нылкышно кылбуретэз кутскемез понна гинэ ӧвӧл, со нырысетӥ ик вань. Кулэлыкезъя но кылбуретэзлэн чузъяськемезъя», – гожтӥз этнограф В. Е. Владыкин «Йыбырскон» (1992) эссеосын книгаяз.
- Поэтессалэн псевдонимез – Ашальчи Оки – одӥг гинэ ӧвӧл. Озьы ик со гожъяз Эльдыш но Юкаменъёс ним басьтыса. Тодмо, Кузебай Герд Лина Григорьевналы дэмлаз вал Акилина Зор кушемним басьтыны, нош со бырйиз возьвылын будӥсь ашальчи турынлэсь нимзэ. Кушемнимызлэн кыкетӥ люкетэз – Оки: семьяяз солы тазьы вазисько вылэм.
Ашальчи Оки вордӥськиз 1898-тӥ арын 16-тӥ оштолэзе (вуж стилья – 4-тӥ оштолэзе) туала Грак ёросэ пырись Ускы гуртын. Карлыганысь (Марий Эл Республикае али пыре) Центральной вотской школаез быдтӥз. 1919-тӥ аре рабфаке пыриз, собере Кузон университетысь медицинской факультетсэ йылпумъяз. 1928-тӥ арын Юкаменское черкогуртын эмчи луыса ужаны кутскиз. 1932-тӥ арын Алнаше ужаны лыктӥз. Тодмо офтальмолог В. П. Филатов дорын стажировказэ ортчиз. Трахома висёнэз эмъянын усто тыршемез понна солы сётӥзы «Удмурт АССР-ысь дано врач» ним. 1930-тӥ аръёсы Ашальчи Оки, репрессиос улэ сюрыса, юнме пытсэтэ пуктэмын вал, собере кылбурамысь дугдӥз. Быдӟым Атыкай ож дыръя фронтын хирург вал. 1946-тӥ арын берытскыса, Алнаш ёросысь эмъяськонниын пенсие потытозяз ужаз. Улонысь кошкиз 1973-тӥ арын 31-тӥ коньывуонэ. 1994-тӥ арысен Вань удмуртъёслэн «Удмурт кенеш» огазеяськонзы Ашальчи Оки нимо Йӧскалык премиен пусъе адӟем карымон луись нылкышноосты.
Ашальчи Оки кылбуръёс гинэ ӧз, статьяос, очеркъёс, нылпиослы веросъёс но гожъяз. Нырысетӥосыз солэн публикациосыз потыны кутскизы 1918-тӥ арын, «Виль син» но «Гудыри» газетъёсын. Калык пӧлын со тужгес но тодмо луиз кылбурчи сямен, 37 кылбур гинэ гожтӥз ке но. Тужгес но тодмо луэм кылбуръёсыз – «Сюрес дурын», «Возьытлык», «Тон юад мынэсьтым». 1925-тӥ арын Кузебай Гердлы луыса Мускоын 2000 экземплярен потӥз солэн «Сюрес дурын» бичетэз. Книгае пыриз 36 кылбур но послесловие, кудӥз гожтэмын Кузебай Гердэн, Иосиф Наговицынэн, Трофим Борисовен но Александр Медведевен. 1928-тӥ арын Ашальчи Оки берпуметӥ – «Кылы быре» нимо – кылбурзэ гожтэ. Со арын ик Ашальчи Окилэн Глазкарын Кузебай Гердэн ӟуч кылэ берыктэм «О чем поет вотячка» бичетэз потӥз.
Лирической героинялэн – дӥсьтӥсьтэм, возьдаськись нылмуртлэн куараеныз Ашальчи Оки аслаз кылбуръёсаз вераське яратон но кылбурет сярысь, вордскем шаер но выль улонэ кыстӥськон, азьлапал нуналлы оскон сярысь. Кылбурчилэсь творчествозэ эскерыса, З. А. Богомолова тодосчи пусйиз: «Дуннеез шӧдэмезъя лирик, Ашальчи Оки возьматӥз нылкышно кылбуретлэсь чеберлыксэ, кудӥз, вуж сямен улон куашкам бере, кема изьыса сайкам сямен, улонлэсь выль чеберлыксэ адӟиз, выль сямен кусып кылдытон амалъёсты тодӥз. Озьыен, Ашальчи Окилэн кылбуретэз «лушкемлыко но шыпыт» луыса но, возьматӥз нылкышнолэсь выль асваланэзлэсь кылдэмзэ» (Голоса эпохи. 2003. С. 101).
1956-тӥ арын писатель юлтошъёсызлэн куремзыя Ашальчи Оки литературае берытскыны кариське. Со кылбур утчаса гожъя, но куштӥське солэсь, вакытлы тупасьтэмен лыдъяса. Пичи веросъёс гожъя. Тунсыкоесь солэн «Мынам абие», «Боко», «Миквор кышнолэн гур бераз» веросъёсыз. Соосты но мукетъёссэ лыдӟыны луоз «Та буртчин чуръёсыд = Эти шелковые строчки» (люказы М. Петрова но Л. Нянькина, 2009) бичетысь. Книгае пыртэмын А. Г. Векшиналэн пиезлэн В. И. Карачёвлэн, мукет ӵыжы-выжыосызлэн, писательёслэн но ӵош ужам эшъёсызлэн тодэ ваёнъёссы.
