«Устоез кылбур произведение» номинациын лауреат луиз Удмуртиысь тодмо ӟуч кылбурчи Владислав Шихов «Пятая книга. 500 стихотворений» бичетэныз. В. Шихов Удмурт Республикаысь Кивалтэтлэсь литературая конкурсаз кыкетӥ пол вормиз: 2018-тӥ арын «Блаженство расставаний» кылбур книгаез понна сое премиен пусйизы.
«Нылпиослы но егитъёслы устоез произведение» номинациын Лия Малых «Боко но Моко» но Лариса Сюткина (Коваль) «Мы как птицы полетели» книгаоссы понна данъямын. Лариса Сюткина педагог но психолог нырысетӥ книга поттыса, вылӥ дунъет басьтӥз.
Лия Малых нырысьсэ нимаз книгаен печатлаз Боко но Моко коркакузёос сярысь выжыкыл-повестьсэ. Кузьмадёсысьтыз люкетъёсыз 1990-тӥ аръёсысен элькун газет-журналын печатласькизы. Повестез Нылпи книгая Калыккуспо Кенешлэн (IBBY) 2024-тӥ ар понна дано списоказ пыртэмын.
«Устоез чеберлыко произведение» номинациын вормиз Римма Игнатьева (Лаптева) «Игнаш сайкемын» романэныз. Произведение 2000-тӥ аръёслэн кутсконаз потӥз вал «Кенеш» журналын. 2020-тӥ арын гожъясьчи сое нимаз книгаен печатланы быгатӥз.
Вормисьёсты ӟечкылазы Удмуртиысь Печатья но ивор вӧлмытонъя агентстволэн кивалтӥсез А. С. Валов, Йӧскалык лыдӟетъюртлэн директорез Т. В. Тенсина но «Удмуртия» книгапоттоннилэн директорез Ю. В. Кузнецов.
