Удмуртъёслэн дунневаланазы шунды бадӟым инты басьтэ, калыклэн валтӥсь инмаръёсыз пӧлы пыре. Шундыез лыдъяло вал адямилэн юрттӥсеныз, солы дурбасьтӥсеныз. Тросэз сям-йылолъёс шундыен герӟаськемын. Удмуртъёс шундылэн но толэзьлэн нимыныз оскытӥзы. Адямилы но югыт дуннелы сӥзем котькуд вӧсь нерге ортчытыку, ваньзэ лэсьтӥзы шундылэн бергамезъя, нош кисьтон карыкузы но сопал дуннеен герӟаськем мукет йылолъёсын – шундылы пумит. Калыкын верало вал: «Шунды самой чебер, шундылэсь некин/нокин но чебер ӧвӧл».
Удмурт фольклорын шунды герӟаськемын анай сярысь пуштросъёсын но яркыт возьматӥське Шунды-Мумы инмар идея пыр. Шундылы осконэз возьмато нылпиослэн вазиськонъёссы (заклички), куриськонъёс. Фольклор гуръёсын но шундылэн образэз возиськемын. Удмурт Элькунлэн гимназ со бадӟым инты басьтэ. Вашкала архетипъёсмы доры берытско удмурт кылбурет но драматургия, отысь выль пуштросъёс утчало. Шунды пыремын искусствое (пужыятэмъёсы, суредъёсы, скульптурае, дуно изъёсын чеберъянъёс лэсьтонэ но мукет удысъёсы).
