Кызьы валэктэ та кыллэсь пуштроссэ «Вордскем кыл» журналлэн редакторез Андрей Клементьев, митапын вакчи дыр куспын (1,5-2 час) одӥг удысысь ӧнерчиос кенешо но ужан амалъёссэс возьматыса, ог-огзылэсь дышетско. Митапъёс ортчо циклэн – быръем тема кӧня ке пумиськонъёсын пыр-поч но мур усьтӥське.
Удмурт кылъя но литературая дышетӥсьёс понна митапъёс пырозы «Улон – лыдӟон, лыдӟон – улон» сузьетэ. Таиз нырысетӥез ужрад сӥземын вал удмурт кылъя урокез тунсыко карись лайфакъёслы – пайдаё визь-кенешъёслы.
Пумиськонэ лыктэм куноос вордскем нуналэныз ӟечкылазы Ирина Фёдоровна Тимирзяноваез – 15-тӥ коньывуонэ солы 60 арес тырмиз. И. Ф. Тимирзянова – «Вордскем кыл» журналысь огъя дышетонъя ёзэтлэн редакторез, методист, покчи классъёслы «Удмурт кылын литературной лыдӟиськон» предметъя учебникъёслэн одӥгез авторзы луэ.
И. Ф. Тимирзянова ужудыссэ усто азинтэ – та сярысь вераськизы Зинаида Кирилловна Рябинина – Йӧскалык прессалэн юртэзлэн кивалтӥсез, Валентина Леонидовна Корепанова – Дышетонъя но тодосъя министерствоысь огъя но школа дорозь дышетонъя ёзэтлэн кивалтӥсезлэн воштӥсез, Ижкарысь 56-тӥ гимназиысь дышетӥсь Александра Александровна Шудегова. Ӟечкыласьёс юбилярлэсь интеллигентной, лачмыт сямзэ пусйизы но удмурт кыл понна валче ужаны сӥзизы.
Ирина Фёдоровналэн нылпиосты дышетон удысын юрттэмез понна тау каризы дышетӥсьёс Надежда Васильевна Кабанова, Маргарита Николаевна Долганова, Надежда Владимировна Голубина. «Котьку но тӥледлы вазиськыны луэ. Журналэ материалъёс ылё-кырсё лэзиськомы, тӥледын ӵош журналэ поттымон вуттӥськом – озьы тӥ милемлы будыны юрттӥськоды. Огшоры сямо, капчи мылкыдо, зэмос эшмы тӥ милям», – шуизы соос.
Собере митап кутскиз. Ужрадэ пыриськизы Удмурт кун университетысь Удмурт кылосбуръя, финно-угроведениея но журналистикая институтысь студентъёс.
Туала дышетон технологиосты валэктӥсь мастер-класс сётӥз Ирина Фёдоровна Тимирзянова. Удмурт кылъя урокез тунсыко нуон амалъёсынызы тодматӥзы Дэри ёросысь Шор Постол шор ёзо школаысь удмурт кылъя но литературая дышетӥсь Надежда Васильевна Кабанова, Пичи Пурга ёросысь Шор Кечол шор ёзо школаысь удмурт кылъя но литературая дышетӥсь Маргарита Николаевна Долганова, Шаркан ёросысь Быги шор ёзо школаысь удмурт кылъя но литературая дышетӥсь Надежда Владимировна Голубина. Соослэсь визь-кенешъёссэс митапчиос бадӟым тунсыкен кылзӥзы.
«Улон – лыдӟон, лыдӟон – улон» сузьетысь удмурт кыллы но литературалы дышетӥсьёс понна митапъёс ортчозы на толсуре но оштолэзе.
