Ульфат Бадретдинов писателен пумиськон ортчоз

15-тӥ оштолэзе Йӧскалык лыдӟетъюртын Татьяна Рудольфовна Душенкова кылчи но лингвокультуролог тодматӥз «Коды удмуртской культуры» книгаеныз. Ужзэ кылдытыны солы бадӟым юрттэт сётӥз Йӧскалык библиотекаын кыкетӥ арзэ таӵе ик нимен лекторий нуон: лекциосты дасян но кылзӥсьёсын кенешон тодосчилэсь книгаез бордын ужан мылкыдзэ эшшо но пуромытылӥз.

9-тӥ оштолэзе Йӧскалык лыдӟетъюртысь «Край удмуртский» клуб выль книгаен тодматскон ортчытӥз. Кылбурчи, журналист, кылысь кылэ берыктӥсь, Удмуртиысь лулчеберет удысысь дано ужась Ада Заитовна Диева берыктӥз Мишши Юхма чуваш писательлэсь «Шурсямга» кузьмадёссэ но сое нимаз книгаен поттӥз.

25-тӥ южтолэзе Йӧскалык лыдӟетъюртын удмурт поэзиен но прозаен антологиослы презентация ортчиз. Книгаос печатламын «Удмуртия» книгапоттониен Удмурт Элькунысь кылъёсты утёнъя, дышетонъя но азинтонъя программа улсын.

20-тӥ южтолэзе Йӧскалык библиотекаын выль удмурт книгалы презентация ортчиз: «Дунневыл меӵкытонъёс» вк-огинысь ёзчиос поттӥзы «Шыпыртӥсь чуръёс» нимо кылбуръёсын бичетсэс.  Книгае пыремын 18 авторлэн 70 кылбурез. Творческой коллективез ӟечкыланы вуизы тодосчиос, журналистъёс, писательёс, студентъёс, мер удысын ужасьёс.

6-тӥ гудырикошконэ (августэ) 13.00 часын Йӧскалык библиотекаын Мария Никоновалэн «Улон – питыран, сюлэм – пияла…»: одӥг удмурт кышномуртлэн дауръем улон сюресэз» книгаеныз тодматскон ортчоз. Та бичетэз люказ но печатланы дасяз гуртоез, тодмо кырӟась но фольклорист Николай Анисимов.

16-тӥ оштолэзе Йӧскалык лыдӟетъюртын Удмуртиысь калык суредась Валентин Белых тодматӥз выль книгаеныз – «Красота уходящая» чеберлыко альбомен. Та книга возьматэ Удмуртиысь городъёслэсь вашкала архитектуразэс – суредъёс но XX даурлэн кутсконысьтыз вуж туспуктэмъёс пыр. Книга понна нимысьтыз очеркъёс гожтӥз шаертодосчи, кылбурчи, Удмуртиысь дано журналист Сергей Жилин.

29-тӥ толшоре Йӧскалык лыдӟетъюртын Ульфат Бадретдинов журналист но писатель «Туннэ – ӵуказелэн кутсконэз» романэныз тодматӥз. Выль чеберлыко ужез удмурт интеллигенцилы сӥземын. Автор 1910-тӥ аръёсысь азьветлӥсьлэн, Вотской автономиез кылдытӥсьлэн Максим Прокопьевлэн биографиеныз тодматэ, югдытӥсьлэсь нимзэ но данзэ утён сярысь ужпум ӝутэ.

16-тӥ толшоре Йӧскалык лыдӟетъюртын ортчиз Михаил Атаманов писателен пумиськон. Иеродиакон Михаил Гаврилович Атаманов – Удмурт Элькунлэн но Грак ёрослэн дано муртэз, кылосбур тодосъя доктор, Библиез удмурт кылэ берыктӥсь. Ужрадын солэн «Санӥ. Пилемъёс доразы берто...» выль романэз сярысь вераськизы. Роман печатласькиз «Кенеш» журналын 2023-тӥ арын.

21-тӥ толсуре йылпумъяськизы Эгра ёрос литературалы сӥзем нуналъёс. Та ӝытэ ёросысь вуэм усточиос Йӧскалык библиотекаын пӧртэм ужрадъёсты ортчытӥзы. Литературая кунокуаын Эгра палъёсысь кылбурчиосын «Удмурт кылме но калыкме данъяса» пумиськон радъяськиз.

Тодмо удмурт кылбурчи, журналист, Удмурт Элькунысь лулчеберет удысысь дано ужась Татьяна Николаевна Чернова 15-тӥ толсуре 70 арессэ пусъе. Юбилеезлы сӥзем ӝыт ортчоз Ӥӧскалык библиотекалэн «Край удмуртский» клублэн пумиськонэз улсын.

20-тӥ инвожое Йӧскалык лыдӟетъюртын Евгений Федорович Шумиловен пумиськон ортчиз, Ужрад сӥземын вал 80 арес тырмонэзлы но «Родная Удмуртия: города и люди. Живая история из шумиловской шкатулки» выль книгаеныз тодматонлы.

20-тӥ инвожое 17.30 часэ Е. Ф. Шумиловен – историкен, искусствоведэн, Йӧскалык лыдӟетъюртлэн дано лыдӟисеныз пумиськон ортчоз. Ужрад сӥземын тодосчилэн 80 арес тырмонэзлы.

23 куартолэзе 18.00 часэ Йӧскалык лыдӟетъюртын «Чайковскийлэн дор палъёсаз» IV Литературной фестивальлэн программаез улсын «Современный удмуртский рассказ» антологилы презентация ортчоз. Отчы пыртэмын удмурт кылысь ӟуч кылэ берыктэм веросъёс.

Куартолэзь пумын Йӧскалык лыдӟетъюртын ортчоз Литературной фестивальлэн программаез улсын «Арлэн книгаез Чайковскийлэн дор палъёсаз» IV Улосвылкуспо фестиваль-конкурслы йылпумъян но вормисьёсты пусъён. 2023-тӥ арысен библиотекалэн вотэсбамысьтыз виртуальной адӟытонын вожвылъяськонэ пыриськем котькудӥныз книгаен тодматскыны луоз.

18-тӥ оштолэзе Йӧскалык библиотекаын Антуан де Сент-Экзюперилэсь «Пичи принц» выжыкыл-мадёссэ бесерман кылэ берыктэмлы сӥзем ужрад ортчиз.

6-тӥ оштолэзе «Край удмуртский» клубын, Эгра ёрос литературалы сӥзем нуналъёс улсын ортчиз Алексей Коробейниковлэн но Светлана Поторочиналэн «Музон улон = Потусторонний мир» книгазылы презентация.

6-тӥ оштолэзе 18.00 часын «Край удмуртский» клублэн пумиськоназ Эгра ёрос литературалы сӥзем нуналъёс улсын ортчоз С. Поторочиналэн но А. Коробейниковлэн «Музон улон = Потусторонний мир» (Ижевск, 2023) кылбур бичетэнызы тодматскон ӝыт.

22-тӥ мартэ «Край удмуртский» клубын удмурт кылбурчилэн, журналистлэн но кылысь кылэ берыктӥсьлэн Ада Заитовна Диевалэн творчествоезлы сӥзем ӝыт ортчиз.