Версия для слабовидящих

Мусо шаере, тон мынам весь сюлмам

Заголовок материала: «Мусо шаере, тон мынам весь сюлмам» (литературая крезьгуро ӝыт)

 

Содержание:

Литературая крезьгуро ӝытлы сценарий

 

Ужрад ортче библиотекалэн лыдӟиськон залаз шоро-куспо арлыдъем калык пӧлын. Лыктэм куноосмы пуко ӝӧк сьӧрын. Ӝӧк вылын пуктэмын самовар но чай юыны сиёнъёс. Магнитофонэтӥ чузъясько удмурт кырӟанъес.

 

Дасямын «Вордӥськем шаере, тон мынам улонэ, пыраклы яратӥ мон тонэ» адӟытон. Солэн таӵе ёзэтъёсыз:

 

1. Удмурт шаерлэн чалмылӥсьтэм гырлыез (К. Герд сярысь)

 

2. Ӟеч ужъёсыз асьмелы кылизы... (А. Оки сярысь)

 

3. "Улытозям мон улонэз кырӟай" (Ф. Васильев сярысь)

 

4. «Мон чидась, мон кужмо...» (А. Кузнецова сярысь)

 

5. «Чагыр инмын кизилиос уг пишто» (3. Рябинина сярысь)

 

Выставкалэн цитатаез:

 

«Вордскем шаер, мынам тон шудбуре,

Тонэ гажай, луи мон кылбурчи,

Шукыяськись мусур кадь кылбурен

Пӧсь мылкыды сюлэмысьтым уртчиз!»

(И. Зорин. Тонэ гажай)

 

Ужрадлэн мугез:

 

- ас шаереныд но калыкеныд данъяськон мылкыд пыӵатон;

 

- удмурт кылбурчиослэн: К. Гердлэн, А. Окилэн, Ф. Васильевлэн, А. Кузнецовалэн, 3. Рябининалэн улэменызы но гожъяськеменызы мургес тодматскон.

 

Чузъяське удмурт крезьгур. Пото кык нуисьёс.

 

1-тӥ нуись: Ӟечбуресь, гажано эшъёс!

 

2-тӥ нуись: Ӟечбуресь, дуно куноосмы!

 

1-тӥ нуись: Ми туж шумпотӥськом туннэ тӥледын пумиськеммылы. Туж бадӟым тау лыктыны быгатэмды понна.

 

2-тӥ нуись: Туннэ асьмеос люкаським тодматскыны удмурт кылбурчиослэн улэменызы но гожъяськеменызы. Вераськон мыноз Кузебай Герд, Ашальчи Оки, Флор Васильев, Алла Кузнецова но Зинаида Рябинина сярысь.

 

1-тӥ нуись: Нош литературая крезьгуро ӝытмы нимаське «Мусо шаере, тон мынам весь сюлмам».

 

2-тӥ нуись: Та пумысен туж чебер кылъёс гожтӥз Флор Васильев:

 

«Бен, Волга но Каматэк уз лу чебер,

Волгатэк нош Кама но ӧвӧл.

Россиятэк ӧвӧл Удмурт шаер,

Нош мон понна Удмуртитэк Россия но ӧвӧл»

(«Шудмы огъя»)

 

1-тӥ нуись: Тросэз дунне вылын улӥсь калыкъёс тодо: тужгес но умоез, чеберез, мусоез со инты, кытын тон вордскид, улӥськод но ужаськод. Одӥг кылын вераса - со Родина.

 

2-тӥ нуись: Вань бадӟым страна дунне вылын, кудзэ ми Родина шуиськомы - со Россия.

 

1-тӥ нуись: Но вань Россиын инты, кудӥз сярысь ми туж яратыса вераськом «Мынам Родинае - со Удмуртия, дуно Удмурт шаер».

 

2-тӥ нуись: Трос книгаос, кылбуръёс, кырӟанъёс гожтэмын та музъем сярысь, солэн тэльёсыз но шуръёсыз, гуртъёсыз но городъёсыз, вуэм ю-нянез но лыз етӥнэз, ужась калыкез сярысь.

 

1-тӥ нуись: Туннэ асьмеос тодматском кылбурчиосын, кудъёсызлы инмар малпанзэс кылбурен вераны быгатонлык сётэм.

 

2-тӥ нуись:

«Вордскем шаер, мынам тон шудбуре,

Тонэ гажай, луи мон кылбурчи,

Шукыяськись мусур кадь кылбурен

Пӧсь мылкыды сюлэмысьтым уртчиз!»

(И. Зорин. Тонэ гажай)

 

1-тӥ нуись: Таӵе шор кылъёсыз (цитатаез) «Вордскем шаере, тон мынам улонэ, пыраклы мон тонэн» книгаосын адӟытонмылэн. Татысь тӥ кылбурчиосмы сярысь трос тунсыко материалъёсты шедьтоды. Учкелэ, лыдӟе, выставка лэсьтэмын тӥ понна.

 

2-тӥ нуись: Куке лыдӟиськод кылбурчиослэсь гожъям чуръессэс, син азе пуксе соослэн сюлэм пуштроссы, паймытэ котыр улонэз быгатыса верамзы.

1-тӥ нуись: Со кылбуръес котыразы кыско кадь, выльысь но выльысь ас чеберенызы но шунытэнызы сюлэмез вырӟыто. Кылбуръёсын верамын котьмар сярысь, но огазея соосты вордскем музъемдэ но калыктэ яратон.

 

Чузъяське С. Широбоковлэн «Куке мынӥсько мон вордскем шаертӥм» кырӟанэз. Кырӟало нылкышноос.

 

Куке мынӥсько мон вордскем шаертӥм,

Сюлмы нош тырме кырӟанэн.

Ӧвӧл кадь пумыз,

Ӧвӧл кадь йылыз

Тӧдьы кызьпуо сюреслэн.

Кыӵе паськытэсь вож лысо нюлэсъёс.

Кыӵе вӧлмытэсь лудъёсмы.

Дыртӥсь шуръёсьн,

Садо возьёсын

Шулдыр тон, милям шаермы!

Чагыр зарезь выл кадь етӥн сяськая

Мусо шаерлэн луд вылаз...

Нюлэс шаугетэ,

Монэ со матэ

Ӧте вож лысо салкымаз.

Эшшо шулдыргес но эшшо чебергес

Улон асьмелы ӝужалоз

Завод гудокъёс,

Кырӟась моторъёс

Милем со сярысь верало.

Потэ нырысетӥ верась:

Я Кузебай-а, шуомы, я Герд –

Чебер кырӟан кадь жингыртоз данэд.

Со дуннеысь ни ми доры уд берт

Но кысытэк югдоз лул ӝуанэд.

Ас шаердэ ӟырдыт яратонэд

Ӧтиз тонэ бадӟым сюрес вылэ.

Сокем ай трос ӧй вал шумпотонэд –

Шудбур угось уг лыкты каньылэн.

Ӟеч малпанэн учкид улон шоры,

Сюлэмысьтыд ӧд ышты оскондэ.

Шудбуроен асьме пал шаерын

Потэ вал адӟемед ас калыктэ.

Вань тыршемед ӧз луы юнмелы,

Нимдэ уз вунэты удмурт калык,

Дыраз туж ик ӧз тод ке но тонэ.

Вань улэмед тодмо ини туннэ.

Зол куаразэ уз ышты кылбуред,

Улоз со данъяса удмурт кылмес.

(А. Белоногов. Малпаськон Герд)

 

Тазьы гожтэ Александр Белоногов Кузебай Гердэз буре вайыса.

 

2008-тӥ арын Кузебай Герд вордскем дырысен тырме 100 ар.

Кузебай Герд (Кузьма Павлович Чайников) вордскиз 1898-тӥ арын, 2-тӥ январе Вавож районысь Покчивуко (Большая Докъя) гуртын. Кылбурчи, прозаик, драматург, тодосчи, педагог, крезьгурчи, югдытӥсь - та удмурт пиосмурт туж трос лэсьтӥз удмуртлыкез ӝутон понна.

 

Вавожысь школаез йылпумъяса, дышетӥсьёсты дасянъя Кукаркаысь семинариын дышетскиз. Сое быдтыса, Бадӟым Учаысь кык классъем школаен кивалтӥз. Озьы ик кивалтӥз Малмыж УОНО-ысь удмурт ёзэтэн. Трос кужымзэ понӥз выль Мултанысь педтехникумез усьтон, книга поттон, нылпи юрт усьтон борды.

 

1922-1925-тӥ аръёсы Кузебай Герд чеберлыко литературая В. Я. Брюсов нимо институтын дышетскиз, отӥяз Шундыӝужанпал калыкъёслэн культуразыя научно-исследовательской институтлэн аспирантэз вал.

 

1923-тӥ арын со удмурт шаерез эскерись «Бӧляк» огазеяськон кылдытэ, 1926-тӥ арын - удмурт писательёслэсь огазеяськонзэс.

 

1929-тӥ арын со СССР-ысь Наукаосъя Академие докторантурае пыриз, но 1930-тӥ арын Ижысь совпартшколае ужаны выжиз.

 

1932-тӥ арын Кузебай Гердэз арестовать каризы, шедьтӥзы тушмонъёс сое пытсэт сьӧры пуктыны амалъёс. Нош 1937-тӥ арын, сӥзьыл пал, Соловец шормуӵе келяса, ыбизы. Со сярысь тодмо луиз 1989-тӥ арын гинэ.

 

Кузебай Гердлы дунне вылын кема улыны ӧз кылды, куамын укмыс аресозь гинэ - шедизы тушмонъёс, вожъяськисьёс, йыркурзэс вормытэк сьӧдмасьёс но саптасьёс. Вунэтӥзы огдыре вань умой лэсьтэм ужъёссэ.

 

Ог витьтон ар улыса, 1989-тӥ арын, Кузебай Герд быдэсак реабилитировать каремын вал. Озьы солэн  данэз выльысь берытскиз калыкез доры.

 

Нош со вакчи улытозяз но Кузебай Герд вуиз ог 500 мында кылбуръёс, куать пьеса, кык повесть, роман, ог 150 мында статьяос гожтыны.

 

Кылбур гожъяны Кузебай Герд кутскиз дас кык аресысен, Вавожысь двухклассной школаын дышетскыкуз.

 

Революция бере кылбуръёсыз «Крезьчи» (1922), «Сяськаяськись музъем» (1927), «Лёгетъёс» (1931) сборникъёсын потӥзы. Та куинь сборникъёс печатласькизы кылбурчи улэп дыръя на.

 

«Крезьчи» книгаяз Герд возьматӥз удмурт калыклэсь туж секыт улэмзэ.

 

Лыдӟись: «Э, куанер калыке, э, шудтэм калыке...»

 

Э, куанер калыке, э, шудтэм калыке,

Тынэсьтыд шудтэмез вань меда кытын ке?

Изьытэк, дӥськуттэк, гольык пыд ветлӥськод,

Ас кӧттэ тырытэк, ляльчиын улӥськод.

Ю-нянед но ӧвӧл туж паськыт бусыяд –

Начаресь ӟегъёсыд куасьмиллям му вылад,

Ӝынызэ анадэ жаг турын басьтылэм,

Интыен-интыен вож пушнер потылэм.

Тынэсьтыд ваньбурдэ, нуназе утчаса,

Чаг тылын эскерса но уд шедьты:

Гӧртэм коркад толалтэ пырыса,

Гур пушкад но пырса чик уд шуна.

Э, куанер калыке, туж шудтэм калыке,

Тынэсьтыд шудтэмэз вань меда кытын ке?

Изьытэк, дӥськуттэк, гольык пыд ветлӥськод,

Ас кӧттэ тырытэк, ляльчиын улӥськод.

Ку меда, кужымдэ люкаса, тон султод?

Ку меда жильыдэ тӥяса сэрпалтод?

Кырӟаса бусыдэ гырыны потылод,

Шумпотса кидыстэ пазялод, кизьылод?...

 

«Чик юнме быро» кылбураз со тышкаськыса вера удмурт калыкез чал-чал улэмэз понна.

 

«Озьы ик кулэ асьмелы -

Вашкала тырысь пыдултыса возем калыклы:

Ум быгатӥське асьмеос дышмонэз адӟонтэм карыны,

Асьме эрикез, чебер улонэз яратыны!»

 

Кузебай Гердлэн туж адӟемез потэ вал ас калыксэ дӥсьтӥсен, эрикоен. Ас кылбураз «Мед куло, эсьмаса» со шуэ:

 

Ӵок! Мед куло, эсьмаса,

Удмуртъёслэсь иземзэс адӟытозь!

Мои жади ини, весь соосыз сайкатыса,

Мон куасьми, удмуртъёс иземысь султытозь.

Султозы, дыр, шуса, весь возьмай, весь возьмай.

Возьмаса кесяськи, сайкатӥ -

Одӥгез но ӧз кыл мынэсьтым куараме.

Кулэм кадь изё на удмуртъёс тэльёстӥ!

Нош асьме юлтошъёс: бигеръёс, чувашъёс —

Кемалась ӝутскыса ужало.

Поттыло газетъёс, школа усьтыло,

Туж визьмо книгаос гожъяло.

Удмуртъёс! Весь изьыса, кумышка пӧзьтыса,

Тэльёсы кулыса быроды-а?

Огинэ луыса, иземысь султыса,

Туж кужмо ужаны кутскоды-а?

(«Мед куло, эсьмаса»)

 

«Сяськаяськись музъем» но «Лёгетъёс» сборникъёсаз Кузебай Герд возьматэ ини воштӥськонъёсты, выль улонэз.

 

Куке быдэс удмурт музъем вылын кылдӥз Совето власть, Кузебай Гердлэн кылбуръёссэ ӝутскем мылкыдын гожъяз. Со гожъяз заводъёс сярысь, возьматӥз адямиослэсь мылкыдзэс.

«Мон удмурт» кылбураз со шумпотыса вера:

 

Мон - удмурт. Мон - туж шудо!

Эрказ луи, бурдъяськи!

Сюлмам горд тылъёс будо,

Сьӧд дуннеысь мозмытски!

Октябрь нуналэ, туннэ

Ульчае калык потоз:

Кудӥз потоз кырӟанэн,

Кудӥз горд флагез ӝутоз.

Нокинлэсь возьдаськытэк,

Удмурт дӥсьме дӥсяса,

Мон но потто кышкатэк,

Горд кырӟанъёс кырӟаса.

Тани - мон но тӥ пӧлын,

Уно пӧртэм калыкъёс,

Мынам мылкыд - туж вылын,

Котырам - выль сюресъёс.

Та Октябрь ӧй ке луысал,

Пеймыт гуын мон улсал,

«Гожмо шыр» нимы лусал,

Аслэсьтым возьдаськысал.

Горд Октябрь монэ ӝутӥз –

Калыкъёс радэ пыртӥз...

Мон тани: татын сылко,

Удмурт кылын кырӟасько!

Мон - удмурт. Мон - туж шудо!

Эрказ луи, бурдъяськи!

Сюлмам горд тылъёс будо,

Сьӧд дуннеысь мозмытски!..

(«Мон удмурт»)

 

Кузебай Герд малпаськиз калыкез дышетон сярысь, нырысь ик вордскем кылызлы, со дунне вылысь медаз быр. Озьы кылдӥз «Удмурт кыл» кылбурез:

 

«...Малы дуно

Та удмурт кыл?

Малы, малы

Кулэ сокем

Удмурт кылэз

Юн ӟеч тодэм?...

Оло мукет уно кыллэсь

Жингрес солэн жингреслыкез?

Оло мусо чеберлыкез?

Оло чебер куаралыкез?

Ӧвӧл, ӧвӧл,

Котькыӵе кыл

Ас интыяз

Чебер, жингрес.

Дырыз дыръя

Котькыӵе кыл

Луэ узыр но сэзь, жингрес.

Нош туннэзэ,

Зэмзэ ик, зэм

Удмурт кылэз

Туж ӟеч тодэм

Тужгес дуно, тужгес кулэ

Та улонэз ӝутын вылэ!..»

(«Удмурт кыл»)

 

Котькуд кылбурчилэн сямен ик, Кузебай Гердлэн трос кылбуръёсыз яратонлы сӥземын. Тани соос пӧлысь кӧняез ке:

 

Ӧс но пытсамтэ...

Шулдыр юмшасьёс

Уйбыт мон ӧй изь:

Уйбыт кырӟазы,

Ӵуж ӟег бусыысь

Жингрес арганъёс.

Вити лыктэмдэ.

Уйбыт жингразы.

Мон ӧй изь. Ӝокыт. Югыт луытозь

Малпаськи. Кылли. Серекъяд, шудӥд.

Куарадэ кылӥ,

Шунды ӝужатозь,

Шулдыр кырӟакуд.

Монэ бӧрдытӥд!

Ӧс но пытсамтэ...

Уйбыт мои ӧй изь:

Ӵуж ӟег бусыысь

Вити лыктэмдэ!

(«Кеносын»)

 

Тани мукетыз - «Туннэ люкиським»:

 

Воксёлы туннэ люкиським –

Ӟег бусы сьӧрозь сое келяй...

Яратымтэзэ табре валай:

Чик лулӟылытэк чупаським.

Садо сюрес кузя кошкиз,

Огпол но берзэ учкытэк.

Кышетсэ но чик шоналтытэк,

Чагыр бусыосы ышиз.

Сӧсырмем сюлэмы бӧрсяз

Пиокуш кадь кеськиз.

Чиректӥз.

Ӝутскиз.

Лобӟиз.

Лобӟиз - шуккиськиз

Някырес бадьлэн вайёсаз.

Усиз. Пересьмем бадь улэ,

Сэрпалтэм из кадь, огназ усиз...

Табере чагыр тулысэ ортчиз,

Ӵок! Ортчемзэ вунэтыны кулэ!

 

Воштӥськем улон, ас шаердэ но калыктэ яратон, соосын данъяськон Кузебай Гердлэсь сюлэмзэ шумпотонэн пачылмытэ. Трос кылбуръёс пото солэн сюлмысьтыз, соос пӧлын «Удмурт улосмы» кылбур но:

 

Тон, Удмурт улосмы,

Эрико шаермы,

Туж мусо потӥськод,

Туж шулдыр адскиськод!

Паськытэсь лудъёсад

Колхозъёс ужало,

Колхозъёс ужало,

Тракторъёс гурлало.

Вашкала гуртъёсад

Школаос усьтэмын,

Вашкала гуртъёсад

Вуж сямзэс куштэмын.

Вуж гуртын вал кенер.

Выль гуртын дэмен луд.

Кин ляльчи вал, куанер,

Со лудын дуре шуд.

Чагтылъёс кысӥзы,

Карасин но быре.

Гуртъёсыз кутскизы

Пукыны электрен...

Городъёс ӝутскыло

Сьӧд нюлэс шоръёсад.

Тон шимес вал азьло,

Нош табре - шулдыр сад.

Колхозэ пырыку,

Колхозъёс ӵыдонтэм.

Колхоз луд учкыку,

Бертэмед потонтэм.

Со понна ик дуно

Тон, Удмурт улосмы!

Со понна ик дано,

Эрико шаермы!

(«Удмурт улосмы»)

 

Кузебай Гердлэн гожъяськон вакытэз туж вакчи вал, чылкак 13-14 ар гинэ. Нош солэн улонэз яркыт кизилилэн лобемез выллем луиз. Со вордэм калыкезлэсь шумпотонзэ но куректонзэ усьтӥсь но суредась луиз. Со кылдытӥз сюлме пыӵамонэсь произведениос. Соос, удмурт культураез сяна, быдэс страналэсь культуразэ но узырмытӥзы, дунне вылысь огъя культурае но ӟеч люкетсэс ватсазы.

 

Кузебай Гердлэн ужъёсыз котькулы кылизы асьме улонамы но сюлэмамы:

 

«Я Кузебай-а шуомы, я Герд –

Нимдэ уз вунэты удмурт калык.

Зол куарадэ уз ышты кылбуред –

Чебер кырӟан - луэ со кемалы.

Ӧз кылды пумъяны малпанъёстэ

Возьмаз ини тонэ шимес адӟон.

Мар «Соловки» со - тодӥсез тодэ...

Калыкедлы кылиз тодаз возён.

Мед валалоз вылэм удмурт калык –

Малпаськон Герд кельтӥд тон пыраклы

(А. Белоногов. Малпаськон Герд)

 

Чузъяське кырӟан «Укно но шоръёсад» К. Гердлэн кылъёсызъя:

 

Укно но шоръёсад

Вож-вож садъёсыд,

Эн кушты но, мемие,

Ву киська.

Азбар но шоръёсад

Тӧдьы ӟазегед,

Эн кушты но, кенаке,

Сюдылы.

Бакча но шоръёсад

Улмопу садэд,

Эн кушты но, дядие,

Ву киська.

Корка но шоръёсад

Векчи пиналъёс,

Эн кушты но, мемие,

Утялты.

Коргид но шоръёсад

Тӧри ужпиед,

Эн кушты но, быратэ,

Сюдылы.

 

2-тӥ верась:

Котькуд калыклэн вань сюлэмаз яратоно нимъёсыз. Удмурт калыклэн таӵе нимъёсыз пӧлы пыре нырысетӥ удмурт нылкышно кычбурчилэн Ашальчи Окилэн нимыз.

Ашальчи Оки – таӵе псевдоним аслыз басьтӥз Лина Григорьевна Векшина. Ашальчи - Кам шур котырысь ческыт зыно турын, зубровник.

 

Ашальчи Оки вордскиз 1898-тӥ арын 4-тӥ апреле Грак ёросысь Кузебай гуртын удмурт крестьян семьяын. Атаезлэн туж потэ вылэм нылзэ дышетэмез. Лина йылпумъяз школаез. Дас куать аресысен дышетыны кутскиз. Соку ик кутскиз кылбуръёс гожъяны.

 

Пичи дыръяз Лина гуртысьтызы одӥг пересь кышномурт доры ветлылыны яратэ вылэм. Та пересез, адямиосты турынъёсын эмъямез понна, «ведӥн» шуыло вылэм.

 

Пичи Линалэн сюлмаз малпан кылдэм - со но луоз «ведӥн», калыкез эмъялоз. Но врач луон понна трос дышетскыны, трос тодыны кулэ. Соин ик нылаш пыре Казаньысь университетэ, дышетске рабфакын но эмъян факультетын. Потэ отысь врач-окулист луыса. Одӥг пол Линалэн кияз «Гудыри» газетысь удмурт кылбур шеде, гожтэм чуръёс солы тодмо но аслаз кадь пото, сюлмаз пыро. Лина кутэ бумага, ручка... Кылбуръёсыз кисьтӥсько сюлмысь.

 

Лыдӟись: «Тон юад мынэсьтым»

 

Тон юад мынэсьтым:

- Марлы бен кылбуръёс гожъяськод,

Чик юнме кужымдэ быдтӥськод?

Бен юад-а, юад-а, эше,

Бусыын ӵуж кисьмам сезьылэсь,

Марлы со уй-нунал ӵаштыртэ,

Уй-нунал ас понназ вераське?

Шур вулэсь нош юад-а, эше,

Марлы со дугдылтэк жильыртэ,

Дугдылтэк ас понназ куаретэ?

Уӵыед но тулыс садъёсын

Марлы бен ӝыт-ӵукен весь чирдэ -

Тон юад-а сое?

 

Ас вордӥськем музъемзэ яратэмзэ Ашальчи Оки тазьы вера:

«Вордӥськем музъеме,

Вордӥськем шаере,

Туж мусо потӥськод,

Туж шулдыр адскиськод.

Калыке потыку,

Дорылэсь мӧзмисько.

Вордӥськем шаерме

Туж буре ваисько»

(«Вордӥськем музъеме»)

 

Калык вераськонысь, кырӟанысь бырйылӥз Ашальчи Оки ас сюлэм висёнзэ но шумпотонзэ вераны тужгес но тупась кылъёс. Озьы со быгатӥз аслэсьтыз гинэ ӧвӧл, трос удмурт нылкышноослэсь пыдлось малпанъёссэс шараяны. Соин ик солэн кылбуръёсыз ас кожазы кадь, ӵуж сезьы музэн, ӝужазы, шур ву кадь жильыртӥзы, уӵы кадь чирдӥзы.

 

Трос кылбуръёсаз Ашальчи Оки возьматӥз секыт семья кусыпъёсты: юонэз, тэргаськонэз, ог-огдэ валамтэез.

 

Лыдӟись:

Пичи коркан чагтыл ӝуа,

Чагтыл ӝуа, коркаез ӵынатэ.

Чагтыл дурын кышномурт пуке,

Кышномурт пуке, ки уж ужа.

Ӵыжыт бамыз солэн кӧсэктэм,

Юись муртлы бызьыса.

Сьӧд йырсиез куанерлэн пурысьтам,

Уен-нуналэн малпаськыса.

Ӟус вылын, огинэ шымырскыса,

Сютэм нылпиос изё:

Вылазы дӥсян дӥсьсы ӧвӧл,

Кӧтсэс тырны няньзы ӧвӧл.

Шудтэм мумызы шоразы учке,

Шар-шар синмысьтыз синкыли вия:

Сюлэм солэн туж куректэ,

Каръян нылпиез туж жаль потэ.

Айыды тӥляд, пиналъёсы

Кудӟыса бертэ, жугиськын кутске.

Дӥсьме кыль, - шуэ, - вина секта.

Уйбыт ӵукнаозь тышкаське.

Кема меда тазьы улом,

Кулон эзельме возьмаса?

Кема меда тазьы курадӟом,

Вордскем нуналме каргаса?

Вылтыры висе, пӧськы кадь ик,

Мыжык огпӧртэм сиыса,

Синмы адӟе ӵуж-вож гинэ,

Синкыли дугдытэк вияса.

Ой, ку меда ӟеч вапум вуоз,

Та аракы ку быроз?

Ой, ку меда картэ визьмаськоз –

Ӟеч улонлэсь радзэ ку шедьтоз?

(«Юись дорын»)

 

Трос кылбур ӧз гожты Ашальчи Оки, куамын сизьым гинэ... Но со кылбуръёсаз возьматӥз вордӥськем шаерезлэсь чеберзэ, азьпал улонлы осконзэ, вань уродзэ улонысь порыса куштон, чылкыт, сайкыт яратон сярысь малпанъёссэ. Со кылбуръёс удмурт нылъёсты ӧтизы ас малпанъёссэс шара вераны, нылмурт данзэс вылэ ӝутыны.

 

Ашальчи Окилэн кызь одӥг кылбурез сӥземын вал яратонлы, соос пӧлын - «Мон тодам ваисько», «Кык гожтэт» но мукетъёсыз.

 

Лыдӟись:

Марлы тонэ яратӥсько,

Марлы тынэсьтыд мӧзьмисько?

Марлы туж жаль потӥськод,

Марлы монэ куасьтӥськод?

Яратэмед монэ быдтӥз,

Пинал сюлэмме чигиз –

Вань эшъёсыным но люкиз,

Вунэтонтэм кайгу ваиз.

Тонэ котьку малпасько,

Уйлы быдэ вӧтасько.

Тонэ адӟытэк мӧзмисько,

Мусо нимдэ верасько.

Тонэн тодматски –

Кайгу шедьти.

Тонэ яратӥ -

Шудтэм луи!

(«Марлы тонэ яратӥсько...»)

 

Лыдӟись:

Мои тонэ яратӥ -

Собере кузьмаськи:

Пужъятэм ӵушконъёс,

Чебересь янчикъёс

Мон кузьмай туж уно,

Гажанэ, котьку но.

Берпумаз мон кузьмай

Туж бадӟым кузьымме,

Туж бадӟым кузьымме –

Пӧсь, ӟырдась сюлэмме.

Пужъятэм ӵушконме,

Чебересь янчикме

Тон басьтӥд ваньзэ но,

Яратӥд котьку но,

Берпумзэ но басьтӥд

Мынэсьтым кузьымме,

Мынэсьтым кузьымме -

Пӧсь, ӟырдась сюлэмме.

Марлы бен басьтыса

Пыд улад тон лёгад?

Туж бадӟым кузьымме -

Пӧсь ӟырдась сюлэмме?

(«Туж бадӟым кузьымме...»)

 

1925-тӥ арын Ашальчилэн потӥз «Сюрес дурын» сборникез, 1928-тӥ арын - «О чем поет вотячка». Собере Лина Векшина  кылбуръёс ӧз гожъя ни.

 

Ӧтьымтэ куноен пыриз война ужась калыклэн улоназ. Быдэс странаысь калык сямен ик, Удмуртиысь калык мыноно луиз тыложе. Семьязэ кельтыса, войналэн нырысетӥ нуналъёсаз ик Лина Григорьевна Векшина кошкиз фронтэ, ужаз полевой госпитальын. Котыраз снарядъёс пуштылыку, со операциос лэсьтылӥз. Озьы, война бырытозь, со фронтлэн азьпал радаз секыт но дано ужез быдэсъяз. Сое данъязы «За боевые заслуги» медален. Война бере Ашальчи Оки  выльысь Алнаше берытскиз. Трос дырзэ но кужымзэ быдтӥз трахомаез быдтон понна.

 

1958-тӥ арын Акулина Григорьевна Векшина пусъемын вал «Знак Почета» орденэн, собере – «Удмурт АССР-ысь дано врач» нимын.

 

1968-тӥ арын Векшиналэн гожъямъёсыз потӥзы «Мон тодам ваисько» бичетын, нош 1978-тӥ арын «Тон юад мынэсьтын» сборникын.

 

1920-тӥ аръёслэн пумысенызы но 1950-тӥ аръёслэн шор вадесозязы Ашальчи Оки ӧз гожъя, уго соку туж секытэсь дыръёс вал. Нош литературамылэсь будэмзэ со ялан сак эскериз. Выльысь гожъяны кутскиз кылбурчи 1956-тӥ арысен, гожъяз  веросъёс, очеркъёс, кудъёсаз возьматӥз пинал дырысен кутскыса вань улонзэ.

 

Ашальчи Оки трос гожъяны малпа на вал. «Кыӵе паймоно кадь дыръёс вуизы!» - мылкыдыз пачыласа ик вазиське со одӥг гожтэтаз. Но тазалыкез лябомиз, 1973-тӥ арын Ашальчи Оки улонысь кошкиз. Кулон азяз гурт калыкез «Мон тодам ваисько» но «Песня о тревожной молодости» кырӟанъёсты шай вылаз кырӟаны косӥз.

 

Калыклэн сюлмаз но визьмаз со кылиз дышетӥсь, врач но кылбурчи луыса. Нош удмурт литературалэн историез понна со - нырысетӥ удмурт нылкышно-кылбурчи.

 

Чузъяське кырӟан «Мон тодам ваисько» А. Окилэн кылъёсызъя.

 

Нюлэскы ветлыкум

Сьӧд сутэр бичакум,

Сьӧд сутэр синъёстэ,

Мон тодам ваисько.

Возьёсыз турнакум,

Льӧль сяська адӟыкум,

Льӧль сяська бамъёстэ

Мон тодам ваисько.

Бусыын гырыкум,

Тюрагай кылыкум,

Тюрагай куарадэ

Мон тодам ваисько.

 

3-тӥ верась:

- Кытысь шедьтӥськод тон

Кылбур чуръёстэ?

- Вордскем гуртысьтым,

Нюлэскысь, бусыысь.

- Кытчы люкаськод тон

Шедьтэм чуръёстэ?

- Гадьысь сюлэмам,

Вань лулысь но сюлмысь.

(«Кытысь шедьтӥськод тон...»)

 

Та чуръёсты гожтӥз Флор Иванович Васильев, тодмо удмурт кылбурчи.

Вордскиз со 1934-тӥ арын 19-тӥ феврале Яр районысь Бердыши гуртын дышетӥсьлэн семьяяз. Пичиысен солэн сюлмаз кылизы, отӥяз пыризы кылбуръёсаз, секыт война аръёс, атаезлэн фронтысь гожтэтъёсыз, анаезлэн шуныт киосыз.

 

«...Тани анай пыроз ни бакчаысь,

Быдэс айшет пыртоз со картошез»

яке

«Фронтысь лыктэм атай гожтэтъёсъя

Ми чоталлям каллен ортчись дырез

Картошкалэн сяськаяськемезъя

Ми лыдъяллям соку вань улонмес».

 

1949-тӥ арын Укан шоръёзо школаез быдтыса, Флор Васильев пыре дышетскыны Глазовысь педучилищее, собере - пединститутэ. Институтын дышетскыкуз, со комсомоллэн секретарез вал. Туж шаплы, мандолинаен, скрипкаен шудыны, туж капчи но чебер эктыны быгатӥсь, котькыӵе ужрадъёсын - нырысетӥ интыын. Институтэз быдтыса, ужаз комсомоллэн горкомаз, ёрос газетлэн редакторезлэн воштӥсез луыса, собере куать ар кивалтӥз «Комсомолец Удмуртии» газетэн, берло аръёссэ ужаз редактор луыса «Молот» журналын, Удмурт писательёслэн Союззылэн тӧроез вал. 1964-тӥ арысен вал СССР-ысь (али Россияысь) писательёслэн огзеяськонзылэн ёзчиез.

 

Кылбуръёс гожъяны кутскиз педучилищеын дышетскыкуз.

1960-тӥ арын Флор Васильевлэн нырысетӥ удмурт кылын сборникез печатласькиз. Со нимаськиз «Ворекъяло кизилиос» («Сияют звёзды»), нош 1967-тӥ арын дуннеез адӟиз ӟуч кылын нырысетӥ «Лирика» сборникез, 1971-тӥ арын Москваын нимаз книгаен потӥзы солэн кылбуръёсыз. Флор Васильев луло дыръя, солэн печатласькиз сизьым удмурт сборникез но вить - ӟучез. Огъя Флор Васильев ог кызь кылбур бичетэз поттэмын.

 

Солэн кылбуръёсыз туж валамонэсь, матынэсь но муресь:

«Бертӥсько-а гуртэ,

Я берлань кошкисько,

Шаере, тон сярысь малпанъёс.

Ӧтиськод ас пидэ,

Муртъёсты ӧтиськод.

Тон дорын котьку ӟеч куноос.

Перепеч-а уд си

Тон, мусур-а уд ю! –

Ӝӧк вылын ческытэсь сиёнъёс.

Ӵемтыса ке усид,

Музъемозь тон уд ву -

Султыны юрттозы трос киос.

Ӟеч сюлмо калыкмес,

Тулыс-сад шаермес

Адӟемзы потэмен ик, луоз,

Уй-нунал дыртыса,

Уй-нунал дыртыса,

Весь лыкто но лукто куноос.

(«Дор сярысь»)

 

Бадӟым но пичи Родина, вордскем гурт, Удмуртия, Россия - соос ваньмыз люкиськонтэм герӟаськемын Флор Васильевлэн творчествояз, со огкадь яратӥз ас калыксэ, музъемзэ, шаерзэ.

 

«Будо, ӝутско трос писпуос. Быдэс нюлэс.

Бен, нокудӥз отын ӧвӧл мултэс,

Нюлэс дурысь корад ке тон арамаез,

Нюлэсэдлэн уз тырмы чеберез.

Ведь адями но одӥгназ ӧвӧл шудо,

Бускельёсыз но улыны солы юртто,

Ачиз но со калыкъёслы юрттэ.

(«Шудмы огъя»)

 

Нош мукет кылбураз со шуэ:

 

Маин-о бен пӧртэм та шаере?

Мукет интыостӥ кадь ик татӥ

Бызё шуръёс, ошмес потэ кыре,

Вож писпуос тубо бамалъёстӥ.

Пилем сьӧры кошкись гурезьёсты

Утчад ке но, уд адӟылы татысь.

Куро люкъёс но зуродъёс адско,

Соос гинэ инмозь ик ӝутӥсько.

Ӧвӧл ке лыдъяно етӥн лудэз,

Уг погыльско зарезь но тулкымъёс.

Ӧз шедьтэ на татысь ӵуж зарниез,

Сое вошто паськыт ӟег бусыос.

Улон куддыр сӧре на мылкыдэз,

Озьы ке но, уг ӝожтӥськы калык.

Ужын сюлмо тыршиз ке,

Со тодэ,

Сюрес усьтоз бадӟым ваньбурезлы.

Дуно удмурт музъем

Нефтен выллем,

Калык сюлэм узыр лякыт сямен.

Калыкмылэсь адӟод быгатэмзэ,

Учкид ке заводысь солэсь ужзэ.

Гурезь йылъёс уг сузьтӥсько инэ,

Ноку уз куашеты татын зарезь.

Калыкеныз,

Чебереныз гинэ

Юн данъяське мынам та шаере.

(«...Маин-о бен пӧртэм та шаере?»)

 

Кемалась быриз Бадӟым Отечественной война. Но со аръёс кема чузъяськозы на калыклэн сюлмаз:

 

Оген кышно пиосмуртэз адӟиз,

Картсэ, лэся, тодаз со вайытӥз.

Солэн сьӧраз кема, кема учкиз,

Синвуоссэ ортчисьёслэсь ватӥз.

Со мар сярысь меда малпаз? Мае

Лулӟылыса соку тодаз ваиз?

Лушкем синвуоссэ, дыр, адӟемен,

Мынам но сюлэмы, оло, чигиз.

Бен мар карод, ӧвӧл ини картэз.

Оло, соин котме подушкаез.

Солэн палыз дораз ке луысал,

Куддыр ӟыгыртысал, мусоясал.

Соин, луоз, куддыр вожъяськыса

Картэн кышномуртъёс шоры учке.

Понназ гинэ туж мур лулӟылыса,

Ыштэм шудзэ дораз ялан вите.

Уз лык ини азьло шудэз.

Уз лык. Озьы ке но, дугдылытэк возьма.

Уг оскы быронтэм пеймыт уйлы,

Ӵук ӟардонлы оскон ӝуа сюлмаз.

Аръёс кошко...Озьы но куд сюлмын

Уло на войналэн бервылъёсыз.

Соос но верало кадь калыклы,

Кыӵе луо солэн секытъёсыз.

(«Оген кышномурт»)

 

Данъяське вал Флор Васильев ас удмурт кылыныз, сюлмыз вӧсь луыса кошке вал, удмурт кылэз ултӥямез кылэ ке.

 

Лыдӟись:

Кинлы кулэ на, пе, удмурт кылэд?

Гуртад сяна,

Уд вераськы соин.

Сыӵе вераськонэз ке кылӥсько,

Котьку солы туж лек вожпотӥсько.

Анай кыл - улонэ нырысь вамыш,

Сотэк уд лэсьты мукетсэ вамыш.

Анай музэн, Анай кылыд юрттоз,

Улон сюрес кузя йыгмыт валтоз.

Бадӟым шуръёс кутско ошмесысен,

Нош вераськон кутске

Анай кылэн.

Умой ӧд ке вала анай кылэз,

Ӟечгес уд тоды тон мукет кылэз.

Соин ик мон

Тыныд йыбырттӥсько,

Соин ик мои Тонэн данъяськисько!

(«Родной кыл»)

 

Флор Васильев туж чебер гожъяз инкуазь, эшъяськон но яратон сярысь. Куд-ог кылбуръёсыз кырӟан но луизы:

«Яратон ке быре, вож куаръёс но куасьмо,

Сяськаос но уг адско тулыс возь вылын.

Яратон ке кысэ, нуналъёс но сылмо,

Сьӧд уйёс кадь гинэ кыстӥсько улонын.

Кошкыкуз яратон мур гожма бам вылэз,

Улонлэн пумозяз бервылыз адӟиське.

Яратон ке ыше, шоканы секытгес,

Улонлэн нош шӧмыз тодмантэм воштӥське.

 

Нош тани мукетыз кылбурез:

 

Кышномуртлэн потэ яратэмез,

Ӧвӧл, картсэ сямен ӧвӧл.

Лушкем потэ яратэмез

Егит пиез

Яке пиосмуртэз

(Ӧз шедьы ке егитэзгес).

Кышномуртлэн потэ яратэмез.

Со учкысал вылэм вылӥысен,

Эскерысал котькуд вамышъёссэ:

Тани лыктоз матаз возьдаськыса,

Тани со кышкаса кадь ӟыгыртоз.

Ымаз-ныраз пӧсь шокаса,

Нырысь со дӥсьтытэк чупаллялоз.

Кышномуртлэн потэ яратэмез.

Со, картэзлэсь ватӥськыса,

Пиосмуртъёс пала ӵем учкылэ,

Кудке дыръя

Синлысъёссэ уллань лэзьылыса.

Кышномуртлэн потэ яратэмез.

Егит дырзэ тодаз-а вайыса

Яке пересьмемзэ-а шӧдыса,

Кышномуртлэн потэ яратэмез.

Нылъёслы кельшо чебер пиосмуртъёс.

Соосын артэ султо ке со нылъёс,

Асьсэос но чебергес пото, лэся,

Учкыло соос котыр данъяськыса.

Нош кышномуртъёс уг ярато, чылкак

Ымнырзы гинэ чебер ке пиослэн.

Ведь луэ чебер сяська но толсяська,

Зорыку вуюись но вордскылэ.

Кышномурт сюлэм адӟе кыдёкысен

Пиослэсь пыдло ватэм сюлэмъёссэс.

Ымнырзы шоры учкылытэк, лушкем,

Книгаез сямен лыдӟе выросъёссэ.

(«Кышномуртлэн потэ яратэмез»)

 

Флор Васильев каньыл гинэ ас кылбуръёсыз пыр лыдӟисеныз вераське - кудзэ турттэ утьыны урод ужъёслэсь, дышетэ кадь шонер улыны, ог-огдэ валаны, вормыны куректонэз, синазькыль карыны лябез но алдаськонэз, шуддэ кияд возьыны быгатыны, секыт дыръя кужмо луыны.

 

Кылбурчилэн аслаз но улоназ куректонэз тырмыт вал. Секыт висьыса, кулӥз гажано кузпалыз, собере - атаез, выныз. Мукет шугсекытъёс но вал, соин кылбурчилэн чуръёсаз пырытэк ӧз быгатэ таӵе кылъёс но:

 

«Мар карод, кулон но вань та дуннеын,

Куректон но весь луоз, иське.

Мон, оло, шумпотысал но шайгуын,

Бӧрдысал ке мон понна кин ке»

 

Туж пиналын, 44 арескын гинэ, кошкиз Флор Васильев асьме пӧлысь. Бырыны шедиз аварие шедьыса,, туж зол сӧсырмыса но курадӟыса.

Туж трос уж лэсьтӥз со ас улытозяз, но малпанъёсыз эшшо тросгес кылизы. Солэн нимыз но кылбуръёсыз весь улозы калыклэн сюлмаз.

 

Чузъяське кырӟан «Тодӥськод-а?» Флор Васильевлэн кылъёсызъя.

 

Тодӥськод-а?

Тон сярысь уй-нунал малпасько.

Адӟиськод-а?

Тон сэрен мӧзмыса ветлӥсько.

Кылӥськод-а?

Уйвӧтам но тонэ ӧтисько.

Тон лыктод-а?

Мон котьку ик тонэ витисько.

Шӧдӥськод-а?

Сюлэмам тон гинэ улӥськод.

Валаськод-а?

Мон тонэ кемалась яратско.

 

Вераськон кутске А. Кузнецова сярысь.

 

Лыдӟись:

Гуртме, Чимошурме, кылдытӥллям вынъёс:

Кайван-батыр удмурт пияш,

Завьял-батыр ӟуч пи.

Оло соин Чимошурам

Али но верасько суро-пожо -

Ӟуч но удмурт кылъёс герӟаськиллям

Люкиськонтэм...

Кыксы но ярато вылэм вынъёс

Одӥг кышномуртэз.

Огез ӟуч сяменыз,

Нош мукетыз удмурт сямен

Кырӟалозы вылэм

Одӥг яратонзы сярысь...

Тон улӥськод Ока палан,

Нош мон, Камлэсь пасьталазэ синйылтыкум,

Тонэ тодам вайылӥсько.

Кыкмы но кырӟаськом уго бадӟым яратонмы сярысь.

Тон ӟуч кылын кылбураськод,

Нош мон кылбурасько удмурт кылын.

Мусо Россиямес данъяськомы сюлмысь.

(«Асьмелэн яратонмы»)

 

4-тӥ верась:

Та кылбурез гожтӥз Алла Алексеевна Кузнецова. Вордскиз со 29-тӥ  ноябре 1940-тӥ арын Завьял районысь Чимошур гуртын.

Мукет кылбурчиослы сямен, ӧз кылды солы дышетскыны университетын, но со ӧз люкеты кылбурчилы сюлэм пыртӥ потымон чуръёс гожъяны.

 

Алла Кузнецовалэн кылбуръёсын куинь сборникез потӥз: «Чуръёсы тыныд», «Малы меда?», «Чимошуре, Чимошуре». Та кышномуртлы улонын трос шӧмъяно луиз ческытсэ но, курытсэ но. Война вакытэ будӥз бере, со ӟеч тодӥз сютэм дырез но, анай-атайтэк улонэз но. Та сярысь кылбурчи вера ас кылбуръёсаз.

 

Лыдӟись:

Ческыт ик нянь.

Сьӧд сюй кадь сьӧд,

Кӧс сюй кадь ик пырдӥз киям

Пот нянь.

Пот нянь вал ӝӧк вылам.

Нош мар вал ческытгес солэсь?

Ӧйтӧд.

Кампет шӧмез тодылытэк,

Сиим ми картофка табань.

Сиим беризь куарлэсь пӧрам.

Улон кадь ик дуно со нянь!

Нош табере чабей нянез

Нылы азе ке пуктӥсько,

Куддыр, шӧдтэк шорысь, синме

Кышет пумен ӵушалтӥсько...

(«Ческыт нянь»)

 

Лыдӟись:

Детдомын милемыз сюдӥзы пӧсь шыдэн.

Тэркы тыр нянь сылӥз ӝӧк вылын.

Со аре тӧрнаса сьӧдэктӥз нэнӥе,

Лыз синмыз кыниськиз пыраклы.

Кӧс нунал ӝытазе мон доры адскыны

Ужысьтыз эшъёсыз вуизы.

Кин мунё, кин книга, кин кампет

Азьло кадь ик салам ваизы.

Нош одӥг кышномурт, нунызэ ӝиптыса,

Вож курытгумыен утялтӥз.

Кузь синлыс пумъёсаз синвузэ ватыса,

Йырсиме небытак маялтӥз.

Ой, ческыт ик потӥз со курытгумыез...

Нэнэлэн кадь потӥз вешамез...

Ой, нылы, гыдыке, медад тоды ноку

Та сютэм син пыртӥ мынямез.

(«Детдомын милемыз...»)

 

Дас куать арескысен Алла Кузнецова ужаны куртске кирпич заводын, отӥяз фрезеровщица, комендант, вузкарись, выж миськись луыса тырше.

 

Та лапеггес, пальышась ымныро кышномурт сярысь Удмуртиысь калык писатель Вячеслав Ар-Серги статьяаз гожтэ: «Мон малпасько, куке кышномурт поэзиез люконо луысал ке (озьы шуыны яра ке) кызетӥ даурез мон сётысал Ашальчи Окилы, нош кызь одигетӥ даурез – Алла Кузнецовалы».

Оло со шонер но! Алла Кузнецовалэн нырысетӥ кылбуръёсыз потыны куртскизы куатьтонэти аръёсы «Комсомолец Удмуртии», «Советская Удмуртия» газетъёсын,«Молот» журналын. Нырысетӥ кылбуръёсыз Алла Кузнецовалэн шудбурен пачылмемын уд шуы. Соос пӧлын шӧдӥське сюлмаськон, куректон но

улон сярысь малпаськон.

 

Лыдӟись:

Ӟеч кылэз котькинлэн но потэ кылэмез.

Лӥятэ ке но со огвилы.

Ляб муртлэн но соку вадьсаське кужымез,

Сӥзьылэд но пӧрме тулыслы.

Улонам канжаськи мон... уси... шуккиськи...

Мугоры чик ӧз сӧсырмы, ӧз.

Чидантэм вӧсь луиз сюлэмы.

Туж вити мон соку ӟеч кылэз.

Я ачид-а валад?

Кӧтӝоже-а вераз?

Эшедлы кадь кидэ тон мычид.

Сюлэмы но бурмиз,

Малпанэ но шуназ...

Бен кытысь со быдӟа ӟеч кылъёс тон шедьтӥд?

(«Ӟеч кыл»)

 

Мукетъёсыз кылбуръёсыз асьмеды дышето кадь:

 

«Огез мед быдэсмоз вал малпанэ:

Дунне вылын арбериос дунтэм мед луозы,

Нош адями улон

Мед дунъянтэм дуно луоз!»

(«Мон шудбуро»)

 

Кылбурчи асьмеды ӧте чылкыт сямо луыны, тазьы вазиське со

лыдӟисьёсызлы:

 

«Ӟечезлы ке ыштӥд тон оскондэ -

Соку тон ыштэмед ваньзэ!»

(«Ыштӥд коньдон»)

 

Кытчы гинэ Алла Кузнецова ӧз вуылы, кытын гинэ ӧз улы – сюлэмыз кыскиз сое вордӥськем палъёсаз:

 

«Бен, ма...

Отын шуныт.

Нош малы ке мыным

Бадӟым шунды улын

Ӧз тырмы кадь инты.

Бертӥ.

Соку гинэ валай:

Кызьы анай

Улытозям сюлмысь уз поты ноку но,

Озьы ик тон мыным улонэлэсь дуно,

Оскод-а тон такем дунъямелы?»

(«Тон мыным улонэсь дуно»)

 

Нош кыӵе синмаськымонэсь солэн яратон сярысь кылбуръёсыз. Солэн героиняез - быдэ вуэм нылкышно. Улонысь шугзэ но, курытсэ но со адӟемын. Улон ик сое визьмо каре. Табере со тодэ, пичи ке но шуд, со -шуд. Сое утьыны кулэ, сое дунъяны быгатоно.

 

Лыдӟись:

Пегӟид.

Эгыр сюлэм бордам

Кышкад сутӥськыны.

Улон сюрес вылам

Ӧд вамышты сьӧрам.

Кыл вӧлдэмлэсь,

Курадӟонлэсь кышкад.

Но дугды-ай,

Вуоз сыӵе дырыд.

Астэ пыжоз яратонэд,

Астэ гинэ,

Нош со дыре

Тодад ваёд меда монэ?

(«Пегӟид»)

 

Тямыстонэтӥ аръёсы Алла Кузнецова йыгмыт  пыриз Удмурт шаерлэн литературной улоназ. Кызь ар ӵоже трос гожъяз, сое тодманы но тодыны кутскизы, кылбуръёсыз потылӥзы Удмуртиын, Россиын но кунгож сьӧрын.

 

Вал солэн улоназ котьмар - кылбурчи пагӟаетӥ вылӥе тубон, анай луонлы шумпотон, трос пол яратонэн пумиськон, шудбур но куректон синкылиос.

 

2003-тӥ арын 12-тӥ гудырикошконэ Алла Кузнецова улонысь кошкиз, сюрес вылын аварие шедьыса.

 

Лыдӟись:

Мои вордӥськи дунне вылэ

Салкым сӥзьыл уе.

Нордӥ выллем

Будӥ кален.

Ож тыл сямен сутӥз монэ ӟырт тол.

Вӧсь луэмлэсь

Кӧдэктылӥз, оло, толэзь -

Урмылыса

Соку поръяз война.

Нош мон кыли улэп.

Мыным май гудыри

Данъя ошмес палме,

Кам шур секта кужым люкась вуэн.

Мон улӥсько,

Нылме, пиме будэтыса,

Сюлмысьтызы ӟеч мылкыдзэс

Шӧдэменым буйгатскыса.

Одӥг малпан гинэ

Уг сёт буйгатскыны:

Кулэ-а мон калыкелы?

Дунне вылын улэмелэн

Бадӟым-а пайдаез?

Кинлэсь-о юано?

(«Мои вордӥськи дунне вылэ...»)

 

Кылбуръёсаз Алла Кузнецова вераз кибашлы но яратӥсь, ӟеч сямо но мыло-кыдо, пӧртэм удысъёсын ужась, нылпи будэтӥсь, выль улонэз лэсьтӥсь туала кышномуртэз данъямез сярысь.

 

Чузъяське кырӟан А. Кузнецовалэн кылъёсызъя.

 

Малпасько тонэ,

Утчасько тонэ,

Ӧтисько тонэ:

- Лык дорам!

Янгышен ке но,

Гажатэк ке но,

Пӧяны ке но

Пыр дорам!

Ӵок, уд вала ке

Со ӝытэ монэ,

Уд ке кут киме

Кошкыкуд...

Синмыным ке но

Вешало мыштэ,

Ӧс кусып вамен

Потыкуд.

Котькинлэсь шудо

Мон соку луо.

Уж дурам дырто

Кырӟаса.

Котькыӵе кӧтӝож ӧвӧлтэм сылмоз,

Тон пырад дорам

Шуыса.

Ой, шудтэм шудэ,

Лушкем малпанэ,

Одӥг пол ке но

Пыр дорам...

(«Малпасько тонэ»)

 

Вераськон кутске З. Рябинина сярысь.

 

5-тӥ верась:

Мон улонлэсь номыр уг куры

Кулэ ӧвӧл кичабонъёс.

Малы соку гожъяськисько-а?

Лыкто асьсэ коже чуръёс.

Мон лыз инбам сярысь уг гожъя.

Гожто ачим сярысь, эшъёс.

Ачим ке ӧй, кин валалоз на?

Кылбур ке ӧз, мар буйгатоз?

(«Азькыл инты»)

 

Та кылъёсын усьтӥське Зинаида Рябининалэн «Синмаськем тӧлъёс» кылбуръёсын сборникез. Зинаида Рябинина вордскиз 1971-тӥ арын 26-тӥ тулыспалэ Селта районысь Кейлуд-Зюнья гуртын. Быдтӥз Югдон шоръёзо школаез, собере Удмурт кун университетэз. Кылбуръёс гожъяны кутскиз, школаын дышетскыкуз ик. Тазьы гожтэ со ас вордскем гуртэз сярысь:

 

Мынам гуртэ пичи но кыдёкын.

Пуксем со малы ке но улыге.

Уг адӟиськылы картаос вылын.

Сюресъёслэн урдсазыгес кыле.

Мынам гуртам толзэ сюрес луэ

Бусы шортӥ лёгем вал пытьыос.

Инме ӟарыт толэзь питрам бере

Отӥ калго Янгурччиысь палэсмуртъёс.

Со пытьыос кузя гуштылыса,

Мон бертылӥ пинал дыръям мырдэм.

Корел ӵын шӧм, сэзь омырен суралскыса

Ой, дыртытъяз. Уяз лымы пӧлын дэрем.

...Али луи ни укыр азьтэм.

Назьыльскисько кӧснуналэ Ижын.

Но шуг дыръя сыӵе потэ бертэм!

Гуртэ, шат тон ӧд мӧзмы мынэсьтым?

(«Кейлудлы»)

 

Али Зинаида Рябинина тодмо журналист. Улэ Ижкарын. Ужа «Удмурт дунне» газетлэн валтӥсь редакторез луыса. Газет ужъёсы тэрисьтэм мылкыдзэ кылбуръёсын кисьтэ, озьы ик гожъя веросъёс но. Мукет нылкышно кылбурчиос пӧлын Зинаида Рябинина висъяське ӧч карыса, чепылляны турттыса гожъяськон манереныз. Лирической героинязэ со возьматэ чеберъятэк. Кылбуръёсыз солэн пӧртэмесь, но авторез шугъятэ нылкышнолэн пуш дуннеез, семья кусыпъёс, адямиослэн ог-огзэс валантэмзы но мукет сюлэмез вӧсь карись ужпумъёс. Тани куд-огез соос пӧлысь:

 

1-тӥ лыдӟись:

Куке ӧдъяй мон бӧрдыны азяд

Пегӟид.

Косӥд монэ буйгатскыны.

Куддыр сыӵе кулэ шыпыт жалям...

Малы-о возьдаськид лӥятыны?

Куке ӧдъяй серекъяны азяд,

Малы ӧд кос меда буйгатскыны?

Вӧзам сыӵе чебер бергад, ушъяд.

...Шудо муртэ яратыны капчи.

(«Куке ӧдъяй...»)

 

2-тӥ лыдӟись:

Вань ке тон, Инмар,

Уть монэ эшлэсь,

Кудӥз сю полэс

Ассэ эш шуоз,

Но одӥг уе

Мынэсьтым картме

Валесаз шунтоз.

(«Вань ке тон, Инмар»)

 

Нош таоссэ кылбуръёссэ лыдӟыса, тодэ лыктэ пинал дыр, яратон, куректон но мӧзмон.

 

1-тӥ лыдӟись:

Тон мыным туннэ сыӵе кулэ вал!

Кылӥськод-а, тон мыным кулэ!

Курисько, маке но малпа, малпа –

Адӟытэк тонэ лулы кулэ.

Мон уг ӝегаты, адском ай ӝоген.

Синъёсад гинэ шыпыт учко.

Пачкатэм лулы, оло, отысь шедьтоз на

Шокчыны выльысь юзмыт кужым.

Тон мыным туннэ сыӵе кулэ вал!..

Туннэдэ ӧд сӥзьы тон мыным.

(«Тон мыным туннэ...»)

 

2-тӥ лыдӟись:

Монэ уд вунэты.

Мон вунэтон понна ӧй вал.

Ӧдъяд ке но,

Уд быгаты,

Тынад

Мон вал.

Вунэтыны астэ косӥд ке но,

Мукет нылмуртъёсын воштӥд ке но,

Уд быгаты. Выльысь тодад лыкто -

Тынад мон кадьёсыз уз луэ.

Ӧй но вал.

(«Монэ уд вунэты»)

 

Кемалась ортчиз Бадӟым Отечественной война, но та пинал кышномурт ас сяменыз возьматэ кышкыт войналэсь вань секытсэ.

 

Лыдӟись:

Котькуд 9-тӥ Мае

Кепыр вайисько ас поннам –

Ӧз тод култояз песяе,

Кытын ватэмын песятай.

Жадиз, Данёзэ возьмаса.

Тодӥз - со ноку но уз ву.

Но котькуд 9-тӥ Мае

Кема бугыръяз шыкыссэ.

Чылкыт айшетсэ поттыса,

Возьмаз, дыр.

Оскиз малы ке.

Бер ӝыт ни, лушкем лулскыса,

Шыпыт ворсалляз шыкыссэ.

(«Вормон нунал»)

 

Кылбурчилэсь чуръёссэ лыдӟыса, паймоно кадь, кытысь со шедьтэ сомында шуныт, сюлме пырись кылъёс. Рябининалэн тросэз кылбуръёсыз сӥземын анай-атаезлы. Туж быгатыса соос гожтэмын.

 

Лыдӟись:

Ой, анай! Пукысал тонэн уйбыт.

Кисьтысал бӧрдыса кӧтӝожме.

Но ачим ни анай.

Уг, уг поты

Берпуметӥ сидэ чигтэме.

Тон монтэк но укыр жуммемын ни.

Малпа, кожа монэ коть шудо.

Со быдӟа но ӝожез ке ӧй чида,

Нылпие будыса мар шуоз?

Ой, анай! Мон мадё тыныд лумбыт –

Ушъяло улэмме-вылэмме.

Кылбурме нош шедьтӥд ке, эн лыдӟы.

Мон тыныд ӟечсэгес на сизё.

(«Ой, анай!..»)

 

Оло анайёсмы кемагес дунне вылын улысалзы, ваньзы малпасалмы ке та пинал кылбурчи сямен.

Зинаида Рябинина палэнэ ӧз кельты нылпи вордон но утён темаез, ас кылбуръёсаз со асьмелы вераны турттэ кадь - нылпиослэн луыны кулэ анайзы но атайзы, пинал сюлэм озьы ик мӧзме, куке ӧвӧл котыраз анай-атаез.

 

Лыдӟись:

Тодӥськод-а, нош мынам будэ пие.

Ачим кадь ик чупырес но туж визьмо.

Только синъёсыз мӧзмыт тусо.

Кинэ ке ялан соос витё.

Тодӥськод-а, мар толон шуиз?

Ку ини атай, пе, мон луо?

Синъёсыз сыӵе шудо шудо.

Малы ке тодмо мыным потто.

Ӟыгыртӥз, чупаз но лулӟытскиз.

Сэзъялтӥз йырзэ тон сяменгес.

Тодӥськод-а, мар туннэ шуиз –

Сюанам отёд-а атайме?

(«Тодӥськод-а, нош мынам...»)

 

Трос вераны луысал на кылбурчилэн творчествоез сярысь. Туннэ тодматским куд-ог кылбуръёсыныз гинэ.

 

Кинлэн мургес тодматскемез потэ кылбурчилэн творчествоеныз, быгатоз лыдӟыны солэсь «Синмаськем толъёс» кылбур сборниксэ.

 

«Чагыр инмын кизилиос уг пишто,

Соос пишто пеймыт-пеймыт инмын.

Кылбурчиос ноку кылбур уг гожто,

Укыр чылкыт, сайкыт ке сюлэмын»

 

1-тӥ нуись: Тани вуиз пумаз удмурт кылбурчиослы сӥзем  ӝытмы.

 

2-тӥ нуись: Соосты ваньзэсты огазея, ас вордскем музъеменыд, шаереныд, ас калыкеныд но соослэн уженызы данъяськон.

 

1-тӥ нуись: Бадӟым тау тӥледлы ваньдылы. Табере ваньдэсты ӧтиськом самовар котыре пӧсь чай юыны. Собере кӧня ке кырӟаломе на удмурт кырӟанъёсмес, ваньмы ӵош, арган шудэмъя.

 

Уже кутэм литература:

 

1. Ар-Серги, Алла Кузнецова (1940 - 2003) // Известия Удмуртской Республики. - 2008. - 31 янв.

2. Ашальчи Оки. Тон юад мынэсьтым : кылбуръёс, веросъёс, гожтэтъёс. - Ижевск : Удмуртия, 1978. - 140 с.

3. Васильев Ф. Гажан дыр : выль кылбуръёс но кырӟанъёс. -Ижевск : Удмуртия, 1971.-  216 с.

4. Васильев Ф. Ойдо вераськом : выль кылбуръёс. - Ижевск : Удмуртия, 1980. - 222 с.

5. Васильев Ф. Тон сярысь : кылбуръёс но кырӟанъёс. - Ижевск : Удмуртия, 1966. - 88 с.

6. Герд Кузебай. Гажан эше : кылбуръёс но поэмаос, тодэ ваёнъёс/ Предисл. А. Шиляевлэн. - Ижевск : Удмуртия, 1978. - 251 с.

7. Герд Кузебай. Кылбуръёс но поэмаос. - Ижевск : Удмуртия, 1963. - 200 с.

8. Герд Кузебай. Та кырӟанъёсы-тюрагайёсы : люкет кылбуръёс, поэмаос / Дасяз Ф. Н. Ермаков. - Ижевск : Удмуртия, 1994. - 302 с.

9. Жингырты, удмурт кырӟан. - Кенеш. - 1994. - № 9.

10. Жингырты, удмурт кырӟан! : нотаосын кырӟан сборник. Кыкетӥ изданиез / Дасяз П. Н. Поздеев. - Устинов : Удмуртия, 1987. - 374 с.

11. Кузнецова А. Малы меда? : кылбуръёс. - Ижевск : Удмуртия, 1984. - 36 с.

12. Кузнецова А. Чуръёсы тыныд : кылбуръёс. - Ижевск : Удмуртия, 1976. - 47 с.

13. Писатели Удмуртии : биобиблиогр. справочник. - Ижевск : Удмуртия, 1989. - 463 с.

14. Рябинина 3. Синмаськем тӧлъёс : кылбуръёс. - Ижевск : Удмуртия, 2006. - 79 с.

 

Дасяз Головизнина Людмила Владимировна, Селта ёросысь библиотекаысь библиотекарь

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru