Валентина Валентиновна Бекмановна вордӥськиз Тыловай гуртын. Уфаысь искусствоосъя кун инстутэз быдэстыса, ньыльдон ар ӵоже Йӧскалык театрын ужаз, ӟуч но удмурт спектакльёсын шудӥз. Тодэ кылись рольёсыз: В. Ар-Сергилэн пьесаезъя «Тонэ кожай вал юг дыдык» спектакльысь Дусым, А. Григорьевлэн пьесаезъя «Матронлэн егит картэз, яке Атас Гири – 2» спектакльысь Дарья, Н. Гогольлэн «Ревизорысьтыз» Анна Андреевна, Петр Захаровлэн «Выль кен» пьесаысьтыз Вуныл.
Дано артистка ассэ возьматӥз драматургия удысын но. В. Бекмановалэн «Мон — кышномурт, мон — анай» (1996) но «Буртчин кышет» (2006) пьесаосыз пуктэмын Йӧскалык театрлэн сценаез вылын.
Творческой ӝыт ортчиз ӟуч но удмурт кылын. Сое Валентина Валентиновна нуиз Богдан пиеныз валче. В. Бекманова аслэсьтыз кылбуръёссэ лыдӟиз, собере быдэстӥз яратоно Есенинэзлэсь кылбуръёссэ, быгатыса шудӥз Антон Чеховлэсь миниатюраоссэ.
Юбилярез кырӟаса ӟечкылазы дано улосчиезлэн, Дэбес ёросын вордскем Геннадий Корепановлэн правнучкаез Вероника Мясникова, Россиысь дано артист, Удмурт Элькунысь калык артист Николай Кардапольцев но мукетъёс.
Дэбес ёросысь Тыловай гуртысь нимысьтыз кузьым – ваньбурен тырмытэм сандык вайыса лыктӥзы Валентина Бекмановалэн эшъёсыз Людмила Миронова но Светлана Федулова. Соос мукет дано улосчизылэн Степан Широбоковлэн «Ой, чебер нылъёс» пьесаысьтыз диалог шудыса возьматӥзы но пусйизы: та постановкаез Тыловай клубын егит дыръяз пуктӥз вал Валентина Бекманова.
Дэбес ёрос землячествоен кивалтӥсь, Удмурт Элькунысь физической культура удысысь дано ужась Валерий Юрьевич Сунцов дано артисткалы кузьым лэсьтӥз: солэсь кылбуръёссэ но пьесаоссэ нимаз книгаен поттозы Нигмадзян Аглямутдиновлэн пичи книгаосты печатлась «Анигма» издательствояз. Ӝыт йылпумъяськиз Дэбес ёрос библиотекаысь ужась Светлана Микрюковаен дасям Валентина Бекмановалэн улон сюресэзлы но творчествоезлы сӥзем слайд-презентациен.