Версия для слабовидящих

Лӧпшо Педуньлэн бенефисэз

Название материала: Лӧпшо Педуньлэн бенефисэз

 

Содержание:

Пуктэм ужпумъёс:

– покчи но шоро-куспо классъёсын дышетскись нылпиосты тодматоно удмурт калык фольклорен: выжыкылъёсын, такмакъёсын, мадиськонъёсын, исаськонъёсын;

– выжыкылъёсты лыдӟыса тодматсконо одӥгеныз валтӥсь героен – Лӧпшо Педунен;

– покчи классъёсын дышетскисьёслэсь муромытоно, паськытатоно удмурт калык фольклоръя тодон-валанзэс;

– та кутэм ужпумъёс озьы ик юрттозы шоро-куспо классъёсын шаер тодонъя ортчись урокъёсын нылпиослэсь тодон-валанзэс паськытатыны.

 

Дорын уж:

– лыдӟоно Лӧпшо Педунь сярысь выжыкылъёсты;

– лыдӟем выжыкылъёсъя суредъёс суредано.

 

Залэз чеберъян:

– "Лопшо Педунь смеётся" книгая адӟытон "Ӟечбур, Лӧпшо Педунь";

– нылпиослэн  лыдӟем выжыкылъёссыя лэсьтэм суредъёсын адӟытон;

– крезьгурен чеберъян: жингрес удмурт калык крезьгуръёс.

 

Уже кутэм материал: доска, магнитофон, удмурт калык крезьгуръёсын аудиокассета, песьтэр, кагаз вылэ юри дасяса гожтэм такмакъёс, мадиськонъёс – "Мельницу прорвало", "Кисель" (выжыкылъёсын копиос), Лӧпшо Педуньлэн дӥськутэз, удмурт нылкышномуртлэн дӥськутэз, жетонъёс интые суредам коньдон.

 

Кенак: Ӟеч-а, бур-а, пиналъёс!

Чырткемесь, егит эшъёс!

Тӥ туннэ куноын

Тунсыко герой дорын.

Кин выжыкылъёсыз лыдӟиз,

Со, малпасько, валатскиз.

Кин вералоз нимтулзэ –

Басьтоз героймылэсь кузьымзэ.

 

Нылпиос верало геройлэсь нимзэ.

 

Кенак: Усто! Озьыен, пиналъёс, асьмеос тӥледын ӵош туннэ куноын Лӧпшо Педунь дорын. Нош кин со – Лӧпшо Педунь? Кытын улэ?

 

Нылпиос юанлы веран сёто.

 

Кенак: Ярам, таизлы но юанлы веран сётыны быгатӥды. Мон учкисько, туж визьмо пиналъёс туннэ ми дорын куноын. Но Лӧпшо Педунь доры куное сюрыны капчи ӧвӧл. Нырысь ик со монэ чакланы косӥз тӥлесьтыд тодон-валандэс. Тани мамында юанлы валэктон сётыны кулэ луоз. Та юанъёслы валэктон сётон понна кулэ вал нырысь ик дорын ужез быдэстыны.

           Кин лэсьтӥз дорысь ужзэ,

           Ӝут-ай ӝогак тон кидэ?

           Туж умой, пиналъёс.

           Я, бен, ум кыске ни дырмес

           Кутсконо ӝоген ужмес.

 

Нылпиос киоссэс ӝуто (нылпиослэсь нимзэс тодӥськоды ке, нимзыя ушъяно).

 

Кенак: Озьыен, пиналъёс, дась-а тӥ Лӧпшо Педуньлэн "Мынам юанэ – тынад валэктонэд" нимо викторинае пыриськыны? Дасесь?! Соку сак кылзэ, мон лыдӟо нырысетӥ юанэз.

 

Мынам юанэ – тынад валэктонэд

 

1. Тодады вае, кыӵе выжыкылъёсын пумиське Лӧпшо Педунь («Алчный купец», «Батрак за еду», «Купец из Деньгоцапа», «Откормленная свинья», «Георгиевский кавалер»)

 

2. Кыӵе писпу вылэ тубиз узыр купец шундыез ӝегатыны? (Кызьпу)

 

3. Кыӵе геройлы вазиськиз купец таӵе юанэн: «Кин югыт нуналэз кузятыны быгатоз?» (Лӧпшо Педуньлы)

 

4. Кӧня часлы купец быгатӥз югыт нуналэз кузьгес кыскыны? (Нокӧнялы но ӧз быгаты, ужасьёсыз нош  ӝыны нунал ужазы)

 

5. Малы "Батрак за еду" нимо выжыкыл тазьы нимамын? Кин вералоз? (Кызьы тодӥськоды ни луоз, пиналъёс, батракъёсты азьло дыре, кылем дауре, юри ужатыны ӧтчазы. Нош та выжыкылын асьмеос адӟиськом, кызьы поп Лӧпшо Педунез одӥг пол ӝӧк сьӧры пуксемезлы сюдӥз ӵукнянен, нуназеятӥз но ӝытнянен утялтӥз. Соку Лӧпшо Педунь шуиз поплы "Даурысь дауре ӝытнянь бере кӧлыны выдо" но  изьыны выдӥз)

 

6. Кинлэн парсез кӧт тырмоназ старосталэн кеносаз сиськиз? (Лӧпшо Педуньлэн)

 

7. Кӧня коньдон басьтӥз Лӧпшо Педунь "Купец из Деньгоцапа" нимо выжыкылын? (100 манет, со даурлы со туж бадӟым коньдонэн лыдъяськиз)

 

8. Кинэ пӧяны быгатӥз Лӧпшо Педунь "Георгиевский кавалер" нимо выжыкылын? (Солдатэз, полковникез, генералэз но эксэез)

 

9. Кыӵе ватос шедьтӥз Лӧпшо Педунь "Изба с привидениями" нимо выжыкылын? (Зарниен тырмытэм горшок)

 

10. Кӧня вал возэн Лӧпшо Педунь ваиз городысь выль корказэ? (Дас вить вал возэн)

 

11. Кӧня уй куспын Лӧпшо Педунь ӝутӥз аслыз выль корка? (Одӥг уй куспын)

 

12. Кыӵе выжыкылын сылал пӧлын кей кылдӥз?  («Соль подешевела»)

 

13. Кыӵе кыл утчаз воргорон пукись вуысь? (Со кыл – "кисель")

 

14. Кин понна Лӧпшо Педунь эксэй луиз «Лопшо Педунь и эксэй» нимо выжыкылын? (Чибиньёслы)

 

Кенак: Усто, пиналъёс, ӟеч. Тани тӥ тодады ваиды Лӧпшо Педунь сярысь выжыкылъёсты. Нош тодӥськоды-а, кин-о малпаз соосты? Та юанлы валэктон сётоз доска вылын суредам кроссворд. Ойдолэ дэмен сэрттомы-пертчомы сое.

Crossword

 

Лултэмысь луло потэ. (Курегпуз)

 

Шорыз тыл, котырыз ву. (Самовар)

 

Бурдтэк лобе, пыдтэк бызе. (Пилем)

 

Вал гырдалтоз, музъем зуркалоз. (Гудыри)

 

Кык пумо, кык кульчоё, шораз ӵог. (Качы)

 

Кенак: Нош ӟуч калык выжыкылъёсын кыӵе геройёс кельшо яке тупало Лӧпшо Педуньлы? Кин вералоз? Кидэс ӝутэ.

 

Нылпиос верало.

 

Кенак: Ӟуч калык выжыкылъёсын Лӧпшо Педуньлы кельшытыны луымон таӵе геройёсты: со – Емеля, Иванушка-дурачок; кылсярысь выжыкылъёс: "По щучьему велению", "Емеля дурак", "Иванушка-дурачок", "Иван – крестьянский сын" но мукетъёсыз. Нош кин малпам, кылдытэм таӵе тунсыко героймес – Лӧпшо Педунез?

 

Нылпиос верало.

 

Кенак: Озьы, зэм но, калык малпам Лӧпшо Педунь нимо маскарчиез. Кызьы тӥ, пиналъёс, малпаськоды, ма пумысь но малы калык кылдытэм таӵе героез. Кытын меда со вордӥськем?

 

Пиналъёс верало.

 

Кенак: Удмурт калык пӧлын, угось ик удмурт выжыкылъёсын, тужгес но тодмо луэ Лӧпшо Педунь, кыллы бырем адями, серекъяны-мактаськыны яратӥсь мурт. Со котькыӵе шуг-секытэз ворме, уг сётскы куректонлы, сереме уськытэ узыръёсыз, чурыт куртчемъёсыз. Педуньлэн алдаськыны яратэмез но урод сям кадь возьматэмын ӧвӧл выжыкылъёсын: со уго алдаськон пыр узыръёсыз но урод сямо адямиосыз гинэ ултӥя. Кылысь кылэ, пельысь пеле удмурт калык пӧлын вӧлмиз шаплы Лӧпшо Педунь сярысь чебересь веросъёс. Калык та герой пыр ас веросъёсыныз серекъяны быгатӥз. Удмурт калыклэн улон манерыз воштӥськемен, воштӥськиз Лӧпшо Педуньлэн но сямыз. Со пумен луиз мудрон, маскарчи, визьмо. Нош асьме дауре Д. А. Яшин удмурт фольклорез люкан но эскерон бордын ужась учёной люказ Лӧпшо Педуньлэсь серемесь но улыны дышетӥсесь выжыкылъёс "Лопшо Педунь смеётся" книгае, кудӥныз тӥ пиналъёс, тодматскиды ини.

 

Витьымтэ шорысь  чузъяське шулдыр удмурт крезьгур. Нылпиос доры пыре Лӧпшо Педунь.

 

Лӧпшо Педунь:

            Ӟёчбуресь, пиналъёс!

            Ӟеч-а, бур-а, эшъёс?!

            Кыӵе мылкыдды?

            Уг-а поты сиемды?

            Кыӵе нош дышетсконды?

            Трос-а доре ужъёсты?

            Уд-а кыкъёс октӥське?

            Кин уг лэсьты дор ужзэ,

            Киостэс эн ӝутэлэ.

            Кин тодэ удмурт кылэз,

            Ӝутэлэ вылэ кидэс.

            Табере кыкетӥзэ,

            Чабиськом кужмо, эше!

 

Кенак: Ой, Лӧпшо Педунь, огшоры ӧвӧл тонэ калык "лӧпшо" шуыса нимам. Усто пӧрме тынад пичиезлэсь но бадӟымезлэсь но мылкыдзэ ӝутыны.

 

Лӧпшо Педунь:

            Тыршисько, эше, сотэк улыны секыт.

            Я, эшъёс, дыр вуиз тодматскыны (вазиське кинлы ке),

            Кидэ оло сётод ӟечьяськыны.

            Мон Педунь, Лӧпшо Педунь,

            Тон… (пиналлэсь ваземзэ возьматэк шуэ):

            Сыл ай, дугды, тон – Онтон,

            Онтон-котон, нянь котон,

            Гуре понон, кисьматон.

 

Нылпиос верало нимзэс, Лӧпшо Педунь вера нимлы исаськонэз.

 

Нылпи: Лӧпшо Педунь, нош мон Миша.

 

Лӧпшо Педунь:

            Миша-куша, табаня,

            Сороковой машина.

 

Нылпи: А мынам нимы Илья.

 

Лӧпшо Педунь:

            Илля-пелля, чепылля,

            Гурезь йылтӥ нискыла.

 

Нылпи: Лӧпшо Педунь, мынам эше Коля, со сярысь но вера.

 

Лӧпшо Педунь:

            Капчиен, кылсярысь:

            Коли-моли, тыкмоли,

            Капка азяд пот али.

 

Лӧпшо Педунь: Нош аслад кызьы нимыд?

 

Нылпи: Сергей мон.

 

Лӧпшо Педунь:

            Сергей-бергей, бер юбо,

            Бере кылем уробо.

 

Кенак: Пиналъёс, валатскиды луоз, та удмурт калык исаськонъёс. Мон но тӥ быдӟа дыръям эшъёсынымы тазьы ик исаськыса шудӥськом вал. Тани мон вӧзын сылэ Натӥ:

            Натали-куатали,

            Сюйысь потэм низили.

 

Пӧрмиз-а, Лӧпшо Педунь?

 

Лӧпшо Педунь: Пӧрмиз, нылы, усто пӧрмиз.

            Чеке-чеке, пиналъёс,

            Шаньга вылэз сиисьёс.

            Чыры-пыры, пиналъёс,

            Табань понна бӧрдӥсьёс.

            Таин, исаськонмылы гож лэзём.

            Али пыр-поч тодматском,

            Кенакен ӝутом кимес.

            Тӥ нош вералэ нимдэс,

            Куарадэс кужмо каре,

            А-то пельы ляб кылэ.

 

Пиналъёс ваньзы, дэмен, нимзэс верало.

 

Лӧпшо Педунь:

            Тумошо ик кылӥське

            Бӧксэмлы тужгес кельше.

            Выльысь вералэ нимдэс

            Тыршо кылзыны умойгес.

 

Пиналъёс озьы ик ваньзы зол кесько нимзес.

 

Лӧпшо Педунь:

            О-о-о, умой, кылӥ, кылӥ.

            Вот али тодматскимы. Тау!

 

Кенак: Лӧпшо Педунь, адӟисько песьтэред капчи ӧвӧл. Ма тунсыкозэ милемлы туннэ ваид? (тупез питырьяса, яке кут вылтӥ тэтчаса).

 

Лӧпшо Педунь: Озьы, озьы… Тӥ доры лыктӥ песьтэр тыр шудонъёсын, мадиськонъёсын, такмакъёсын.

 

Кенак: Нош кыӵе шудон милемлы ваид? Кызьы шудомы?

 

Лӧпшо Педунь: Ум, эшъёс, шудомы туннэ асьмеос рифма малпаса. Мон, шуом, тӥледлы кыл верало, нош тӥ солы рифма утчалэ. Тани, кылсярысь: шур – (даур).

 

Пань-пань – (котэм нянь)

Кут – (кутэз кут)

Боры – (эн горы)

Культо – (кульчо)

Кенер – (кеньыр)

Юрттӥсь – (мерттӥсь)

Кӧм – (сьӧм)

Ӝук – (нюк)

Кыз – (кызь)

Крезь – (азвесь)

Шыр – (кеньыр)

Ӟечыран – (кучыран)

Шулеп – (шелеп)

Сяртчы – (чечы)

Гозы – (узы)

Нянь – (шунянь)

Пинь – (дӥнь)

Коньы – (пуньы)           

Пуньы – (пуны)

Чечы – (ӟичы)

Шумес – (зундэс)

Шар – (кар)

Узы – (боры)

 

Лӧпшо Педунь:

           Я, таин тырмоз пукыны,

           Султомы  бадӟым круге

           Такмакъёс ӵош кырӟаны.

 

Ваньзы султо одӥг паськыт круге. Лӧпшо Педунь песьтэрысьтыз кагаз вылэ гожтэм такмакъёс поттыса кругетӥ лэзе. Чузъяське крезьгур. Крезьгур чузъяскемен нырысетӥез такмак кругетӥ киысь кие кошке. Крезьгур чузъяськемысь дугдэ – кин киын такмак кыле, солы ик шуд усе кырӟаны со такмакез. Нош крезьгур чузъяське, нош ик такмакъёс киысь кие кошко.

 

Такмакъёс:

1. Ми лыктӥмы дорады

    Матэгес тодматскыны,

    Мылкыддэс лӧпкытыны,

    Асьме сярысь мадьыны.

2. Ойдо, эше, кырӟалом,

    Дышетскеммес вералом,

    Серем пыр чеберъяськом,

    Визьмынымы ушъяськом.

3. Нина нимо нылашмы

    Чик уг дырты, гызмыльтэ,

    Автобусын милемыз

    Ялан кема ӝегатэ.

4. Котькуд урокмы бере

    Ваня бызе буфетэ.

    Ческыт сиён со басьтэ,

    Ваньместы ик гочатэ.

5. Ваня нимо пияшмы

    Урокын сема сие.

    Собере сема кӧмзэ

    Сяська горшоке кисьтэ.

6. "Тон чебер", – монэ шуо.

    Чебер дӥсь мынам уно,

    Школае ке лыктӥсько,

    Мыным котьку вожъясько.

7. Дас минутлы ӝегаса,

    Мырдэм пыдзэ кыскаса,

    Кутскем ужмы вунэмын,

    Саклыкмы – Миша бордын.

8. Чингыли ке жингыртэ,

    Школамы дымбыр-р! вазе.

    Уралтэм нылпиос со

    Сиськонние лобато.

9. Такмакъёсмес кырӟамы,

    Классмы сярысь мадимы.

    Тӥляд вань-а пӧлады

    Шаянтӥсь пиналъёсты?

10. Ми кырӟам, маскаръяським,

     Такмакъёс тӥлед кельтӥм.

     Яразы ке – чабелэ,

     Киостэс эн жалялэ.

 

Кенак: Лӧпшо Педунь, кырӟам шулдыр такмакъёстэ, туж потэ на эктэме.

 

Лӧпшо Педунь: Тырмоз ини кырӟаны,

Ойдолэ табере эктомы! (ортчыто "парэн эктон")

 

Кенак: Табере ӵыдэтском. (Шудон "Мадись но тодосчи", Лӧпшо Педунь выжыкылъёсын бичет сётэ нылпиослы, нош соос лыдӟо, яке верало выжыкыллэсь вакчи люкетсэ, нош мукетъёсызлы тодыны кулэ луоз кыӵе выжыкылысь та люкетэз "пегӟем")

 

Лӧпшо Педунь: Кенак, мынам зарни песьтэрам шудонъёсы быронтэм, тани, кылсярысь, мадиськонъёсы но тырмыт.

 

Кенак: Пиналъёс, турттом, оло, калык мадиськонъёсты сэрттыны-пертчыны?

 

Пиналъёс:

          – Турттом!

          – Быгатом!

          – Тыршом!

          – Лыдӟом но адӟом!..

 

Кенак: Озьыен, Лӧпшо Педунь, вера нырысетӥ мадиськондэ, нош ми пиналъёсын мур малпаськом но одно ик тодом вераны.

 

Лӧпшо Педунь: Туж синмаськисько мон тӥледлы, сэзь, визьмо нылпиослы, син гинэ медам усь, эшъёсы.

 

Лӧпшо Педунь вера мадиськонъёс, нылпиос тодыны тыршо.

1. Вольыт пужымлэн ваез вить гинэ. (Суй но чиньыос)

 

2. Кык сюрыын тӧдьы курегъёс. (Пиньёс)

 

3. Гур пушкын горд кунян. (Ым, кыл)

 

4. Кык ты куспын ӝужыт гурезь. (Ныр но синъёс)

 

5. Корка ӝутыса пыртоно, коркась – муръётӥ потэ. (Пу)

 

6. Одӥг мурт сю полэс дӥсяськем. (Кубиста)

 

7. Онтон дӥсяськемын трос полэс, сое кыле Вася, но со ик бӧрдэ. (Сугон)

 

8. Ӵукна султоз, шунды шоры учкоз, со сьӧры ик котырскоз. (Шундыберган)

 

9. Мотор ӧвӧл – гуретэ, пилот ӧвӧл – лоба, кый ӧвӧл – лека.  (Муш)

 

10. Одӥг пыдыз, одӥг шляпаез – вань улэм-вылэмез. (Губи)

 

11. Уг ке но вераськы, пу кора. (Тӥр)

 

12. Кин тӥртэк, пурттэк корка лэсьтэ? (Тылобурдо)

 

Кенак: Усто, пиналъёс, вань мадиськонъёсты тодӥды…

 

Лӧпшо Педунь (Кенаклы вераны сётытэк): Нош тодозы меда та суредъёсты но арбериосты. Кыӵе выжыкыллы соос тупало.

1. "Алчный купец" – кызьпу но саник  (суред).

 

2. "Батрак за еду" –  шер но кусо (суред).

 

3. "Купец из Деньгоцапа" – 100 манет уксё.

 

4. "Откормленная свинья" – шудон парсьпи.

 

5. "Георгиевский кавалер" – Георгиевский крест (суред).

 

6. "Изба с привидениями" –  зарниен тырмытэм горшок  (суред).

 

7. "Соль подешевела" – сылал пакет.

 

8. "Лопшо Педунь и поп Василий"  – сюбег чыртыен кувшин.

 

"Театр-экспромт"  шудон

 

Лӧпшо Педунь: Нош али дорам ӧтисько 7–8  кузя тужгес но чырткемесь, востэмесь, но ӝог малпаськыны быгатӥсьёссэ. Али, эшъёс, тӥ кык командалы люкиськоды. Тӥ, куинь кузя (нылпиослэсь нимтулъёссэс тодэ но вера) али артистъёс сямен пуктоно луоды "Мельницу прорвало" нимо выжыкылэз. Нош тӥ эшъёсы, зэмос удмурт кун театрысьтымы артистъёс выллем тырше. "Кисель" нимо выжыкылэз милемлы возьматыны.

 

Кенак: Нош асьмеос, пиналъёс (учкисьёслы вазиське) зол чабомы артистъёсмылы но сак учкомы соосты.

 

Та "Театр-экспромт" шудонэз пиналъёслэн мылкыдзыя кӧня ке пол шудыны луоно.

 

Кенак: Лӧпшо Педунь, дыр вуиз нылпиослэн та тунсыко, визьмо но чебер эшъёсмылэн суредъёссылы дун сётыны.

 

Лӧпшо Педунь: Озьы ке озьы, но учкы-ай, кенак, кӧня татын суредъёс, кӧня тунсыко ужъёс – йыр берытске. Яркыт но чебер буёло суредъёс синмез мальдыто, ява. Кызьы вераны ик уг тодӥськы. Усто, пиналъёс, туж тыршыса ужаллямды, суредъёс шоры учкыса, адӟыны луэ выжыкылъёсты лыдӟемды потыса лыдӟиллям. Собере, татысь ик мон адӟисько, кудӥз выжыкыл тужгес но зол кельшем пиналъёслы, тани, шуом, кылсярысь... (выжыкыллэн нимыз). Таиз выжыкылъя тросгес суредъёс. Нош тужгес но сюлмам пыӵаз таиз суред (вера суредлэсь, выжыкыллэсь, нылпилэсь нимзэ).

 

Лӧпшо Педунь: Туннэ нокин мон дорысь кузьымтэк уз кошкы. Но, ойдолэ нырысь чабоме трос коньы люкасьёслы (нимъёссэс вера). Табере чабоме соослы, кин туннэ пыриськиз вань шудонъёсы (нимъёссэс вера). Чабоме тужгес но лыдӟиськисьёслы (нимъёссэс вера). Озьы ик, чабоме мыным, тыныд но соослы.

 

Кенак: Нош али, Лӧпшо Педуньлы пӧсь салам. Öтисько ваньдэсты сиёнэн-юонэн тыр ӝӧк сьӧры, чечыен чай юыны, пӧсь табань сиыны.

           Ми шудӥмы, верамы

           Такмакъёс но кырӟамы.

           Тырмоз ини табере,

           Киостэс но чабелэ.

 

Лӧпшо Педунь: Выльысь пумиськытозь! Таин ӟеч луэ, эшъёс!

 

Удмурт крезьгур чузъяськемъя эктыса кошке.

 

Уже кутэм литература

 

1. Икча-Кукча : удмурт нылпи фольклор / люказ Л. Долганова ; суредаз М. Гарипов. – Ижевск : Удмуртия, 1983. – 56 с. : ил.

2. Лопшо Педунь смеётся: удмурт. нар. сказки / лит. обраб. Н. П. Кралиной ; худож. Р. К. Тагиров. – Ижевск : Удмуртия, 1970. – 45 с. : ил.

3. Можга ёросысь усточиослэн ужъёссы : [частушки] // Кизили. – 2005. – № 1. – С. 12–13.

4. Удмурт-ӟуч словарь = Удмуртско-русский словарь : ок. 35000 слов / под ред. В. М. Вахрушева. – М. : Рус. яз., 1983. – 592 с.

5. Удмуртские народные сказки / сост., пер. с удмурт., предисл. Н. П. Кралиной. – 2-е изд., доп. – Ижевск : Удмуртия, 1976. – 324 с. : ил.

6. Удмуртский фольклор : загадки / сост. Т. Г. Перевозчикова. – Ижевск : Удмуртия, 1982. – 256 с.

7. Удмуртский юмор / пер. с удмурт. И. Законов. – Ижевск : Удмуртия, 1976. – 240 с. : ил.

8. Яшин Д. А. Удмурт фольклор. – Ижевск : Удмуртия, 1976. – 152 с.

 

Дасяз Антонида Борисовна Коротаева, Вавож ёросысь центральной библиотекалэн пиналъёсын ужанъя ёзэтаз ужась

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru