#ЛУЧШЕДОМА
На время всеобщей самоизоляции Национальная библиотека УР переходит на новый формат работы. Информацию об онлайн-мероприятиях, услугах, ресурсах и сервисах для удаленных пользователей вы можете посмотреть здесь

Версия для слабовидящих

Выль тулкымъёс Удмуртиысь литератураын

Выль тулкымъёс Удмуртиысь литератураын

23-тӥ оштолэзе «Удмурт шаер» клубын «Выль тулкымъёс Удмуртиысь литератураын = Новая волна в литературе Удмуртии» нимо пумиськон ортчиз, кудаз литературатодосчиос но критикъёс, периодической изданиослэн валтӥсь редакторъёссы, элькунлэн куноосыз – Татарстанысь но Башкортостанысь удмурт школаослэн директоръёссы, литературая огазеяськонъёслэн но клубъёслэн ёзчиоссы, удмурт но ӟуч кылын гожъяськись егит авторъёс пыриськизы.

Ужрадэз нуиз кылосбур тодосъёсъя кандидат, Удмурт Элькунысь Тодон-валан удысын ужасьёслэсь быгатонлыксэс будэтонъя но выльдонъя институтысь удмурт кылосбуръя но йӧскалык кылъёсъя кафедралэн кивалтӥсез Андрей Александрович Клементьев. 

 

Удмурт Элькунысь лулчеберетъя, печатья но ивортодэтъя министрлэн воштӥсез Пётр Павлович Данилов пумиськонлэн пуштросэзлэсь туалалыко луэмзэ пусйиз. Со ивортӥз, Удмурт Элькунысь Кивалтэтлэн Президиумезлэн заседанияз литература но литературая критика удысын ужасьёслы но егит гожъяськисьёслы юрттон понна «Об учреждении ежегодной премии имени Зои Богомоловой» Удмурт Элькунысь Кивалтэтлэн ӵектосэзлэн постановлениез кылзэмын вал шуыса.


Удмурт Элькунысь йӧскалык лыдӟиськоннилэн директорез Галина Гавриловна Калинина вераназ егит авторъёслэсь удысбурзэс вӧлмытонын книга поттон ужпумез ӝутӥз. Элькун кемалась кун заказъя гожтэм литературалы кулэяське ни. Туала литературая альманахъёс но антологиос лыдӟиськисьёслы тунсыко луысалзы, егит авторъёслэсь ужъёссэс библиотекаосын ӟечгес вӧлмытыны луонлык сётысалзы.


Егит авторъёс печатласькыны кутско ӵемгес газет-журналъёсын. Редакциын ужасьёс книга поттонлэн кичӧлтӥсьёсыз но луыло. Кылсярысь, «Луч» журналлэн валтӥсь редакторез Николай Евгеньевич Малышев ивортӥз, али дыре редакция элькунлэн кивалтэтэзлэн пресс-службаеныз ӵош ӟуч кылын гожъяськись писательёслэн журналын печатласькем ужъёссыя кык томен «Современная литература Удмуртии» (XXI-тӥ даурлэн нырысетӥ дас аръёсыз) изданилы ӵектос дася. Прозая нырысетӥ томе 100-лэсь трос авторъёс пырозы. Двухтомниклэсь тиражзэ элькунысь библиотекаосы вӧлмытон понна 1000 экзэмплярен поттыны малпало.


«Ӟечбур!» газетлэн редакциез «Окно в мир детства» ӵектосэз быдэстэ. Валтӥсь редакторез Надежда Серафимовна Лопатина ивортӥз, юнкоръёслэн ужъёсынызы 10 книга поттэмын ини шуыса.


Леонид Петрович Васильев, ИжГТУ-лэн «Прикосновение» нимо литература огазеяськонэзлэн кивалтӥсез, егитъёсты бичетъёсазы печатласькыны ӧтиз. Огазеяськон 13 ар ужа ини, та аръёс ӵоже 26 бичет поттӥз, берло дыре электрон изданиос потыны кутскизы.


Егит авторъёслэн тросэз ужъёссы сетевой ресурсъёсын возьматэмын – литература порталъёсын, блогъёсын, мерлыко бамъёсын. Виртуальной пространствоын тросгес лыдӟисьёс, тунсыкъяськонъёсъя луэ огазеяськыны, произведение сярысь малпанъёсты, дунъямъёсты ӝоггес луэ тодыны.


Ӝог воштӥськись интернет-среда одно ик вуттэ выль кылъёс пӧрмытонлы. Та ласянь уг висъяськы удмурт авторъёслэн удысбурзы но. Клублэн пумиськоназ тэкшерон (дискуссия) потӥз егит кылбурчиослэн «выль» удмурт кылъёссы ласянь. Кылбурчи, «Кенеш» журналлэн кылбуретъя отделэзлэн редакторез Лидия Степановна Нянькина чылкыт но чебер удмурт кыл понна дурбасьтӥз.


Мукет сямен малпа Кристиан Пишлёгер, Венской университетлэн докторантэз, финно-угровед (австри кылчиез удмурт кыл, солэн Интернетын азинскемез, Интернетын удмурт кылын вераськисьёслэн лыдзы тунсыкъяськытэ): «Али дыре удмурт кылын гожтэмез дуннелэн котькуд интыысеныз лыдӟыны быгатӥськом. Мыным сыӵе удмурт кыл кельше, кудӥныз али верасько Сетьын, малы ке шуоно со возьматэ туннэ нуналысь югдурез».

 

Дарали Лели (Елена Петрова), егитъёслы «Дарт» газетлэн валтӥсь редакторез сямен, публикациос дасякуз, интернетысь «жагъёсты» палэнтэ шуыса вераз. Интернет гожтосэ ӵем дыръя удмурт, ӟуч, англи кылъёс, интернет-символика, бренд нимъёс, слоганъёс пыртылэмын. Озьы ке но, тужгес тунсыко авторъёс тодмо но адӟем карымон луо. «Удмуртлык» но «Юмшан57» огинлыкъёс юрттэмен асьсэлэсь интызэс шедьтӥзы ни удмурт блогеръёс. Дарали Лели лыдъямъя, валтӥсез луэ егитъёслэн анай кылынызы тунсыкъяськонзы.


Удмуртиысь туала литературалэн азинскемез, солэн ужпумъёсыз сярысь малпанъёссэс, Владимир Романовлэн но Флор Васильевлэн егит авторъёсын ужамзы сярысь тодэ ваёнъёссэс, визь-кенешъёссэс веразы арлыдогес кылбурчиос: «Инвожо» журналлэн валтӥсь редакторез Пётр Михайлович Захаров; кылосбур тодосъёсъя кандидат Виктор Леонидович Шибанов; «Италмас» журналлэн валтӥсь редакторезлэн воштӥсез Наталия Викторовна Варламова; кылосбур тодосъёсъя кандидат Александр Григорьевич Шкляев но мукетъёс.


Ужрадын удмурт но ӟуч кылын кылбуръёссэс лыдӟизы Мария Векшина, Богдан Анфиногенов, Алёна Паздерина, Лариса Орехова, «Чайка» литературая огазеяськонлэн ёзчиосыз Егор Роньжин, Алёна Буркова но Александр Камашев, К. Герд нимо гимназиысь «Радуга» литературая клубысь пинал гожъясьёс Ульяна Петрова, Степан Черепанов но Дарья Шиляева, нылпиослы гожъясь кылбурчи Гузель Исхакова.


Ужрадлы книга адӟытон дасямын вал. Нырысетӥ люкетэз – «Литературная жизнь Удмуртии» – элькунысь литературая огазеяськонъёслэн но калыккуспо ПЕН-клублэн удмурт отделениезлэн ужамзы сярысь, Удмуртиын ортчылӥсь кылбурето лыдӟонъёс («Брезентовая цапля»), литературая вожвылъяськонъёс но фестивальёс («Проза дня») сярысь публикациосын тодматӥз. «Литературное творчество молодых» люкетын книгаос, авторской но коллективной бичетъёс, Удмуртиысь егит кылбурчиослэн, прозаикъёслэн но драматургъёслэн элькун но росси периодикаын печатласькем ужъёссы возьматэмын. Куинетӥ люкетын – «Литературоведение и литературная критика» – егит авторъёслэн монографиоссы, статьяоссы но рецензиоссы возьматӥськизы.