Ува палъёсысь тросэз писательёс азинтӥзы удмурт литератураез но солэн историяз кылизы. С. Т. Арекеева куд-ог нимъёсты пусйиз: Матвей Кельдов, Петр Блинов, Михаил Лямин, Григорий Симаков, Людмила Кутянова, Галина Романова. Нош аслэсьтыз литератураен герӟаськемзэ Светлана Тимофеевна валэктӥз тазьы: «Мон уг гожъяськы ке но произведениосты, эскерисько писательлэсь творчествозэ, чеберлыко гожтосъёс кылдытон амалъёсты».
С. Т. Арекеева вордӥськиз но будӥз Ува ёросысь Косойгуртын. Татчы фольклор бичаны ветлӥзы тодмо писательёс: Кузебай Герд, Игнатий Гаврилов. Светлана Тимофеевналэн анаез, Елизавета Терентьевна, куать гуртлы першал луыса ужаз. Соку калык гуртын улӥз, семьялы быдэ трос нылпи будӥз. Елизавета Терентьевнаез ассэ но гажазы, семьязэ но. Пичи дыръяз Светлана Арекееваез пичи першал шуо вылэм, анаезлы ужаз юрттӥськемез понна.
Атаез, Тимофей Романович, колхозын счетовод, кладовщик, бухгалтер луыса тыршиз. Светлана Тимофеевна тодаз вайылэ атаезлэсь школаын дышетэм кылбуръёссэ адӟытэк вераны яратэмзэ. Тимофей Романович войнае бырем атаезлэсь ужан тӥрлыксэ синпельлы утьыса возем, ачиз но кибашлы вылэм. Песятайзэ но, ӵужатайзэ С. Арекеевалы адӟыны ӧз кылды: кыксы ик быризы Быдӟым Атыкай ожын. Нош ӵужанаез Мария Марковна огназ куинь нылпи будэтӥз, кема дыр ӵоже картсэ войнаысь витиз.
С. Т. Арекеева тодон-валан басьтӥз Косойгуртысь начальной школаын, собере Жужгес шоръёзо школаын. Классэс, асьсэ нылпиоссэс кадь, туж яратӥзы но трос тодон-валан сётӥзы Туйманцев кузпалъёс: Юлия Терентьевна но Дмитрий Семенович. Светлана Тимофеевнаен одӥг классын дышетскиз Людмила Леонидовна Карпова – лингвист, кылосбур тодосъя доктор. Л. Л. Карпова ӝытын пусйиз: Светлана Арекеевалэсь сочинениоссэ дышетӥсьёс классазы шара лыдӟо вал. Солэн сочинение умой гожтыны быгатэмез – трос лыдӟиськемез бордын. Библиотекаысь котьку трос книга басьтылэ вылэм. Литератураез, кинематографез но театрез сое яратыны дышетэм родной апаез – Эльза Тимофеевна, Жужгес школаысь бадӟым классъёсты литератураен дышетӥсь.
Светлана Тимофеевналэн гожъямъёсыз нырысьсэ печатласькизы «Дась лу!» нылпи газетын. Со тодаз ваиз газетлэн юнкоръёсызлэн слетазы пыриськемзэ. Вунонтэм кылиз Трофим Архипов писателен пумиськон. «Лудӟи шур дурын» книгазэ С. Т. Арекеева трос пол лыдӟылэм 4-тӥ классын. Романысь геройёс улэп адямиос кадь пото вал, шуэ со.
Мукетыз школа вакытысь тодэ ваёнэз – Жужгес школаысь дышетскисьёсын «Визьмын, кужмын, эшъёсын» телевизионной ӵошатсконэ пыриськон. Командаез дасян понна гуртэ вуылӥзы та передачалэн авторъёсыз – Семен Карпов но Василий Михайлов удмурт тележурналистъёс но писательёс.
Школаез быдэстыса, С. Т. Арекеева дышетсконзэ азьланьтӥз Удмурт кун университетысь кылосбуръя факультетын. Солэн курсаз таланто адямиос ӧжыт ӧй вал. Пӧлазы витез луиз тодосъя кандидат: педагогикая – Маргарита Федоровна Сельченкова, Светлана Тимофеевна Арекеева, историяя – Миннияхметова Татьяна Гильнияхметовна, кылосбуръя – Виктор Леонидович Шибанов, Людмила Леонидовна Карпова. Студент группаысьтызы куинь удмурт писатель потӥз: Вячеслав Ар-Серги Удмуртиысь калык писатель, Виктор Шибанов но Надежда Гильманшина кылбурчиос. Тау карыса С. Т. Арекеева вераз дышетӥсьёсыз сярысь, соос пӧлын Даниил Яшин кылбурчи но фольклорист, кылчиос Роза Яшина, Иван Тараканов, литературатодосчи Надежда Кралина, Елена Подшивалова но мукетъёс.
Университетэз быдэстыса, Жужгес школаын куинь ар ужамез бере С. Т. Арекеева Москвае аспирантурае дышетскыны пыриз, Геннадий Афанасьевич Ушаков профессорлэн кичӧлтэмезъя. Кызьы пусйиз С. Т. Арекеева, Г. А. Ушаков сюлмаське вал кадръёсты будэтыны. Солэн тыршеменыз педагогика тодосъя кандидат луизы Надежда Витальевна Лекомцева, Валентина Михайловна Ившина, Любовь Петровна Федорова, Маргарита Родионовна Федорова. Геннадий Ушаков юрттыны, бурдъяны быгатэ вал. Озьы ик Светлана Тимофеевна ӟечен тодаз ваиз В. К. Кельмаков профессорез. Удмурт кылосбур факультетысь литературоведъёслэсь кафедразэс Валей Кельмакович туж кужмоен лыдъяз. Литературатодослыко ужъёссэ С. Т. Арекеева гожъяз, А. Г. Шкляевлэсь дышетскыса.
Йӧскалык школаослэн тодосъя но эскеронъя инстутысь аспирантураяз куинь ар ӵоже (1987–1990) очной амалэн дышетскыса, С. Т. Арекеева гожтӥз но утиз диссертацизэ. Ӵукнаысен бер ӝытозь Ленинской библиотекаын пукыса пӧрмиз со, шуиз Светлана Тимофеевна. Дышетскон вакытаз улон интыен шугъяськонъёс кылдӥзы ке но, аспирантураын дышетскемез пумысен со уг жаля.
1991-тӥ арын С. Т. Арекеева Удмурт университетын ужаны кутскиз. Соку удмурт кылосбур факультетысь литературоведъёслэн кафедраенызы кивалтӥз Александр Григорьевич Шкляев. Отын кылдӥз туж ӟеч команда. Тодосчиос книгаосын серия дасян борды басьтӥськизы. Печатласькизы муресь тодос ужъёсын бичетъёс: «Движение эпохи – движение литературы», «Удмуртская литература XX века: направления и тенденции развития».
Удмурт литератураез эскеронын С. Т. Арекеева басьтӥськиз 1920–1930-тӥ аръёсы кылдэм произведениосты сэрттон-пертчон борды. Со 150-лэсь ятыр тодос ужъёс гожтӥз. Соос пӧлын «Г. С. Медведевлэн чеберлыко дуннеез ("Лӧзя бесмен" романэзъя)» учебно-методической юрттэт (1997), Л. П. Фёдороваен валче дасям «Поэтика портрета в удмуртской литературе» (2005) учебной пособие. С. Т. Арекеева 1919-тӥ–1935-тӥ аръёсы удмурт журнал-газетын печатласькем веросъёсын «Сюрес вожын» (2010) бичетэз люказ, радъяз но азькыл, валэктонъёс гожтӥз. 2023-тӥ арын печатласькем «Удмурт литературалэн историез» выль коллективной монографилэн инъетэз луизы тодосчилэн аръёс ӵоже гожтэм статьяосыз но эскеронъёсыз.
– 1992-тӥ арысен ми дасяны кутским школаын удмурт литературалы дышетон программа, люкаськиз усто коллективмы, – азьланьтэ С. Т. Арекеева, – дас арскын со дасям материалъёсты уже кутыса, 2002-тӥ арын поттӥмы программа но усто учебникъёсын серия. Ми дышетон удысысь выль стандартъёслэсь куронъёссэ азьпалтӥмы – соос ваньзы милям учебникъёсамы лыдэ басьтэмын вал ини.
2008-тӥ арын С. Т. Арекеева Г. А. Ушаков, Л. П. Фёдорова, А. Г. Шкляев, В. Л. Шибанов шоръёзо школаысь 5-тӥ–8-тӥ классъёслы «Удмурт литература» учебникъёсын комплект понна Кун премилэн лауреатъёсыз луизы.
Но, кызьы пусъе тодосчи, жаляса верано, дыр вуэ выль учебникъёсты дасяны, нылпиос удмурт кылэз ляб тодо ни. Светлана Тимофеевна сюлмаське удмурт кылосбуръя ӧнерчиосты дасясь факультетлэн азьпал нуналэз понна. – Асьме институтмы (Удмурт кылосбуръя, финно-угроведениея но журналистикая институт) мед улоз, мед азинскоз. Ведь ми дасяськом удмурт лулчеберетэз возись но вӧлмытӥсь кадръёсты. Соос котькытын ужало – нылпи садын, школаын, лыдӟетъюртын, прессаын, шуэ С. Т. Арекеева.
Творческой ӝытын Светлана Арекеева сярысь ӟеч кылъёс веразы эшъёсыз но коллегаосыз: Л. Л. Карпова, Л. П. Федорова, Т. И. Зайцева, В. Л. Шибанов, Вячеслав Ар-Серги калык писатель, «Кенеш» литературной журналлэн валтӥсь редакторез Анастасия Шумилова но редакциысьтыз ӧнерчи Галина Евсеева. Ужрадын Удмурт кун университетысь студентъёс кылбур лыдӟизы, нош «Чипчирган» ансамбль кырӟан быдэстӥз.
