Татьяна Рудольфовна Душенкова – Россиысь тодосъёсъя академилэн Урал ёзэтэзлэн Тодос эскеронъя Удмурт федерал центрысьтыз История, кылъя но литературая удмурт институтысь тодосчи. Со эскере лулчеберетэз лингвокультурология удысын. Лингвокультурология, кыллэн узырлыкез пыр возьматэ пӧртэм выжы калыкъёслэсь малпаськон сямзэс, психика но культура ласянь аспӧртэмлыксэс, пуш дуннезэс но солэсь тӥрлыке но арбериосы пыӵамзэ.
Т. Р. Душенковалэн верамезъя, лингвокультурология сое золгес но золгес бордаз кыске, ведь тодмо кылъёс но кылтэчетъёс усьто выль пуштросъёссэс, нош лулчеберетэз но кылэз яратон эшшо но кужмоя. Озьы асьмеос валаськом калыкмылэсь аспӧртэмлыксэ, солэсь лулчеберет кодъёссэ. Та кодъёс пыӵамын кылэ, фольклоре, литературае, суредъёсы, киуже, кун символъёсы но мк. Нош удмурт кылосбурез фольклор пыр эскерыны ӵектэм Т. Р. Душенковалы тодмо фольклорист, профессор Т. Г. Владыкина. Тодосчилэн «Коды удмуртской культуры» книгаез сӥземын удмурт ментальностьлы, калыкмылэн архетипъёсызлы – вашкала дырысен туннэ нуналозь возиськем дуннеез валэктӥсь идеяослы, кудъёсыз пыӵамын вераськон кылэ сяна пӧртэм киуж арбериосы но.
Ужрадэ лыктэм эшъёсыз но коллегаосыз ӟечкылазы Татьяна Рудольфовнаез выль книгаеныз. Йӧскалык лыдӟетъюртлэн кивалтӥсез Татьяна Владимировна Тенсина шуиз: Т. Р. Душенковалэсь библиотекаын кыкетӥ арзэ мынӥсь лекциоссэ синйылтытэк ӧз кыле: пӧртэм арлыдо но пӧртэм тунсыкъяськонъёсын калык отчы ветлӥз.
– Тӥледыз яратӥзы тодосчиез но югдытӥсез сямен, – шуиз Т. В. Тенсина но сӥзиз: лекциос библиотекаын вуоно арын но мед азьланьтӥськозы.
Т. Р. Душенковалэн верамезъя, лекциосты нуон сярысь малпан кылдӥз Татьяна Ишматовалы луыса. Удмурт азьветлӥсь кыкетӥ арзэ ини радъя «ШУД» (Школа удмуртского добродушия) нимо пумиськонъёсты. Та проектысь тунсыко адямиосын тодматскон бурдъяз Т. Р. Душенковаез но. – Мынам но вань, мае вераны, малпай мон, – азьланьтӥз тодосчи. – Кутскыку, мон туж возьдаськи, нош асме ачим вормыны юрттӥз лекцие лыктэм муртъёслэн монэ тунсыкен кылзӥськемзы.
Сюлмысьтыз ӟечкылаз люкаськемъёсты выль книгаен Удмурт Элькунлэн Кун Кенешезлэн тӧроезлэн воштӥсез Т. В. Ишматова. Со шумпотэмзэ вераз, Т. Р. Душенкова азьланьтэ Л. С. Христолюбовалэсь, Г. А. Никитиналэсь, М. Г. Ивановалэсь, Т. Г. Владыкиналэсь но мукетъёс тодмо удмурт тодосчиослэсь калыклы тодон-валан сётон ужзэс.
Книгалэсь вылкыметсэ чебер каре Глазовын вордӥськем суредасьлэн Елена Ведерниковалэн суредэз. Е. Н. Ведерникова тазьы валэктӥз сое: пыдесъяськем адямиос куисько, нош соослэн мугорзы, шунды сиос выллем кыстӥсько вылӥе. Куиськись муртъёс асьсэ выжызылэсь улонзэс куо, нош соосты котырто зарни италмасъёс – шунды сиос-чалепъёс, кудъёсыз адямиослэсь йыръёссэс «зарниен» буязы.
Е. Н. Ведерникова, картиназэ суредакуз, песянаезлэсь горд йырсиё муртъёс сярысь мадёссэ тодаз возем но суредаз пыӵатэм. Песянаез шуоз вылэм: кыз, инмозь ик ӝужыт будыса, йылыныз шундыез пасям но, шунды сиос-чалепъёс вияллям адямиослэн йыр вылазы но со дырысен соослэн йырсизы гордалэс луэм. Е. Н. Ведерникова сӥзиз ваньмылы шаплыгес кариськыны: удмурт возьдаськон сяммылы луыса, дунне лулчеберетлэн сӥосаз ышыны, пе, быгатом. Нош Т. Р. Душенкова мылкыд кариз суредасен валче ужзэ азьланьтыны.
Татьяна Рудольфовна озьы ик тау кариз книга поттӥсьлы, «Шелест» издательствоен кивалтӥсьлы Галина Викторовна Гребневалы, рецензентлы – философия наукаосъя докторлы, Россиысь тодосъёсъя академилэн Урал ёзэтэзлэн Философия но правоя институтысь тодосчилы Алексей Михайлович Пономаревлы. А. М. Пономарев вылӥ дунъяз выль книгаез. Солэн верамезъя, удмурт лулчеберет али зол воштӥськон вакытаз, кризисын. Асьмен аспӧртэмлыкмы герӟаськемын кыллэн синтаксисэныз. Индо-европейской выжые пырись кылъёслэсь удмурт кыл висъяське мукет логикаеныз, мукет сямен малпанэз веранэн но кылъёсты ог-огенызы герӟанэн.
Та люкетъёс, огинэ кариськыса, кылдыто менталитетмес но адямилэсь ассэ ачиз возён сямзэ. Юан: возиськоз меда удмурт код яке куашкалоз? Ведь али лулчеберетлэн дуно луись люкетъёсыз дунлыксэс ыштыса, вузлы пӧрмо, шуиз А. М. Пономарев. Соин калыклэсь аспӧртэмлыксэ утьыны юрттӥсь культурологической ужлы тодосчи-философ вылӥ дунъет сётӥз.
Книгалэн печатлам тиражез ичи. Люкаськемъёс сӥзизы та книгаез поттыны бадӟым тиражен. Нош туннэ электрон версизэ шедьтыны луоз Интернетысь: Россиысь тодосъёсъя академилэн Урал ёзэтэзлэн Тодос эскеронъя Удмурт федерал центрлэн но Йӧскалык библиотекалэн вотэсбамаз книга поттэмын ини.