В. К. Кельмаков – Удмурт кун университетысь профессор, кылосбур тодосъя доктор, финн-угор тодосын тужгес но адӟем карымон ӧнерчи. Улонэз ӵоже витьсюлэсь трос уж гожтӥз. Солэн тунсыкъяськон удысэз паськыт вал: диалектология, удмурт кыллэн историез но исторической фонетикаез, лексика, кылпӧрмытон, грамматика, синтаксис но мукет.
Адӟытонэ пыртэмын В. К. Кельмаковлэн кигожтосъёсыз, книгаосыз, туспуктэмъёсыз но арбериосыз. Туж тунсыко луэ фольклор экспедициос дыръя киен гожъям калык кырӟанъёсын тетрадез, тодос картотекаысьтыз пичи люкетэз (тодосчилэн архиваз ог 35 сюрс киен гожтэм карточкаен картотека кылемын). Карточкаосаз пусъем удмурт но финн-угор выжыысь кылъёсты, кылтэчетъёсты но веранъёсты В. К. Кельмаков бадӟым тодос ужъёс дасякуз кутӥз. Кӧня пример кулэ статья, книга кылдытыку? Адӟытонэ тодосчилэсь та адскисьтэм луись ужзэ возьматон понна инсталляция пыртэмын.
Инсталляциез кылдыто куинь усьтэм дипломатъёс (чемоданъёс). Котькудаз пуктылэмын В. К. Кельмаковлэн тужгес но тодмо луэм ужез: «Краткий курс удмуртской диалектологии» (1998), «Диалектная и историческая фонетика удмуртского языка» (2003–2004). Нош куиньметӥяз дипломатэ интыямын тодосчилэн нырысетӥ статьяез – «Роль татарского языка в развитии абстрактной лексики кукморского диалекта удмуртского языка» (1965).
Cтатьяысь чакланъёссэ-малпанъёссэ юнматон понна, тодосчи, кылсярысь, 33 пример кутӥз. Нош «Диалектная и историческая фонетика удмуртского языка» тодос уже со пыртӥз ини 20 451 пример, книгаысь теориез валэктыса. Лыдпусъёс учкисьлэн тодаз мед кылёзы шуыса, котькуд дипломатысь книга вӧзы радэн-радэн пуктэмын пачкаен чылкыт карточкаос.
Радъясьёс выставкалы бадӟым планшетъёсы печатласа дасязы вуж туспуктэмъёс: соос возьмато тодосчилэсь 1960-тӥ–1980-тӥ аръёсысь университетын ужамзэ, финн-угор тодосчиосын пумиськонъёссэ но «Чипчирган» фольклор ансамбле пыриськон вакытсэ.
Адӟытон январь ӵоже ужалоз на.
В. К. Кельмаковлы сӥзем выставкалы обзор ортчоз 3-тӥ толшоре (январе) 12 часын Йӧскалык библиотекаысь Литературной кунокуаын (гостинойын).
