Библиотекаын таӵе ёзэтэз усьтон луиз Удмуртиын литературной музеез кылдытонын огез бадӟым вамыш. Калыклэн, творческой интеллигенцилэн малпаназ со кемалась ни вал.
Йӧскалык библиотекаысь Литературной адӟытонъёсын центрез усьтонлы кичӧлтӥсь луиз Удмурт Элькунысь лулчеберетъя министр Владимир Михайлович Соловьев. Со мур гажаса вераськиз алигес улонысь кошкем тодосчилэн Валентин Кельмакович Кельмаковлэн писательёслэсь архивъёссэ утись литературной музей усьтон пумысен сюлмаськемез сярысь.
В. К. Кельмаков Россиысь но финн-угор дуннеысь бадӟым удмурт кылчи, та ӵектослэсь кулэлыксэ ӟырдыт валэктылӥз статьяосаз но пумиськонъёсын, кивалтӥсьёсын нимысьтыз вераськонъёсы ветлӥз.
В. М. Соловьев шуиз, литературатодосчилэн Надежда Петровна Кралиналэн вордскемез дырысен 100 ар тырмонзэ пусйыса, Ижысь Советской ульчае буре ваён пул юнматэмзы бере выльысь ӝутэмын вал литературной музеез кылдытон ужпум. Малы ке шуоно кошке быдэс поколение. Историез возьматӥсь тунсыко материалъёс медам ыше шуыса, Йӧскалык лыдӟетъюртын литературно-выставочной центр кылдытон – со литературной музейлы узыр материал дасяны кутскон луэ.
Литературно-выставочной центр юрттоз удмурт литературалэн историеныз тодматыны, али вакытэ гожъясьчиос понна но пайдаез бадӟым луоз. Йӧскалык лыдӟетъюртлэн даур ӵоже люкам фондаз утисько книжной коллекциос: соос дасямын тодмо адямиослэн дор библиотекаысьтызы быръем книгаослэсь. Коллекциослэсь оглюкетсэ возьматӥзы ужрадлы дасям нимысьтыз адӟытонын.
Экспозицие пыртэмын вал Кузебай Герд, Ашальчи Оки кылбурчиослэн 1920-тӥ аръёсы потэм книгаоссы, Игнатий Гаврилов но Егор Загребин драматургъёслэн пьесаоссылэн рукописьёссы, удмурт нылпи кылбурчилэн Герман Ходыревлэн но ӟуч поэтлэн Олег Поскрёбышевлэн доразы возиськем библиотекаосысьтызы автографъёсын книгаос, калык писательлэн Семён Самсоновлэсь рукописьёсыз но нимысьтыз та адӟытонлы ваем экспонатъёс. Кылсярысь, Марина Германовна Ходырева музыковед но композитор сётӥз атаезлэсь Герман Ходыревлэсь дэремзэ но балалайказэ, блокнотсэ но кигожтосъёссэ.
Литературной музейлэн кулэлыкез сярысь пумиськонын вераськизы лулчеберетъя министр Владимир Соловьев, Йӧскалык лыдӟетъюртлэн директорез Татьяна Тенсина, Кун Кенешысь культурая, туризмъя но йӧскалык политикая комиссилэн, «Удмурт Кенешлэн» тӧроез Андрей Ураськин, «Удмурт дунне» газетлэн валтӥсь редакторез, Удмуртиысь Писательёслэн огазеяськонзылэн ёзчиез Елена Миннигараева но литературатодосчи Надежда Лекомцева, литературоведлэн, писательлэн Анатолий Уваровлэн ӵужодӥгез.
