Владимир Никифорович вордӥськемын Алнаш ёросысь Блатгуртын 1935-тӥ арын. Пичи дырысьтыз тужгес но вунонтэмез – кынмаса огвакытэ зол висемез. Ёрос эмъяськонниысь врачъёс пичи пилы юрттыны быгатӥллямтэ но кулыны дораз лэзиллям. Собере со борды семьяосыз басьтӥськиллям. Вышкые турын вуэ пуксьытылӥзы. Озьы выремзы бере гадям туж бадӟым пӧськы кылдӥз, – вера Владимир Никифорович, – сое агай пуртэн бышкалтӥз но пӧськыысь люкаськем ур кисьтӥськиз. Собере ини пичи пияш катьяськем.
Адямилэн визезлы но эмъяны быгатонэзлы паймыса, В. Н. Савельев пичи дырысеныз врач луыны малпам. Можгаысь фельдшерско-акушерской школаез быдэстыса, дышетсконзэ азьланьтӥз Ижысь эмтодос институтын. Тыршиз ёрос больцаосын – Глаз ёросын но Дэри каргуртын.
Владимир Никифоровичлэсь зол мылкыдо но ужлэсь кышкасьтэм луэмзэ возьматэ тодослыко диссертация борды басьтӥськемез. Макем секытэн сое гожъяз но эскеронъёс ортчытӥз – ачиз гинэ тодэ. Но тодос уж гожтонысьтыз одӥг таӵе гинэ учыр валэктэ В. Н. Савельевлэсь юн мылкыдо луэмзэ. Кулэ луиз адями шӧйёслы рентген лэсьтылыны, нош со вакытэ ки вылын нуллон рентген лэсьтон аппаратъёс ӧй вал на. Со шӧйёсты валэн вайыса но эмъюртлэн вылӥысь этажаз рентген-кабинетэ ки вылаз тубытъяно луиз, берганлы ёзэз (тазобедренной суставез) снимок лэсьтон понна. Озьы гожтэмын вал диссертациез.
В. Н. Савельев трос аръёс ӵоже (1975–1990) тазалыкез утёнъя министр луыса ужаз. Соку Элькун (Республиканской) клинической больницалы сюрс койкаё выль юрт ӝутӥзы. Министрын ужан вакытаз ик Владимир Никифорович быдэстӥз докторской диссертацизэ. Озьы ик гуртын улӥсьёслэсь тазалыксэ утён понна кылдытӥз ёрос амбулаториосын система но ӝог эмъюрттэт сётӥсь бригадаос.
Владимир Николаевич трос аръёс ӵоже ужа Ижысь эмтодос кун академиын. Римма Аверьяновна кышноеныз куинь нылпи будэтӥзы. Ваньзы соос эм удысын тыршо. В. Н. Савельевлэн выжыяз тросэз врач луыса ужало.
Владимир Никифорович аслэсьтыз тазалыксэ сак эскере. Таӵе бадӟым аресказ вуыса со ветлэ ай Карлутка шур дуре, кезьыт вуэн гылляське. Озьы ӝутӥськем вирзӥбетсэ уськытыны быгатэ.
Тодосчиен пумиськон сӥземын вал Семьялэсь арзэ пусъёнлы, нош В. Н. Савельев данъяське ӵыжы-выжыеныз: 30 пала адями тырше эм удысын. Ӝытэ вуиз семьяез но. Лыктэм куноос В. Н. Савельев сярысь ӟеч кыл веразы, солы тау каризы. Озьы ужрадэ пыриськисьёс тодматскизы эмчи династиен.
