Кылбуръёсын «Зарни италмас» бичетэ пырем авторъёс пӧлын: XX даур шорын гожъяськем удмурт кылбурчиос Михаил Петров, Степан Широбоков, Николай Байтеряков, Тимофей Шмаков, Илья Зорин, Михаил Покчи-Петров, Флор Васильев, 1980-тӥ–1990-тӥ аръёсысь авторъёс – Владимир Романов, Людмила Кутянова, Алла Кузнецова, Михаил Федотов, Иосиф Иванов, Эрик Батуев, Николай Никифоров, Илья Пельтемов но мукет писательёс.
Прозаен «Шуныт тӧл» антологие люкамын новеллаос но веросъёс. Татчы пыртэмын XX даурлэн кыкетӥ люкетысьтыз авторъёс: Трофим Архипов, Геннадий Красильников, Роман Валишин, Николай Васильев, Семен Самсонов, Генрих Перевощиков, Василий Широбоков, Никвлад Самсонов, Григорий Данилов, Виталий Агбаев но мукет гожъясьчиос. Пусйыны кулэ, ваньзы авторъёс улонысь кошкемын ини.
Антологиос поттэмын Удмурт Элькунлы 105 ар тырмонлы но азьланьто издательстволэсь удмурт чеберлыко произведениосты одӥг обложка улын люкаса поттон ужзэ. Удмурт кунлыклы 100 ар тырмонэз пусйыса, 2020-тӥ арын печатламын вал «Туала удмурт поэзия», «Туала удмурт проза» но «Туала удмурт нылпи литература» бичетъёс, соос возьматӥзы туннэ нуналысь тодмо удмурт авторъёсты но гожъяськон удысэ пырись егитъёсты.
Ӵыж-выль, али типографиысь вуэм антологиосын тодматсконэ лыктӥзы тодосчиос, удмурт писательёс, журналистъёс. Люкаськемъёсты выль книгаен ӟечкылазы: Татьяна Ишматова – Удмуртиысь Кун Кенешлэн тӧроезлэн воштӥсез, Эдуард Петров Удмуртиысь йӧскалык политикая министр, Юрий Васильевич Кузнецов «Удмуртия» издательстволэн кивалтӥсез, Сергей Матвеев калык кылбурчи но антологиосты люкась-радъясь, Вячеслав Ар-Серги, Александр Шкляев калык писательёс.
Книгалэн тиражез сётэмын луоз элькунысь школаосы но библиотекаосы. Удмуртиысь Кун Кенешлэн тӧроезлэн воштӥсез Т. В. Ишматова сӥзиз, выль книга мед юрттоз егитъёс пӧлын удмурт писательёслэсь творчествозэc вӧлмытыны. Азьветлӥсь нимысьтыз пусйиз «Удмуртия» издательстволэсь усто ужамзэ: со туала арын трос уг потты ке но чеберлыко литературая книгаос, котькудӥз печатлам ужзы усто луэ полиграфиеныз, чебер карыса печатлам книга ик лыдӟиськыны мылкыд кылдытэ.
Йӧскалык политикая министр Э. С. Петров ивортӥз, книгаосты та программая поттон азьлантӥськоз. Кылсярысь, али дасяло удмурт кылъя орфографической кыллюкамез. «Удмуртия» издательстволэн директорез Ю. В. Кузнецов азьпалан кылдытоно мукет выль антология сярысь малпанзэ шараяз: удмурт нылпи литературалэсь зарни вакытсэ – Аркадий Клабуковлэсь, Герман Ходыревлэсь но мукет яратоно нылпи писательёслэсь ужъёссэс одно ик нимаз бичетэн поттыны кулэ. Печатлам ужъёс калыке мед вӧлмозы, соослэн но одно ик мед луозы лыдӟисьёссы, веразы ужрадэ люкаськемъёс.