Версия для слабовидящих

Котькуд муртлэн аслаз кизилиез

Название материала: Котькуд муртлэн аслаз кизилиез...

 

Содержание:

Флор Иванович Васильевлэн творчествоезлы сӥзьыса ӝыт-портрет

 

Дано кылбурчиез – Флор Иванович Васильевез – Удмуртиын тодымтэез ӧвӧл, дыр. Уката, ас вордскем палъёсаз – Яр ёросын. Со сярысь верамын но, гожтэмын но ваньмыз кадь. Но озьы ке но, солэн творчествоез али дырозь сюлэмшугъяськытэ но паймытэ лыдӟисьёсты. Паймыто выленыз, чебереныз, мур малпаськытонэныз. Макем со трос дырлы шӧдэ но адӟе азьлань улонэз!

Соин ик солэн творчествоез кылёз котьку но егит но ас дырызлы тупась. Нош ми, культура удысын ужасьёс, кулэ валэктыны, возьматыны солэсь творчествозэ.

 

Та ӝыт-портретлэн сценариез сӥземын Флор Васильевлэн творчествоезлы. Ӝыт-портретэз луэ ортчытыны библиотекаосын но, клубъёсысь сцена вылын но. Умой луоз кутыны та ужрадэ клубысь ужасьёсты но школаын дышетскисьёсты, со сяна – художественной самодеятельностез. Ӝыт кутскон азьын библиотекаын, яке клублэн фойеаз луэ ортчытыны лыктэмъёслы книгаослэсь дасям адӟытон «Улытозям мон улонэз кырӟай...», соосты вакчияк тодматыны адӟытонлэн пуштросэныз.

 

Сценаез дасяны луэ озьы: катанчи вылэ ошемын Ф. И. Васильевлэн портретэз, сцена вылын сылэ журнальной ӝӧк, со вылын сяськаосын ваза но кылбурчилэн книгаосыз.

 

Ӝытэз нуо кык нуисьёс, кылбуръёсты быдэсто школаын дышетскисьёс, кырӟанъёсты – художественной самодеятельностьысь кырӟасьёс.

 

Ӝыт усьтӥське «Вордӥськем шаере кырӟанэн, нырысь – зол, собере – калленгес. Кырӟан (калленгес кырӟакузы) вылытӥ ик:

 

1-тӥ нуись (катанчи сьӧрын кутске): Туннэ ӝытмес сӥзиськомы тодмо удмурт кылбурчилы но асьмелэн землякмылы – Флор Иванович Васильевлы.

 

Потэ лыдӟись но лыдӟе Ф. Васильевлэсь «Корка пушкам тон пыр кепыратэк...» кылбурзэ  (Куар усён толэзе. С. 63).

 

2-тӥ нуись:

         Кион сюан толэзь шорын вордски,

         Вузэмзылэсь ӧй кышка мон.

         Нош укное

         Тол

         Лымызэ пальккиз,

         Липет корез ик согымон (Куар усён толэзе. С. 243).

 

1-тӥ нуись: Нош ик лымыё тулыспал толэзь пельтэ, ӵокса по пытса толон гинэ лёгем сюресъёсты, зӥбе музъем борды озьы гинэ но лапег пурысь пилемъёсты. Ортчо аръёс... Тани 74 ар ортчиз ини, кызьы кыдёкысь нюлэсъёс, бусыос пӧлын ышем пичи гинэ Бердыш гуртын, аслаз куараеныз ялӥз али гинэ дунне вылэ вордскем Кылбурчи – Флор Васильев.

 

2-тӥ нуись: Бердыш гурт сылэ шулдыр интыын, артэ – меӵ вырйыло, нюлэсо интыос, пичи гинэ Мой шур. Бердышысен ньыль иськем ортчыса, нюлэсъёс сьӧрын – Шамардан нюлэс.

 

Лыдӟись лыдӟе «Мынам вордскем Бердыш гуртэ...» кылбурез (Улытозям мон улонэз кырӟай. С. 204).

 

1-тӥ нуись: Васильевъёслэн семьяязы Флор вал нырысетӥез нылпи. Тусызъя со укша вал анаезлы. Туж яратӥз анайзэ, берпумзэ дораз вуылыкуз тазьы ӟечкыласа анаезлы кузьмаз киын нуллон час: «Нуллы, анай! Кема ул!».

 

Лыдӟись лыдӟе «Сайкыт ӵукна но кузь сюрес...» кылбурез (Ойдо вераськом. С. 56).

 

2-тӥ нуись: Ас гуртысьтыз школаын дышетскиз атаезлэн, Иван Алексеевичлэн, классаз. Флорлэн сямыз вал востэм, возьдаськись. Витетӥ классэ дышетскыны мынӥз Укан шоръёзо школае. Гожъяз чебересь сочинениос. Ма сярысь? Улон, Быдӟым ож дыръя ортчем секытэсь пинал аръёс, азьланезлы оскон сярысь.

 

Лыдӟись лыдӟе «Вордскыны ум утчаське инты...» кылбурез (Куар усён толэзе. С. 68–69).

 

1-тӥ нуись: Глаз кар. Татын кылбурчилэн ортчиз егит дырыз. Чебер гужем нунал со вуиз Глаз каре. Чиед, тӧдьы кысъем пинал пи – сыӵе со вуиз Глаз карысь педучилищее, сизьым классэз йылпумъяса. Нош педучилищеез йылпумъяса со дышетсконзэ азьланьтэ татын ик, али гинэ усьтӥськем пединститутын. Дышетскыкуз ик со кыстӥськиз спортэ, ӵошатсконъёсын ӵем дыръя басьтылӥз нырысетӥ интыос. Со сяна – дышетскиз музыкальной грамоталы. Быгатылӥз шудыны мандолинаен но скрипкаен.

 

2-тӥ нуись: Флор туж усто суредалляз акварелен но вӧен, усто быгатылӥз  гожъяськыны  плакат пероен, яратылӥз но быгатылӥз чебер но туж капчи эктыны. Сцена вылын пуктылӥз удмурт писательёслэн произведениоссыя спектакльёс. Та вакытэ ик Флор Васильев кутске гожъяны кылбур.

 

1-тӥ нуись:

         Шур дуре ке васькисько,

         Калленак йӧтско ву тулкымъёс.

         Со вакыт, дыр, вордӥсько

         Шыпытэсь гинэ кылбур чуръёс.

         Чеберлы паймон куара

         Шыпытак вордске шӧдтэк шорысь.

         Чеберез данъясь кырӟан

         Шыпытак потэ сюлэм  пушкысь (Ойдо  вераськом. С. 43).

 

Лыдӟись лыдӟе «Сюлэмын вордӥське выль кырӟан...» кылбурез (Улытозям мон улонэз кырӟай. С. 191).

 

Художественной самодеятельностьысь кырӟасьёс быдэсто «Ӵукна шунды сайкыт ӝутске» кырӟанэз.

 

2-тӥ нуись: Флор Иванович Васильевлэн творчествояз нимысьтыз инты басьтэ яратон. Та котьку ик егит тема пыре солэн, зэмзэ но, аслаз шӧдӥсь но шырыт сюлэм пыртӥз поттэм валанэн кылбуръёсаз. Со си кадь, шӧдэ котькуд каллен йӧтскылэмез, но вазиське мурт сюлэм вӧсьлы но, аслазэзлы но. Тодмо ӟуч кылбурчи Николай Доризо тазьы вера Флор Васильевлэн творчествоез сярысь: «Флор Васильевлэн кылбуръёсаз – философия, ачиз улон, адямилэн улон-вылон пуштросэз.

 

Лыдӟись лыдӟе «Гажанэлы» кылбурез (Тон сярысь. С. 86).

 

Художественной самодеятельностьысь кырӟасьёс быдэсто «Тодӥськод-а» кырӟанэз.

 

1-тӥ нуись: Солэн кылбуръёсаз яратон герӟаськемын вордскем интыослы яратонэн, музъем вылысь вань чебереныз но улэпеныз.

 

Кӧняез кылбур чуръёсыз вордскизы солэн сюлэмаз, куке со пыдын мертаз иськем бӧрсьы иськем! Кылбурчиен ӟечбураськыса кадь, йырынызы шоназы солы тӧдьы ромашкаос, чагыр, ӝужыт инбамын кырӟазы тюрагайёс.

 

Тюрагай кырӟам куараен фонограмма пуктоно. Лыдӟись лыдӟе «Кызьы уд дырты бен гуртэ?!» кылбурез

(Улытозям мон улонэз кырӟай. С. 74).

 

2-тӥ нуись: Тодмо удмурт писатель Г. Перевощиков, кылсярысь, кылбурчи сярысь вераз: «Туж шер адями быгатэ таӵе мур яратыны аслэсьтыз вордскем интыоссэ, кытын солэн ортчизы пинал аръёсыз. Нокин но уг тоды ке но та интыосты, Флор Васильевлэсь кылбуръёссэ лыдӟыса, соку ик потэ вуылэм Бердыш гуртэ, пичи гинэ Мой шур дуре. Аслад синъёсыныд адӟем но тодматскем татысь интыосын но адямиосын. Со бордысь ик кылбурчилэн кужымез».

 

1-тӥ нуись: (Лыдӟе «Мой шур» кылбурез (Куар усён толэзе. С. 73).)

 

2-тӥ нуись: Кин ке малпаськиз-а таӵе юан сярысь: «Маин мыным дуно ас палысьтым бамалъёс, вужеро нюлэсъёс, ошмесо шуръёс но нюкъёс, тамакен мудэт вылын пукись воргоронъёс?»

 

1-тӥ нуись: «Малы мон уг валаськы, кытысь шумприч гурт нылкышноос, кудъёсыз котьку дась ас сюлэм шунытэнызы быдэс дуннеез шунтыны, басьто кужым? Маин ке соос укшало шундылы. Асьмелэн ошмесъёсмы но нылкышноосмы – шуныт тылсиос, улонлэн азьланез но тупаса улон! Малы мынам ас дорам инбам но, шунды но, уй но, тулыс но, сӥзьыл ортчыны луонтэм дэри но, дуногес? Малы ке шуоно, мон татын вордӥськи!».

 

2-тӥ нуись: Кытын но ку со гожъяз кылбуръёссэ? Ку вуылӥз со сомында гожъяса? Кин сое матынгес тодэ вал, соос пусйылӥзы: пӧртэм заседаниосын, яке лыдӟисьёсын пумиськонъёсын, огшоры вераськон дыръя, яке чалмыт пукон дыръя, малпамтэ шорысь ымнырыз чурытоме, маке аслаз малпанъёсаз усе кадь. Пиджак гадь кисыысьтыз поттэ блокнотсэ, чилектэм кадь гожтэ кӧня ке чуръёс, но соку ик чалме, палэнске но маке ас понназ мыня.

 

Лыдӟись лыдӟе «Уг быгатскы чебер вераськыны...» кылбурез (Улытозям мон улонэз кырӟай. С. 34).

Художественной самодеятельностьысь кырӟасьёс быдэсто «Монэ но витё» кырӟанэз.

 

1-тӥ нуись:

         Куректыны ӧвӧл кулэ,

         Кулэ ӧвӧл куректыны.

         Пельыд ӟечсэ гинэ кылэ,

         Ӟечлы гинэ вордскиськомы.

         Кайгу шедиз ке улонын,

         Тулыс лымы кадь шуналоз.

         Ӟечез понна вордскиськомы,

         Мед со гинэ ӟечкылалоз.

         Ненег тӧлэн мед вешалоз

         Вордскись сяська кадь улонэз.

         Шуныт зорен мед чупалоз

         Быгыльскыны кутскем тысез.

         Öвӧл кулэ куректыны,

         Я, тон но ӵушы синвудэ.

         Ӟардон тусъем шумпотонлы

         Я, сёт ни, сёты ни кидэ (Улытозям мон улонэз кырӟай. С. 239).

 

2-тӥ нуись: Кылбуръёссэ Ф. И. Васильев гожъяз удмурт кылын. Солэсь юаллязы: «Малы ӧвӧл ӟуч кылын? Тон туж умой тодӥськод сое!». Нош со вералляз: «Мон дыши малпаськыны но вераськыны удмурт кылын, мыным капчигес малпанъёсме вераны вордскем кылыным! Вордскем палъёсы сярысь, кудъёссэ мон дыши кылзыны пинал дырысен ик, мынам гожъяме потэ ас кылыным».

 

1-тӥ нуись:

         Анайлэн йӧлыныз

         Со пыӵаз сюлэмам.

         Чингыли куараен

         Кылӥськиз пельёсам.

         Со лыктӥз мон доры,

         Дуннеез со усьтӥз.

         Киытӥм со валтыса,

         Улонэн тодматӥз.

         Ас кылын тырмемын

         Мугорам ёзвиос.

         Со кылъёс йырвимын,

         Сюлэмын но соос.

         Мон ӧй кыл ке кылме,

         Шат, кулэ пельёсы?

         Мон ӧй адӟы ке сое.

         Шат, кулэ синъёсы? 

 

2-тӥ нуись: Удмурт кылэ Флор Васильев берыктӥз трос дасо удмурт кылъёсты, кудъёсыз аръёс ортчыса удмурт кылысь ышизы вал ини. Со кылбуръёсаз возьматэ удмурт адямилэсь малпанъёссэ но лулзэ. Солэн кылбуръёсыз зэм ик но мур герӟаськемын удмурт кылын, удмурт крезьгурен.

 

Художественной самодеятельностьысь кырӟасьёс быдэсто «Вера на огпол» кырӟанэз.

 

1-тӥ нуись: Флор Васильев – зэмос кылбурчи, соин ик лыдӟисьёсызлы солэн творчествоез али дырозь но тунсыко луэ. Соин солэн кылбуръёсыз мур сюлэме пыӵало, адямиен пыраклы кылё.

 

2-тӥ нуись:

         Одӥг дунне, одӥг улон,

         Одӥг шунды музъем вадьсын.

         Нош нуналъёс чильпырало,

         Питран пиньёс кадь чиляло,

         Воштылыса огзэс огзы.

         Питран мактал, улон кошке.

         Дугдылытэк, шутэтскытэк.

         Асфальт вылтӥ со погыльске,

         Изъёс вылын но сэзъяське,

         Ялан азьлань, ялан дыртэ.

         Улон мынэ азьлань гинэ,

         Уг лу солы берытскыны.

         Инвис ӧте шумпотонэн,

         Улон пиштэ шудэн-бурен,

         Кулэ ӧвӧл кожалыны.

         Тон улондэ – ас питрандэ –

         Эн лэзь ноку но ас эрказ.

         Вань чильпырась нуналъёстэ

         Весь валты, валты жадьытэк

         Улонэдлэн шудаз-бураз.

         Одӥг дунне, одӥг улон.

         Одӥг шунды яркыт пиштэ.

         Нош нуналъёс чильпырало,

         Нош сюресъёс весь кожыло,

         Нош тон эн ышты сюрестэ! (Куар усён толэзе. С. 125–126).

 

1-тӥ нуись: «Кыӵе писпуэз тужгес яратӥськод?» – юазы Флор Васильевлэсь. Со вераз: «Зэм ке верано, пужымез. Map понна – уг тодӥськы, оло со ӝужыт но веськрес будэ шуыса, кузесь веньёсыз понна, малы ке соос кельшо ныллэн кузесь синлысъёсызлы. Югыт мылкыдэз ӝутэмез понна–а? Мынам ӧжыт гинэ но потэ укшаме та писпулы, калыклы шумпотон кузьманы!».

 

2-тӥ нуись: (Лыдӟе «Мон ветлӥсько музъем вылтӥ...» кылбурез (Улытозям мон улонэз кырӟай. С. 29).)

 

1-тӥ нуись: 5-тӥ пӧсьтолэзе 1978-тӥ арын кылбурчи шӧдтэк шорысь шедиз бырыны. Но кылизы асьмелы солэн сайкытэсь но чебересь крезьёсыз. Нош кылбурчилэн аслаз верамезъя – крезьёс уг тодо пумзэс.

 

2-тӥ нуись: Куке улонысь кошке ке зэмос кылбурчи, со соку ик калыкезлэн син азяз будэ, луэ бадӟымгес но шӧдскымонгес. Эшъёсыз азьын, музъем азьын, кудӥз вылын чузъяськиз солэн куараез... Сыӵе луэ Флор Васильев но.

 

1-тӥ нуись:

         Котькуд муртлэн аслаз кизилиез,

         Со кузёез вадьсын яркыт пиштэ.

         Котькуд муртлэн аслаз вань сюресэз,

         Пусъем инвис доры сое одно вуттэ.

         Кемаласен со котьмалы тодмо,

         Озьы ке но, сюлмысь верам эшшо потэ:

         Мед котькин но ас сюрессэ вормоз,

         Кудӥз туж кыдёкысь инвис доры вуттэ.

         Мед котькин но адӟоз кизилизэ,

         Кудӥз кема пиштоз яркыт тылсиосын.

         Котькуд адямилэсь улон дырзэ

         Котькуд нунал мед тырмытоз ӟеч ужъёсын.

 

Уже кутэм литература

 

1. Васильев Ф. И. Куар усён толэзе : выль кылбуръёс / суредаз Л. Прозоров. – Ижевск : Удмуртия, 1976. – 296 с.

2. Васильев Ф. И. Ойдо вераськом : выль кылбуръёс / суредаз Л. Прозоров. – Ижевск : Удмуртия, 1980. – 224 с.

3. Васильев Ф. И. Тон сярысь : кылбуръёс но кырӟанъёс. – Ижевск : Удмуртия, 1965. – 88 с.

4. Васильев Ф. И. Улытозям мон улонэз кырӟай : кылбуръёс / суредаз Л. Прозоров. – Ижевск : Удмуртия, 1984. – 280 с.

5. Григорьев Г. Монэ но витё : «Топольысь юг-тӧдьы мамыкъёс…» : [кырӟан] // Кенеш. – 2000. – № 11–12. –  С. 3 обл.

6. Караваев М. А. Ӵукна шунды сайкыт ӝутске : «Ӵукна шунды сайкыт ӝутске…» : [кырӟан] // Пурӟе льӧмпу сяська / Караваев М. А. – Ижевск, 1991. – С. 24–25.

7. Матвеев Г. М. Вордӥськем шаере : «Вож зарезь кадь чебер нюлэсъёс…» : [кырӟан] // Молот. – 1986. – № 12. – С. 4 обл.

8. Матвеев Г. М. Тодӥськод-а : «Тодӥськод-а?..» : [кырӟан] // Удмуртские песни. – Ижевск, 1975. – С. 315–316.

9. Оськин М. Вера на огпол : «Пумиськомы Чупчи дурын вераськыса-чупаськыса…» : [кырӟан] // Кенеш. – 2000. – № 5–6. – С. 109.

10. Восхождение :  ст., воспоминания о Флоре Васильеве / сост. З. А. Богомолова. – Ижевск : Удмуртия, 1984. – 347 с. :  ил.

 

Дасязы Фаина Евстегнеевна Дюкина, Нина Валерьевна Сунцова – Яр ёросысь центральной библиотекаын ужасьёс. Удмурт кылэ берыктӥз Н. В. Сунцова.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru