Версия для слабовидящих

Кинъёс тӥ, бесермянъёс?

Заголовок материала: «Кинъёс тӥ, бесермянъёс?» (Михаил Федотовлэн бесерманъёслы сӥзем кылбуръёсызъя но ужъёсызъя)

 

Содержание:

Возьматоно Михаил Федотовлэсь портретсэ

В. Белых М. Федотовлэн тусбуйыз // Инвожо . - 1999. - №1/2. - С. 2.

 

Спросил себя ты как-то, парень,

Не знаешь: кто ты - бесермянин?

Дитя ль Хазарского элькуна?

Или же горного пуштуна?

Иль след монгольского похода?

Может, славянская порода?

Иль кровь удмуртского народа?

В крови смешалась род от рода

Национальная природа.

А я, земляк, сказал бы так:

Ты - искра совести народа.

(В. Трефиловлэн М. Федотовлы сӥзем кылбурез)

 

Михаил Федотов... Бесерман кылбурчи. Нырысетӥ бесерман кылбурчи. Флор Васильев нимо премиезлэн лауреатэз. Ас калыкезлэсь выжызэ-пушъетсэ эскерись тодосчи. Ас малпанъёсыныз сузёнтэм вылӥын лобась но котьмар ужлы ӝабырес, дыртӥсь. Улыны дыртӥсь... Тани кызьы гожтем со ачиз сярысь:

 

Кӧня дырме быдтӥ юнме,

Быдэс улон мында.

Нош возьытлык та сюлэмме

Куке сюпсёз меда?

Куке луоз меда юась,

Малы улӥд озьы?

Кин ке луоз меда валась?

Валаз ке но, кызьы?

 

«Мон - бесерман. Кӧня улӥсько, сомында ик валаны тыршисько аслэсьтым кин луэмме, кыӵе выжыысь потэмме. Куд-огез шуозы, малы со тыныд кулэ, мар пӧртэмлыкез вань бесерманъёс но удмуртъёс куспын? Зэм но, мар пӧртэмез? Верасько удмурт кылын. Озьы ик гыро-кизё, пудо вордо, жингыр-жингыр выль юртъёс ӝуто. Нош юмшан дыръёсы яке огшоры пукон ӝытъёсы гуртын чузъясько туж ӝож но мур пуштросо аспӧртэм гуръёс. Отын адями аслэсьтыз улонзэ вера, куддыр бӧрдыса но.

 

Чузъяське бесерман крезь, экран вылын возьматоно бесерманъёслэн улонзы сярысь туспуктэмъёсты.

 

Михаил Федотов вордскиз 7-тӥ октябре 1958-тӥ арын Яр ёросысь Ворца гуртысь бесермян семьяын. Нокин соку ӧз тоды, дунне вылэ ас калыксэ данъяса гожъясь адями вордскиз шуыса. Будӥз, шудылӥз, дышетскиз мукет пиналъёс сямен ик. Инкуазьлэн пӧртэм суредъёсыз, котырысь гурт калыкезлэн улон-вылонэз, солэн сямъёсыз пинал дыръяз ик мур пыремын вал Мишалэн сюлэмаз...

 

(М. Федотовлэн улонэз сярысь вераку, возьматоно туспуктэмъёсты)

 

Анаезлэн верамезъя, Миша пичи дырысен ик кылбур гожъян борды кыстӥське вылэм. Кезьыт гур вылын, пе, лушкем йӧндыртылэ вал. 8-тӥ классын дышетскыкуз, Миша нырысьсэ гожъямзэ келям «Дась лу!» газетэ. Сое синйылтэм Флор Васильев. Школаязы ик тодмо кылбурчи Мишалэн ужезлы дунъет сётэ - солы книгазэ кузьма. Пияш со дырысен гожъянэныз ӧвӧл ини люкиськылэм.

 

Кинлэсь меда, дышетӥсезлэсь-а, оло бускель пересьсылэсь-а, оло соизлэсь но, таизлэсь но пичи Миши бесерман калык сярысь мадёнэз кылэм.

 

Мынэ инсценировка. Шудо: ведущий, Миша Федотов пичи дыръяз, Иван - солэн атаез.

 

Улэм-вылэм вашкала аръёсы туж чебер но веськрес, кужмо но таза, визьмо но йӧно бесерман калык. Улӥз со Алтай гурезьёс котырын. Та чебер но узыр калыклы ачиз Чингизхан синмаськем. Дуннеез киултыны малпаса, бесерман калык пӧлысь аслыз азьветлӥсь ожгарчиосты бырйылэм. Куд-огез туж кужмо батыръёс луиллям. Берлогес ни хан Батый та кышкасьтэм калыкез копаксэ войсколэн азьпал радаз султытэм. Кыӵе ке карез пазьгоно ке, нырысь ик бесерман калыкез ожгарчиосыз азьын пудо уллёен ӵош урысэн жугыса валтытъям. Туж, туж трос бесерман калык соку бырем. Улэп кылемъёсыз гинэ Кам котыре кылиллям вылэм. Но отын но та шудтэм калыклы улыны ӧвӧл сётӥллям - весь пыдло но пыдло нюлэсъёсы улляллям. Кир-пазь луэмъёс гинэ Удмурт шаере вуиллям. Мур гуос гудӟыса, музъемын улӥллям.

 

- Озьыен, бесерман выжы музъем пушкы ышемын, - курекъя пияш.

 

Пичи Миши корт лопатка кутэм но Лекма шур дурысьтызы тэле мынэм. Пичигес вырйылэз адӟем но кутскем уг сое копаны! - Тингыль-тангыль вазись скал гырлыосты ик ӧвӧл кылэм. Атаез скал уллёез гуртэ тубытэ вылэм, малпамтэ шорысь пизэ адӟем:

 

- Пие, тон-а? Ой, куалектытӥд! Мар озьы дауртӥськод?

 

Миши маке вераны вырем но, атаез валамтэ.

 

- Ошмессин утчаськод-а, пие?

 

- Уг, мон соосты, атай, выжыосты...

 

- Кыӵе выжыосты? - кушерскем атаез.

 

- Ма, музъем пушкы ышем выжыосмес...

 

Мишалэн атаез, Иван агай, соку гинэ пештырскем йырсиоссэ вить чиньыосыныз сыналтыса серектэм:

 

- Э-э, пие, тон тӥни соос сярысь–а, бесерманъёс сярысь юад. Миши йырыныз гинэ шоналтэм.

 

- Малы тыныд бесерман выжыос кулэ луизы на, пие? - юам Иван агай.

 

- Мон ноку но со выжыез ӧй адӟы на, атай, - лякытэн шуэм Миши.

 

- Мон но, пие, та ӵоже ултозям ӧй адӟылы на, - мур лулӟем Иван агай.

 

Малы соку, атай, бесерман выжыосмес ӧд утча, малы музъемез ӧд гудӟа? - юам пияш.

 

- Утчаны уг луы вал, пие, малпаны гинэ но уг луы вал, - отчы-татчы чакласькыса верам Иван агай. - Ойдо, пие, бер ини.

 

- Ӵуказе мон нош ик лыкто татчы, я, атай, - шуэм пияш. - Лыкто но туж мур копало.

 

- Эн ветлы, Мишуня, кылзы монэ, эн... тон табрезэ удмурт ни. Эн утча ни бесерман выжыдэ. Кылзы пересьтэ.

 

- Малы тон, атай, азьлогес ик мыным асьме выжыосмы сярысь ӧд вералля? Верасал ке, мон кемалась соосты утчасал, туж мур гу копасал но шедьтысал. Мон таки ӧтё выжы калыкмес, - пияш алигес гудэм вылаз уськытскем. - Мон татын! Лыктэ! Потэ! Мон мӧзмисько тӥлесьтыд. Мыным мон кадь ик эш кулэ, - Миши гудӟемаз йырзэ донгыса кесяськем. Нокыӵе куара-ланга Миши ӧвӧл кылэм. Ӟозъёс гинэ ӟозгытӥллям. Бесерман выжыос куаразэс ӧвӧл сётӥллям.

 

Оло та дырысен Михаил Федотов зэмос ик кутскем выжыоссэ утчаны: кылбуръёс, поэмаос гожъяны, бесерман кылбугор дасяны. Со Венгрие но ветлэм - бесерман калык доры...

 

«Мон уг турттӥськы бесерманъёс сярысь йылысеныз пумозяз мадьыны, - вера вал Михаил Федотов. - Кинъёс соос, кытысь потэмын? Та юанъёслы шонер валэктон сётыны али уггес луы на. Бесермянъёслэн кыӵе выжыысь потэмзы пумысен гинэ тодосчиос даурлэсь кема ченгешо ини. Юанъёс бугор выллем бинисько, кылдо выль но выль ужпумъёс, соосты огкутскемен уд сэртты. Мынам али вераме потэ та калыклэн лулыз, кыӵе дуннеын улэмез сярысь. Секыт но валантэм югдуре сюремын со. Кытын сюреслэн йылыз - али шуг валэктыны».

 

Аслыз гинэ тупась куараё вылэмзэ Федотов тужгес яркыт возьматӥз нырысетӥ сборниказ «Тӧдьы юсьёс берто» - со калыке вуиз 1986 арын, кыкетӥез - «Берекет», 1988-тӥ арын. Бӧрсяз ик потӥз куинетӥ сборникез - «Вӧсь». Кылбуръёсыз пачылмемын пӧртэм малпанъёсын: отын вордӥськем шаердэ гажан мылкыд, инкуазез утён, ӟеч ужез сюлмысь гажан, анай-атайзэ вылӥе ӝутон-яратон.

 

Михаил Федотовлэн атаез дышетӥсь вал. Глазов педтехникумез быдэстыса, война кускытозь, Кычино гуртысь начальной школаен кивалтӥз. Татысен ик сое войнае басьтӥзы. Быдӟым Отечественной войнаысь сӧсырмыса бертӥз 1943-тӥ арын. Со вакыт яратонэз, собере кышноез, Матрена Алексеевна вордскем гуртазы, Ворцаын совхозын ужалляз. Бӧрысьгес сое Ижкаре военной заводэ келязы. Ворца гуртазы огазьын улыны кутскизы война бырыса гинэ.

 

Михаил Федотов аслыз атаезлэсь профессизэ ик быръёно кариськиз - тодон-валанъёссэ муромытӥз Удмурт Элькунмылэн шоркараз — Удмурт университетлэн филология факультетаз. Сое быдтэм бере 1981-тӥ арысен Михаил Иванович мыло-кыдо тыршиз Удмурт научно-исследовательской институтын. Татын со эскериз бесерман кылэз, рос-прос тыршиз ас калыкезлы нимысьтыз кылбугор-словарь дасян бордын. Нош та ужзэ быдэстыны ӧз учыра...

 

Экран вылын возьматоно фотографиосты.

 

«Мон яратылӥ вераськылыны Педор зазаеным. Мискинь адями, со губрес вордскемын вал, нош ӧлексы луэмзэ нокин но ӧз шӧдылы. Пиосмурт огназ гинэ бесерман крезез нёжъяны быгатылӥз. Зыл-зыл кырӟалоз вал, верано кылъёссэ соку ик йырысьтыз малпаса».

 

Чузъяське бесерман крезь.

 

1938-тӥ арозь бесерманъёс нимаз калыкен лыдъяськизы. Соослэн огъя лыдӟы 10 сюрс пала вал. 1937-тӥ арын асьме кунамы Всесоюзной перепись ортчиз. Со бордын тыршем адямиос быдэстэм ужзэс И. В. Сталинлы возьматӥзы. Бадӟым кивалтӥсьлы ӧз яра перепись дыръя лыдэ басьтэм калыкъёслэн списоксы. Солэн малпамезъя, пичи выжы калыкъёс отын луыны кулэ ӧй вал: соос огазеяськозы но азьланяз одӥг бадӟым выжы кылдытозы. Всесоюзной переписья йылпумъянъёс лэсьтэмын вал 1939-тӥ арын гинэ, бесерманъёс со списокын таяз учыре ӧй вал ни, соос пыризы удмуртъёс пӧлы, асьсэлэсь статуссэс пыраклы ыштыса. Бесерманъёсын ӵош ик списокысь ӵушемын вал ог сю пала мукет пичи лыдъем калыкъёс но. Озьы огкутскемен, тӥрен ӵогыса сямен, выжытэм быдтэмын но сурамын вал эрикез гажась, но сое утьыны быгатӥсьтэм калык выжыос.

 

Озьы дантэм йылпумъяськиз бесерманъёслэн сюрс аръёс пыр ортчем историзы. Бесерманъёс удмуртьёсын сураськыны ӧз дыртэ, соос котьку но улӥзы нимаз гуртъёсын яке бигеръёсын ӵош (али бесерман выжыос интыяськемын ог 60 пала гуртъёсын). Пересьёс юн возизы сямъёссэс, егит-чеберзэс кадь утизы лул узырлыксэс. Сыӵе мылкыд пыӵатылӥзы егитъёслы но. Нош уката кужмогес инъет луиз выжыез шӧдон. Со ик утьыны быгатӥз быдэс калыкез. Бесерманъёс асьсэ нимзэс ӧз ыштэ, сое котьку сюлмазы возизы.

 

Ӧз кылды егит поэтлы трос аслаз калыкез сярысь вераны. Туж вазь кошкиз сопал дуннее. Дор музъемез, вордэм мумиз-бубиз кадь, уте ини кылбурчизэ 13 ар ӵоже. Туэ солы тырмысал 50 гинэ...

 

Аслаз сайкыт куараеныз, чылкыт гожъяськон манереныз, юзмыт мылкыдо чуръёсыныз удмурт кылбурчиослэн радазы йыг-йыг султӥз вал Михаил Федотов.

 

Чузъяське бесерман крезь, портретэз экран вылын.

 

«Мынам бесерман сюлэмам ялан чузъяське пересь зазаелэн боз-боз куараен кырӟам крезез. Со бугыртэ монэ, малпаськытэ калыкелэн ӵуказе нуналэз сярысь, ӧте выль инвисъёсы...»

 

Уже кутэм литература:

 

Федотов М. И. Мон бесерман // Инвожо. -1991. - № 12.

 

Белых В. М. Федотовлэн тусбуйыз // Инвожо. - 1999. - № 1,2. - С. 2.

 

Федотов М. И. Кинъёс тӥ, бесерманъёс // Кизили. - 1990. - № 11.

 

Трефилов В. Бесермянский пульсар // Сельская правда. - 2003. - 7 окт.

 

Урасинова А. Зӧк бесермян пи // Иднакар. - 1996. - 29 окт.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru