Версия для слабовидящих

"Толсур" фольклор композиция

Заголовок материала: "Толсур" фольклор композиция

 

Содержание:

Сцена вылэ юр-яр карыса, ӵашетыса, пото кышноос но пиос, возьмато ульчаетӥ мынӥсь вожоосты. Соос кин кызьы дӥсяськемын: киязы ухват, тыбыразы песьтэр, ымныръёссы пытсамын.

 

Сьӧд Сандӥ: Кышноос, кытчы азьло ик пыром?

 

Чутро Насьта: Сандыр кенак доры!

 

Ваньзы: Ойдолэ, ойдолэ!

 

Озьы вераськыса, кенешыса сцена вылысь кошко.

 

Сценалэн огпал пумаз киуж ужаса, кырӟаса пуке Сандыр кенак, кырӟа:

 

Тӧдьы кызьпу вож куаро но,

Малы меда гурыё?

Пинал йыры туж пинал но,

Малы меда кайгуо?

 

Кылӥське вуэм вожоослэн ӧсэ йыгаськемзы.

 

Сандыр кенак: Пыре, пыре! Пырись муртлы ӧс усьтэмын!

 

Вожоос корка пыро арганъя эктыса-кырӟаса. Сандыр кенак котькудзэсты тодманы турттэ.

 

Сандыр кенак: Дугдэ, дугдэ... Тодмай, тодмай: таиз Сьӧд Сандӥ - калие, таиз Чутро Насьта, кудое, Шактыр Одоть... Азьвыл дыръя вожоосты сурен куноято вал. Мон толсур азе сур пӧзьтэм вал. Шуд, тазалык ваемды понна мон тӥледыз утялто ай.

 

Сандыр кенак ветлэ удъяськыса, кырӟа:

 

Марлы юи, марлы юи

Та чаркаысь винаез?

Али ке но ӧй юысал,

Кудӟонме ке тодысал.

 

Бызьыса пыре егит пияш.

 

Пияш: Ой, кӧня кузя таос татын! Кыӵе шулдыр! Нош ми, егитъёс, мӧзмыса огнамы ветлӥськом укно улысь укно улэ, кытын меда вожоос тунасько шуыса. Дорады пырыны лэзёды-а?

 

Вожоос: Пыре, пыре.

 

Пияш кошке, нош кышноос асьсэ куспын кенешо.

 

Сьӧд Сандӥ: Кышноос, егитъёс пырыны медо. Ойдо вераськом - кин ма туналоз. Мон ыжгон кутылыто.

 

Чутро Насьта: Мон сапег лэзьято.

 

Шактыр Одоть: Мон тын лыдӟыто.

 

Сандыр кенак: Нош мон зундэс куштыто.

 

Озьы вераськон куспетӥзы кырӟаса но эктыса егитъёс пыро, вожоос но соос борды итӥсько:

 

Егитъёс, коштан пиос,

Тӥледды витё нылъёс.

Кытчы тӥ кошкиськоды,

Кытчы тӥ дыртӥськоды?

Верано ке ватытэк,

Туж мӧзмыт сюан гуртэк.

Нылъёсмы котьку дасесь,

Ӧвӧл гинэ курасез.

Тракторист но комбайнёр,

Машинист, егит шофёр -

Ваньзы ик чебер пиос,

Устоесь эмеспиос.

 

Шактыр Одоть: Дугдэ ини, дугдэ, тырмоз! Ойдолэ тунатском!

 

Валэктэ тунаськонэзлэсь радзэ:

Бызьыса мынӥськоды но тынэз кытчыозь сузёды кутӥськоды. Собере лыдъяськоды: сюсек, мешок, котомка. Кинлы ма усёз!

Сюсек - узыр азе.

Мешок - шоро-куспо.

Котомка - начар интые.

2-3 егитъёс тунасько, нош Шактыр Одоть валэктэ: кинлы ма усиз.

 

Чутро Насьта: Нош табере сапег лэзьялом: кыдёке-а матэ-а бызёды яке кышно ваёды. Кин азьло?

 

Нылаш: Мон!

 

Кык мурт киосынызы кутскыса «лэсьто» ӟезьы липет, кудӥз вамен егитъёс лэзьяло гын сапег.

 

Сьӧд Сандӥ: Кыдёке-а, матэ-а бызёды, узыре яке куанер азе шедёды асьмеос али тодӥм. Табере туналом кыӵе тусъем меда луоз туганды. Кин азьло?

 

Синъёссэс пытсаса, керттыса бӧрсьысь бере егитъёс кутыло берыктэм шубаез. Нош вожоос кесясько: «Горд, сьӧд, тӧдьы!», собере бызьыса егитъёс доры мыно но учко: кыӵе гонъем луоз туганзы, картсы.

 

Сандыр кенак: Ойдолэ табере зундэс куялом!

 

Сандыр кенак пуксе пукон вылэ. Солэн азяз понэмын тэркы. Отчы егитъёс тыро зундэсъёссэс. Тэркы пытсаське ӵушконэн. Тунаськон кутске котырак бергаса кырӟанэн:

 

Возь вылтӥ ветлӥсько, ӵушконме валисько.

Огпол мыно на ай, огпол валё на ай.

 

Сандыр кенак: Кинлэн зундэсэз?

 

1–тӥ нылаш: Мынам!

 

Сандыр кенак: Э-э-э, нылы. Пинал али - гуртад пук на!

 

Нылаш зундэссэ басьтэ, нош эшъёсыз серекъяло.

 

Борддоре учкисько, гажанме адӟисько. Огпол мыно на ай, огпол валё на ай.

 

Сандыр кенак: Кинлэн зундэсэз?

 

2-тӥ нылаш: Мынам!

 

Сандыр кенак: Ой, нылы, пересезлы бызёд ук!

 

Нылаш зундэссэ басьтэ, интыяз кариське.

 

Сизьымдон сизьым ыштаназ кышъетэз, котькуд кышъетаз сизьымдон манет. Огпол мыно на ай, огпол вале на ай.

 

Сандыр кенак: Кинлэн зундэсэз?

 

3-тӥ нылаш: Мынам!

 

Сандыр кенак: О, нылы, узырезлы бызёд!

 

Кудӥз ке бызёз, кудӥз ке коркан пукоз,

Нош али мынам мар-о кароно?

Огпол мыно на ай, огпол валё на ай.

 

Сандыр кенак: Кинлэн зундэсэз?

 

Пияш: Мынам!

 

Сандыр кенак: Тыныд, пие, калыкез шулдыртыны усе!

 

Пияш: Туж умой! Ойдолэ соку шулдыръяськом!

 

Ваньзы парен-парен кариськыса султо круге но шудо «Небыльток» шудонэз. Арган шудэмъя круг пушкын сылӥсьёс экто, нош сьӧр пӧлаз сылӥсьёс кырӟало такмакъёс. Крезьгур чузъяськемысъ дугдӥз ке, круг шорысь эктӥсьёс асьсэлы пар шедьтыны кулэ. Кин огназ кыле, со маде яке выжыкыл, кылбур, яке эктэ, кырӟа но мукет.

 

Пияш: Бускельёс, уйшор вуиз ини. Оло сюрес воже мыном кылзӥськыны?

 

Ваньзы: Мыном, мыном!

 

Ваньзы эктыса, кырӟаса кошко.

 

Фольклорная композиция составлена на основе рассказов и воспоминаний уроженцев д. Левая Кушья Игринского района: Чиркова Анатолия Григорьевича 1968 года рождения, Чирковой Капиталины Архиповны 1946 года рождения, жителей д. Сундур - Кожевниковой Ольги Макаровны (1923 г. р.), Поздеевой Александры Сидоровны (1923 г. р.), Леконцевой Надежды Васильевны (1932 г. р.), Чирковой Татьяны Ильиничны (1923 г. р.).

 

Дасязы Сундур гуртысь ӧнерчиос

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru