Татьяна Рудольфовна Душенкова – Историяя, кылъя но литературая удмурт институтысь тодосчи, наукаысь эскероно удысъёсыз: этнокультурология, лингвокультурология, этнолингвистика, удмурт кыллэн концептосфераез, кыллэн семантикаез но философиез но мукет.
Т. Р. Душенковаен кык пумиськон ортчиз ини. Со доры калык мыло-кыдо ветлэ, удмурт традиционной культураен тунсыкъяське.
Нырысетӥ пумиськон дыръя тодосчи эскериз туала удмурт фэнтезилэсь аспӧртэмлыксэ. Лекция нимаськиз «“Да Винчилэн кодэз” удмурт сямен: туала фэнтезилэн лыдпус кодаз дунневыл но йӧскалык тодметъёсыз». Т. Р. Душенкова пыр-поч эскериз туала удмурт литератураысь тужгес но усто гожтэм фэнтезиез – Елена Миннигараевалэсь «69 ар ортчыса...» кузьмадёссэ но возьматӥз, макем ӟеч писатель удмурт вашкалаез аслаз повестяз пыртӥз. Туала нылпиос сое дышето компьютер шудон пыр. Пароль-вӧськыл вераса, повестьысь геройёс сюро удмурт инмаръёслэн дуннеязы.
Повестьын котькуд чыры-пыры, лыдмет но арбери мур пуштросо луо, кудзэ валано этнокультурологической комментарийёсын тодматскыса. Озьы чеберлыко произведение пыр выльысь огдырлы улӟе удмурт калыклэн вашкала дунневаланэз но улонысь кошкем сэбедъёс но йылолъёс.
Мукетаз лекциын Т. Р. Душенкова кылзӥсьёслы ӵектӥз удмурт лулчеберетысь астрономия темаез. Кылын но фольклорын возиськись тодон-валан юрттӥз тодосчилы удмурт «гороскопэз» улӟытыны но толэзьёслэн удмурт нимъёсты но коми пӧйшурасьёслэсь календарьзэс ӵошатыса, «зодиак» кругез возьматыны.
Вашкала удмуртлэн улоназ бадӟым инты басьтэ вылэм толэзь. Толэзьлэн пичиямез но вылезлэн вордӥськемез крестьянлэсь ужзэ валтэ, кышномуртлэсь пинал ваён вакытэныз кивалтэ. Толэзьлэн пусэныз нылкышно дӥськутэз чебермало, солэсь утись кужымзэ пусйыса. Вуоно лекциын Т. Р. Душенкова усьтоз удмурт лулчеберетысь шундыен герӟаськем пӧртэм пуштросъёсты.
