Светлана Юрьевна Поторочиналэн книгаосызлы сӥзем ужрадъёс вал ини. 2021-тӥ арын Удмурт кыллэн калыккуспо нуналаз, историкен-шаерчиен А. В. Коробейниковен валче «Удм точка ру» ӟуч но удмурт кылын кылбур бичетсылы презентация радъяськиз. Туэ «Край удмуртский» клубын та творческой тандем эшшо одӥгеныз – «Музон улон = Потусторонний мир» книгаеныз тодматӥз.
Азьвылэз презентация сямен ик, пумиськон ортче Удмурт кыллэн нуналаз Йӧскалык лыдӟетъюртлэн «Удмуртиысь Эгра ёрос литературалэн нуналъёсыз» проект улсын, С. Поторочина кыкетӥ ползэ возьматоз элькунын аслэсьтыз вордскем ёроссэ.
«Разноцветье = Турлы буёло улонэ» (Ижевск : Иднакар ; Институт компьютерных исследований, 2023) – авторлэн нырысетӥ книгаез. Отчы пыризы кылбуръёс, веросъёс, тодэ ваёнъёс, удмурт кылын драматической сценаос. Тросэз книгаын поттэм текстъёс уже кутэмын. Кылсярысь, нылпиослы кылбуръёс нимысьтыз гожтэмын нылпи садысь пиналъёсты удмурт кыллы дышетон понна; пьесаос пуктэмын Шаркан ёросысь Быгиын но Эгра ёросысь Чутыр гуртын. Тросэз кылбуръёсыз крезьгуро литературной композициосы пыремын, нош очеркъёс но веросъёс – со конкурсэ ыстэм ужъёс, кудъёсыз журнал-газетын потазы.
Книга, кудзэ С. Поторочина сӥзиз «пиезлы но дуно адямиосызлы» люкылэмын семья, вордскем шаерез яратон, синмаськон, яратон, инкуазь, ачиз сярысь, улон, нылпиос, тылож темаосъя. Берпуметӥяз люкетын – ӟуч, англи, француз кыллы берыктэмъёс, кудзэ дасязы А. Коробейников, А. Иванов но А. Усанина. Книгалэсь кылзэ тупатъяз но книгалы йылпумъян гожтӥз литературатодосчи В. Л. Шибанов.
Пыронэз дунтэк.
Ӧтиськомы ваньдэс.
