Версия для слабовидящих

Мусо вордскем шаермы

Название материала: Мусо вордскем шаермы

 

Содержание:

(нылпиосын но анай-атайёсын ӵош шулдыръяськон сӥзьыл ӝыт)

 

Кема ужам анай кадь со йӧно,

 Лыктэ со котьку тачак саламен.

 Соин, лэся, со нимысьтыз дуно,

 Уг пот мӧзмыт дырзэ но курламе.

А. Белоногов

 

– Ӟечбуресь, гажано эшъёсы! Туннэ асьмеос люкаськимы йыръёсмес тӥяны, тросгес тодон-валан басьтыны но шулдыръяськыны.

 

– Сӥзьыл мышпалзэ учке ини. Солэн берло нуналъёсыз вакчиесь, ӝомалэсэсь. Соку гинэ ӵукна ӟардэ, югыт умой-умой вӧлскылыса ик уг вутты кадь, уд но шӧдӥськы – музъем вылэ акшан лэзьке ни. Шуо уг: нуналэд та вакытэ ӟольгыри вамыш кузя гинэ. Пилемъёс улӥетӥ уяло: я лымыя, я кезьыт зор кыдыра. Шунды шер возьматскылэ, укно синъёс солы но шумпото, лэся: воректыло, пальпотыло.

 

– Инкуазь буёлъёс бездӥзы. Кыдёкысен ик син шоры йӧто сьӧдмыт-вож нюлэсъёс гинэ. Шим-шим кылем лудъёсын, сикъёсын но арамаосын тӧл шуласа ветлэ, ватскон инты шедьтымтэеныз лэся, со лекъяське, вузэ, музъемез, прудъёсты, шуръёсты кынтэ.

 

– Нюлэсъёсын, садъёсын уг шыпырто ни куаръёс, тулысозь чалмемын тылобурдоослэн шулдыресь концертъёссы. Шыпыт интыосын одӥг-ог пиштыло чырткем пислэгъёс, чипсыло тэль курегъёс, кокасько горд йыро сизьёс. Писпуысь писпуэ уллёен лобало палэзь сиись пурысь юберъёс, улвайёс вылын ӟильгетыса пуко-пуко но дур-р лобӟо!

 

– Асьме доры толйыны вуизы шушыос, люгысэрттӥсьёс, такъя юберъёс но мукетъёсыз бурдо куноос. Соослы, уй палась лыктэмъёслы, татын кезьыт уг поты, шӧдске, сион октыса, сэзь лобало, ӟильырто, шулало, чието.

 

Нуись: Асьме доры туннэ вуиз куно. Тодмады-а, кин со. Вералэ али ваньды ӵош.

 

Сӥзьыл: Ӟечбуресь, нылпиос, анай-атайёс, куноос!

 

Нуись но пиналъёс: Ӟечбуресь, Сӥзьыл!

 

Нуись:

           Ӟечбуресь, Сӥзьыл!

           Туж уcто тон вуид.

           Тынэсьтыд ми, Сӥзьыл, юалом:

           Map кузьым ваид?

 

Сӥзьыл: Ваи мон тӥледлы пызь!

 

Пиналъёс: Кутэм нянь пыжом солэсь!

 

Сӥзьыл: Бакча сиён тачак ваи!

 

Пиналъёс: Шыд пӧзьтом ми соосын!

 

Сӥзьыл: Шумпотӥды-а грушалы?

 

Пиналъёс: Толалтэлы сое ми куасьтом!

 

Сӥзьыл: Нош улмо чечы кадь!

 

Пиналъёс: Варенья солэсь пӧзьтом!

 

Сӥзьыл: Та корзинкаям мынам сӥзьыл кузьымъёсы, но соосты басьтон понна мадиськонъёсты тодыны кулэ.

 

Кин ке сю полэс дӥсяськем,

озьы но ӧвӧл бирдыяськем,

кускыз но солэн керттымтэ,

дӥсез но солэн вурымтэ. (Кубиста)

 

Одӥг но жаль уг поты,

шораз ке учкисько,

оломалы бӧрдоно. (Сугон)

 

Ӵыжыт анайлэн нырыз кузь. (Ӵужкушман)

 

Корка трос адями,

ӧсэз но укноез но ӧвӧл. (Кияр)

 

Шунды шорын Окыльна апай сылэ,

шунды кытчы – со но отчы. (Шундыберган)

 

Музъеме одӥг понӥськод но,

со дас вить луэ. (Картофка)

 

Нуись:

          Улмо но, чечы но,

          Нянь но тон ваид.

          Нош чебер куазь

          Милемлы ваид-а?

 

Сӥзьыл: Ваи мон тӥледлы аслэсьтым сӥзьыл куазьме. А кыӵе со – тодэ али.

 

Чагыр инметӥ лобе тылобурдо,

паськыт бурдо, быдэс инэз ӵокса. (Пилем)

 

Инмарлэн синвуэз вань дуннеез пылатэ. (Зор)

 

Бурдыз ке но ӧвӧл – лобаны быгатэ,

киыз ке но ӧвӧл – писпуэз някыртэ,

куараез ке но ӧвӧл – кырӟа. (Тӧл)

 

Нуналъёс вакчи луизы

кузьгес луизы уйёс,

кин-о вералоз, кин-о тодэ,

ку-о со луэ. (Сӥзьыл)

 

Сӥзьыл: Ӟечесь, пиналъёс! Нош кырӟаны тӥ быгатӥськоды-а? Тодӥськоды-а мон сярысь крезьёс?

 

Пиналъёс кырӟало.

 

Сӥзьыл: Туж умой быгатӥськоды. Нош кылбуръёс тодӥськоды-а?

 

Пиналъёс:

                  Зарнияськем шунды сиос

                  Кызьпу куаръёс пӧлы йыромиллям.

                  Чик жалятэк, лэся, соос

                  Ас зарнизэс

                  Татчы ик кельтӥллям.

                  Ф. Васильев

                

                 Сӥзьыл, зарни сӥзьыл,

                 Дыртэ тэле, сике.

                 Выль тӧл лыктон азьын

                 Писпуосты миське.

                 Жадем музъем вылэ

                 Вале дуно кышет,

                 Озьы сӥзьыл нюлэс

                 Вуюисьлы кельше.

                 В. Кириллов

                

                 Я, тырмоз тыныд, тӧл,

                 курткыны

                 писпулэсь куаръёссэ.

                 Дырызлэсь вазь

                 малы быдтыны

                 писпулэсь чеберзэ.

                 Вадестӥд

                 шунытэсь палъёсы

                 туриос лобозы,

                 нош писпу

                 шат куартэм вайёсын

                 шоналоз бӧрсязы?

                 Сӥзьыл пал чеберзэ

                 туриос

                 эшшо мед адӟозы.

                 Дыр вуиз ке,

                 куаръёс

                 асьсэос

                 шыпытак усёзы.

                 А. Леонтьев

                

                 Кызьпу вайёс вискытӥ

                 Вож адско лысо кызъёс,

                 Ортчыку беризь ултӥ

                 Ӵаштырто усем куаръёс.

                 Со озьы сӥзьыл лыктэ,

                 Я зоре, я пужмертэ.

                 Куаръёсты со чеберъя.

                 Чеберъя но питыръя.

                 Т. Шмаков

 

Сӥзьыл: А нош эктэмды тӥляд луэ-а.

 

Пиналъёс экто.

 

Сӥзьыл: Ӟечесь! Туж усто эктӥськоды но, кырӟаськоды но, кылбур но вераны быгатӥськоды. Нош али кыл сётом нуисьлы но солэн юрттӥсьёсызлы.

 

Нуись:

           Map дунне вылын

           Котьмалэсь дуно?

           Котькытчы тон мын –

           Солэсь мӧзмоно.

           Map дунне вылын

           Котьмалэсь чебер?

           Со – одӥг кылын –

           Вордӥськем шаер.

           Ф. Пукроков

          

           Бен, Волга но Каматэк уз лу чебер,

           Волгамытэк нош Кама но ӧвӧл.

           Россиятэк ӧвӧл Удмурт шаер,

           Нош мон понна

           Удмуртитэк Россия но ӧвӧл.

 

Нуись: Озьы гожтӥз асьме шаермы сярысь удмурт кылбурчи Флор Васильев.

                     

                      Мон удмурт

           Удмуртъёс бен сокем трос ӧвӧл.

           Шаермес но уд шуы пумтэм.

           Улонмы нош Кам шур кадь вӧл-вӧл

           Шудбуре ни нуэ удмуртэз.

           Пеймыт уй кадь зӥбе вал кайгу.

           Сю пӧртэм калыкъёс ваче ки

           Кутскизы но, отчы ик удмурт

           Улонзэ выльдыса кутӥськиз.

           Асьмелэн вормонтэм кужыммы

           Со ваче кутӥськем киосын.

           Соинтэк-а удмурт гуръёсмы

           Жингырто ни пӧртэм палъёсын?!

           Мед луоз та дунне кайгутэм!

           Котьку медло шудбур но эшлык!

           Мон удмурт.

           Эшъёсы – лыдъянтэм.

           Шаермы но инбам кадь эркыт.

           В. Ванюшев

 

Сӥзьыл: Туннэ асьмелэн ӝытмы сӥземын удмурт музъемлы, вордскем шаерлы. Таӵе юанъёсмы милям тӥледлы.

 

1. Ку Удмурт шаер пыртэмын вал ӟуч государствое? (1558 арын)

 

2. Ку кылдӥз Удмурт автономия? (1920 арын)

 

3. Вералэ Удмуртиысь тужгес бадӟым шуръёсты. (Кам, Чупчи, Вало, Сива, Кильмезь, Иж)

 

4. Вералэ асьтэ ёросысьтыды шуръёсты. (Арлеть, Кильмезь)

 

5. Асьме шуръёсмы узыр чорыген. Вералэ удмурт нимъёссэс. (Лещ – пая, пескарь – чукырна)

 

6. Тазалыклы изъян ваись кыӵе будосъёс тодмо асьме шаерын? (Пиньтурын, кионсутэр)

 

7. Кыӵе эмъюм будос, калык шуэмъя, йӧнатэ 99 висёнъёсты? (Виртурын)

 

8. Вералэ тылобурдоослэсь удмурт нимъёссэс. (Глухарь – дукъя, рябчик – сяла)

 

9. Map кароно пӧртмаськисьёслы сётэм нянен? (Сюдоно пудоослы)

 

10. Map карыны кулэ сюанчиос нырысь ик келисьёс доры пыремзы бере? (Куинь пол гур котыртӥ котырскыны)

 

11. Кыӵе удмурт сиёнтэк, кудзэ дася выль кен, уг ортчы сюан? (Табаньтэк)

 

12. Кыӵе гужем шулдыръяськонлэн нимыз герӟаськемын ужен? (Гербер)

 

13. Удмурт мифологиын вулэн инмарэз. (Вумурт)

 

14. Кыӵе пӧйшур Удмурт шаерын тужгес но бадӟым? (Койык)

 

15. Удмуртилэн нырысетӥ президентэз. (А. А. Волков)

 

16. «Улэм потэ» романлэн авторез. (Пётр Блинов)

 

17. Удмурт шаерын символлы пӧрмем сяська. (Италмас)

 

18. Кыӵе карын вордӥськиз быдӟым композитор Пётр Ильич Чайковский? (Воткинск)

 

Сӥзьыл: Тани шудонмылэн вань ёзъёсыз ортчизы. Жюри лыдъялоз очкоосты но ивортоз, кин меда туннэ потӥз «шуд пуйы» луыса. Корзинае мынам туннэ туж шудо. Мон тӥледлы кузьымъёс дасяй.

 

Öсэтӥ бызьыса пыре Лӧпшо Педунь.

 

Лӧпшо Педунь: Ӟечбуресь, мусо пиналъёс – чебер сяськаос, гажано эшъёс! Кылӥ, тӥ туннэ шулдыръяськиськоды, соин лыктыны кариськи тӥ доры. Тодмады-а, кин мон? Вералэ али ваньды ӵош.

 

Пиналъёс: Лӧпшо Педунь!

 

Нуись: Ӟечбур, Лӧпшо Педунь! Вордскид тон туж кемалась асьме Удмурт шаерын. Кемалась ке но вордскид, котьку тон пинал но етӥз. Сю аръёс но ортчыса ӧд пересьмы. Лэчыт веранъёс, серемес чуръёс, шулдыр кырӟанъёс, мадиськонъёс – ваньмыз кылдо Лӧпшо Педунь бордысь. Нош туннэ ма ваид ми доры?

 

Лӧпшо Педунь: Ваи мон тӥледлы книга, гожтӥсез Трофимова Е. Я., нимыз «Кызьы кылдэм удмуртъёслэн сиён-юонзы». Та книга тодматоз удмурт калыклэн 200 вашкала сиён-юонъёсынызы.

 

Анайёс верало пӧраса ваем сионзы сярысь, пуктыло ӝӧк вылэ.

 

Лӧпшо Педунь: Сие-юэ тӥ, эшъёс,

Ӝӧк сьӧрады пукыса.

Ӝӧк вылын котьма но вань.

Ваньмыз ческыт пӧрамын.

 

Уже кутэм литература

 

1. Арлэн нылпиосыз : удмурт писательёслэн инкуазь сярысь кылбуръёссы но веросъёссы / дасязы Г. К. Перевозчиков, П. Н. Петрова. – Ижевск : Удмуртия, 1974. – 152 с.

2. Ефремов А. Д. Край удмуртский – сторона родная : Удмуртия в вопр. и ответах. – 2-е изд., доп. – Ижевск : Удмуртия, 1988. – 296 с.

3. Зарни бугор : удмурт фольклор нылпи садын  = Золотой клубок : удмурт. фольклор в дет. саду. – Ижевск : Удмуртия, 1992. – 89 с.

4. Удмурт кыл нылпи садын : программаос но методической юрттэт / В. А. Анисимова [и др.]. – Ижевск : Удмуртия, 1992. – 128 с. : ноты.

5. Удмуртский фольклор : загадки / сост. Т. Г. Перевозчикова. – Ижевск : Удмуртия, 1982. –  256 с.

 

Дасяз Людмила Ефремовна Стяжкина, Селтаысь централизованной библиотечной системалэн 3-тӥ номеро филиалаз (Гопгурт) ужась

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru