Версия для слабовидящих

Ӟеч нимдэ тынэсьтыд калыкын данъяло

Название материала: Ӟеч нимдэ тынэсьтыд калыкын данъяло (Шкляева-Волкова А. В. вордӥськем дырысен 100 ар тырмонлы сӥзем тодэ ваён ӝыт)

 

Содержание:

Сцена чеберматэмын. Солэн урдэсаз лэсьтэмын адӟытон.

 

Лэземын «Гори, гори, моя звезда» фонограмма.

 

1-тӥ нуись: Ӟечбуресь, гажано эшъёс! Гурт калык! Лыктэм куноос!

 

2-тӥ нуись: Шулдыр ӝытэн тӥледыз!

 

1-тӥ нуись: Удмуртия! Пичи гинэ инты басьтэ со бадӟым Россимылэн карта вылаз. Татысен жильыртыса

кутско бадӟым шуръёс: Кама но Вятка. Трос ошмесъёс чагыр синъёссэс усьто татын. Куд-ог интыосаз шаермы бусыё, ӵошкыт, нош мукетъёсаз, Урал гурезьёс матынэн, вырйыло, гурезё.

 

2-тӥ нуись: Пичи гурт, Малый Кармыж но шуо та гуртэз, Пельга но, Чашкашур но шуо, Умегйыл но. Сылэ со вырйыло интыын. Гуртэз шори люке Умег шур. Та пичи гурт асьме шаермылэн историяз аслэсьтыз пытьызэ кельтӥз. Татын 1908-тӥ арын 21-тӥ коньывуонэ вордӥськиз удмурт нылаш Анастасия Васильевна Волкова-Шкляева - пичи гурт вадьсын ӝуатскиз выль кизили.

 

1-тӥ нуись: Туннэ, асьме ёросысь потэм артисткалэсь Анастасия Васильевналэсь вордӥськем нуналзэ пусйыса, тодамы ваёмы улэм-вылэмзэ, данъяськомы солэн уженыз, талантэныз. Туэ солы тырмысал ини 100 арес.

 

2-тӥ нуись: Пичи гуртсэ Умегйыл шуэмзы туж яралляз Насьтӥлы.

 

1-тӥ нуись: Нош али Флор Васильевлэсь «Тӥ ветлӥды-а ми пала» кылбурзэ лыдӟозы Нынек школаысь 10-тӥ классын дышетскисьёс. Та кылбур тупа котькуд удмурт гуртлы.

 

Тӥ ветлӥды-а ми пала?

Ӧд ке ветлэ, лыктэлэ.

Вань шулдырзэ гуртмылэсь

Тӥ лыктэлэ но учкылэ.

Шур дуре ке васькиды,

Чебер ӧрзэ тӥ адӟоды,

Юзмыт вулы шумпотыса,

Шурын пыласькылэ шунды.

Нош нюлэскы ке мынӥды,

Синды мальдоз чеберезлы.

Горд намерез ке сииды,

Тӥ паймоды ческытэзлы.

Тӥ ветлӥды-а ми пала?

Ӧд на ке ветлэ, лыктэлэ

Палъёсмылы синмаськыса,

Татысь ноку но уд кошкелэ.

 

2-тӥ нуись: Улонысь читыр-чутыр гожъёссэ-сюресъёссэ нокызьы но ноку уд вала, дыр. Небыт валем ковёр ӧвӧл уг со. Мае гинэ пумитано уг луы вамышлы быдэ: ӝужытэсь вырйылъёсты но, муресь нюк-гопъёсты но. Шока улон сопала но, тапала но. Уд но тоды, мар луоз ӵуказе. Улон кызьы но уг куаса адямиез. Котыр ласянь, пӧртэм сямен.

 

1-тӥ нуись: Озьы ик куасаз улон Анастасия Васильевнаез но.

 

2-тӥ нуись: Куать арескысен со анайтэк но атайтэк кылем. Анаез висьыса кулэм бере пичи Насьтӥ улэм Исак ӵужатаеныз, ӵужанаеныз, Педя ӵужмуртэныз но солэн кышноеныз. Ӵужатаез но Педя ӵужмуртэз кулэм бере кенаксэс улляса, юртазы Николай ӵужмуртэз аслаз семьяеныз улыны лыктэм. Пичи Насьтӥлы урод нуналъёс вуиллям. Анна кенакезлэн нылпиез вордӥськем бере сое школае но ӧз ни лэзьялэ. Пумитъяськемез понна мурӝолэ но пытсаллязы.

 

2-тӥ нуись: Насьтӥлэн сюлэмаз соос уно веньёс мертчытыса кельтӥзы. Уго пичи нылэз ӧз жаляллялэ.

 

1-тӥ нуись: Вуиз сютэм 1921-тӥ ар. Пичи Насьтӥез мултэс ым каремзэс адӟыса, аслэсьтыз лябӟемзэ шӧдыса, ӵужатаез сое Поршурысь нылпи юртэ келяз.

 

2-тӥ нуись: Соку нылпи юртын но кӧттыр улон вылымтэ. 1922-тӥ арын, оштолэзьлэн пумаз, нылпиосты Украинае но Белоруссие - нянё интыосы - келяны поттӥзы. Озьы 14 аресъем Насьтӥ вуэ кыдёкысь Белоруссиысь Гомель городэ. Кин но ӧй вал со отын! Выж но дӥсь миськись, пудо сюдӥсь, пичи нылпиосты утись, бакчаын ужась.

Ньыль ар ӵоже уно синкылизэ кисьтэм удмурт нылаш палэнын.

 

1-тӥ нуись:

Ньыль ар ӵоже мон весь ужай,

Ӧй жаля кужымме.

Мон бертонме гинэ малпай,

Вити со нуналме.

Мон весь малпанъёсам

Юрттӥ кадь анайлы,

Уйвӧтъёсам но мон ужай,

Ялан юрттӥ солы.

Мон бертонлы гинэ оски,

Вити со нуналме.

Пинал сюлмын ик мон шӧдӥ

Секыт ужлэсь шӧмзэ.

 

2-тӥ нуись: Секыт ке но вал улонэз, ужез, уг вунэты вал со удмурт кылзэ, удмурт кырӟанъёссэ. Кытӥяз, ужакуз но кырӟалля вал. Таӵе ӝожъёсыз но кырӟанъёсыз вал, дыр.

 

1-тӥ нуись: Нынек клубысь нылкышно ансамбль кырӟалоз Ашальчи Окилэн кылъёсызъя «Лулы мынам» кырӟанэз.

 

2-тӥ нуись: Шуг-секытъёсты вормыны юрттӥз улонэз мур гажамез, вордскем шаерзэ яратэмез. Малпаны ик шуг, кин луысал анайтэк-атайтэк кылем, сютэм улонэз пырпотэм Анастасия Васильевна, солы ӧй ке пумиськылысалзы ӟеч сюлэмо адямиос. Сыӵе адямиос ик юрттӥзы солы вордскем шаераз берытскыны. Николай ӵужмуртэз но пумит ӧз луы гуртэ бертэмезлы.

 

1-тӥ нуись: Михаил Покчи-Петровлэн «Куке поезд вуттэ вордӥськем палъёсы» кылбурысьтыз геройлэн сямен ик сюлмыз дыртӥз дыр пичи Насьтӥлэн дор палъёсаз.

 

Али кылзыны дэмласьком та кылбурез.

 

Сюлэм, я кытчы дыртӥськод,

Кинэн адӟиськемед потӥз?

Малы тазьы весь учкисько

Усьтэм вагон укноетӥ?

Эх, дырты, дырты, поездэ,

Ӟечесь-буресь вордскем палъёс!

Эх, пумиталэ тӥ нылдэс!

Тодмо лудъёс, шуръёс, тэльёс!

Тол суралля сьӧд йырсиме,

Бамам небыт кизэ йӧттэ.

Оло, нылыз берытскемен,

Вордскем музъем но шумпотэ?

Тани соос - тодмо лудъёс -

Вӧзтӥ йыбыртъяса кылё.

Тӧдьы кызьпу арамаос

Куаренызы кичабыло.

Эх, дырты, дырты, поездэ,

Ӟечесь-буресь, вордскем палъёс!

Эх, пумиталэ тӥ нылдэс,

Тодмо лудъёс, шуръёс, тэльёс!

 

2-тӥ нуись: Гуртаз Анастасия Васильевна вуиз 1925-тӥ арын. Дораз вуэм нылэз синйылтӥз дышетӥсь Василий Хрисанович Мокеев: улон сэрег висъяз, дышетскыны юрттӥз.

 

1-тӥ нуись: Анастасия Васильевна Казаньын рабфакын дышетскиз. Отын дышетскисьёс, Октябрьской революцилы сӥзьыса, «Бугыръяськисьёс» спектакль пуктӥзы. Насьтӥлэн отын шудэмез вань эшъёсызлы кельшиз. Соос одӥг ымысь сямен веразы: тыныд одно ик театрын шудыны кулэ.

 

Туж уно шуг-секытъёсты вормыса, Анастасия Васильевна быдтӥз Ижевскысь театральной курсъёсыз. Собере Москваысь театральной искусствоя техникумын дышетскиз.

 

2-тӥ нуись: Театре со вуиз вылӥ быгатонлыкен артист луыса 1933-тӥ арын 8-тӥ оштолэзе. Удмурт театрын соку ик рольёс борды кутскемез ӧз луы. Со аре театре трос егитъёсты уже кутӥзы.

Ваньмыз сямен соос самодеятельностьысь басьтэмын вал. Егит артистъёсты театр искусстволы нимысьтыз дышетоно луиз. Соосты умой вераськыны дышетон бордысен ик кутскиз Анастасия Васильевналэн театрын ужез.

 

1-тӥ нуись: Туж чебер, инмысь лэзиськем нылмурт кадь, потӥз Москваысь вуэм артистка гуртысь лыктэм нылъёслы но пиослы. «Ӵуж йырсиез ваё пунэмын, мугорыз веськрес, нош вераське кыӵе вольыт, кӧня ӝогверанъёсты пулемёт кадь шаплы вера. Киосыныз мултэс уг шона, тыбырзэ уг губырты, йырзэ возьдаськыса мӧля вылаз уг лэзьы» - пушсы тырыса со сярысь тазьы вераллязы Васса Виноградова, Василий Гаврилов но трос мукет пинал дырысенызы Анастасия Васильевна вӧзын ужам артистъёс.

 

2-тӥ нуись: Мукетъёссэ дышетонъяз, аслэсьтыз ужзэ но ӧз вунэты. Нырысетӥ ролез - «Кезьыт ошмесысь» Бӧдёно луиз. Со дырысен уно авторъёслэн пьесаосысьтызы рольёс шудэмын: Островскийлэн «Грозаысьтыз» - Кабаниха, Михаил Петровлэн «Зӥбет зурка» пьесаысьтыз Дукъя, Гальдонинлэн «Хозяйка гостиницы» пьесаысьтыз Мирандолина, Садовниковлэн «Тыло вӧсь» пьесаысьтыз Дыды. Тужгес но мылысь-кыдысь со шудылӥз Игнатий Гавриловлэн пьесаосызъя пуктэм спектакльёсын. Кыкназы ик соос, Анастасия Васильевна но Игнатий Гаврилович, улытозязы тыршизы удмурт калыклэсь культуразэ ӝутон бордын. Дано артистка Игнатий Гавриловлэн гожтэм пьесаеныз тубӥз удмурт сцена вылэ, васькиз но солэн пьесаяз шудыса. Одӥгез понна туж сюлмыз бӧрдэ вал: малы меда Игнатий Гавриловлэсь нимзэ театрлы уг сёто?

 

1-тӥ нуись: Игнатий Гаврилов, пиналысен удмурт театрен герӟаськыса, вань улонзэ сӥзиз удмурт театр искусствоез но литератураез азинтонлы. Удмурт театр Игнатий Гавриловлэн пьесаосызъя арлы быдэ кык-куинь спектакль пуктылӥз. Ваньзэ-ӧвӧлзэ драматург ньыльдонлэсь ятыр пьеса гожтӥз. Куамынэтӥ-ньыльдонэтӥ аръёсы Удмурт театр Игнатий Гавриловлэн театрез вал.

 

2-тӥ нуись: Анастасия Васильевналы Игнатий Гавриловлэн творчествоез, солэн кылъёсызъя гожъям кырӟанъёс кельшылӥзы. Дэмласькомы кылзыны «Гожтэт» кырӟанэз. Тӥ понна кырӟалоз Нынекысь нылкышно ансамбль.

 

1-тӥ нуись: Иван Еремеевлы сӥзем «Выль чуръёс мон дасяй» кылбур возьматэ кадь Анастасия Васильевналэсь улонзэ. Та кылбурез тӥ понна лыдӟоз 11-тӥ классын дышетскись.

 

Бубыли кадь чебер ӵуж куаръёс

Зӥр котыр бергаса усьыло,

Кемалась ортчылэм нуналъёс

Тани нош ик тодэ лыктыло.

Тани шим-шим кылем Вало ӧр,

Сьӧдэктэм но лапкам казна тэль.

Возь вылэз пылатэ кезьыт зор,

Нюлэс сьӧсь кадь вузэ сӥзьыл тол.

Кӧня ар та тодмо азьёстӥ

Гужем мон турнай бӧрдыса,

Нош берло сюлоен та палтӥ

Бызьылӥ, пудоез возьмаса.

Ой, мискинь сирота нылпилы

Туж секыт но курыт вал соку.

Лушкемен пиньёсме куртчылӥ,

Гужембыт возь вылын турнаку.

Мон азьло улонме вал каргась,

Ӝож кылем сирота, гурт ляльчи,

Табере улонме мон гажась,

Выль ӝужась, выль удмурт артист.

 

2-тӥ нуись: Театр - вашкала дыръёсы кылдэм искусство. Уно дауръёс ӵоже театр трос визь-нод люказ, солэн аслаз историез кылдӥз. Малы кулэ театр? Малы асьмеос артистъёслэсь шудэмзэс яратыса но шумпотыса учкиськомы?

 

1-тӥ нуись: Нырысь ик, театр асьмелы шумпотон вае, визь-нод сётэ. Асьмемын со соглаш но луэ, куддыр споръяське но, малпаськонэ но вуттэ. Театрын асьмеос бадӟыматӥсь пияла пыр сямен улонэз адӟиськом, театр зэмлыкез валаны юрттэ. Театр адямилэсь творческой мылкыдзэ улӟытэ; улон, вапум, ачиз сярысь малпаськонэ вуттэ. Пырак улонлы со - эш но дышетӥсь.

 

2-тӥ нуись: Театр, театр, шуиськом. Нош театрын артистъёс ужало ук. Соос вутто калык доры культураез. Соос юртто театрлы будыны, азинскыны. Ӟырдыт сюлэмо, чылкыт сямо, мыло-кыдо шудэменызы соос учкисьёслэсь мылкыдзэс бугырто.

 

1-тӥ нуись: Озьы ик тыршиз Анастасия Васильевна но. Рольёсаз вань сюлэм шунытсэ сётыса шудӥз со сцена вылын. Тодманы луонтэм воштӥське вал со рольёсаз. Чылкак вунэтэ вал, сцена вылын

шудэ шуыса, ваньмыз зэмос улонын ортче кадь потэ вал солы. Героиняосызлэсь малпанъёссэс но куректонзэс пушкытӥз поттыса шудӥз. Аслаз тодэ ваёнъёсаз Михаил Петровлэн «Зӥбет зурка» пьесаысьтыз Дукъялэсь рользэ шудэмез сярысь тазьы гожъяз: «Дукъялэсь уг, аслэсьтым пиме солдатэ келясько кадь, мон ачим огнам йырын кылисько кадь потӥсько. Соин ик шудыкум эриктэм синвуосы пызьырало куддыр».

 

2-тӥ нуись: Сыӵе ик вал со улонын но - адямиосты гажась, соос понна сюлмаськись кышномурт, улонлэсь шорсюлэмзэ валась адями. Кык пиоссэ пичи дырысенызы ватэменыз, Анастасия Васильевна вань яратонзэ, лул-сюлэмзэ поныса будэтӥз Галя нылзэ.

 

(Чузъяське «Тонтэк кин-о мон?» кырӟан. Кылъёсыз К. Ломагинлэн, крезьгурез П. Кузнецовлэн. Кырӟа Н. И. Старкова)

 

1-тӥ нуись: Туннэ асьме дорын куноын Анастасия Васильевналэн нылыз Галина Филипповна, ӵыжы-выжыосыз, гуртоосыз но асьме удмурт гожъясьёсмы. Куриськомы, тӥледыз, Галина Филипповна сцена вылэ.

 

2-тӥ нуись: Гажано Галина Филипповна, гажано ӵыжы-выжыосыз, гажано гуртоос, туж тодэммы потэ Анастасия Васильевна сярысь: кыӵе адями вал со? Кыӵе артист? Кыӵе анай? Кыӵе ӵужанай? Нырысь кыл сётӥськомы тӥледлы, Галина Филипповна, кӧня ке вералэ анайды сярысь.

 

(Галина Филипповна вераське)

 

1-тӥ нуись: Галина Филипповна! Туж бадӟым тау тӥледлы ми доры лыктэмды понна. Тӥляд вордӥськем нуналды анаеныды одӥг нуналэ. Ӟечкыласькомы тӥледыз вордӥськем нуналэныды. Сӥзиськомы юн тазалык, шудо-буро улон но выль азинсконъёс. Тӥледлы кузьым - кырӟан «Удмурт нылкышно». Кылъёсыз Л. Тихоновалэн, крезьгурез Е. Антоновалэн. Кырӟалоз Нынек культура юртын ужась Иван Смолин.

 

(Собере кыл сётоно мукет лыктэм куноослы)

 

2-тӥ нуись: Гажано куноос! Туж бадӟым тау ваньдылы. Дано гожъясьёсмылы Можга улосвылмес вунэтымтэзы понна. Гурт калыклы шуныт но ӟеч пумитамез понна, удмуртлыкмес гажамез понна, аслэсьтыз дано нылызлэсь нимзэ утьыса воземез понна. Тӥледлы, Галина Филипповна но Анастасия Васильевналэн ӵыжы-выжыосыз, лыктыны мылкыд каремды понна. Азьланяз но мед луозы выль пумиськонъес.

 

1-тӥ нуись: Али учкыны дэмласькомы Анастасия Васильевналэн творчествоезлы сӥзем ӝытмес йылпумъян концерт. Тӥледыз гажаса но ӟечкыласа, шудбуро улон, тазалык сӥзьыса, ас быгатэмзэс возьматозы Нынекысь артистъёс но крезьгуръя центрын ужасьёс.

 

2-тӥ нуись: Дано артистмылы сӥзем ӝытмы йылпумъяськиз. Анастасия Васильевналы туж кельше вал ӟуч романс «Гори, гори, моя звезда». Та романсэн ми тӥледын люкиськиськом. Тау ваньдылы, ӟеч луэ!

 

Дасяз Бурина Н. Д. Можга ёрос библиотекаысь ОИЕФ отделэн кивалтӥсь.

Яндекс.Метрика

Возник вопрос?

Будем рады вам помочь
Подробнее

Позвонить
Написать

Skype: unatlib.org.ru