Тодмо композитор, скрипкаен шудӥсь Илья Петухов Эльвира Калабанова концертмейстерен быдэстӥзы скрипкалы концертысь адажио кантабиле. Таиз крезьгур чузъяськыку, удмурт кылзӥсь одно ик тодмо калык гуръёсты кылэ. Капчи, тодэ кылись крезьгур – со композиторлэн зол тыршыса, пӧсяса ужам емышез.
Г. Корепановлэн матысьёсыз пусъё композиторлэсь рос-прос сямзэ. Н. В. Гогольлэн аслаз творчествоез сярысь тазьы пусъемез вань: «Мон сютэм куло, но мапаськытэк, визь понытэк гожтэм уж уг печатла». Озьы тыршиз удмурт композитор но. Талантэзлы луыса, котьку дышетскыса но ӝабырскыса ужаса Г. Корепанов аслэсьтыз льӧль малпанзэ улонэ пыӵатӥз – опера кылдытӥз.
Озьыен, «Наталь» (1961) нимо нырысетӥ удмурт опера возьматӥз, макем вылӥе ӝутӥськиз удмурт профессиональной музыка. Операын ӟеч усьтӥськиз Г. Корепановлэн тодэ кылись крезьгур гожтыны быгатонлыкез. Со композитор сямен удмурт фольклорысь крезьгуран амалъёсты валаса, аслыз гинэ тупась аспӧртэм музыка кылдытӥз.
Крезьгурез яратон Г. А. Корепановлэн семьяезлы но пыӵаз. Пиез, Александр Германович Корепанов – Удмуртиысь искусство удысысь дано ужась, элькунысьтымы симфонической но хоровой крезьгурез азинтонлы трос кужымзэ сётӥз. А. Г. Корепановлэн нылъёсыз – пианисткаос, Мария Александровна Павлова но Людмила Александровна Хитрина, дышето Крезьгуръя элькун колледжын фортепьяноен шудыны. Ӝытын Корепановъёслэн семьязы – Александр Корепанов, Мария Павлова, Людмила Хитрина, Александра Павлова, Вадим Пак – быдэстӥзы Герман Корепановлэсь «Чагыр конверт» но Александр Корепановлэсь «Полька» крезьгуро гожтосъёссэс.
Александр Корепанов шуиз: атаез ӟырдыт яратэм крезьгурез но литератураез. 13 аресказ Г. Корепанов утчаз ассэ роман гожтыса, веросъёс но кылбуръёс, «Затерянный мир» научно-фантастической поэма гожтӥз, быдэс улонэз ӵоже дневник нуиз. Литератураез гажамез солы зол юрттӥз кырӟан удысын: Г. Корепанов валаз, кылбурлы крезьгурез тупатыку, крезьгур интонация сяна, одно ик лыдэ басьтоно текстлэсь пуштроссэ но отчы пыӵатэм мылкыдъёсты. Композитор эшъяськиз удмурт кылбурчиосын. Тужгес но матысь эшез вал Степан Широбоков. Дэбесын улӥсь С. Широбоковен гожтэт пыр кенешыса, композитор ог витьтон котыр кырӟан кылдытӥз.
Г. Корепанов дораз бадӟым библиотека люкам. Нылызлэн, Наталья Корепановалэн верамезъя, семьяез куанер ке но улӥз, атаез котьку уксё шедьтӥз книгалы. Совето ульчаысь 15-тӥ юртын улыкузы, кык комнатаен квартираязы куинь бадӟым книгаен шкафъёс сяна, Г. Корепановлэн книгаосыз ӝужыт радъёсын интыямын на вал ужан ӝӧк вылаз. Со сяна, ог куамынлэсь ятыр журнал-газетлы гожтӥськем, пӧлазы «Удмуртская правда», «Советской Удмуртия», «Комсомолец Удмуртии» газетъёс, удмурт литературалы сӥзем «Молот» журнал, озьы ик «Советская культура», «Музыкальная жизнь», «Театральная жизнь», «Советская музыка», «Литературная газета», «Иностранная литература», «Нева» журналъёс. Тае ваньзэ Герман Афанасьевич учкыса-лыдӟылыса вуттэм.
Куинь висъето выль патерын Г. Корепанов зэмос дорысь библиотека сярысь малпанзэ быдэстӥз. Выж вылысен вӧлдэтозь борддоре шуккем ӝажыосы со вань книгаоссэ интыям, нош Александр пиез Кузонысь нимысьтыз пагӟа басьтыса ваем. Библиотекаысьтыз котькуд книгазэ Г. Корепанов одно ик лыдӟе вал.
Покчи нылыныз Герман Афанасьевич кылъёс малпаса шудэм, трос букваем кылысь вакчи кылъёс пӧрмытыса. Ӵемысь нылыз атаеныз споръяськем, таӵе кыл ӧвӧл, атаез сое ачиз малпаз, дыр, шуоз вылэм. Г. Корепанов сыӵе учыре соку ик ӵектылӥз кылэз кыллюкамысь эскерыны. Таӵе шудонъёслы луыса, Корепановъёслэн нылпиосызлы книгаез яратон пыӵаз.
Ӝытэ ӧтем куноос Герман Афанасьевичлэсь небыт сямо, адямилыко луэмзэ пусйизы. Со сярысь ӟечен тодэ ваизы Удмуртиысь искусство удысысь дано ужась, композитор Юрий Толкач, Россиысь дано артист но Удмуртиысь калык артист Николай Копысов, Удмуртиысь кун премилэн лауреатэз, искусство удысысь дано ужась, композитор Евгения Владимировна Копысова, Россиысь лулчеберет удысысь дано ужась Иван Петрович Шкрабов.
Композиторлэн творчествоныз но биографиеныз пыр-почгес тодматскыны ӵектӥськом «Сердце, живущее музыкой: к 100-летию Г. А. Корепанова» адӟытонысь. Кызьы сое вотэсбамысьтымы учкыны, дышетэмын нимысьтыз руководствоын.
