Версия для слабовидящих

«Тон лобӟы, кырӟанэ мынам!»

Название материала: «Тон лобӟы, кырӟанэ мынам!» (Крезьгуро литературной композиция)

 

Содержание:

Нырысетӥ нуись:

Аслам анаелы кадь оскисько удмурт кыллы.

Вордскем гуртам удмурт кылын

Валэктӥзы мыным:

Малы ӟег-нянь куддыр луэ кузьыт,

Малы ошмес вумы сокем ческыт.

Пие шоры удмурт кылын мон вазисько,

Чагыр инэз но сьӧд муэз,

Адямиез, пичи кузьылиез яратыны

Удмурт кылын сое дышетӥсько.

 

Кыкетӥ нуись: Котькуд калыклэн – пичи-а со, бадӟым-а – аслаз кырӟан манерез, аслаз крезьгурез вань. Кырӟан пыр калыкъёс ог-огзэс валало, ог-огенызы эшъясько. Одӥг ӟуч эше мыным вералляз: «Туж яратӥсько удмурт кырӟанъёсты кылзыны. Ачим одӥг кылзэ но уг тодӥськы удмурт сямен, нош кырӟанъёсысьтыды вань сюлэм малпанъёстэс адӟисько кадь, сюлмыным шӧдӥсько, ма сярысь отын вераське».

 

Нырысетӥ нуись:

Нюлэскы ветлыкум,

Сьӧд сутэр бичакум,

Сьӧд сутэр синъёстэ

Мон тодам ваисько.

Возьёсыз турнакум,

Льӧль сяська адӟыкум,

Льӧль сяська бамъёстэ

Мон тодам вайисько.

Бусыын гырыкум,

Тюрагай кылыкум,

Тюрагай куарадэ

Мон тодам ваисько.

 

Та чебер кылбурез кельтӥз асьмелы Ашальчи Оки, нырысетӥ удмурт нылкышно-гожъяськись. Табере та кылбур кырӟан луыса улэ калык пӧлын. Вань-а меда Ашальчи Окилэсь кутскем ужзэ азьланьтӥсьёс? Вань. Эшшо кыӵеесь! Татьяна Чернова, Алла Кузнецова, Людмила Кутянова, Галина Романова.

 

Кыкетӥ нуись: Галина Васильевна вордскиз 1950 арын 22 августэ Ува ёросысь (азьвыл вал Нылга ёрос) Булай Починка гуртын. Анай-атаез огшоры гурт ужасьёс - атаез механизатор луыса кема ужаз, анаез фермаын скал кыскиз. Пиналъёссы вал вить кузя, Галина Васильевна самой бадӟымез. Дышетскиз со Парсьгуртысь восьмилетней школаын, собере мынӥз вал Можга педучилищее, но конкурс пыр ӧз поты. Озьы одӥг ар колхозын скал кыскиз. Собере кошкиз Ижевске, пыриз ПТУ-е, каменщик луыса 2 ар ужаз лэсьтӥськонын.

 

Нырысетӥ нуись: Но 1968 арын тулыс Галина Васильевналэн улоназ чутрак воштӥськон луиз. Общежитие вуиз «Советской Удмуртия» газетысь корреспондент Матильда Иванова. Со юаз, тӥляд ӧвӧл-а, пе, гожъяськисьёсты. Галина Васильевна пичиен-пичиен ас понназ гожъяське вал, но кинлы ке возьматыны, редакцие нуыны ӧз малпалля. Кылбуръёсыныз бадӟым тетрадьзэ сётӥз М. Ивановалы. Кӧня ке улыса, Романоваез ӧтизы редакцие. Шуизы, одӥг веростэ но кык кылбурдэ газетэ поттомы. Кыӵе бадӟым шумпотон вал солы! Кӧня ке толэзь ортчиз но, Романоваез корректор луыса ужаны ӧтизы. Галина Васильевна шуэ: «Тау Степан Григорьевич Машковлы. Со соку зам. редактора вал, монэ, 8 класс образованиен муртэ, редакцие ужаны ӧтиз. Ведь корректорын ужан понна туж ӟеч тодыны кулэ правописаниез. Нош монэ ӧз но эскере, кутӥзы но тӥни».

 

Романова гожъяськиз, мылкыдзэ ӝутылӥзы редакциысь ужасьёс: Михаил Перевощиков, Николай Васильев, Роман Валишин, Василий Широбоков, Василий Садовников, Кирилл Ломагин но трос мукетъёсыз. Соос ваньзы туж ӟеч адямиос вал, егит гожъясьёслы котьку юрттыны дасесь.

 

Кыкетӥ нуись: Отын ик тодматскиз со Владимир Романовен. Нимтулъёссы кыкназылэн Романовъёс, Галина Васильевна, Владимир но Васильевич. Кыкназы вордскемын августэ. Редакциын соос эшъяськизы, собере кышнояськизы.

 

Редакцие ужаны лыктыса, Галина Васильевна пыриз дышетскыны Удмурт кун университетэ. Университетэз йылпумъяз 1980 арын. «Советской Удмуртия» газетын ужаз 1979 арозь, собере выжиз «Молотэ» но отын ужаз 1989 арозь. 1990 арын «Инвожо» журналын ужаны кутскиз, собере - «Вордскем кылын».

 

Владимир Романовен соос улӥзы 12 ар, одӥг пизы вань. Галина Васильевна шуэ: «В. Романовен улэммы сярысь трос уг вера, тани таӵе кылбурам вакчияк со адӟиське:

(чузъяське крезьгур)

 

Одӥг вал асьмелэн Инмармы,

Вӧсьмы но Кылчинмы.

Одӥг вал асьмелэн Шундымы.

Лулмы но сюлэммы.

Яратонмы но асьмелэн одӥг вал:

Сабырез валасьтэм эркын тӧл.

Тӧлпери луыса со ӝутскиз,

Ӵош пуктэм коркамес куашкатӥз...

Одӥг вал асьмелэн Инмармы,

Яратон но одӥг вал.»

 

(чузъяське крезьгур, пото кырӟасьёс)

Кырӟан «Пумиськон вальс», крезьгурез Михаил Черновлэн.

 

Нырысетӥ нуись:       

Тон лобӟы, кырӟанэ мынам,

Эркын тылобурдо сямен.

Мед ӧръяськоз чурад малпан

Эн гурла, эн, паллян гурен.

Югыт сюрес усьтӥськемын азяд.

Зарни крезь сиосыд золтылэмын тынад.

Тон кырӟа зэмлыкез но шудбурез,

Эн гурла, эн, мыдлань гурен.

 

Кырӟан «Ой, шудо егит дыр!», крезьгурез Г. Бекмановлэн.

 

- Шудо ик тон, Валя, - шуэ Граня.

- Ма, тон но шедьтод али шуддэ, Граня. Мон тани уйвӧтам но ӧй адӟылы сое такемысь. Выжыкылын кадь ваньмыз луиз: тонэ но, оло, кытын ке вите ини асладэз, уд гинэ тодӥськы на, - Гранялэсь малы озьы шуэмзэ валатэк вера Валя.

 

- Уз. Валя, уз лу ни со мынам...

 

- Ну, мар тон, Граня. Вуоз но шуоз: «Вай кидэ, Граня-Аграфена». Ачид но шӧдыса уд вуы, сьӧраз тонэ магнитэн сямен кыскоз, бордысьтыз уз лэзьы ни. Солы луыса, тон дась котькыӵе секытэз чиданы. Умой-умой яратон, чебер сяська кадь, одӥг пол ӝуалскыса уг кысы  вылэм. Тулыс жингрес кырӟанэн жутӥськыса, со сильтӧллы но, кезьытлы но уг сетӥськы. Аслэсьтыд азьвыл тодымтэ кужымдэ улӟытэ...

 

Кырӟан «Валаса но ӧй ву», крезьгурез Н. Трубачевлэн.

 

... Бусаськем синъёсын ӝот-ӝот мынэ со урам кузя. Нокинэ, номыре уг адӟы. Шораз вазьылысалзы ке, ӧй кылысал, дыр. Урам дурысь паськыт но ӝужыт льӧмпу пала вуыса, со улэ лэсьтэм скамья вылэ катьтэм лэзькиз.

 

Жадем синъёсыз шоры йӧтӥзы лабрес льӧмпу вайёс. Кӧня пол соос татын Петяеныз пукизы! Со дырысен кӧня льӧмпу пушъетъёс ӝужамын. Куд-огез соос Анялэсь но ӝужытэсь, мукетъёсыз али гинэ мычисько.  Аня йырзэ вылӥе ӝутӥз. Льӧмпулэн самой бадӟым ваез куасьмем. Пуштрес куаръёс пӧлын со вай кӧшкемыт адӟиське. Котьмалэн вакытэз ортче вылэм. Писпу но весяк уг улы.

 

Аня йыр вадьсаз ик ошиськем вай борды сузьтӥськиз но льӧмзэ басьтӥз, Кыксэ-куиньзэ ымаз понӥз. Вуиллямтэ на вылэм. Туссы нош сьӧд-сьӧд адӟиськиз.

 

- Анюта!

 

Аня куара пала берытскиз. Селантий, йыг-йыг капчи вамышъяса, со пала лыктэ.

 

- Анюта! Нош мон шугъяськыны кутски вал. Малы, шуисько, садикын ӧвӧл. Палагей апай но ма вераны уг тоды... Зэмзэ но ымнырыд кӧдэктэмын. Ма луиз, Анюта?!

 

Аня ма вераны тодытэк сылэ. Ӝож но солы, умой но. Эшшо маке мед юалоз на вал. Аня сылысал но кылзысал, весь кылзысал солэсь мусо, небыт куаразэ.

 

- Анюта, мон мӧзми тынэсьтыд. Чагыр синъёсыд городын но весь азям улӥзы. Селантий Анялэсь салкымам кизэ шуныт киыныз юн-юн кырмиз но, бордаз ӝиптыса, вылысьтыз вылаз ымдурзэ, синъёссэ, бамзэ чупаны кутскиз...

 

Нырысетӥ нуись:

Выльысь пиналмыса

Пыро ӵук шундыен коркад.

Инмар сямен

Пуксё тӧршор сэргад.

Улляд ке нош отысь,

Берыктӥсько Кылдысинлы,

Тӧдьы туген биниськыса

Ӝутско азбар шорад.

Ишкид ке нош сое,

Пӧрмо тулыс куазьлы.

Вож дэремен дӥсяськыса,

Эшшо чебер пиналмыса

Экто но кырӟало азяд.

Ошмес вуэ доры

Ачид соку лыктод,

Лабрес льӧмпу улам

Шутэтскыны пуксёд.

 

Кырӟан «Тон ӧвӧл мынам», крезьгурез Г. Бекмановлэн.

 

Ой, чильтро ук тынад синъёсыд

Ой, чильтро,

Весь шорам учкыло - кӧяло-вӧяло.

Мон ачим но вӧзад вырисько ни кильтро –

Вунэмын куректон, бурдъёстэк лобасько.

Ой, чильтро ук тынад синъёсыд.

Ой, чильтро,

Вань дунне луэмын кадь чебер чильтэро.

Чагыр инбаме сьӧразы ни чорто...

Тодӥсько, мон усё..

Но сьӧрад

Ӝутскисько.

 

Кырӟан «Кылӥськод-а монэ?», крезьгурез Г. Бекмановлэн.

 

Кыкетӥ нуись: Галина Романова кылбуръёс гинэ ӧз гожъя. Со тунсыко веросчи но. Котькинлы тодмо, дыр, Галина Романовалэн Ӧрекчи Лепсей сярысь серемес мадёсэз:

 

...Нош Сьӧд Кирлолэн пиез, Лепсей, сярысь гурт калык тазьы шуэ: «Кызлэн выжыяз бадяр ӝужаз». Лепсейлэсь нимзэ кылыса ик, киынызы шонтозы но мыньпотыса шуозы, пе, вал:

 

- А-а, Ӧрекчи Лепсеез-а? Тодӥськом, тодӥськом. Югыт куазен кык син азяд, ява, пуконтэм пуконэ пуктоз.

 

Граждан ож басылмем берегес, Починка ураме вуиз паськыт горд шароварен егит воргорон. Ӵук шундылэн тылсиосыз чильк-вальк кисьтасько солэн сурон сапегаз. Ныро картузэз бутыркаё-бутыркаё, горд йырсиосыз, кузёзылэсь мылкыдзэ возьматыса сямен, картуззэ ик ӝутыса, шунды шоры кыстӥсько кадь. Тани-тани йыре пононэз усёз. Кавалерийской мыйыкен мотор ымнырыз йӧн-йӧн гинэ котыр учкылэ, курень синъёсыз кинэ ке адӟыны туртто кадь. Но уг шедьто.

 

Ӵукна сиськыса пукись Деми укно пыртӥ сое адӟиз: ымаз понэм пуньызэ берен сиён пӧлаз куштӥз, усьтэм ымыз ӧз ворсаськы ни. Собере солы лыктӥсьлэн ветлэмез маке но тодмо кадь потӥз.

 

- Ма, Сьӧд Кирло Лепсей, лэся, ук та! Инмар понна, Лепсей!

 

Бызьыса пумитаз потӥз. Кема гинэ угось ӧз адскылэ ни. Ишь, кыӵе воштӥськем! Кыӵе ке комиссар, дыр. Лишной уз луы, ваньзэ ортчемзэ вунэтыса, солы ӟеч кариськыны.

 

- Ӟечбур, Алексей Кириллыч!

 

- О, Демьян Демьяныч! Умой! Умой!

 

- Ма, кытын тон таӵе кема калгид? Кышноед бертонэдлы уг оскы ни вал. Толон ӝыт гинэ дорамы кайгырыса пукиз.

 

- Кытын вал - отын ӧвӧл ни. Адӟиськод, табере мон огшоры музъем гырись ӧвӧл ни. Ваньмыз воштӥське, Деми. Азьвыл мон тон дорын ляльчиын ветлӥ, табере... - мыйыксэ позыртӥз Лепсей.

 

- Я, я, озьы эн вераськы, Алексей Кириллыч, - котырес ымнырыз ӵук шундыен одӥг кадь луиз Демилэн. – Гуртад сёровно мынам мында утялтонзы уз луы. Айда дорамы пыром. Кышное ӵапак куреген шыд пӧзьтӥз. Нунал кузь али, гуртад берло но вуод.

 

- Дыртӥсько, Деми. Кышноен адӟиськыса, калыкез чалякгес люкано луоз. Вунэтӥськем: ачид но лопата, тӥр, ведра кут но пожарка доры бызьыса лыкты.

 

- Ма, мар луиз, вера ини, сюлэмез эн кыскы?! - Демилэн синъёсыз куинь копейка кадесь питырскизы.

 

Гурт паламы вуыку адӟисько: кытысь ке бугыр гинэ ӵын потэ. Матаз вуи но кӧшкемай: Ванька нюкмы ӝуа вылэм. Тынад бусыед со нюк дорынгес кадь, медаз ӝуа вал кизем нянед.

 

Деми ӝуась эгыр вылын сылӥсь кадь узир-безир вырыны кутскиз: мар карыны уг вала ни. Собере ури-бери корказ пыриз. Лепсейлэн берыз но ышыса ӧз вутты, Деми, тӥр, ведра, лопата кутыса, Ванька нюк пала бызе вал ини.

 

Ӝыны сюрессэ, вӧзтӥз ортчись адямиосты паймытъяса, шузимем кадь бызиз но, кыкпыдӵошин ворттӥсь валлэсь биньгозызэ шуак кыскем кадь, тып! гинэ интыяз дугдӥз. - Эх, Лепсей, Лепсей! - гинэ шуиз на. Ванька нюкын угось одӥг писпу но, лӥял но ӧвӧл: номыризлы отын ӝуаны. Турын но отчы тулыс лымы шунам бере гинэ шер-тур потэ...

 

(кырӟасьёслэн кырӟамзы кылӥське)

Ой, сереме, сереме но

Малы потэ сереме?

Сьӧд куреге тӧдьы пуза,

Соин потэ сереме.

 

...Куинь нунал юмшаз Лепсей. Вань гуртоосыз доры пыраз. Одӥгезлы шуэ, Заводысь милициын, пе, ужасько, мукетызлы - воксёлы бертӥ. Деми пельзэ сак карыса кылскиз Лепсей сярысь верамъёсты. Собере сюлмыз интыяз пуксиз: шедьтӥз, дыр, пе, кытысь ке горд шаровар но мычыръяськыса ветлэ. Кытын ни гольыкъёслы начальнике потыны. Ачиз Инмар тазьы улыны гожтэм бере, Лепсей кадь шайтан воштэмъёсын сое мукет уд кар ни.

 

Нош Деми тазьы малпаськон вискытӥ Лепсей сузмем юрт котырзэ, гидкуазэ умой-умой сэзъяны малпаз. Эшъёссэ люказ, веме кариз. Ӝытазеяз куинь чаркаен пиосмурт пограмон кема возем лек вина юизы.

Ӵуказеяз Лепсейлэн йырзэ но ӝутэмез уг луы ни. Нош макмыр веськатыны номыриз кыльымтэ. Map кароно? Тэшканы турттӥсь йырыныз койка вылысьтыз мырдэм султӥз но, чоз-чоз кариськыса, мыйыксэ маялтӥз. Горд шароварзэ дӥсяса, ураме потӥз. Пырак Деми доры йӧн-йӧн вамыштӥз.

 

Таӵе вазь ӵукна витьымтэ кунолы соиз паймиз. Собере Лепсейлэсь пыктэм синъёссэ адӟыса юаз:

 

- Map сыӵе луиз, Лепси?

 

- Эн но юа, Деми. Куректонме кӧт пушкам возьыны ӧй чида ни но, пырак тон доры лыктоно кариськи. Ачид тодӥськод, толон веме лэсьтӥ. Кышное, солы шуыса, кемалась ӟизатэм ӟумыртонзэ поттӥз. Оло оскод, оло уд но, со быдэсыз пурысьтам. Map возьыт, мар возьыт! Куноосме буш келяно луиз, - сотэк но поромись йырзэ сэзъя Лепсей.

 

- Ма мынам но кемалась пукетэм винае кылле ук! - усьтыр-табыр мурӝолаз пыриз но винаен бекчезэ поттӥз Деми. Сое дыртыса усьтӥз. Кобые кисьтӥз синкыли кадь чылкыт винаез.

 

- Пыдэсаз пуксиз, дыр, пурысьтамез. Вай али шӧмзэ эскеро, валало, дыр, - ӵаж-ӵаж кезьыт винаез Лепсей кӧня ке гучык кобыысь ӟузиз но, кылемзэ усьтэм укноетӥ кисьтӥз: - Озьы ик вань - мынамез шӧмо ик. Ваньзэ кисьтано луод. Я, мон кема ӝегай кадь. Гуртын ыштӥзы, луоз, - пырс потыса кошкиз Лепсей.

 

- Ой-ёй-ёй! Map ишан та, мар ишан! - шуыса, Деми корка шораз кайгырыса кылиз.

 

Кырӟа, кырӟа шуиськод но,

Кырӟан кылы сандыкам.

Усьтысал но, басьтысал но,

Усьтонэз анай киын.

 

Кӧня ке нунал ортчыса, Деми кылӥз: Лепсейлы, пе, кыӵе ке казённой бумага вуиз но, со заводэ кошкиз. Капчияк шокчиз Деми. Нош ик Починка урам кузя атасъяськыса ветлыны кутскиз.

 

Одӥг пол, озьы гадьзэ урдыса, ураме потӥз. Малпаз-малпаз но Лепсейёс пала шонтӥз: кемалась ини тари  кеньыр пунэмазы вал солэсь. Кышноезлэсь, Лепсей ӧвӧл дыръя, курыса утчано. Нош кӧня ке вамыш лэсьтэмез бере, интыяз ик пуксиське вал: син азяз ишан кадь пиштӥз горд шаровар.

 

- Кытчы озьы потӥд, Деми, - юаз Лепсей.

 

- Ма, тани... чылкыт омырен шоканы потӥ ай... Коркан укыр ӝокыт... Ачид бон кытысь вуиськод?

 

- Заводысь. Асьме палъёсын кузё луыны бумага сётӥзы. Горд пустол штанэд, пе, вань бере, марым, начальнике пуктӥськом. Асьме палъёсы милиционере юнматӥзы. - Демилэн ныр улаз Лепсей бумага донгиз.

 

Оскытэк но оскыса, сое букваен-букваен лыдӟонъяз, Деми малпаз: «Эх шу, визьтэм! Сомында коньдонэным луэ вал ведь ини Лепсейлэсь со горд штанзэ гинэ басьтэме. Табере со интыын мон кузё луысал. Аслэсьтым шудме ачим чиньы пыртӥм келяй».

 

Нырысетӥ нуись:

Вал меда, ӧй вал меда

Сыӵе калык дунне вылын?

Кин валэктоз на,

Кин табере тодоз на?..

 

Кыкетӥ нуись:

Вылэм, шуо, вылэм

Сыӵе калык дунне вылын...

Тыр шепъёсын ю-нянь

Будэтӥллям.

Гранит излэсь юнгес андан

Ӵыжатӥллям.

Бадӟым дун шуръёсты

Ӵыпылӥллям.

Ӧрӟи кадь нылпиос но

Вордӥллям.

 

Кыкетӥ нуись:

Ми куноед ӧвӧл тынад,

Мусо Вордскем Удмурт дормы.

Бусыосад, заводъёсад

Жингыртыло ужгуръёсмы.

Азьвыл ыштэм осконъёсмес

Туннэ выльысь мед шедьтомы.

Сюлмаськонмес, вормонъёсмес

Тонэн шори ми люкомы.

Мусо вордскем Удмурт дормы,

Тон сёт милем батыр кужым.

Гопо медаз лу сюресмы –

Медам шеде канжаськыны.

Кезьыт тӧллы пумит задор

Вамышъялом кузё сямен.

Эркын мед шокалоз Кам дор -

Чаклаломы кузё синмын.

 

(Чузъяське крезьгур «Яратэ, яратэ», кылъёсыз В. Котковлэн, крезьгурез А. Корепановлэн. Сцена вылэ пото нуисьёс, кырӟасьёс, шудӥсьёс. Ваньмыз кырӟало та кырӟанэз)

 

Яратэ, яратэ, яратэ

Шундыез, лыз инэз, музъемез.

Аратэ, аратэ, аратэ

Дуннее яратон тылӝуэз.

Кырӟалэ, вералэ, данъялэ

Асьмелэсь вордӥськем шаермес.

Ойдолэ, ойдолэ, ойдолэ

Юн ӟырдыт кырмомы киосмес.

Гажалэ, данъялэ, дунъялэ

Вордӥськем городдэс, но гурттэс.

Ӝутэлэ, ӝутэлэ, ӝутэлэ

Ӝутэлэ тӥ йырдэс, удмуртъёс.

Яратэ, яратэ, яратэ

Ошмесо та удмурт шаермес.

Аратэ, аратэ, аратэ

Куспамы тупаса улонмес.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru