Версия для слабовидящих

Кытын ке но кырӟа на Степан...

Название материала: Кытын ке но кырӟа на Степан...

 

Содержание:

Кырӟанэн-кылбурен тугоко (Кырӟан Степан Широбоковлэн творчествояз)

 

Нуись: Дэбес ёросысь калык туж данъяське калык кылбурчиен Степан Павлович Широбоковен. Кылбурчи татын трос аръёс ӵоже улӥз, ужаз, Дэбес палъёс, отысь калык сярысь чебересь кылбуръёс кылдытъяз. Степан Павлович вордскиз 1912-тӥ арын 18-тӥ толсуре (декабре)  Шаркан ёросысь Малый Казес (Вортча-Починка) гуртын, нош вань творчествоез солэн герӟаськемын Дэбесэнымы, Чупчиен, Байгурезен. Соин Степан Павловичез ми асьме бӧлякен лыдъяськом. Степан Павловичлэн кылбуръёсаз, кырӟанъёсаз усьтӥсько асьме шаермылэн чеберез, аспӧртэмлыкез, ас калыксэ яратэмез, вордскем но улон интыеныз данъяськемез.

 

Куке мынӥсько мон вордскем шаертӥм,

Сюлэм нош  тырме кырӟанэн.

Ӧвӧл кадь пумыз,

Ӧвӧл кадь йылыз

Тӧдьы кызьпуо сюреслэн.

 

Нуись:  Степан Широбоковез тодӥсьёс пусъё - со вал туж капчи, шулдыр, задор мылкыдо, калыкен огкыл шедьтӥсь адями. Тодӥськом - со туж яратэ вал инкуазез, яратэ вал чорыганы, кырӟаны.

 

(«Мон шаертӥм мынӥсько» кырӟан)

 

Нуись: Удмурт уӵы. Озьы нимазы нырысетӥ калык кылбурчиез калык пӧлын. Сыӵе ним солы сётӥзы кылдытэм чуръёссэ артист сямен лыдӟемез понна. «Чупчи уӵы» ним солы сётӥз кылбурчи Олег Поскрёбышев. Пётр Поздеев сӥзиз Степан Широбоковлы «Кырӟа, уӵы!» кылбурзэ:

 

Мед кикы  кайгыроз ас понназ тэль кушын,

Солэн ӝож гурезлы тон эн сётскы,  уӵы,

Кырӟа: «Ӵык-ӵык, ӵы-ы-ик, ӵык-ӵык-ӵык!»

 

Степан Широбоков ачиз тужгес но яратэ вылэм кылзыны кикыез, нош кылбуръёссэ ачиз уӵы сямен кырӟалляз.

 

Нуись: Степан Широбоковлэн творчествоез туж юн герӟаськемын кырӟанэн. Тросэзлы кылбуръёсызлы гожтэмын гуръёс: «Мон шаертӥм мынӥсько», «Чупчи тупалан-а», «Зарни сӥзьыл» (крезьгурез Г. Корепановлэн), «Ӝӧк сьӧрын кырӟан» (Д. Ившин), «Ӧй быгаты вунэтыны» (Г. Матвеев, Г. Корепанов), «Кык кызьпуос», «Тыловай топольёс» (Г. М. Корепанов-Камский) но мукет. Ваньмыз 50 пала кырӟанъёс. Надежда Кралина, Удмуртиысь тодмо литературовед, гожъяз: «Степан Павловичлэн гожъям кылбуръёсыз туж поэтическоесь, котькуд чурез ачиз кырӟанэ куриське. Соин но вылды, поэтлэн данакез кылбуръёсыз Герман Корепанов композиторлэн сюлэмаз сюрес шедьтӥзы. Калык гажаса кырӟа: «Келян», «Чупчи тупалан-а?», «Зарни сӥзьыл» кырӟанъёсты».

 

Нуись: «Зарни сӥзьыл» кырӟан поэтлэн вань творчествоезлы увертюра выллем луэ. Шаерез но улонэз ӟырдыт яратон, ошмес ву кадь сайкытэсь малпанъёс, чебересь мылкыдъёс - ваньмыз татын висъянтэм биниськемын», - гожтӥз фольклорист, удмурт кылбурчи Пётр Поздеев.

 

Кызьпулэн ӵужектэм куаръёсыз

Бергаса ву вылэ васькизы.

Зарни сӥзьыл! Кинэ бен туннэ,

Кинэ бен утча та сюлэм...

(«Зарни сӥзьыл»  кырӟан)

 

Нуись: Та кырӟанлэн кылдэмез сярысь тодэ ваёнъёсаз вера Александр Шкляев, удмурт критик но литературовед. Тани таӵе вераськон кылдэм С. П. Широбоков но А. Шкляев куспын:

 

- Троссэ самой усто кырӟанъёсме-кылбуръёсме мон пытсэтын гожъяй.

 

- Кызьы озьы? Ӧй вала.

 

- Ма озьы ик. 50-тӥ аръёсы, городын улыкум, монэ Герман Корепанов озьы ужатӥз. Пытса вал монэ издательстволэн кабинетаз но, ӝытазеозь кырӟан гурелы кылбур гожты шуыса, тунгона но кошке вал. Тодӥськод-а, юрттэ вал. Гожъяськон понна, брат, зол дисциплина кулэ. Тӥни сыӵе амалэн кылдӥз «Зарни сӥзьыл» кырӟан но.

 

Нуись: Кызьы верамы ни, Герман Корепанов С. Широбоковлэн кылбуръёсызъя трос кырӟанъёс гожтӥз. Со сяна, кылдытӥз на сюитаос но кантатаос. Ачиз композитор тодаз вае: «Одӥг дыре ми Степан Павловичен трос ужамы удмурт кырӟанъёс кылдытон бордын. Солэн кылбуръёсыз адямилэсь мылкыдзэ валаса гожтэмын. Паймод Степан Павловичлэн музыкальной луэмезлы. Куддыръя, кылбурезлы музыка гожтон интые, со ачиз мынам музыкаея кылбур гожтылӥз. Нош кызьы со «кылтэм музыкалы» сокем тупась поэтической образъёс шедьтылӥз? Ӧйтӧд. Самой озьы гожтэмын «Зарни сӥзьыл», «Чупчи тупалан-а?», «Ӧй быгаты вунэтыны» кырӟанъёс».

 

(«Ӧй быгаты вунэтыны» кырӟан)

 

Нуись: «Адямилэн сямыз сыӵе, вылды, ини: отчы но, татчы но вуэмез, созэ но тазэ но тодэмез потэ. Я со мыноз чорыганы, я пӧйшураны, я туж тодмо Байгурезе тубалоз, я Сибирь сюрес вылэ поталоз. Инкуазь солы - поэзия, отысь со шедьтэ выль кылбуръёсызлы жингыртӥсь гуръёс, шуръёсын, писпуосын, тылобурдоосын ас кылыныз вераське», - гожтӥз Степан Павлович сярысь В. Широбоков.

 

(«Чупчи тупалан-а» кырӟан)

 

Нуись: Кылбурчи - инкуазьлэн эшез, инкуазьлэн пиез. Пӧртэм сяськаё турнано возьёс, тылобурдо куараос, вож нюлэс, ӟильырась ошмесъёс - ваньмыз солы туж матын. Зэмос кылбурчи котыр улонэн ӵош шока. Солэсь буёлъёссэ огшоры кыл пыртӥ асьмелэн сюлэмамы, визьмамы вуттэ. Нош со кылбуръёс эшшо кырӟан ке луэмын на!

 

Яратском ми тулыс сяськаясь,

Буртчинэн ӵаштыртӥсь садъёсмес.

Сяськаё сад улын ӝытъёсы

Кырӟанэн жингыртӥсь гуръёсмес.

(«Ой, мар-о сыӵе тон, сюлэм» кырӟан)

 

Нуись: Степан Павлович Широбоков Быдӟым Отечественной войналэн тылӝуэз пыртӥ потэм адями. Со адӟиз калыклэсь курадӟемзэ, фашистъёслэсь сьӧсьяськемзэс, асьме солдатъёслэсь кышкатэк ожмаськемзэс. Ваньзэ сое возьматыны тыршиз «Кык вынъёс» поэмаяз, кудӥз сӥземын огшоры адямиослэн война дыръя геройлыко ожмаськемзылы. Поэмаын быгатыса кутэмын калык кырӟанъёс, соос пыр возьматэмын удмурт нылкышнолэн куректонэз но мӧзмонэз.

 

Ой, кылёз ук, ой, кылёз

Яратоно нылмуртэд,

Ой, кылёз ук, ой, кылёз

Паськыт шулдыр бусыед...

Ой, кырӟалэ, кырӟалэ

Буртчин садын уӵыос.

Ой, поръялэ, поръялэ

Паськыт тӧдьы Кам кожъёс.

 

Нуись: «Степан Широбоков - вож музъемез но чагыр шуръёсты, зарниен тулкымъяськись чабей бусыосты но пипу бычыосты кырӟась кылбурчи. Солэн лирикаяз умой шӧдӥське вал сюлэмаз улӥсь бадӟым шумпотон но, кырӟанлы укшась мӧзмон мылкыд но», - гожъяз тодмо ӟуч критик Л. Аннинский 1958-тӥ арын «Литературной газетын».

 

Нуись: Геннадий Михайлович Корепанов-Камский Степан Широбоковлэн кылбуръёсызья трос кырӟанъёс но «Любушка» оперетта гожтӥз. «Тыловай топольёс» кырӟанлэн кылдэмез сярысь туж тунсыко вера Анатолий Валентинович Кардапольцев, Дэбес педучилищеысь музыкая дышетӥсь: «Степан Широбоков одӥгзэ самой умойзэ кылбурзэ сӥзе Тыловай селоысь топольёслы. Вортча-Починка гуртысь педучилищее дышетскыны ветлыкуз, со та топольёс улын котьку шутэтскылэм. Синмаськыса, пе, учкисько вал соослэн веськрес но кужмо мугоръёссы шоры. Корепанов-Камский та кылбурлы гурзэ гожтэ но репетицие ӧте Анатолий Валентиновичез. Степан Широбоков репетиция бере Геннадий Михайловичез ӟыгыртӥз но шуэ:

 

- Мон шӧдӥ, ваньмыз умой пӧрмоз шуыса. Ваньмыз туж умой, нош марлы тон куштӥд кык берло чуръёссэ?

 

Геннадий Михайлович валэктыны тыршиз, музыкалэн куронъёсызъя озьы гожтоно вал шуыса. Нош Степан Павлович соглаш ӧз луы. Композиторлы гурзэ вань чуръёссэ лыдэ басьтыса гожтоно луиз».

 

(«Тыловай топольёс» кырӟан)

 

Нуись: Дэбес ёросын улӥсьёслы ваньмызлы тодмо кылбурчилэн «Дэбес сярысь» кырӟанэз, кудӥзлы гур кылдытӥз педучилищеын ужам дышетӥсь, али пенсионер Алексей Иванович Чужанов. Азьло аръёсы туж вӧлскемын вал конкурсъёс ортчытъян. Одӥгаз сыӵе конкурсэ кулэ вал асьмелэн селомы сярысь кырӟан. Озьы кылдӥз «Дэбес сярысь кырӟан». Сьӧлык, дыр, луоз, асьмеос та кырӟанэз туннэ ӧм кылзэ ке.

 

(«Дэбес сярысь кырӟан»)

 

Нуись: Кырӟан Степан Широбоковлэн творчествояз бадӟым инты басьтэ шуыса вера на таӵе учыр: 1964-тӥ арын Степан Широбоков йылпумъяз «Кырӟан сюрес шедьтэ» повестьсэ. Отын со возьматэ удмурт пияшлэсь искусствое кыстӥськемзэ, солэсь зэмос музыкант луэмзэ. Пичи дырысен сирота кылем Яша Кукушкин музыкаез гажаны дышиз. Секыт война аръёсы фронтэ кошкем агаезлэсь баянзэ поттыса, пияш сюлмысь дышетске калык гуръёсты шудыны. Лек кенакезлэсь уйбыт лушкем пукоз вал шур дурын, тодмо гуръёсты тодаз вайыса. Татысен кутске солэн искусствое сюресэз. Та произведение сӥземын Геннадий Михайлович Корепанов-Камскийлы.

 

Нуись: Степан Павлович Дэбесын Андронов нимо ульчаын улӥз. Али солэн коркаез интыын педучилищелэн юртэз сылэ. Нош солэн азбараз кык кызьпуос будо: ӝужытэсь, веськресэсь. Та дышетскон юртэз юри чакласа пуктӥзы, кызьпуос тӥяськыны медаз шеде шуыса, угось та кызьпуосты куке но мерттӥзы вал Степан Павлович Тамара Степановна кузпалыныз.

Кунооссэ пумитакуз, кылбурчи котьку сямен вайылӥз соосты кызьпуосыз доры, гажаса, адямиос сярысь кадь, мадьылӥз соос сярысь.

 

Кемалась ӧвӧл ни асьме пӧлын кылбурчи Степан Широбоков, но будо солэн кызьпуосыз, шумпото котькуд вордскем нуналлы, шунытлы, шундылы.

 

(«Кык кызьпуос» кырӟан)

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru