Литературно-выставочной центрлэн выль адӟытонэз «Удмурт дунне» газетлы 110 ар но Вормонлы 80 ар тырмонлы сӥземын. Экспонатъёс луизы газет редакцилэн архивез, али но азьвыл ужасьёслэн арбериоссы но документъёссы.
Газетлэсь улонзэ возьмато пӧртэм вакытъёсы вошъяськись нимъёсыз но басьтэм данъетъёсыз. «Удмурт дунне» газетлэн историез кутске 1915-тӥ арысен. 110 ар ӵоже нимыз 7 пол вошъяськиз: «Войнаысь ивор» (1915-тӥ ар), «Удморт» (1917-тӥ ар), «Виль синь» (1918-тӥ ар), «Гудыри» (1918-тӥ ар), «Удмурт Коммуна» (1930-тӥ ар), «Советской Удмуртия» (1943-тӥ ар). 1992-тӥ арысен газет «Удмурт дунне» нимын печатлаське.
Данъетъёс пӧлысь тужгес но дуноез – 1968-тӥ арын басьтэм «Знак Почета» орден, кудӥныз газетэз ӟечкылазы «Советской Удмуртилы» 50 ар тырмыку. Нош 2019-тӥ арын «Удмурт дунне» Россиысь тужгес но устоез этнической изданиос» конкурсын устоез луиз но «Лучшая газета» нимен пусъемын.
Адӟытонлэн тунсыко люкетэз – «Советской Удмуртия» газетлэн азьвыл редакторезлэн Василий Михайловлэн документъёсыз но арбериосыз, туспуктэмез. Соосты ужрадлы сётӥз Пичи Пурга ёросысь ужбергатӥсь, «Малая Пургаагропромэнерго» огазеяськонлэн кивалтӥсез, общественной ужась Георгий Алексеев – В. Михайловлэн племянникезлэн пиез. Со вуттӥз Василий Михайловлэсь бадӟым курень чемоданзэ. Та чемоданэн журналист, командир бертэм Быдӟым Атыкай ожысь.
Василий Михайловлэн чемоданэз сяна, адӟытонэ пыртэмын гужем пальтоез но партбилетэз. Та ужкагазын пусъемын: Василий Михайлович компартие пырем война дыръя. Со вакытэк ик, фронтын ожмаськыкуз, тодматскиз вуоно кузпалэныз. Наталья Сергеевнаен соослы валче 70 арлэсь кема улыны кылдӥз. Экспозициын Михайловъёслэн туспуктэмзы возьматэмын.
Редакция юнме уг лыдъяськы удмурт литературалэн, журналистикалэн кӧкыеныз. Газетын кыдазы, газет пыр потӥзы валтӥсь удмурт писательёс, удмурт журналистъёс. Адӟытонын возьматэмын Василий Смирнов ответственной секретарьлэн, фронтовиклэн «Погонтэм солдатъёс» (1968) кузьмадёсэзлэн рукописез, Кирилл Ломагинлэн архивысьтыз солы ыстэм Генрих Перевощиковлэн, Евгений Самсоновлэн гожтэтъёссы но мукет тунсыко экспонатъёс. Озьы арбериос но документъёс пыр яркыт возьматӥське валтӥсь удмурт газетлэн 110 ар ӵоже кыстӥськись тунсыко историез.
