Версия для слабовидящих

Уйпал удмуртъёслэн дӥськутсылы сӥзем фестиваль

Название материала: Уйпал удмуртъёслэн дӥськутсылы сӥзем фестиваль

 

Содержание:

Чузъяське удмурт гур. Пото удмурт дӥськутэн дӥсяськем нуисьёс.

 

Нырысетӥ нуись: Ӟечесь-буресь, гажано эшъёс! Туннэ асьме доры лыктӥзы Юкаменск ёрослэн пӧртэм сэрегъёсысьтыз куноос но гуртоосмы. Люкаськизы соос огазе уйпал удмуртъёслэн дӥськутсылы сӥзем фестивале.

 

(Чузъяське крезь)

 

Кыкетӥ нуись: Кемалась, туж кемалась вашкала удмуртъёс улӥллям паськытэсь Кам но Ватка шуръёс вискын, валэн пырыны луонтэм сьӧд нюлэсъёсын, ӵыдонтэм чебересь возьёсын. Мае но ӧз адӟе вашкала удмуртъёс. Соослэн улоназы, гурт котыразы но культура удысазы пӧртэм воштӥськонъёс ортчизы. Пӧртэм дыръёсы соос пӧртэм дӥськут нуллӥзы.

 

Нырысетӥ нуись: Дӥсь - со чеберлыкез возьматон. Кызьы со вуремын, чеберъямын, кыӵе мылкыдын быдэстэмын - ваньмыз калыклэн син шораз йӧтэ.

 

(Чузъяське «Ӝуткам дэремме дӥсяса» кырӟан, егит нылъёслэн дӥсенызы дӥсяськем ныл потэ)

 

Кыкетӥ нуись: Тани вашкала ныл дэрем. Вуремын со тӧдьыматэм етӥнлэсь. Таӵе дэрем вылэ дӥсяллязы на шортдэрем, со горд яке сьӧд луэ вал. Нош дэремлэсь гадь котырзэ куиньсэрго лэсьтылӥзы. Вашкала удмурт дэрем туалаезлэсь ӧжытгес чеберъямын вал, озьы ке но котькудӥз кышномурт сое ас быгатэмезъя лэсьтылӥз-чеберъяз. Узырезлэн но кибашлыезлэн дэремез но чебергес вал.

Котькудӥз удмурт ныл мугорезлэсь чеберзэ возьматӥсь кускерттон нуллылӥз (костюмен нылаш сцена вылысь кошке).

 

Нырысетӥ нуись: 30-тӥ аръёсы тодмо писатель Всеволод Лебедев гожтӥз: удмуртъёс пе, дӥсь шоры искусство шоры кадь учко. Нылкышно дӥськут лэсьтон уж  бордын ужаны кутске пиналысен ик, вань быгатонлыксэ со понэ дӥськут лэсьтонэ.

(Пото нылкышно дэремен дӥсяськем кышномуртъёс)

 

Кыкетӥ нуись: Нылкышно дэремез уйпал удмуртъёс вурылӥзы тӧдьы яке горд, тани таиз тӧдьы дэрем вуремын етӥнлэсь. Солэн ӧвӧл воротникез но, бирдыосыз но. Нош чырты котырзэ лэсьтылӥзы котырес яке куинь сэрего, пась интыяз ошылӥзы кабачи (нагрудник). Кабачиос туж аспӧртэмлыко чебер пужъятэмын луылӥзы. Дэремлэн сӧзыез озьы ик чебермамын. Таӵе дэрем борды керттылӥзы на айшет, кудӥз озьы ик пужъятэмын яке чильпамын луылӥз. Таӵе дэрем вылэ озьы ик дӥсяллязы на шортдэрем. Нылкышно дэремлэсь саессэ озьы ик чебермаллязы пужъятэм яке куэмпужыен, кудзэ лэсьтылӥзы паськыт, быдэс саес кузя. Нырысьсэ таӵе дэрем дӥсяллязы сюанэ, собере котькуд нунал нуллылӥзы.

 

Нырысетӥ нуись: Уйпал удмуртъёслэн дӥськутысьтызы туж ӵем шедьтод куинь буёлэз - тӧдьы, сьӧд но горд. Тӧдьы дэрем возьматэ инэз но чылкыт сямъёсмес, гордэз  - шундыез, нош сьӧд буёл - яратоно музъемез но йӧнлыкез.

 

Нош табере ужрадмес азьланьтоз шулдыр кырӟан.

 

Кыкетӥ нуись: Удмурт калык аслаз дӥсезлы туж трос саклык висъялляз. Дӥсь вылысь котькуд пужыез ас интыяз пуктыса чеберъяллязы, угось вашкалаос малпаллязы, ваньмыз со адямиез сьӧд кужымъёслэсь, лек синъёслэсь, висёнъёслэсь уте шуыса.

 

Нырысетӥ нуись: Дӥсез вуро вылэм дэралэсь. Паймымон вылэм со дэра: ӟырт кезьыт дыръя утиз кезьытлэсь, нош гужем куазен соин салкым вылэм.

 

Кыкетӥ нуись: Тодосчиос уйпал удмуртъёслэсь дӥськутсэс эскерыса, пусъё - кин ке но кырӟам но кырӟанзэ дэра вылэ кельтэм.

(Чузъяське «Вамыштомы артэ» кырӟан) (Потэ мукетыз модель)

 

Нырысетӥ нуись: Таиз дэреммы вуремын туала модалэн куронэзъя, ӧвӧл вунэтэмын вашкала даурысь пужыос но. Уже кутэмын вашкала пужъятскон, аппликация, амалъёс. Та удмурт дэреммы учкымон, соин ураме потыны гинэ ӧвӧл, концертэ но, шулдыръяськонэ но, гажанэд доры но мыныны луоз.

(Эктон)

 

Кыкетӥ нуись: Уйпал удмуртъёслэн дэремъёссы уг висъясько кадь асьме палан ик улӥсь бесерман калыклэн дӥсезлэсь. Нош мар бордын меда аспӧртэмлыкез бесерман дэремлэн?

Бесерманъёс дэремъёссэс горд яке тӧдьы буёлъёсын лэсьтылӥзы, но гордзэ тросгес кыӵе ке шулдыръяськонъёсы дӥсяллязы. Удмуртъёс кадь ик вурылӥзы улӥ дэрем но шортдэрем. Улӥ дэремлэн гырпумысеныз лэсьтэмын луылӥз кыӵе ке но куэм яке пужъятэм пужы, гадь котырзэ гордэн, ӵужен яке вожен пужъятыса чебермаллязы. Нош сӧзы улаз котьку но лэсьтылӥзы оборкаос. Озьыен, бесерман дэрем кӧня ке кельше вал бигер дӥсьлы но. Шортдэремлэсь саесъёссэ лэсьтылӥзы вакчи, гадьзэ пужъятылӥзы. Шортдэрем вылэ керттылӥзы на пӧртэм буёло азькышет, нош йыразы нуллылӥзы кортлэсь яке ыргонлэсь чебермаса лэсьтэм йылсо изьы – такъя. Сыӵе ик чебермаса лэсьтылӥзы на пельпум вылтӥ вурем керттэтэз – камалиез. Ӵемысь уже кутылӥзы горд, вож, ӵуж буелъёсты.

(Бесерман дэрем) (Чузъяське «Арганчи» кырӟан)

 

Нырысетӥ нуись: Кызьы верамы ини азьлогес, котькудӥз удмурт ныл быгатыны кулэ вал вуриськыны, куиськыны, пужъятскыны. Та киужъёслы анайёс нылъёссэс дышетылӥзы пичиысен ик. Котькудӥзлэн анайлэн аслэсьтыз дыдызэ чебер дӥсямез потылӥз. Али сцена вылэ потозы самой пичиосыз модельёсмы. Соос возьматозы вашкала но туала нылпи деремъёсты но шулдыр кырӟан кырӟалозы.

(Чузъяське «Ми пичи пиналъёс» кырӟан)

 

Кыкетӥ нуись: Али сцена вылэ ӧтиськом куноосмес, вуизы соос асьме доры Пискорысь. Ойдолэ пумиталом соосты туж зол кичабонэн.

(Кырӟало-верало куноос)

 

Нырысетӥ нуись: Уйпал удмуртъёс огкылысь но тупаса уло асьме палась бигеръёсын но. Ортчись ужрадмы сярысь кылыса, соослэн но асьсэлэсь калык дӥськутсэс возьматэмзы потӥз, соин ик мылысь-кыдысь туннэ асьме доры лыктӥзы. Куриськом соосты потыны сцена вылэ.

(Бигер эктон, кырӟан) (Потэ модель)

 

Нырысетӥ нуись: Удмурт дэрем вылын пужыос... Соос туж мур пуштросоесь. Соосты валэктон туннэ но пумозяз вуттымтэ на. Вазен кибашлы адямиос чаг тылын пукыса но, пужыос кылдытъяло вал. Асьме пӧлын но кибашлыос трос, соос но кылдытъяло паймымон костюмъёс. Тани огез соос пӧлысь.

(Чузъяське «Кӧня возьмай», «Сьӧд мыйык» кырӟан)

 

Кыкетӥ нуись: Удмурт дӥсьёсмы туж чебер адӟисько. Озьы ке но, дыр ортчемъя уно ыштонъёсты адӟиз ни удмурт дэрем. Ӧвӧл ни жингыртӥсь ошетъёс, чингылиос, угыос, поскесъёс, кускерттонъёс. Соосты воштӥзы куэмъёс, чильпамъёс. Нош али таосыз но быро ини. Соин ик асьмелы, али улӥсьёслы, ӵыжы-выжыосмылэсь, вашкалаосмылэсь котькуд нюжазэс утьыны кулэ. Вакыт воштӥськемъя, дӥськут но воштӥськытэк уг улы, сое выльдыса, удмурт шӧм пыӵатыса, туала дырлы тупась кароно.

(Чузъяське крезь, пото модельёс)

 

Нырысетӥ нуись: Бадӟым тау ваньзылы, кин пыриськиз та ужрадамы.

 

Кыкетӥ нуись: Бадӟым тау куноосмылы, учкисьёсмылы.

 

Нырысетӥ нуись: Ӟеч улэ.

 

Кыкетӥ нуись: Выль пумиськытозь.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru