Семьялы сӥзем ужъёс котьку кылдо творчестволэн пӧртэм ӧръёсаз, изобразительной искусство сярысь веранэз но ӧвӧл. Солэн инъетэз – укшатон (метафора), одӥг суредэ гинэ со быгатэ пыӵатыны пӧртэм мылкыдо веросэз, повестез, сагаез но. Сюрс кылэз воштоз одӥг гинэ мур пуштросо деталь, саклыко учкись быгатоз сое «лыдӟыны», валаны солэсь историзэ, кудзэ суредасьлэн верамез потэ вал. Нош али асьмеос «лыдӟомы» семья сярысь мадёсэз.
- Мар бордысен семья кутске? Озьы, нырысь сюан ортчыто. Нош малы эмеспилы но вылькенлы куноос одно «курыт» шуо? Тазьы вазиськыны кемаласен сямлы пыремын. Сое пӧртэм валэкто. Кылсярысь, шуо, чупаськись эмеспиен вылькен «ческытгес» но «чылкытгес» кариллям «курыт вина» шуыса кесяськись куноослэсь виназэс. Яке, «курыт» – «горько» кылдэмын вашкала славян «гореть» кыллэсь, «горько», озьыен, «горячо» шуэмез валэктэ. Пӧсь чупасько бере, яратонзы но пӧсь луыны кулэ.
И. А. Безносов «Горько» (1967)
- Нылпитэм семья сярысь шуо, пе, сяська кадь, нош зыныз солэн ӧвӧл. Будозы пиналъёс но, оло, анай-атайзылэсь ужзэ азьланьтозы. Та пияш кадь, кудӥз дано песятаезлэсь-кафтанщиклэсь цилиндрзэ йыраз изьыяз. Соку семья луоз династия – малы ке шуоно борддоре шуккемын картина – песятаезлэн портретэз. Анаез но атаез пичи пизэс яратыса киязы возё – оружейник мед луоз.
П. С. Семенов «Династия ижевских оружейников» (2010)
- Петр Садофьевич Семеновлэн – «На пашне. Год рождения 20‑й» («Гырем бусыын. 20-тӥ арын вордскемын») суредаз возьматэмын анай-атайлэн нылпизэс яратэмзы, улон но солэн азинскемез сярысь малпанъёс. Красноармеец но солэн кышноез пичи пизы шоры учко. Ымнырзы югыт. Тани соос бороздае пиналзэс кельтозы но ожмаськыса, тэльмырыса басьтэм музъемазы кизьыны потозы.
П. С. Семенов «На пашне. Год рождения 20-й» (1977)
- Егит художник ассэ суредам, Груша сузэрзэ но йыраз горд кизилиё изьыен солдатысь бертэм атайзэ. Одӥг пыдын пияш кӧкыез лейкатэ. Пичи сузэрзэ ӝӧк пыд борды думем, медаз кошкы шуыса. Коӵыш но кеч аслаз кечпиеныз асьсэзы утёзы. П. С. Семенов озьы тодаз вае война вакытысь пичи дырзэ.
П. С. Семенов «Из кизнерского детства» (2002)
- Калыкын шуо: «Нылпитэм кышно-картъёс – сиротаос». Соин одӥгез тужгес но даноез праздник – нуны сюан. Мед луоз укно сьӧрын ӟырт кезьыт но буран, коркан шуныт но шумпотон мылкыд: вань семья выль адямилы кузьмаське.
В. Н. Морозов «Нуны сюан» (Б. Саушкинлэн «Нуны сюан» книгаезлы иллюстрация)
- Данъяськыса мынэ егит атай вордскем гуртэзлэн урамез кузя – нош со азьын солэн яратоно нылъёсыз вамышъяло.
Р. К. Тагиров «Семья» (1969)
- «Семья кужмо, куке улэ одӥг липет улын». Выль юртлэн липетэз ке со, кудаз тӥ басьтӥды выль квартира. Город пумын ке но мед луоз – П. С. Семеновлэн «Новоселы» («Яна потӥсьёс) картинаяз кадь, кудзэ солы заказтӥз Машзавод. Барышниковлэн ульчаяз лэсьтэм заводчиослы выль микрорайон вӧзын ик пичи тымет – отчы семьяен пыласькыны ветлӥллям. Тӧдьы унябей, пӧсьын тӧдьыектэм пӧсь омыр – гужем куазьлы далтӥз со арын инвожо толэзе.
П. С. Семенов «Новоселы» (1971)
- Аслаз семьяяз котькин но ас понназ бадӟым. Нош тыныд вить арес ке – веранэз но ӧвӧл. «Мон ачим!» – шуэ пичи пи, бадӟымъёслэсь адӟем карыса. Сузэр выж миськон борды басьтӥськиз бере, мынам кылеме уг поты – вае мыным но ужаны! Анайлы ӟеч юрттӥсьёс будо.
Д. В. Ходырев «Мамины помощники» (1955)
(Дмитрий Владимирович Ходыревлэн суредысьтыз одӥг тунсыко деталез сярысь лыдӟе милям библиотечной блогысьтысьтымы «На стене висит картина – холст, обрáмленный в багет...» публикациез.)
- Пичиос будо но атай юртысь кошко – егитъёсыз тодмотэмез но вылез бордаз кыске. Вордскем гуртаз пересьмем, юрттэт витись анай-атай кыле ке но. Петр Васильевич Ёлкинлэн «Напутствие» («Ӟеч кылъёс верам») картинаез сярысь искусствовед А. Поляк гожтӥз вал, «суредась татын возьматӥз сюрес быръён но пӧртэм арлыдо муртъёслэн кусыпсы сярысь философской малпанъёссэ». Кусыпъёс сярысь меда? Оло, люкиськон сярысь ик? Пересь атай зӥбыт кариськыны тырше. Тыбырзэ шонер возе, учкемез чурыт. Анаез нош ваньзэ шӧдыса сямен губырскиз, секыт ужам киоссэ алвылаз понэм. Пизы анай-атаез шоры уг учкы, ымдурыз вогъяськемзэ возьмато: «Мон кошко, мон верай…».
П. В. Ёлкин «Напутствие» (1978)
- «Ужез огнад лэсьтыса уд быдты». Нош крестьян семьялэн ужез котьку лачак – гужем но толалтэ. Гурт улонэз но крестьян ужез тодон юрттӥз Менсадык Гарипович Гариповлы удмурт гуртлэсь дуннезэ суреданы – огвакытэ векчи детальёсын но, кылбурчи сямен образъёс шедьтыса, серемес палзэ возьматыса. Выжыкыллы суред выллем адске солэн «Ыж ӵышкон» офортэз. «Тӥ понна ке со выжыкыл, нош мыным – улон», – вералоз вал суредась.
М. Г. Гарипов «Ыж ӵышкон»
- Менсадык Гариповлэн атаез ӟеч кузё но муш вордӥсь вал, нош анаез – юртэз утись. Суредась вералляз трос ужамзы сярысь – ӵукнаысен ӝытозь юрт котыразы бергазы. Сыӵеен ик соосты суредам «Веник керттон» суредаз: анайзэ Ямига Николаевнаез но атайзэ – Гарип Нуритдиновичез. Кыӵе яркыт та картина! Оло, пуксись шунды лапасэ пыре, оло, возьматэмын вуоно мунчолэн пӧсез но мунчо бере гордэктэм мугоръёс – веникен пудоез гинэ уд сюды ук.
М. Г. Гарипов «Веник керттон» (1987)
- Тани турнан вакыт – луллы шумпотон, вань семьялы уж. «Казмасские травы» («Казмас турын») – Василий Николаевич Морозовлэн чебер дуннез кылдытэмын аслаз дунне шоры учконэзлы гинэ луыса ӧвӧл, вордскем шаерзэ но яратыса. Суредам дуннеысь котькуд сэрег тодаз вайытэ художниклэсь вордӥськем палъёссэ.
В. Н. Морозов «Казмасские травы» (1987)
- Эшшо одӥгез турнан дыр – льӧль-льӧль, кытын кусо шуккем пель сьӧрын кылӥське кадь. Вань семья люкаськемын, пичи нылпизы но анай тыбыр сьӧрын ныпъетын пуке. Картина буёлъёсты учкыса, тодмаськод Вячеслав Ильич Михайловлэсь ужзэ. Одӥг пол солэсь юаллям: кытысь сыӵе паймымон суредъёс кылдытыны быгатонлык? «Пичи дырме тодэ вайыса, – шуэм В. Михайлов. – Мон нянь сиыны ёрмыса будэмын, но пичи дыры луиз быдэс творчествоелы инъет.
В. И. Михайлов «Родник. Июнь» (1998)
- «В. Михайлов тау каре анаезлы, гуртысь кышномуртлы, кудӥз пичи пиезлэсь суреданы мылкыдзэ валаз. Со пиезлэн быгатонлыкез бадӟым шуыса оскиз но дышетскыны лэзиз. Зэмос суредась луэмез бере, В. Михайлов анаезлы одӥг суредзэ сӥзем – “Памяти матери. Трудное лето” ("Анаез тодэ вайыса. Секыт гужем", 1987). Сюлэмшуг мылкыдэн пыӵамын суредысь буёлъёс, сыӵеесь ик художниклэн матысь муртэз сярысь буйгасьтэм малпанъёсыз» (Ю. Лобанов).
В. И. Михайлов «Памяти матери. Трудное лето» (1987)
- «Мар ужад, сое ик сиёд». «Ужам бере сиён ческыт кошке». Ужан нуналъёс бере юмшан дыр но вуиз, сое бӧлякен ортчытэм потэ. Пичиысен вордскем гуртысьтыз праздникъёсты яратӥз Семен Николаевич Виноградов. Солэн фигуратив суредъёсыз – огшоры улон-вылонысь сюжетъёс, кудъёсыз бусы ужъёслы но сиён пӧранлы сӥземын, соос калык драмалы тупало, яркыт буёлъёсыныз шумпотто. «Табани» («Табань») суредын бадӟым крестьян семья. Толалтэ нунал. Коркан гур ӝуа, со котырын пӧраськись кышномурт берга, табань пыже. Пӧсен кыӵе со ческыт. Пичи пи тыл бордысь синзэ уг басьты. Нош коӵышсы – ӝӧк сьӧрын пукись муртъёс шоры учке – сюдэмзэс возьма. Пыр-поч учке ай «Праздничный день в удмуртской избе» («Удмурт коркан праздник дыръя») суредзэ – мар сярысь со тӥледлы вералоз.
С. Н. Виноградов «Табани» (1978)
С. Н. Виноградов «Праздничный день в удмуртской избе» (1960)
- Юмшанъёс ортчо, аръёс но кошко. Но зэмос яратон улэп – кайгырон дыръя но, шумпотыку, висьыку но тазалыкед вань дыръя. Аръёс ӵоже валче улэм кузпалъёс ог-огзэс кыл вератэк но валало. Толэзьлэн пиштэмез но мыным тырме, учкемысьтыд мылкыддэ валаны, шыпытын но малпанъёстэ кылӥсько… П. В. Ёлкинлэн «Раздумья. Автопортрет с женой» («Малпанъёс. Кузпалэным автопортрет») картинаез шара возьматэм мылкыдыныз бордаз кыске учкисез.
П. В. Ёлкин «Раздумья. Автопортрет с женой» (1996)
- Алексей Павлович Холмогоровлэсь «Родной дом» («Вордскем юрт») картиназэ учкыса, сюлэме шуныт пыре. Та суредзэ со яратӥз. Суред вылын – гуртысь корка пуш, укно дурын анаеныз атаез пуке. Картинае пыӵамын суредасьлэн пичи дырыз но егит дырыз сярысь тодэ ваёнъёсыз.
А. П. Холмогоров «Родной дом» (1977)
- Семьялэн портретэз синпельлы. Суред вылын – котьку шорад капчи мыняса учкись дуно адямиосыд. Ужан нунал бере, ӝытазе семья люкаськиз усьтэм укно вӧзы. Отысен завод адӟиське. Со заводын ужазы песятайёс, ужало атайёс но, оло, нылпиос, нунокъёс но ужалозы. Династилэн портретэз возьматэмын П. С. Семеновлэн «Семья. Ижевские металлурги Обуховы» («Семья. Ижкарысь Обухов металлургъёс». 1979) ужаз. Нош тани аслаз художниклэн семьяез – «У зеркала» («Синучкон вӧзын». 1975) суред вылын. Картинаысь интывыл (пространство) радъямын тазьы: синучкон азьын анаезлэн но пиезлэн сайкыт ымныръёссы, нош комнатаезлэн перспективаезлы луыса, адско мукет матысь ӵыжы-выжыоссы, собере синйылтӥськод рамаез – кема ар ӵоже борддорын возьыса вужмем, бездыны кутскем туспуктэмъёсын...