Кыкетӥез Ашальчи Окилэн кылбур бичетэз – «Мон тодам ваисько» – 1968-тӥ арын гинэ потэ. Сое люказ но азькыл гожтӥз кылбурчи но литературатодосчи П. К. Поздеев. 10 ар ортчыса, кылбурчи кулэм бере, П. К. Поздеев поттэ критикен А. А. Ермолаевен валче «Тон юад мынэсьтым» книга. Отчы пыртэмын Ашальчи Окилэн кылбуръёсыз, 16 веросэз, выжыкыл но кылбурчилэн А. Н. Клабуковлы, Г. Д. Красильниковлы но мукет удмурт писательёслы гожтэтъёсыз. Ашальчи Окилэн удмурт кылын чуръёсыз но К. Гердэн, Г. Пагиревен, В. Семакинэн, В. Широковен но мукет кылбурчиосын берыктэм кылбуръёсыз пыртэмын «Пинал нылмурт туж яратэ» (1994), «Чыртывесь = Ожерелье» (1998), «Туж бадӟым кузьымме…» (2010) бичетъёсы.
Адӟытонын тодматскыны луоз шер пумиськись печатлам ужъёсын но, пӧлазы Кузебай Гердлэн «Шуныт зор» (1924) но «Выль сюрес» (1929) дышетскон книгаосыз, кытчы со Ашальчи Окилэсь куд-ог кылбуръёссэ но вакчи веросъёссэ пыртэм.
Ашальчи Окилэн кылбуръёсыз венгер но эстон кылын нимаз бичетэн потӥзы – «Miért hallgat az udmurt nő? = Малы шып улэ удмурт нылкышно?» (Szombathely, 2004) но «Mu kullerkupud» (Tallinn, 2005). Кылбурчилэн гожъямъёсыз озьы ик берыктэмын француз, финн, бигер, коми кылэ.
Экспозицие пыртэмын Ашальчи Окилэн улонсюресэзлы но творчествоезлы сӥзем ужъёс:
- «Ашальчи Оки (Акилина Григорьевна Векшина). Улэмез но творчествоез = Жизнь и творчество» (люкасез А. А. Ермолаев, 1998);
- М. М. Козлов «Ашальчи Оки» (1998);
- «Вовращение Ашальчи» (2013);
- З. А. Богомолова «Для любви и стихов» (Голоса эпохи. 2003. С. 96–110);
- В. Л. Шибанов «Душу понять через душу: о феномене культурной травмы в лирике Ашальчи Оки» (Наука. 2015. № 1. С. 161–163);
- Л. П. Федорова «Кылбурчи, веросчи, эмчи» (Кенеш. 2018. № 4. С. 93–100);
- К. И. Куликов «Военврач Векшина» (Грани Победы. 2005) но мукет.
Экспозицие пырем троссэ книгаосты шедьтыны луэ Удмурт Элькунысь Йӧскалык электрон библиотекаысь. Пыр-поч дасям но НЭБ УР ресурсэ чӧлскетъёсын библиографиен список поттэмын «Воршуд» сайтысь «Ашальчи Оки» статьяын.
Асьме адӟытонлэн эшшо одӥг темаез – Ашальчи Окилэн кылбуретэз крезьгурын. «Киям крезе, сюлмам – кырӟанэ» (2002), «Чингыли» (2001) бичетъёсысь но Н. Постниковлэн «Малпасько тонэ» (2010) книгаысьтыз тӥ шедьтоды кылбуръёсызлы нотаос. Ашальчи Окилэн чуръёсызлы крезьгур гожтӥзы композиторъёс Г. А. Корепанов, («Мон тодам ваисько»), Г. М. Корепанов-Камский («Кык гожтэт»), Н. Е. Постников («Сюрес дурын», «Лулы мынам», «Даур»), П. Н. Кузнец («Оло монэ яратӥськод») но мукет крезьгурчиос.
Нырысетӥ удмурт кылбурчиез суредазы Удмурт Элькунысь тодмо суредасьёс но скульпторъёс. А. Золотухинлэн «Ашальчи Окилэн тусбуез – удмурт суредасьёслэн ужъёсазы» (Инвожо. 1998. № 4. Вылкыметлэн 3-тӥ бамез.) статьяяз сётэмын репродукциос – Удмурт Элькунысь суредасьёслэн С. Н. Виноградовлэн, П. В. Ёлкинлэн, В. Л. Белыхлэн, В. И. Михайловлэн но мукет авторъёслэн Ашальчи Окилы сӥзем ужъёссы. Соосын но мукет суредъёсын тӥледыз тодматоз мультимедиа амалэн кылдытэм библиографической тодэт книга – «Удмуртские мотивы в изобразительном искусстве».
