Ӝыт кутскыку, Ольга Александроваез ӟечкылаз Йӧскалык лыдӟетъюртлэн директорез Татьяна Владимировна Тенсина. Со пусйиз: Ольга Яковлевна Сьӧлта ёросын улон корка гинэ ӧз пукты, со выль творческой инты кылдытӥз. – Отчы ветло туристъёс, отын ортчо фестивальёс. Адямилэн мылкыдыз вань ке, одно ик сое быдэстоз, – шуиз Т. В. Тенсина. Ужрад дыръя Ольга Яковлевнаез ӟечкылазы эшъёсыз но коллегаосыз – Россиысь дано артист Александр Гаевич Мустаев, Удмурт университетысь удмурт кылосбуръя, финно-угроведениея но журналистикая институтлэн директорез Галина Анатольевна Глухова, «Удмуртия» ГТРК-ысь журналист Валерий Михайлович Сидоров, калык писатель Александр Григорьевич Шкляев.
Ольга Александрова 5 аресказ тодэ ини вал: со театрын шудоз. Школаын дышетскыкуз, пыриськиз кырӟаны но эктыны, радъяз концертъёсты, шара лыдӟонъя конкурсъёсын нырысетӥ инты басьтылӥз. – Школаез быдтыку, мон дась артистка ни вал, – шуэ Ольга Яковлевна. Театральной институтэ со кык пол конкурс пыр ӧз ортчы. Но Ижысь Мунё театре ужаны пыриз. Кызьы шуэ ачиз актриса, профессилы дышетско профессионал дорын.
Анаезлэн, Анна Афанасьевналэн, нылзэ дышетэмез туж потӥз. Солэн кичӧлтэмезъя Ольга Александрова пыриз Удмурт кун университетысь кылосбуръя факультетэ. Дышетскыкуз валаз: сое бордаз кыске искусство. Кылосбуръя факультетысь кошкыса, Москваысь Лулчеберетъя кун институтэ режиссёрлы дышетскыны пыре.
– Мон дышетски трос калыко ужрадъёсты ортчытыны, – шуэ Ольга Яковлевна. – Мыным шуд усиз: 1985-тӥ арын Москваын Егитъёслэн но студентъёслэн дунневыл фестивальзы ортчиз. Дышетӥсьёсын валче ми дасямы фестивальлэсь егитъёслы но нылпиослы программазэ.
Вылӥ дышетсконниез быдэстыса, Ольга Александрова берытскиз Ижкаре но ужаны интыяськиз Лулчеберетъя Министерстволэн Элькунысь научно-методической центраз. Отын со чаклаз республикаысьтымы самодеятельной театръёсты. Ольга Александрова тодаз вае: татын ужакуз, Глазовысь «Парафраз» студия профессиональной театр луиз.
Методической ужен вырыны тунсыко вал, но Ольга Яковлевнаез бордаз кыскиз творчество. Со кошкиз Нижний Тагил карысь мунё театре. Отын актриса сямен кужмо будӥз. Валтӥсь режиссёр Григорий Гольдман спектакльёссэ пуктӥз «Урал зона» ӧрын.
«Урал зонае» пыризы Магнитогорскысь, Курганысь, Томскысь мунё театръёс. Соос вылӥ ӟечлыкен спектакльёс пуктӥзы. «Урал зонаысь» режиссёръёс Валерий Вольховский, Виктор Шрайман, Роман Виндерман постановкаоссэс синтетической искусствоен нимазы: мунё театрез но драмая театрез огазеяса, адямилэсь, мунёлэсь но арберилэсь огъя театрзэ кылдытӥзы.
Озьы выль тодон-валанэзлы луыса, Ольга Александрова басьтӥськиз аслаз постановкаосыз борды. – Мынам миссияе – буш интыын выльзэ кылдытон, – шуэ со ачиз сярысь. 1990-тӥ арын со пуктӥз нырысетӥ моноспектакльзэ – вашкала ӟуч кылын «Слово о полку Игореве» поэмаез. Та постановкаеныз со Свердловск улосвылысь театръёслэн конкурсаз Гран-при басьтӥз.
Кыкетӥез моноспектаклез кылдӥз Россиысь финн-угор калыкъёс азинскон вакытэ, соку сяськаяськиз искусствоысь нимысьтыз ӧр – вашкала лулчеберетэз туала улонэ пыртӥсь этнофутуризм. Со вакытэ радъяськизы пӧртэм финн-угор фестивальёс. Одӥгаз ужрадын эстон театр удмурт выжыкылэз пуктӥз. Та постановкаез адӟыса, Ольга Яковлевна малпаз: «Мон куло, удмурт кылын спектакль ӧй ке пукты».
Со вакытэ актриса ужаз Москваысь «Лаборатория» театрын. Удмурт тодосчиос Владимир Емельянович но Татьяна Григорьевна Владыкинъёс юрттӥзы Ольга Александровалы мур дышетыны удмурт фольклорез но этнографиез. Соосын кенешыса, 1994-тӥ арын Ольга Яковлевна кылдытӥз удмурт кылын «Куинь сюан гуръёс» моноспектакль.
– Та спектаклен мон ветлӥ ог кызь кунэ. Со ваньмызлы кулэ луиз: Канадаын, Америкаын, Испаниын, Фарер шормуӵъёсын, – вера Ольга Яковлевна. Пӧртэм городъёсы вуыса, со трос тодон-валан басьтӥз. Со адӟиз дуннеысь тужгес но тодмо режиссёръёслэсь – Италиысь Эудженио Барбалэсь, Англиысь Питер Бруклэсь ужъёссэс но скандинав кунъёсысь фольклор театръёсты. «Куинь сюан гуръёс» постановкаен Ольга Александроваез ӧтизы удмурт шаере но. Кастрен огазеяськонлэсь стипендизэ басьтыса, со Удмуртиысь ёросъёсын моноспектакльзэ возьматӥз.
Светлана Соколовская, Егитъёслэн юртсылэн директорез, актрисаез ас дораз ужаны но выль театр кылдытыны ӧтиз. 1998-тӥ арын Ольга Александрова пуктӥз «Тристан и Изольда» спектаклез. Крезьгурзэ гожтӥз композитор Игорь Шкляев, костюмъёсты малпаз тодосчи Людмила Молчанова, суредъёсты – Игорь Науменко. Та постановка – бадӟым эксперимент: Тристан луиз удмурт батыр, нош Изольда – удмурт нылмурт. Спектакльын огазеяськиз удмурт но вашкала кельт лулчеберет. Постановка мынӥз куинь ар ӵоже, учкисьёс мукет каръёсысь но вуылӥзы.
Собере Ольга Александрова нош Москвае кошкиз: Ленкомын Марк Захаров режиссер дорын стажировка ортчиз. Москваын со ТЮЗ-ысь тодмо режиссёръёс Генриетта Яновская но Кама Гинкас дорын дышетскиз. 2002-тӥ арын мынӥз фестивале Ханты-Мансийске. Отын солы выль уж ӵектэмын вал – кылдытыны обь-угор калыкъёслэсь профессионал театрзэс.
Хантыослэн но мансиослэн соку ӧй вал искусствозы, Геннадий Райшев суредасьлэн ужъёсыз сяна. Солэн суредъёсыз Ольга Александровалэсь мылкыдзэ лӧпкытъязы обь-угор калыкъёслэн «Солнце» театрзылы спектакльёс но концертъёс дасяны. – Дуннеысь фестивальёсты «Солнце» театр усьтэ вал, – тодаз вае Ольга Яковлевна. – Милям выступениосмы ортчизы Кремльысь дворецын, ООН-лэн штаб квартираяз Нью-Йоркын, Европалэн Кенешезлэсь ӧтчамъёссэ усьтыны ветлӥмы Страсбурге.
2013-тӥ Ольга Александровалы берытскиз Москвае. Удмурт землячестволэн ужаз пыриськиз но Гербер праздниклэн режиссёрез луиз. 2015-тӥ арын тодматскиз «Странник» православной театрен. Соосын валче кылдытӥз удмурт кылын «Рождественский вертеп» спектакль. – Мария – удмурт кышномурт, нош котькуд калыклэн аслаз Христосэз, – шуэ та спекакль сярысь Ольга Яковлевна.
Али Ольга Александрова улэ Виняшур-Бия гуртын. – Мон малпай, мынам интые татын – кытын будо ӝужыт пужымъёс, кошке Кильмезь шур, – шуэ со. Татын Ольга Яковлевна аслыз выль юрт ӝутӥз, отчы сцена лэсьтӥз но театральной музей кылдытӥз. Ужа выль моноспектакль бордын – Ольга Леонардовна Книппер-Чехова актрисалэн тодэ ванъёсызъя но А. П. Чеховен переписказыя «Я люблю вас, Ольга» постановка дася. Ольга Книппер-Чехова вордскиз Глазов уездысь Кокман гуртын. Туала Сьӧлта ёрослэсь со 70 иськемын гинэ.
Творческой процесстэк Ольга Александровалэн одӥг нуналэз но уг ортчы. – 60 арескам мон асме туж егитэн но шудоен лыдъясько, – шуэ со.
