Автор тодматэ Кияса ёросысь Салья гуртысь калык кылосэн. Книгаез удмурт фольклоръя усто бичетъёс пӧлы пыртыны луоз. Автор пыр-поч возьматэ, кызьы сальяос ортчытӥллям семья сэбедэз (сюанэз, нуны сюанэз, пинял куноез) ар вакытлы тупась йылолъёсты (бусы сюанэз, сялтым вӧсянэз, сӥзьыл кисьтонэз); куд-огез сценарий формаен но сётэмын – тулыс но гужем ортчись возь выл шудонъёс, солдатэ келян.
Книгаысь быдэс глава визькылъёслы сӥземын – соос туж трос, автор соосты алфавитъя радъяса сётэ. С. Вахитов пусъе калык эмъяськон амалъёсты но: одӥгез статья пелляськон кылъёс сярысь, мукетыз статья висёнъёсты эмъяку кутӥськись турын-куаръёсын тодматэ.
С. Вахитов удмурт кыллэсь узырлыксэ эскере. Кылсярысь, антропонимъёсты возьматэ: кызьы туала гуртын удмуртъёс ог-огзылы ним сёто, кызьы ӵыжы-выжыосты нимало. Сальялан одӥг кадь нимен ветлӥсь нылкышноос ог-огзэс адаш шуо, нош пиосъёс ог-огзылы паньтэмъёс шуыса вазисько.
Шаерчи гожтэ Салья воршудэз утчамез сярысь но. Дышетскисьёсыныз валче С. Вахитов ветлэм шаермылэн пӧртэм сэрегъёсаз Салья нимен интыосын тодматскон понна. Соос Киров улосвылысь Кильмезь ёросысь Салья гуртэ экспедицие потазы, Татарстанысь Балтач ёросысь Вуж Кушкет гуртэ Салья урамазы вуизы, Пичи Пурга ёросысь Салья гурезез адӟизы.
Одӥг книгае люкам пӧртэм статьяос возьмато, макем узыр Салья гуртлэн но удмурт калыклэн лулчеберетэз, макем тунсыко солэн дунне шоры учкемез. Книга печатламын «Йӧскалык прессалэн юртэз» издательствоын. Тау кариськом С. С. Вахитовлы но Йӧскалык прессалэн юртэзлы библиотекамылэн вотэсбамаз выль книгаез поттыны мылкыд каремзы понна.
