Литературатодосчиос А. Н. Уваровен герӟаськем книгаослэн кылдон сюрессы сярысь мадизы. Александр Григорьевич Шкляевлэн верамезъя, 1960-тӥ аръёсы Ленинградын венгер тодосчи Петер Домокош люкам шундыӝужан палась финн-угор калыкъёслэн литератураоссы сярысь материал но малпаськем, кудӥз борды солы нимысьтыз басьтӥськоно. Со вакытэ П. Домокош тодматскем А. Н. Уваровен. Удмурт тодосчилы со ӟеч адямилы сямен синмаськем но быръем удмурт литератураез. Та пумиськонлы луыса но П. Домокош удмурт литература сярысь диссертация гожтӥз, нош берло сое «Удмурт литературалэн историез» тодос монография карыса поттӥз.
Надежда Витальевна Лекомцева мадиз А. Н. Уваровен валче «Писатели и литературоведы Удмуртии» биобиблиографической справочник дасян бордын ужамез сярысь. Гожъясьчиослы сӥзем таяз справочнике нырысьсэ пыртэмын критикъёслэн но литературоведъёслэн биографизы но. Со сяна, Н. В. Лекомцева пусйиз, солэн анаез А. Н. Уваровлэн апаез луэ.
Дышетон удысысь йӧскалык ужпумъёсты тодон-эскеронъя институтысь тодосъя ужась Людмила Васильевна Бусыгина А. Н. Уваровлэсь творчествозэ школаын дышетон сярысь презентация возьматӥз. Покчи классъёсын пиналъёс Анатолий Уваровлэн кылбуръёсыз пыр дунъяны дышо поэзиысь куарашудонэз. Бадӟым классъёсын дышетскисьёс А. Н. Уваровен удмурт кылэ берыктэм «Калевала» эпосэн тодматско, писательлэсь критической статьяоссэ лыдӟо. Л. В. Бусыгина пусйиз: А. Н. Уваров бордысен институтлэн историез кутскиз: 1990-тӥ арын РСФСР-ысь Дышетонъя министерстволэн йӧскалык школаосъя тодон-эскеронъя институтлэн соку усьтӥськем филиалэзлэн заведующиез А. Н. Уваров луиз.
Ужрадын Йӧскалык библиотекалэн архивысьтыз А. Н. Уваровен видео возьматӥзы. Отын со вера удмурт кылэн котыр ласянь тунсыкъяськемез сярысь: «Мон тырши вордскем кылме пыр-поч дышетыны. Вашкала книгаосты но трос лыдӟи. Соос возьматӥзы, макем чебер но узыр удмурт кылмы. Со понна тау кареме потэ югдытӥсьлы Кузьма Андреевлы милям гуртамы но уробоен вуылыса книга сётъямез но вузамез понна, тау кареме потэ песятайёссылы со книгаосты басьямзы понна».
Тодосчилэн пиез, суредась Сергей Анатольевич Уваров тодаз вайиз, макем кужмо яратэ вал атаез вордскем кылзэ. Анатолий Уваров уг чида, пе, вал, куке удмурт кылэз но калыкез мыскылляло. Сыӵе муртэн со вераськемысь дугдылэм. Калыклэн, эшъёсызлэн но ӵыжы-выжыослэн тодазы Анатолий Уваров кылиз адямиен, кудӥз зэмлык понна нюръяськиз, удмурт лулчеберетэз но тодосэз азинтон бордын гижысь-пиньысь тыршиз.
Ужрадын А. Н. Уваровлэсь кылбуръёссэ но берыктэмъёссэ лыдӟизы Йӧскалык театрысь актёр Игорь Моисеев, егитъёслэн «Шунды» огазеяськонзылэн кивалтӥсез Виолетта Анисимова, тодмо режиссер но актриса Ольга Александрова, кырӟаз Елена Шутова, Ижысь «Восточный» лулчеберетъя юртысь ӧнерчи.
Ӝытэз йылпумъяз Удмурт Элькунысь лулчеберетъя министр Владимир Михайлович Соловьев. Со пусйиз: Анатолий Уваров вордскемын Алнаш ёросысь Куашкам гуртын, нош отысь потӥзы уно усточиос, кудъёсыз удмурт лулчеберетэз азинто. Ачиз но В. М. Соловьев Анатолий Уваровлэн улосчиез (землякез) луэ, со поэтлэн гожтэм кылбурезъя но Николай Постниковлэн крезьгурезъя «Тыпылэсь меда, бадярлэсь меда» кырӟанзэ быдэстӥз.
