55
УИИЯЛ но Йӧскалык лыдӟиськонни трос аръёс ӵоже ни удмурт тодослыкез но лулчеберетэз азинтон бордын тыршо. Берпуметӥез валче радъям ужрад – кык томен «Русско-удмуртский словарь»-лэн презентациез, озьы ик УИИЯЛ-ысь ӧнерчиосын шаермылэн юбилеезлы дасямын вал.
Йӧскалык электрон лыдӟиськонни кылдытон – валче ужамлэн одӥгез ӧрез. Институт лыдӟиськоннилы луонлык сётэ ӧнерчиосызлэсь гожтэм книгаоссэ оцифровать карыны. Йӧскалык лыдӟиськонни институтлэн фондысьтыз газетъёсты утён вылысь архивной номеръёссэ оцифровать каре.
Кема аръёс ӵоже валче ужамлэн емышез луиз УИИЯЛ-ысь ӧнерчиосын кылдытэм «Национальный корпус удмуртского языка» – информационно-справочной сӧзнэт, кудӥз люка удмурт текстъёсты электрон вариантэн. Проектлэн сайтаз кык люкет: корпус но кыллюкам. Корпусэ пыремын удмурт кылын книгаосысь но периодика поттэтъёсысь люкетъёссы. Куд-огез соос пӧлысь луэ Йӧскалык электрон лыдӟиськоннилэн «Удмуртская книга» коллекциысьтыз.
Кыллюкаме пыртэмын удмурт-ӟуч (2008) но ӟуч-удмурт (2019) кыллюкамъёслэн электрон версизы. Кылысь кылэ берыктон сяна татын луэ на удмурт кылъёслэсь чузъяськемзэс кылӟиськыны. «Гипертекстовой» берыктонэз но уже кутыны луонлык вань. Курсорез пуктоно удмурт текстысь кыл вылэ, солэн улаз ӟуч кылэ берыктэмез потоз.
Та ресурс кылдытэмын удмурт кылэн тунсыкъяськисьёс понна: ӧнерлыко кылчиослы, кылэз дышетӥсьёслы, дышетскисьёслы, студентъёслы но ас кожаз кылэз эскерисьёслы.