Лекциез нуиз Йӧскалык но шаертодон литературая но библиографияя Центрысь библиотекарь, кылосбур тодосъёсъя кандидат Л. А. Дмитриева. Трос аръёс ӵоже гожъяськись прозаикъёс, тодмо удмурт писательёс Ульфат Бадретдинов, Римма Игнатьева, Лия Малых, егитъёс Мария Векшина, Дарали Лели берло аръёсы шумпоттӥзы лыдӟисез, роман гожтыса яке нимаз книгаен сое печатласа. Мӧйымем бере литература борды басьтӥськизы но та удысын усто азинскизы Любовь Ганькова, Анатолий Байтэрег, Александра Бочкарёва. Соос повесть, верос, тодэ ваёнъёс жанрен произведениос гожъяло.
Вакчияк ивортом лекцилэн пуштросэз сярысь. «Игнаш сайкемын» романзэ Римма Игнатьева 2000-тӥ аръёсы печатлаз ни «Кенеш» журналын. 2020-тӥ арын 600 бамъем книга «Удмуртия» книгапоттонниын печатласькиз. Дарали Лели пусйиз: удмурт литературалэн историяз Римма Игнатьева удмурт нылкышноос пӧлысь нырысетӥез роман гожтӥз. Произведениын одӥг семьялэн историез но валтӥсь геройлэн Игнашлэн кузь улонэз пыр возьматэмын удмурт крестьянъёслэн нуналысь нуналэ улэмзы, 19-тӥ даурысен кутскыса, Граждан ож вакытозь. Туала Кез ёросысь уйпал удмуртъёслэн вераськетсы быгатыса пыртэмын произведениелэн литературной кылаз.
Ульфат Бадретдинов «Туннэ – ӵуказелэн кутсконэз» (2022) романаз суреда 20-тӥ даурлэн пӧртэм вакытъёсаз улӥсь удмурт интеллигенциез. Валтӥсь герой карыса автор быръем историысь зэмос адямиез – югдытӥсез но удмурт кунлыкез радъясез Максим Прокопьевез, романын солэн вакчи но яркыт улон сюресэз возьматэмын. Произведениысь мукетыз сюжетной линия 1990-тӥ аръёсты усьтэ: Максим Прокопьевлэн улосчиез Серафим Николаев Ижкарысь удмурт кылосбуръя факультетэз быдэстыса, берытске вордскем палъёсаз – Татарстанысь Кукмор ёросэ но дано удмурт политиклы синпелет пуктон ужез радъяны турттэ. Шӧдтэк шорысь Серафимлы пыд пуктӥсьёс сюро – Нырьялан но, бускель бигер гуртын но удмурт югдытӥсез уг ярато вылэм. Солэн мугез исторической югдурен герӟаськемын – Граждан ож вакытэ пыӵалэн муртъёс Максим Прокопьевлэн нимыныз крестьянъёслэсь кӧня ке пол юзэс люкаса, калыкез няньтэк кельтӥллям. Гуртоослэн йыркурез Максим вылэ усем. Трос аръёс ӵоже сыӵе вӧсь карись тодэ ваёнэн улӥсь калык Максим Прокопьевлэсь нимзэ тодэ ваёнлы но данъянлы пумитъяське. Романысь куинетӥез сюжетной линия возьматэ камсьӧр удмуртъёс пӧлысь дышетскем удмурт нылкышнолэсь Светлана Куноевалэсь улонзэ но удмурт лулчеберетэ сюрес лёгемзэ.
Лия Малых «Усьты синъёстэ» романаз (печатласькиз 2023-тӥ арын «Кенеш» литературной журналын) тодматэ лыдӟисез удмурт гуртысь одӥг семьяысь нылкышноослэн адӟонэнызы. Та семьяысь воргоронъёс бырыны шедё бадӟымесь исторической событиос сэрен – колхоз кылдытон вакытэ кулаке поттыса, Граждан но Быдӟым Атыкай тыложъёсын, озьы ик депрессивной мылкыдъёслы луыса. Романын Л. Малых пыр-поч усьтэ гуртысь нылкышнолэсь психологизэ но малпаськон ӧрзэ.
Тунсыко сюжетэн, узыр удмурт кылэн гожтэм книгаосынызы паймыто нимысьтыз дышетскем басьтытэк, мӧйымыса гожъяськыны кутскем авторъёс. Пӧлазы – Алнаш ёросысь гожъясьчи Любовь Ганькова. Со 15 книга поттӥз, ужъёсыз – шаертодонъя но калык кылосэн бичетъёс, кылбур-веросэн книгаос.
Алнаш ёросысь Ляли гуртын вордскем автор Анатолий Никитич Байтеряков гожъяське Анатолий Байтэрег кушем ним басьтыса. 2022-тӥ арын со печатлаз «Италмасо вырйыл» кузьвероссэ. Повестьысь мадёсчи тодаз вае вордскем гуртаз ортчем пичи дырзэ, суреда туала вакытэ мынӥсь улонзэ. Али со ини мӧйымем воргорон, шутэтскон нуналъёсы гинэ бертылэ вордскем гуртаз оген улӥсь анаез доры, кудӥз весь возьма пиезлэсь дораз улыны берытскемзэ.
Повестьын возьматэмын лялиослэн вераськон манерзы. Мадёсчи быгатыса суреда инкуазь суредъёсты, кудъёсыз тужгес но дуно гуртысь адямилы – гужем вож лудъёс, толалтэ чилясь, пыд улын ӟукыртӥсь лымыен шобырскем бусыос. Соин валче повестьын оскымон возьматэмын гурт калыклэн тыложын бырем ӵыжы-выжыоссы пумысен бырисьтэм куректэмзы.
Лекциын пусъем удмурт писательёс пӧлысь тросэз нылкышноос луо. Озьы ик туала удмурт литератураын валтӥсь героез но али – нылкышно. Удмурт авторъёс солэсь секыт улонзэ возьмато но лулпуш дуннезэ усто суредало, туала ӟуч но дунне литератураен валче мыныса.
