Анатолий Уваров кылбур гожъяны вазь кутскиз – нырысьсэ со печатласькиз 1947-тӥ арын. Дыр ортчемъя романтизм мылкыдо егит дыр лириказэ воштэ юмор. Солэн ӵушкась но серекъясь кылбуръёсыз элькунысь гинэ ӧвӧл, Совето Союзысь периодикаын но («Крокодил», «Человек и закон» журналъёс но мукет) потӥзы. Калык серекъян сямъёслы сӥземын «Художественное своеобразие удмуртской сатиры» (1979) монографиез. Мукетыз солэн тодмо тодослыко ужез – Октябрь революцилэсь азьвыл ужам удмурт гожъясьчиослэн-югдытӥсьёслэн И. С. Михеевлэн, И. В. Васильевлэн, И. В. Яковлевлэн но мукет авторъёслэн биографизы но творчествозы сярысь «Югдытӥсьёс» (1994) книга.
А. Н. Уваров ӟеч уж лэсьтӥз, дунне литератураез удмурт кылэ берыктыса. Венгер кылэз ас кожаз дышетыса, со удмурт лыдӟисез – пичизэ но, бадӟымзэ но – венгер поэзиен но прозаен тодматӥз («венгер литературалэн удмурт посолэз» шуизы Анатолий Николаевич сярысь та ужез дунъяса Будапештысь коллегаосыз). Берыктӥз финн кылысь «Калевалаез», Гётелэсь, Гейнелэсь, Байронлэсь кылбуретсэ, «Слово о полку Игореве» поэмаез, Библиез берыктонъя институтэн валче ужаса, Вуж Сӥзёнысь главаосын рукопись дасяз. Удмурт драмтеатрын солэн берыктэм пьесаосызъя – Еврипидлэн «Медея» трагедиезъя («Яратон но вожан») но финн нылкышно-драматурглэн Инкери Ильпиненлэн «Белые розы на столе» («Ӝöк вылын тöдьы розаос») драмаезъя спектакльёс пуктэмын вал. А. Н. Уваровлэн берыктон удысын ужамез вылӥ дунъямын вал: со «Калевала» финн огазеяськонлэн но венгер филология калыккуспо обществолэн дано ёзчиез луиз.
А. Уваровлэн аслаз чеберлыко произведениосыз берыктэмын венгер, поляк, финн, англи, бигер, чуваш, коми, пор, эрзя но мукет кылъёсы. Тросэз кылбуръёсызъя кырӟанъёс гожтэмын, соос пыремын «Италмас» но «Шулдыр ӝыт» ансамбльёслэн репертуаразы.
12+
Ужрад удмурт но ӟуч кылын ортчоз.
Ваньзэсты ӧтиськом. Пыронэз дунтэк.
