Выль книгаен ӟечкылазы Ада Диеваез но Мишши Юхмаез вуэм куноос: кылчи, кылосбуръя доктор, профессор Р. Ш. Насибуллин, «Удмурт дунне» газетысь журналист Галина Семенова, литературатодосчиос А. Г. Шкляев, А. С. Зуева-Измайлова, С. Л. Скопкарева, Удмуртиысь Чуваш йӧскалык центрысь азьветлӥсь А. Л. Иголкин но мукет куноос.
Чувашиысь салам – нимысьтыз видеоӟечкылан та ужрадэ келям ачиз автор – Мишши Юхма, калык писатель, Чувашиысь, Удмуртиысь, Татарстанысь но Марий Элысь культура удысысь дано ужась, Кузебай Герд нимо премилэн лауреатэз. Мишши Юхма вераз, калыкъёсмы куспын ог-огедлы ӟеч мылкыдын юрттон мед луоз, озьы лулчеберетмылэн ӵуказе нуналэзлы оскон юнмалоз. Та кылъёсты улоназ пыӵатӥз ачиз писатель но. Со чуваш кылэ берыктыса, Кузебай Гердлэн кылбуръёсыныз «Ылттӑн хӗвел вӑранать...» (Шупашкар, 1996) бичет поттӥз. Нош аслаз М. Юхмалэн «Песнь о Чувашии» (1995) книгаезлы иллюстрациосты суредаз удмурт суредась Касим Галиханов.
М. Юхма 200-лэсь трос книгаослэн но 30 пала пьесаослэн авторзы луэ. Чуваш калык яратыса лыдӟе солэсь исторической прозазэ: «Голубая стрела», «Дорога на Москву», «Кунгош – птица бессмертия» романъёссэ, «Бессмертие» тетралогизэ. Удмурт кылэ дано чуваш писательлэсь кылбуръёссэ берыктӥзы Герман Ходырев, Петр Захаров, Вениамин Ившин, Алексей Ельцов, Ада Диева кылбурчиос, прозаысьтыз люкетъёссэ – Никвлад Самсонов, Василий Ванюшев, Анастасия Деметер-Петрова. Мишши Юхмалэн вань быдэскын удмуртэ берыктэм бадӟым произведениез но – «Чагыр ньӧл» роман. Сое ас сяменыз берыктӥз Вячеслав Ар-Серги калык писатель. Нимаз книгаен роман печатласькиз 1996-тӥ арын (редакторез – Татьяна Чернова).
Кыкетӥез удмурт кылын потэм бадӟым прозаической произведение – «Шурсямга» кузьмадёс. А. Г. Шкляевлэн верамезъя, Ада Диевалэн переводаз чузъяське удмурт калыклэн улэп кылыз. Галина Семенова журналист но пусйиз, 2024-тӥ арын «Шурсямга» повестез «Удмурт дунне» газетын печатланы дасякуз, редакторской ручказэ палэнтыса лыдӟем – сокем бордаз кыскем та повестьлэн пуштросэз но кылыз.
М. Юхма аслаз повестез сярысь но вераз. «Война вакытэ, – шуиз со, милям гуртмылэн урамъёсаз пыраллязы кионъёс, нош гуртмы интыяськемын вал нюлэслы матын. Тодам ваисько песянаелэсь верамзэ: кионэз пумитады ке, синмаз учкыса сылэ, эн бызе. Мыным трос пол кионэн пумиськылоно луиз, мон песянаелэн косэмезъя кари. Соос синмазы учкемме чидатэк, асьсэос ик кошкылӥзы. Кузьмадёсысь кионлэн улэмез – со мынам но анаелэн улонысьтыз учыръёс. «Шурсямгаез» мон кык уй куспын гожтӥ. 1981-тӥ арын сое ӟуч кылэ берыктыса печатлазы «Октябрь» журналын, берлогес – «Спутник» журналын со потӥз, Европаын улӥсь калыкъёслэн кылъёсазы берыктыса».
Мишши Юхмалэн удмурт шаере вуылэмез сярысь мадиз Анна Сергеевна Зуева-Измайлова, литературатодосчи, кылосбур тодосъя доктор. Чуваш писатель 1992-тӥ арын удмуртъёслэн Нырысетӥ всесоюзной ӧтчамазы ветлӥз. Нош 1993-тӥ арын Ижкаре вуылыкуз, со усьтӥз Удмуртиысь чувашъёслэсь йӧскалык центрзэс, 1995-тӥ арын Удмуртиын чуваш культуралэсь нуналъёссэ ортчытонэ пыриськиз.
2011-тӥ арын А. С. Зуева-Измайлова Мишши Юхмалы сӥзем «Гражданин мира» статьяосын бичет поттӥз. Отчы удмурт тодосчиослэн но лулчеберет удысын ужасьёслэн чуваш но удмурт культуралэн герӟетъёссы сярысь статьяоссы пыртэмын. Та книгаысь ужъёс пыризы 2018-тӥ арын Мишши Юхмалэн улонэзлы но творчествоезлы сӥзем «Мудрец, сказитель и пророк» (2018) Чебоксарыын печатласькем бичетэ но.