Николай Семенович Байтеряков (9 авг. 1923 – 1 апр. 1997) – кылбурчи-фронтовик, Удмуртиысь калык кылбурчи, Удмурт Элькунысь Кун премилэн лауреатэз.
- «Аслад улонэд сярысь секыт гожъяны. Эшшо но секытгес вераны творчествоед сярысь, – гожтӥз Н. Байтеряков аслаз “Над родником” (1977) кылбур бичетэзлы азькылаз. – Зэмзэ но, мар сярысь бен гожъялод? Оло, ортчем сюресэд сярысь, оло кылбурлэн вордскемез сярысь. Огзэ мукетызлэсь уд люкы. Улон но кылбур люконтэм герӟаськемын».
1938-тӥ арын гуртысь школазэ быдэстыса, Н. Байтеряков Можга педучилищеын дышетскыны кутскиз. Литературной кружоклэн ужаз пыриськиз (сое нуиз Ф. Г. Александров нылпи писатель). Нырысетӥез солэн кылбурез – «Тямыс март» печатламын вал 1938-тӥ арын «Дась лу!» газетын, нош одӥг арскын со «Шудо пинал дыр» коллективной сборнике пыриз. Висеменыз дышетсконаз вис кароно луиз, собере ужаз Сарапулысь кирпич поттон заводын, нюлэс кораз, Ува–Кильмезь чугун сюрес лэсьтонын ужаз. 1942-тӥ арын Быдӟым Атыкай оже кошкиз. Гуртаз берытскиз 1942-тӥ арын, Горд Кизили орденэн, «За отвагу» но «За победу над Германией в Великой Отечественной войне 1941–1945 годов» медален. 1951-тӥ арын Ижкарысь кык аръем областной школаез йылпумъяз. Партийной ёзэтъёсын ужаз, «Ленинское знамя» (Можга кар) ёрос газетын. 1959-тӥ – 1961-тӥ аръёсы Москваысь вылӥ литературной курсъёсын дышетскиз.
- «Кылбуран борды басьтӥськи армиысь бертэм бере. Мыным шуд усиз Михаил Петровен пумиськыны. Со мыным вынэзлы сямен юрттӥз. Со дырысен кылбуранэн ӧй люкиськы. Тау шуэме потэ Андрей Бутолинлы, Афанасий Лужанинлы, Тимофей Шмаковлы, Степан Широбоковлы... Соос дышетӥзы монэ кылбурлэсь чеберзэ валаны, кылбуретысь аслэсьтым интыме шедьтыны» («Над родником»).
Николай Байтеряков удмурт кылын 11 кылбур бичет но 4 прозаен книга гожтӥз. Книгаосызлэн нырысетӥзэ поттэмъёсыз ваньзы сямен адӟытонэ интыямын. Кылбуръёсыз элькунын но странамылэн шоркараз но печатласькизы («Нева», «Дружба народов», «Наш современник», «Волга» журналъёсын), 20 кылэ берыктэмын. Ачиз но кылбурчи яратоно Есенинзэ удмуртэ берыктӥз, со сяна, урал поэтэз Леонид Шкавроез, калык кылбурчиез Расул Гамзатовез, Кабардино-Балкариысь калык кылбурчиез Кайсын Кулиевез но мукет авторъёсты. Байтеряковлы луыса, удмурт лыдӟись тодматскиз француз писательлэн Антуан де Сент-Экзюперилэн «Пичи принц» выжыкылэныз, кудӥз нырысьсэ печатласькиз 1989-тӥ арын. (Туэ оштолэзе библиотекаямы эшшо одӥг берыктэм книгаен тодматскон ортчиз – бесерман кылэ: та уж Байтеряковлэн текстэз вылэ но ӵолтӥськыса быдэстэмын.
Адӟытонэ пыртэмын Н. Байтеряковлэн ӟуч кылэ О. Поскребышевен, В. Семакинэн, Г. Пагиревен, Г. Фроловен но мукет авторъёсын берыктэм кылбуръёсыз. Со нырысетӥ ӟуч кылын сборник «Вдоль серебряной Варзи» (1966), «Черемуха в цвету» (1977), «Над родником» (1977), «Серебряная лодка» (1989) но кык кылын потэм «Жин азвесь крезьгурен» = «Серебряная мелодия» (люказ Л. Айтуганова, 2003) бадӟым издание. Та книгае пыртэмын витьтон ар ӵоже кылбурын гожтэм ваньмыз ужъёсыз, пӧлазы – нырысьсэ войналэсь азьло «Дась лу!» газетын печатлам кылбуръёсыз, записной книжкаосысьтыз, нимаз кагазэн, ӵыжы-выжыосызлы но матысьёсызлы гожтэтъёсаз гожтэмъёсыз но берло улон аръёсаз кылдытэмъёсыз.
Адӟытонлэн нимаз люкетаз пыризы дышетскисьёслы хрестоматиос, антологиос но коллективной сборникъёсысь ужъёсыз. Кылбуръёсызъя кырӟан гожтӥзы Г. Ганьков, Г. Корепанов-Камский, П. Кузнецов, Н. Постников но мукет авторъёс.
Н. Байтеряковлэсь творчествозэ эскерисьёс асьсэлы библиотекалэн фондысьтыз литературатодос но биографической изданиос, тодэ ваёнъёсын книгаос, статьяос шедьтыны быгатозы.
- Поэт сярысь но солэн мер улонэ пыриськемез, кылбуретын будэмез, творчествояз лирикалэн пыӵамез, кылбуръёсызлэн тематиказы но символъёссы сярысь адӟыны луоз «История советской удмуртской литературы» (люказ В. Ванюшев, 1988) книгалэн 2-тӥ томысьтыз но венгер литературоведлэн Петер Домокошлэн «История удмуртской литературы» (1993) монографиысьтыз.
- Л. Д. Айтугановалэн (Кутяновалэн) «Сюлэмысен кутске кырӟан» («Песня рождается в сердце», 1998) книгаяз эскеремын поэтлэн кылбуран манерез. Отчы пыртэмын писательлэн творчествоез сярысь статьяос, кудъёссэ гожтӥзы А. Ермолаев, В. Ванюшев, В. Романов, Н. Белоноговен интервью, аслаз Н. Байтеряковлэн малпанъёсыз.
- Н. Байтеряковлэн 1960-тӥ–80‑тӥ аръёсы удмурт поэзиын нимысьтыз ӧр кылдытэмез сярысь гожтэ Л. П. Федорова «Кырӟась кылбурчи» статьяяз но куд-ог кылбуръёссэ пыр-поч эскере (Кенеш. 2008. № 8).
- Кылбурчилэн творчествоез сярысь малпаське «Туала удмурт кылбурет ӟуч но кунсьӧр литератураослэн герӟетазы» (2022) монографияз В. Л. Шибанов.
Ӧтиськом вань мылкыд карисьёсты.
Пыронэз дунтэк.
