Версия для слабовидящих

Чеберина

Название материала: Чеберина (Удмурт нылъёс куспын чеберай нимез басьтон понна ӵошатскон)

 

Содержание:

Катанчи усьтӥськемлэсь азьло чузъяське «Чеберина, Чеберай» кырӟан (Кылъёсыз Т. Черновалэн, крезьгурез Н. Постниковлэн).

 

Пото кык нуисьёс:

 

  - Ӟечбуресь, гажано эшъёс, дуно люкаськем куноос!

 

  - Чырткемесь, мусо апайёс но агайёс, кенакъёс но дядяйёс!

 

  - Тунэ асьме азьын усьтӥськоз чеберлык дунне – удмурт нылъёсмы пӧлын «Чеберай» нимез басьтон понна ӵошатскон.

 

- Асьме азьын туннэ ас чеберенызы но пӧртэм быгатонъёсынызы воректозы нылъёс.

(марш шудэм улсын зал урдсытӥ сцена вылэ бӧрсьысь бӧрсе тубо нылъёс ӝытлы тупась дэремъёсын. Котькудӥзлэсь верало нимзэ-тулзэ, кытын ужамзэ яке дышетскемзэ)

 

- Myсо нылашъёс! Али куриськом тӥледыз сцена вылысь кошкыны но, удмурт дэремъёстэс дӥсяса, нырысетӥ конкурслы дасяськыны.

(Нылъёс кошко)

 

- «Чеберлык утёз дуннеез» - Достоевскийлэн верам кылъёсыз туннэ ӵапак интыяз.

Соос сярысь вунэтӥллямтэ, асьме доры лыктӥллям гажано кивалтӥсьесмы.....

(Вера нимтулъёссэс, собере одӥгезлы кыл сетэ).

 

 - Та ӝытмес калык радъя ортчытон вылысь юрттыны дась луизы спонсоръёсмы:...

 

 - Табере одно ик верам потэ, кин та конкурсэз ортчытон понна уй-нуналзэ сюлмаськиз, пыдпыдэсыз ӟырдамон бызьылӥз.

(Нимтулъёссэс вера).

 

- Нош али кыл сётӥськом жюрилэн тӧроезлы.

 

- Озьыен, гажано учкисьёсмы, туннэ асмеос быръём нылъёс пӧлысь тужгес чеберзэ, мусозэ, быгатӥсьсэ....

 

- Шаплызэ, кепырасьсэ... Кинлы ке востэм сям яра.

 

- Ӧйтӧд, ӧйтӧд... Укыр востэм луон удмурт нылъёслэсь мылкыдзэс, Ашальчи Оки шуэмъя, жильыен уг думылы-а? Созэ ини жюри чаклалоз. Жюри ик синйылтоз, тужгес веськрессэ, йӧнозэ...

 

- Нош котьма ке но, гажано эшъёс, самой ӟеч дунъет сётӥсь - со ачиз учкись!

 

- Озьы бере, гажано учкисьёсмы, куриськом кагазэ гожтыса келяны, кыӵе номерен апаез тӥ бырйысалды.

 

- Сыл ай, сыл! Быръемез пӧлысь быръемез нырзэ чатыртоз, уз но пӧра, уз но мара...

 

- Эн сура, эше, та тыныд туган яке кышно быръён ӧвӧл. Та ӝытмы - чеберлыкез утчан. Вашкала дырысь удмуртьёслэн чеберлык сярысь асьсэлэн валанзы вал, нош кӧня ӵошатонъёс шедьто кылбурчиосмы! Я, тодад вай ай...

 

- Сяська но тон,

Уӵы но тон мыным,

Тон вань ке,

Мон но воргорон тусъем.

 

- Зэм, зэм!

Нылкышно ке тон азьын,

Чебергес адскем потэ.

Нылкышно ке тон урдсын,

Ӝужытгес будэм потэ.

Нылкышно ке тон сьӧрын,

Кужмогес луэм потэ.

Нылкышно ке тон вӧзын,

Визьмогес луэм потэ.

 

- Ма, асьмеос татын асьмеды тросгес возьматӥськом ми кадь.

Ку ини адӟиськозы Италмасъёсмы?

 

- Соос дасесь ӧвӧлгес на, дыр. Чеберъяськыны ой-ёй кӧня дыр кулэ. Ойдо нырысь сцены вылэ ӧтёмы кырӟась пимес.

 

Кырӟан: «Мӧзмон».

 

- Удмурт нылмурт - Дыдык, Зара,

Айна, Марӟан я Тутыгыш -

Нимыд ас сярысьтыд вера,

Нимыд тынад ноку уз ыш.

 

Асьмелэн нырысез конкурсмы сӥземын удмурт нылкышно нимъёслы. Ӧтиськом нылъёсты сцена вылэ!

(Нылъёс удмурт дӥсьёсын сцена вылэ пото)

 

- Тӥ пӧлын, нылъёс, одно ик Чачабей яке Сяськабей, Бӧдёно яке Туливить вань, дыр. Вераны курисько, кыӵе вашкала нимез асьтэлы бырйысалды но малы.

Вералэ ӝогак, вакчияк.

 (Нылъёс оген-оген микрофон азьын верасько, собере кошкыло.)

 

- Адӟиды-а?

Пилинӟыос но чигвесьёс, чыртыкышъёс но бутьмаръёс, укотугъёс но поскесъёс, пельугыос но зундэсъёс.

 

- Йыркерттэтъёс но айшонъёс, кускерттонъёс но чалмаос, кашамеръёс но буртчинъёс, бурлатшортъёс но пустолъёс. Чебермыто уг нылъёсмес!

 

- Мон сямен, удмурт ныллы удмурт дӥськут ик кельше. Мукетсэ сыӵезэ нокытысь уд шэдьты.

 

- Нош али нош ик кырӟасьёсты ӧтиськом.

(Сцена вылэ кырӟасьёсты ӧтё. Чузъяське «Сьӧд мыйык» кырӟан).

 

- Али асьмеды возьма гуртын дасям уж - творческой конкурс - аслэсьтыд быгатондэ, таланттэ, лул чеберлыктэ усьтон. Котькудӥз возьматэ, мае ӟечгес пӧрмытэ: кыланы-бураны-а, кырӟаны-эктыны-а. Кыӵе тынад пуш дуннеед, маин улӥськод, маин шокаськод, мар борды кыстӥськиськод.

 

- Озьыен, творческой конкурс - «Мынам чеберлык дуннее»!

(Котькудӥз нылмурт потэ, ассэ возьматэ. Дӥсяськемын аслыз тупась дэремен - со мед юрттоз тусбуйзэ, быгатонзэ усьтыны)

 

(Сцена вылэ потэ артист. Чузъяське  кырӟан.)

 

- Вашкала дырысен удмурт калык котьку но данъяськылӥз сиён-юон пӧраны быгатонлыкъёсыныз.

 

- Нош али ӧтиськом нылъёсыз сцена вылэ. Азьпалан куинетӥ конкурс, со нимаське «Вашкала удмурт сиён-юон. Возьматыны куриськом, ма со сыӵе, кызьы но марлэсь сое дасяло.

(Куинетӥ конкурс «Вашкала удмурт сиён-юон»)

 

- Нош али кыл сётӥськомы жюрилы. (Потэ Обыда)

 

Обыда: Жалясь но уз луы,

Юрттӥсь но меда?

Шайтан кышномурт мон,

Шӧтэм Обыда.

Йӧно кышнолэн

Уз усьы данэз –

Чурыт куртчемлэн

Луисько туганэз.

Чиге чиданэ –

Уг лу чигнаме.

Асме но, лэся, ӧвӧл жалянэ

Шудтэм кышномурт мон

Шӧтэм Обыда

Шудэ палэнскиз но –

Лыктоз на меда?

 

- Адӟиськод-а, асьме доры Обыда лыктэм! Чебер нылъёсмес таба вылэ тырыса, одӥгтэм гурын пыжоз. Адӟид-а, кыӵе вожъяське?

 

- Мон сямен, со нылъёсыз уг кышкаты, со алэ.

 

Обыда: Эн герӟаське чурыт куртчемъёсын, азьтэмъёсын, юисьёсын. Сыӵеосын артэ ноку но калык радэ потыны уд быгаты.

 

- Та ӝытмылэсь воксё палэнэ кожим. Асьмеос туннэ чеберлыкез данъянськом ук.

 

- Ойдолэ табере ӟечгес тодматском, кӧня ке кенешом, йырвизьмес сыналом. Мон юало - тӥ вералоды.

(Ньылетӥ конкурс «Юан-веран, тодон-валан»)

 

- Али сцена вылэ ӧтӥськом кырӟасьёсмес.

Кырӟан «Яратӥ»

 

- Мынам пыды ик кутскиз ини куалекъяны. Сыӵе вакыт вуиз, тани-тани тодмо луозы чеберайёсмы, мусокайёсмы.

 

- Ойдо бен ӧтём ни соосыз. Сцена вылэ ӧтиськом нылъёсмес.

(Нылъёс сцена вылэ пото).

 

- Гажано нылъёс, мусо чебер апайёс. Туннэ сыӵе нунал, кыӵеез тӥ понна ноку ӧй вал. Тӥ вылласянь но пушласянь но югдытӥды асьтэдыз, вань чебердэс, быгатэмдэс усьтӥды. Ваньзылы эшшо огпол возьматӥды: асьме нылъёс ужаны гинэ шаплыесь ӧвӧл - котьма ласянь устоесь, синмаськымонэсь.

 

- Нош ӵошатскон - со ӵошатскон. Кинлэн ке кӧтыз но ӝож луоз - кытчы пырод.

 

- Но тани вань кагазъёс бичамын, учкисьёслэн мылкыдзы лыдэ басьтэмын. Тау тӥледлы, учкисьёсмы, юрттэмды понна.

(Вера кыӵе номер трос куара люказ, со нылашлы кузьым сёто).

 

- Асьмелэн туннэ кылмы быриз.

 

- Табере йылпумъян кыл - жюрилы!

(Жюри йылпумъянъёс лэсьтэ. Быръемын МУСОКАЙ, УСТОКАЙ, ДЫДЫКАЙ, ВИЗЬНӦДӤ. Чеберайлы йыр вылаз поно корона)

 

Чузъяське «Чеберина, Чеберай» кырӟан гур.

 

- Данъяськиськом тӥледын, нылъёс! Йырдэс вылын возе. Эшшо вылӥгес тубатъёсысь мед адӟом на тӥледыз. Ӟеч луэ!

 

- Ӟеч луэ!

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru